YOHANE 8

1Yesu naye akatonga he ntuvi ya Mizeituni. 2Chaheyavo hekinache akaingia wa he nyumba ya mtaso, vantu vose vakamswia, naye akaikaa si na kuvacheja. 3Vaandiki na Vafarisayo vakamwetie mche egurirwe ekishinda, vakamvika aho ghati. 4Vakamti, “Mcheji, mche uu egurirwe hala ekishinda. 5He myomongwa, vache sa ava Mose etuazere kuvabigha mabwe; we nawe uti ze?” 6Navo vetetie huvo kwa kumghesha, nesa vavone cha kumrengekia. Mira Yesu akakodeka akaandika hala si na kichaa chakwe. 7Vekizika kumvwijisha, akavusha meso, akavati, “Ula esina mabanu ghati henyu navoke kumvirita ibwe.” 8Akakodeka kangi, akaandika hala si na kichaa chakwe. 9Navo vekinasikie, madunganyo avo akavalaha, vakafuma mmwe mmwe, kuvokia vaghosi mhaka wakukenjija; Yesu akashighwa ye mwenye, na ula mche eimuke hala ghati. 10Yesu akarongeka, asivone mntu ungi esire ula mche, akamti, “We mche, vala vekusitaka veohi? Tehena ekulahie iti una nzune?” 11Akamti, “Mfumwa, tehena.” Yesu akamti, “Nami sikakulahe; kutongire, mira usironge mabanu kangi.”]

Kianga cha si ii

12Niho Yesu akavavwira kangi akati, “Mi nimi kianga cha si ii, ye eniratera tekatonge he kija narini, mira eneketa kianga cha nkalamo.” 13Niho Vafarisayo vakamti, “We ukutetia vuonwa mwenye; vuonwa vwako si vwa idi.” 14Yesu akagharusha, akavati, “Mi nziaho nikutetia vuonwa mwenye, vuonwa vwangu ni vwa idi; ambu nemanyije hantu nefuma na hantu netonga; mira unywi temumanyije hantu nefuma neri hantu netonga. 15Unywi mulaha kuraterija vya kimwiri; mi silaha mntu. 16Nami kakicha nalaha, mlaho wangu ni wa idi; ambu mi simi mwenye, mira nimi hamwe na ula enitumie. 17Kangi he myomo yenyu heandikwe iti, Vuonwa vwa vantu veri ni vwa idi. 18Mi nimi nekutetia vuonwa mwenye, ne Vava enitumie enitetia vuonwa.” 19Niho vakamti, “Vaveo eohi?” Yesu akagharusha, “Mi temunimanyije, neri Vava wangu temummanyije; nanga mwekinimanyije mi, mwekirammanya ne Vava wangu.” 20Viteto ivyo evitetie aho ekicheja he nyumba ya mtaso, he sanduku ya ndungu; neri tehena mntu emgurire, ambu saa yakwe yasanafika.

Machundwe a mlaho weneza

21Niho akavavwira wa “Mi nitonga, na unywi munenienda; na unywi munefwia he mabanu enyu; hantu mi netonga unywi temuidima kuza.” 22Vayuda vakati, “Hamao, enetakukoma!” Kila eti, “Hantu mi netonga unywi temuidima kuza?” 23Akavati, “Unywi mu va aha si, mi ni wa uko wanga; unywi mu va he si ii, mi si wa he si ii. 24Nicho nemuti, Munefwia he mabanu enyu; ambu mwekisaitikija iti nimi Ye, munefwia he mabanu enyu.” 25Niho vakamti, “We u muni?” Yesu akavati, “Nire icho nemuvwirire too aho. 26Nina vijinki vya kuteta na vya kumulaha; mira ula enitumie ni wa idi, nami vila nevisikie he Ye nivyo neviteta he si ii.” 27Neri tevetwarije iti evalangia Vava. 28Niho Yesu akavati, “Mwekinekenja kumkweja Mwana wa Mntu, niho mwenemanya iti nimi Ye; na iti sironga mburi he mikundire yangu, mira sa vuntu Vava enichejije nivwo vuntu neteta. 29Na ula enitumie e hamwe nami; tenishighie mwenye; ambu misi yose nironga vila vyemwizihira.” 30Aho ekiteta ivyo vajinki vakamwitikija.

