LUKE 19

Jesu ní, Sasye nì

1Ki kruʔu ma, Jesu wi gaâ je wa Jeriko kàʔà ni ge, wɔ̀ɔ naʔa pari. 2Naŋa wà dà bo wa à pe noo yeri Sasye. Wi dá bo misari syɔfɛɛ pe lagwɔ mà po masa naŋa. 3Wi dáa ki ca bìʔi cɛn hɛn ŋa wi Jesu we. Di wi ìn dàá gbanni bì da Jesu nyaʔa we hɛɛn pe fafaʔama kala na le, mɛjɛn Sasye wi dá bo nawree. 4Wɔ̀ɔ fɛ́ mà kɛri yɛʔɛ̀ ge mà yâ luʔu sya tiʔi ni jango wi ba Jesu nya we. Mɛjɛn wi dá bì ba doro wa ki kloʔò kiì ni. 5Jesu wi gaâ no wa ki deʔe na nyiŋi ga na ge, wɔ̀ɔ wele wa namuru mòo po: «Sasye, ma fyala, ma trìgì naʔa, mɛjɛn alaʔa nî, kí ma yala bì drigi ma na.» 6Sasye wɔ̀ɔ fyala mà trigi mà yâ Jesu co we kmaʔa wa wi go nî ge. 7Hɛɛn pè bɛfu bee pe daʔá nya ge, à pe na Jesu hanʔa we mà yo: «Wí ma trigi wa kapere hanrifɔlɔ na we.» 8Di Sasye wɔ̀ɔ jɛ mà yere màʔa yo wò fɔlɔ ma we mà yo: «Na fɔlɔ, maʔa wèlé, mí bi na kyɛʔɛ yrɛbɛ pi konʔo kan fyomo fɛɛ ma be. Nàʔa po mi dá hɛn wà yrɛbɛ fiʔiri mà pi syɔ wí ma, pa mi ki yrɛbɛ pi nyoʔo ticɛrɛ nuŋu bì pi kân wí ma.» 9Jesu wɔ̀ɔ kí yo wí ma mà yo: «Alaʔa nî, syɔmo mí ma no naʔa ki go woo na be, mɛjɛn ki naŋa wiì fanna, wí nyɛ Abrahamu kluʔu pyɔ wi. 10Hɛn Pyɔ wi dá ban bì ba hɛɛn ca, bee pe dá bunŋu, bì pe syɔ.»

Klo fɔlɔ wà gbejanra kanma kayoʔo

(Mat 25:14-30)

11Ki kruʔu ma, Jesu wɔ̀ɔ ní mà yomɛlɛ kmo bee kan pe dáa wi kayoro nuru de. Mɛjɛn, pɔɔ da gaâ no wa Jerusalɛmu kàʔà tanla ge, à pe naʔa honri mà yo Nyɛʔɛlɛ li masaʔa kí bi no kungreʔe. 12Ki kala na, wɔ̀ɔ yo: «Naŋa wà dà bo hɛnkpangbanŋa. Wɔ̀ɔ na cɛn bì dá sye klo là ni leʔe jango pe ya klo kan wí ma, wi na hru wi ba glɛn lí na. 13Di sanni wí bi da sye, wɔ̀ɔ wi tungɔɔ pèè yeri kɛ̂ mà bâ saamo pyɔ nigbe kan pè bɛfu ma mà pe po: ‹Ye yaa ya wa tí ni nyiŋi ga na mí bi bo tanʔala na.› 14Àʔa hín bo wi klo woo pe dɔɔ́ cɛ. À pe hɛɛn pèè tun wa klòʔo fɔlɔ ma we mà yo pe yɔɔ po: ‹Wo ìn jori ki naŋa ŋa wi po wò klo fɔlɔ.›

