YOHANE 12

Maria wa Betania emvira Yesu mafuta

(Mat. 26:6-13; Mrk. 14:3-9)

1Ingeri heshele misi mtandatu Pasaka ifike, Yesu akafika Betania, hantu Lazaro ekiikaa, ula Yesu emvushije he vefwie. 2Niho vakamharehia kijo cha chahemagheri uko. Marta akapipirika; ne Lazaro neki mmwe wa vala veikae he kijo hamwe naye. 3Niho Maria akaghuha ratili ya mafuta a nardo edi ena zora mbaha, akamvira Yesu he maghu, akamhanguja maghu na nywii jakwe. Na ila nyumba ikaizua mpungo ya ala mafuta. 4Niho Yuda Iskarioti mmwe wa varateri vakwe, eye eneremrengeha, akati, 5“Hanini aa mafuta esekitaghwa na dinari maghana matatu jikainkwa vakiva?” 6Naye etetie huvo si kwa kuvavoneia vakiva; mira ni kila eki mkea, naye niye mzagura mfuko, akaghuha vila vyegerirwe hewo. 7Niho Yesu akati, “Mshighe, ambu eavikiie msi wa kujikwa kwangu. 8Ambu vakiva munanavo misi yose; mira mi temuna nami misi yose.”

9Niho vantu vajinki he Vayuda vakamaka iti ye ewaho; navo vakaza, si vuntu vwakwe Yesu du, mira iti vamvone hata Lazaro, eye Yesu emvushije he vefwie. 10Vabaha va vatasi vakachila iti vamkome hata uu Lazaro; 11ambu he vuntu vwakwe vajinki he Vayuda vakuvusha na mondo, vakamwitikija Yesu.

Kuingia Yerusalemu kwa mng’aro

(Mat. 21:1-11; Mrk. 11:1-11; Luk. 19:28-40)

12Msi wa keri vantu vajinki vezie he msi m’baha, vekisikia iti Yesu eza Yerusalemu; 13vakaghuha matambi a misala, vakafuma na nze kuramzana, vakalonzisha vekiti, “Hosiana! Mwenye lutelwedi ni ula eza he izina la Mfumwa, mfumwa wa Israeli. 14Yesu ekivona ndama ya njoe akakwea heyo, sa vuntu cheandikwe:

15“Usifoleke m’bora Sayuni!

Rereha, mfumwa wako eza,

Evekiwe ni ndama ya njoe.”

16Ijo mburi varateri vakwe tevekijuvukiwe nijo aho kuvoka, mira Yesu ekinakazwe, niho vekumbuka iti eandikiwe ivyo, na iti vekinakazwe, niho vekumbuka iti eandikiwe ivyo, na iti vekimrongiie huvo. 17Niho va luvungano vala vekiho hamwe naye hala ekimwitanga Lazaro kufuma he mbira, ekimvusha he vefwie, vakamtetia vuonwa. 18Nicho cheshigha, luvungano vekitonga kumzana, kila vekisikie iti aronga luvengo ulwo. 19Niho Vafarisayo vakavwirana venye kwa venye, “Yoani ra iti tehenacho mweveiwa; rerehani isanga lose limratera.” Iombi la Vagriki