Vayuda vekanana ne Yesu

31Niho Yesu akavati vala Vayuda vemwitikije, “Unywi mwekiikaa he kiteto changu mwaoka varateri vangu kweri; 32kangi munemanya idi, na iyo idi inemukombola.” 33Vakamgharusha, “Uswi tu lukolo lwakwe Abrahamu, neri tetunaoka vazoro va mntu narini; we uti ze, ‘Munekombolwa?’” 34Yesu akavagharusha, “Kididi, kididi, nimutio, Ula eronga mabanu ni mzoro wa mabanu. 35Neri mzoro teikaa kaa misi yose; mwana eikaa kae na kae. 36Kakicha Mwana ekimukombola, mwakombolwa kweri. 37Nemumanyije iti unywi mu lukolo lwakwe Abrahamu; mira muenda kunikoma nihala kiteto changu chesiho he unywi. 38Vila nevivonie he Vava nivyo neviteta; na unywi nirehuvo vila mwevisikie he vava wenyu nivyo mwevironga.” 39Vakagharusha, vakamti, “Vava wetu ni Abrahamu”! Yesu akavati, “Nanga mweki vana vakwe Abrahamu mwekironga ndima jakwe Abrahamu. 40Mira iki muenda kunikoma, mi mntu nemuvwirire idi nesikie ha Mrungu. Abrahamu teketie huvo. 41Unywi muronga ndima ja vava wenyu.” Niho vakamti, “Uswi tetumoghiwe kwa mashindo; uswi tuna Vava mmwe eye Mrungu.” 42Yesu akavati, “Kakicha Mrungu neki Vava wenyu mwekinikunda mi; ambu nefumie he Mrungu, nikaza; neri sikuzire mi mwenye, mira ye niye enitumie. 43Hanini mwesitwarija ivyo neteta? Ni hala unywi mwesiidima kusikia kiteto changu. 44Unywi mu vana va vava wenyu Shetani, na tama ja vava wenyu nijo mwekunda kujiketa. Ye neki mkomi too kuvoka; neri teimuke he idi, ambu heye tehena iyo idi. Ekiketa mongo eteta vila e vyakwe mwenye; ambu ye ni mmongo na vava wawo. 45Nami kila neteta vila e vya idi temuniitikija. 46Ni ani he unywi enikonesha iti nina mabanu? Nami nekiteta idi hanini mwesiniitikija? 47Ye e wa Mrungu esikia viteto vya Mrungu; heicho unywi temuvisikia, ambu temu va Mrungu.”

48Vayuda vakagharusha, vakamti, “H’ii! tetuteta nezo twekiti we u Msamaria, kangi una mpepo?” 49Yesu akagharusha, “Mi sina mpepo; mira mi nimshimia Vava wangu, na unywi munikondia shima yangu. 50Neri mi sienda ngazo yangu; hena ye eienda na kulaha. 51Kididi, kididi, nimutio, ‘Mntu ekigurisha kiteto changu tekavone kifwa neri kae na kae.’” 52Niho Vayuda vemti, “Iki twamanya iti una mpepo. Abrahamu efwie na varoti vefwie, nawe uti, ‘Mntu ekigurisha kiteto changu tekavone kifwa neri kae na kae;’ 53we u m’baha kumkela vava wetu Abrahamu efwie? Na varoti vefwie! Ukughosha ani?” 54Yesu akagharusha, “Nekikukaza mwenye ngazo yangu si kintu; enikaza ni Vava wangu, eye unywi mweti ni Mrungu wenyu. 55Neri unywi temummanyije; mira mi nimmanyyije. Nekiti iti simmanyije, nioka mmongo sa unywi; mira nemmanyije, na kiteto chakwe nekigurishe. 56Abrahamu, vava wenyu, eking’arire vuntu enezavona msi wangu; naye akauvona, akaizihirwa.” 57Niho Vayuda vakamti, “We tunakolosha miaka makumi masano, nawe wamvona Abrahamu?” 58Yesu akavati, “Kididi, kididi, nimutio, Abrahamu esinaoka, mi nekireho.” 59Niho vetoa mabwe nesa vamvirite; mira Yesu akakuvisa, akafuma he nyumba ya mtaso.

Currently Selected:

YOHANE 8: CHSUNT67

Highlight

Copy