YOHANE 11

Lazaro evushwa he vefwie

1Hekina mntu muwaji, Lazaro wa Betania, wa muzi wavo Maria ne Marta mjinawe. 2Maria ni ula ekimvirire Yesu Mfumwa mafuta epupuntika, akamhanguja maghu na nywii jakwe, eye rumburye Lazaro ula ekiwaa. 3Niho vala varumburye vakatuma ntume hakwe vekiti, “Mfumwa, ula wemkundie teveiwa.” 4Yesu ekinasikie, akati, “Vuwaji uvu si vwa kifwa, mira ni vuntu vwa ngazo ya Mrungu, nesa Mwana wa Mrungu akazwe hevwo. 5Na Yesu ekimkundie Marta na Mjinawe ne Lazaro. 6Ekinasikie iti teveiwa, niho akaikaa hala hantu ekireho misi miri. 7Kangi nyuma ya ivyo akavti varateri vakwe, “Natutongeni wa Yudea.” 8Vala varateri vakamti, “Rabi, izana zana niho Vayuda vekienda kukubigha mabwe, nawe utonga wa uko?” 9Yesu akagharusha, “Hamao, saa ja he msi si ikumi na mbiri? Mntu ekitonga hemsi tebigha chaa, kila evona kianga cha si ii. 10Mira ekitonga kio ebigha chaa; ambu kianga tekiho heye.” 11Ekinatete huvo, kangi nyuma ya ivyo, akavati, “Mmbwie wetu Lazaro ashinjia; mira nitonga niremvusha.” 12Niho vala varateri vakamti, “Mfumwa, kakicha ashinjia enebanda.” 13Mira Yesu etetie mburi ya kifwa chakwe; vo vakadunganya iti eteta mburi ya kushinjia lughohe. 14Niho Yesu akavavwira boo, “Lazaro afwa. 15Mi niizihirwa vuntu vwenyu kila nesekiho uko, nesa muidime kuitikija; mira natutonge hakwe.” 16Niho Toma eitangwa Mmaza, akavati vatateri vaghenji, “Tutongeni na uswi turefwa hamwe naye.”

17Niho Yesu ekifika akamkicha aikaa he mbira misi mine. 18Betania wekiho hafuhi na Yerusalemu, kiringanyo cha maili mbiri huvu; 19na vantu vajinki he Vayuda vekizie havo Marta ne Maria kuvatuja, vuntu vwa rumburye. 20Niho Marta ekinasikie iti Yesu ezie, akatonga kumzana; Maria naye ekiho kula nyumba. 21Niho Marta akamti Yesu, “Mfumwa, nanga wekiwaha, rumburya tekifwa ye. 22Mira na ere iki nemanyije iti cho wenemwomba Mrungu, Mrungu enekunka.” 23Yesu akamti, “Rumburyo enevuka he vefwie.” 24Marta akamti, “Nemanyije iti enevuka wa he kuvuka kwa vefwie msi wa mkengelejo.” 25Yesu akamti, “Mi nimi uko kuvuka he vefwie na nkalamo. Ye eniitikija mi, na akatefwa enekalama; 26na kila eho moo, ekiniitikija mi, tekafwenye neri kae na kae. Uitikija huvo?” 27Akamti, “Yee Mfumwa, mi nakuitikija iti we niwe Kristo, Mwana wa Mrungu, ula eza he si ii.” 28Ekikenja kuteta huvo, akatonga akamwitanga mjinawe eye Maria; akamvwira kwa mpiso, “Mcheji ewaha, ekuitanga.” 29Naye ekirasikia akavuka fia, akamswia. 30Na Yesu asanafika he kamuzi; mira ekireho hala hantu Marta emzaniie. 31Niho vala Vayuda vekina ne Maria kula nyumba vekimtuja, vekinamvone vuntu evuka fia na kufuma, vakamratera; vekidunganya iti kana etatonga kula he mbira nesa areiia ho. 32Maria ekinafike hala hantu Yesu ekiho, ekiramvona, akagwa he maghu akwe, akamti, “Mfumwa, nanga wekiwaha, rumburya tekifwa ye.” 33Yesu ekinamvone ekiia, na vala Vayuda vemratere vekiia, akaluluma na kuwajwa he ngoro, 34akati, “Mwemvikie hio?” Vakamti, “Mfumwa, nzo urerehe.” 35Yesu akaseja masoji. 36Niho Vayuda vakati, “Rereha vuntu emkundie.” 37Mira va kumwe vakati, “Hama uu ekimtambaruje ula ituntu meso, tekiidima kumkinda uu asifwe?”

