YOHANE 10

Isanzu la magonji

1“Kididi, kididi, nimutio, Ula esiingia he mvera wa isanzu la magonji, mira eingia mondo, uo ni mkea na mkibonda. 2Eingiia he mvera ni mrisha wa magonji. 3Uo mlughojo emjuvuia, magonji nao esikia izii lakwe; naye eaitanga magonji akwe kwa mazina ao, na kuaramosha. 4Naye ekinafunya magonji akwe ose na nze, earongorira; na ala magonji emratera, ambu emanyije izii lakwe. 5Mgheni teekamratere neri, mira enemwaha; ambu teemanyije mazii a vagheni.” 6Yesu evavwirire icho kisoma mira vo tevejuvukiwe ni ijo mburi evavwirire.

Mi nimi mrisha wedi

7Ingeri Yesu akavati wa, “Kididi, kididi, nimutio, Mi nimi mvera wa magonji. 8Vose venirongorire ni vakea na vakibonda; mira magonji teevasikie. 9Mi nimi mvera; mntu ekiingia hemmi enekia; eneingia na kufuma, kangi enevona ndisha. 10Mkea tezia kingi esire kuiva, na kukoma na kukonda; mi nezie nesa vakete nkalamo, kangi vaivone fwa.

11“Mi nimi mrisha wedi. Mrisha wedi einkija kuho kwakwe vuntu vwa magonji. 12Mntu wa mhako, esiye mrisha, kila magonji esi akwe, evona ighinga lekiza, akashigha magonji na kuaha; na ighanga liagura na kuazara. 13Ula eaha kila e mntu wa mhako; tena luserekena na magonji. 14Mi nimi mrisha wedi; vala e vangu nevamanyije; na vala e vangu venimanyije mi; 15sa vuntu Vava enimanyije, nami nemmanyije Vava. Nami niinkija kuho kwangu vuntu vwa magonji. 16Nirena magonji angi, esi a isanzu ili; ao nao kinitara kuaete; na izii langu enelisikia; niho heneketa ifyo imwe na mrisha mmwe. 17Nicho cheshigha Vava ekinikunda, kila neinkija kuho kwangu nesa ninakughuhe wa. 18Tehena ekunighunba, mira nitakuinkija, kangi nina nzinya ya kukughuha wa. Iazero ilo nelighuhie ha Vava wangu.”

19Hakaketa wa kughavanyika he Vayuda, vuntu vwa ivyo viteto. 20Vajinki hevo vakati, “Uu ene mpepo, kangi eghuruka; hanini mwemsikija?” 21Vakumwe vakati, “Viteto ivyo si vya mntu ena mpepo. H’ii! mpepo eveiwa kutambaruja matuntu meso?”

Yesu eho Yerusalemu he msi m’baha wa kukumbuka kuzerijwa kwa nyumba ya mtaso

22Kula Yerusalemu hekina msi m’baha wa kukumbuka kuzerija nyumba ya mtaso; neki igheri la kiho. 23Yesu naye ekivechavecha he nyumba ya mtaso, he lukumbi lwakwe Salomoni. 24Niho Vayuda vemjunguluka, vekimti, “Unetulighighisha ngoro jetu mhaka rini? Kakicha we niwe Kristo utuvwire boo.” 25Yesu akavagharusha, “Nanamuvwira, mira unywi temuitikija. Ndima ijo nejionga he izina la Vava wangu nijo jenitetia vuonwa. 26Mira unywi temuitikija, ambu temuho ghati he magonji angu. 27Magonji angu enisikia izii langu; nami niamanya, nao eniatera. 28Nami niainka nkalamo ya kae na kae; neri teekazeteka narini; kangi tehena mntu eneanipekula he mkono wangu. 29Vava wangu eaninkie ni m’baha kuvecha vose; neri tehena mntu eveiwa kuapekula he mkono wa Vava wangu. 30Mi ne Vava tu mmwe.”

Vunzo vwa Vayuda

31Vayuda vakatoa mabwe kangi iti vam’bighe. 32Yesu akavagharusha, “Nemuvonyeshe ndima jedi nyingi jefuma ha Vava, he ijo ndima-o, ni ihi mwenibighia mabwe?” 33Vayuda vakamgharusha, “He vuntu vwa ndima yedi tetukubigha mabwe; mira ni kila we wemfalaja Mrungu, na kila we we mntu ukughosha Mrungu we mwenye. 34Yesu akavagharusha, “Hama tekiandikwe he myomo yenyu, kuti, ‘Mi netie, ni unywi mirungu?’ 35Ukinakiche evaitange mirungu kila veziiwe ni kiteto cha Mrungu (maandiko teeveiwa kukondika); 36h’ii! ula eye Vava emzerije, akamtuma he si ii, unywi muti, ‘Umfalaja Mrungu,’ ni hala netie, ‘Mi ni Mwana wa Mrungu’? 37Kakicha sironga ndima ja Vava wangu, musiniitikije; 38mira nekijironga, nziaho temuniitikija mi, itikijani jila ndima; nesa muidime kumanya na kutwarija iti Vava eho hemi, nami niho he Vava.” 39Vakaenda kangi kumgura, mira akapuchuluka he mikono yavo.

40Akatonga wa na sela ya Yordani, mhaka hala hantu Yohane ekibatizia hala kuvoka, akakaa uko. 41Vantu vajinki vakamswia, vakati, “Yohane terongie luvengo neri, mira vyose Yohane etetie he mburi ya uu neki vya idi.” 42Vajinki vakamwitikija uko.

Currently Selected:

YOHANE 10: CHSUNT67

Highlight

Copy