20Hekina Vagriki vasiku he vala vantu vekweie kuratasa he ula musi mbaha. 21Avo vakamswia Filipo, mntu wa Betsaida ya Galilaya, vakamsemba vekiti, “Mfumwa, uswi tuenda kumvona Yesu.” 22Filipo akatonga akamvwira Andrea; niho Andrea ne Filipo vakamvwira Yesu. 23Yesu naye akavagharusha, akati, “Saa yafika Mwana wa Mntu akazwe. 24Kididi, kididi, nimutio, Kabeu ka ngano kekisagwa he msau, kakafwa, kerakaa huvo ko kajenye; mira kekifwa, kemoghisha. 25Ye ekunda moo wakwe eneutesha; na ula evihiwa moo wakwe he si ii, eneukija mhaka he nkalamo ya kae na kae. 26Mntu ekinitumikia, naniratere, na hantu mi neho, niho hantu na mndima wangu enerahaikaa. Kangi mntu ekinitumikia, Vava enemshimia. 27Iki ngoro yangu ila vwasi, nami niti ze, ‘Vava unikanie he saa ii?’ mira ni vuntu vwa icho, nicho cheshigha nekifikia ii saa. 28Vava ukaze izina lako.” Niho hakaza izii kufuma uko wanga, “Nalikaza, nami ninelikaza wa.” 29Niho luvungano veimuke hafuhi vakasikia, vakati, “Haketa mrurumo;” vangi vakati, “Malaika ateta naye.” 30Yesu akagharusha, akati, “Izii ilo teliketike vuntu vwangu, mira ni he vuntu vwenyu. 31Iki mlaho wa si ii uho; iki m’baha wa si ii enetaghwa na nze. 32Aho mi nekinekwejwa wanga ya isanga, ninevajuta vose na hangu.” 33Etetie huvo kwa kuvonyesha iti, ni kifwa ani enerefwa. 34Niho luvungano vakamgharusha, “Uswi twesikie he myomongwa iti Kristo eikaa kae na kae; nawe uti ze iti kimtara Mwana wa Mntu kukwejwa? Uu Mwana wa Mntu ni ani?” 35Niho Yesu akavati, “Kianga kireho na unywi kakenda kadori. Tongani aho mwerena na icho kianga, kija kisiremuidima; ambu ula etongia he kija temanya hantu etonga. 36Igheri mwerena na kianga.” Yesu ekinatete huvo, akatonga, akakuvisa vasimvone.

Vayuda tevemwitikije, mira va kumwe vemwitikije kimpiso

37Mira nziaho erongie maluvengo mangi huvo mazya hevo, tevemwitikije; 38nesa kikoloke kila chetetiwe ni mroti Yesaya ekiti:

“Mfumwa, ni ani eitikije mburi jetu?

Kangi mkono wa Mfumwa wemfunukurirwe ani?” 39Nicho chashigha vo vasiidime kuitikija; ambu Yesaya etetie kangi:

40“Evatuntushe meso,

Akaghosha ngoro javo nkuji;

Vasirevona na meso avo,

Vakajuvukiwa na ngoro javo,

Na kugharuka nesa nivakije.” 41Ivyo viteto Yesaya evitetie, kila ekivonie ngazo yakwe, akalanga mburi jakwe. 42Mira hata he vabaha hekirena vajinki vwmwitikije; mira he vuntu vwa Vafarisayo tevekughambie boo, nesa vasirechwiiwa nzighi he sinagogi. 43Ambu vekikundire nguma ya vantu kuvecha nguma ya Mrungu.

Kifuhi cha mafundisho akwe Yesu mozya he vantu

44Yesu naye akaketa na izii ibaha, akati, “Ye eniitikija mi, teniitikija mi esire ula enitumie. 45Na ula enirereha mi emrereha ula enitumie. 46Mi nezie nesa nioke kianga cha si ii, nesa kila mntu eniitikija mi asiikae he kija. 47Na mntu ekisikia viteto vyangu ekisavigurisha, mi simlaha; ambu mi sizie kulaha si ii, esire kukija si ii. 48Ye enisua mi, esikunda viteto vyangu, hena ye anemlaha; kiteto icho nekitetie, nicho chenemlaha msi wa mkengelejo. 49Ambu sitetie vyangu mwenye; mira Vava enitumie, Ye mwenye eniazere cho neneteta na cho neneghamba. 50Nami nemanyije iti iazero lakwe ni nkalamo ya kae na kae; heicho ivyo mi neteta, niteta sa vuntu Vava enivwirire.”

Currently Selected:

YOHANE 12: CHSUNT67

Highlight

Copy