38Niho Yesu ekiluluma kangi he ngoro yakwe, akafika he mbira. Nayo neki mpanga, na wanga heyo hevikiwe ibwe. 39Yesu akati, “Vushani ilo ibwe.” Marta rumburye ula efwie, akamti, “Mfumwa, iki enunka; ambu yoo ni msi wa kane ekinafwe.” 40Yesu akamti, “Mi sikuvwirire iti wekiitikija unevona ngazo ya Mrungu?” 41Niho vakavusha lila ibwe. Yesu akavusha meso na wanga, akati, “Vava, nikuanjela ni kila we wenisikie. 42Nami nekiremanya iti unisikia misi yose; mira he vuntu vwa ulu luvungano lweimuke aha, nicho cheshigha nekiteta huvo, nesa vaidime kuitikija iti niwe wenitumie.” 43Naye ekinakenje kuteta huvo, akaitanga na izii ibaha, “Lazaro, fuma nze!” 44Ula efwie akafuma na nze, echungiwe shanda maghu na mikono, vusho vwakwe vwechungiwe na mhaluma. Niho Yesu akavati, “Mchungueni, mumshighe atonge.”

Vabaha va vatasi veteta njama ya kumkoma Yesu

(Mat. 26:1-5; Mrk. 14:1-2; Luk. 22:1-2)

45Niho Vayuda vajinki vala vezie hakwe Maria vekivona vila eketie, vakamwitikija. 46Mira va kumwe vakatonga he Vafarisayo, vakavavwira vila Yesu eketie. 47Niho vabaha va vatasi na Vafarisayo vakavunganya chila, vakati, “Tuneghendaze? ambu uu mntu eronga maluvengo mangi. 48Twekimshigha huvu vantu vose venemwitikija; kangi Varoma navo veneza kutaha isanga letu na mbari yetu.” 49Mntu mmwe hevo, Kayafa, eki mtasi m’baha ula mwaka, akavati, “Unywi tehenacho mwemanyije neri; 50neri temudunganya iti kiiziha, mntu mmwe afwe vuntu vwa vantu; nesa mbari nzima isiteke.” 51Icho kiteto tekitetie kwa kumanya kwakwe mwenye; mira kila eki mtasi m’baha mwaka ula, erotie iti Yesu enefwa vuntu vwa iyo mbari. 52Neri si vuntu vwa iyo mbari du; mira na iti avunganye hamwe vana va Mrungu vezarike. 53Too msi ula vakachila mburi ya kumkoma.

54Heicho Yesu tezeanga kangi he Vayuda kwa kukufunyirija; mira akafuma uko, akatonga hantu hafuhi na nyika, mhaka he muzi weitangwa Efraimu; akaikaa ho hamwe na varateri vakwe. 55Pasaka ya Vayuda yekiho hafuhi; vantu vakakwea kufuma he mighunda mhaka Yerusalemu Pasaka yekinafike, nesa vakuzerije. 56Niho vo vakamwenda Yesu, vakateta vereimuka kula he nyumba ya mtaso, “Muti ze, tekaze neri he uu msi m’baha?” 57Na vabaha va vatasi na Vafarisayo vekifunyije momo iti mntu ekimanya hantu eho, atwae mburi, nesa vaidime kumgura.

Currently Selected:

YOHANE 11: CHSUNT67

Highlight

Copy