15Di wi gaâ klo ta le nyiŋi ga na ge, wɔ̀ɔ hru mà pan. Wi dá gbejanra kan bee ma ge, wɔ̀ɔ bâ pe yeri mà yo pe kɛri wa wi deʔe na, jango tonro ŋa pé ta wa ya wama ni me, wi bɔɔ cɛn. 16Kplɛɛ wɔ̀ɔ pan mà bâ yo: ‹Kundiʔi, mí ma saamo pii kɛ̂ ta tonro ma gbejanra saamo pyɔ nigbe ní we.› 17Klo fɔlɔ wɔ̀ɔ wí po: ‹Tungɔkmaa, pa ma gâ bo pama hɛn katatulu na le, ki kala na, mí bi sye kan má ma, ma klɛn kyɛ̀rɛ̀ kɛ̂ na.› 18Syɛnwoo wɔ̀ɔ pan mà bâ yo: ‹Kundiʔi, mí ma saamo pii kɔgunnu ta tonro ma gbejanra saamo pyɔ nigbe ní we.› 19Klo fɔlɔ wɔ̀ɔ kí yo ki woo ma we mà yo: ‹Mí bi sye kan má ma, ma klɛn kyɛ̀rɛ̀ kɔgunnu na.› 20À wà ma pan mà báʔà yo mà yo: ‹Kundiʔi, ma saamo wí ŋa. Mi dɔɔ́ pwɔ kpasyople ní mòo tyɛʔɛ namyɛlɛ na. 21Mi dáa fyaʔa má na, mɛjɛn má nyɛ canʔalaŋa. Yraʔa ga mo mɛ ìn dà dyɛʔɛ be ge, ma na kà kpe be ki deʔe na ge. Akaba ba mɛ ìn fali ge, ma na bâ pi kon.› 22Klo fɔlɔ wɔ̀ɔ wí po: ‹Tungɔpee, mí bi kiti kon má na bì yala ma nohɛntara tiì nì. Ma daʔa cɛ́n kɛ mà yo mí nyɛ canʔalaŋa. Yraʔa ga mi ìn dyɛʔɛ be ge, mi na bâ kà kpe be ki deʔe na ge. Akaba ba mi ìn fali ge, mi na bâ pi kon. 23Nyaʔa dá gan mɛ ìn dà na gbejanra kan de gbejanra go fɔlɔ ma we? Nàʔa po ban, mi dí bì baʔa nya kà ma haʔa wa ti na.› 24Bee pe dá bo wa yerehaʔa ge, wɔ̀ɔ pé po: ‹Ye saamo syɔ wi ma, yoo kan saamo pii kɛ̂ fɔlɔ ma we.› 25À poo po: ‹Kundiʔi, saamo pii kɛ̂ nyɛ wiì ma we kɔ.› 26Wɔ̀ɔ pé po: ‹Kanyɛmɛ na, nà yraʔa kà bí bo hɛn o hɛn ŋa ma, pa pe ba kà haʔa wa wi ma nɛ. Di nàʔa po yraʔa ka wò wì ma, cɛnri ŋa wi ma, pa pe bɔɔ syɔ wí ma.#19:26 ma wèle wa Mat 13:12; Mar 4:25; Luk 8:18 ni wè. 27Ɛɛn di, ki woo bee pé nyɛ na bɛnfɛɛ mâ po pe ìn jori bì bo pe klo fɔlɔ ge, ye pan pé ni naʔamɛ ge, ye ba pe kpo na yɛʔɛ̀ na.› »

Jesu wí ma je wa Jerusalɛmu kàʔà ni ge

(Mat 21:1-11; Mar 11:1-11; Jan 12:12-19)

28Wi gâ ki kayoro yo de kɔ ge, wɔ̀ɔ klu pe yɛʔɛ̀ na sye Jerusalɛmu kàʔà ni ge. 29Wi da gâ no wa Bɛtifaje kàʔà nì, ní Betani kàʔà na ge, wa angolo la tanla pé na yeri Olife tiri angolo le, wɔ̀ɔ wi ploʔofɛɛ pèè tun syɛn, 30mà pe po: «Yee sye kàʔà ga ni kí nyɛ wa yè yɛ̀ʔɛ́ ge. Nà ye ya je waʔa nî, yé bi sofɛnlɛple nya pe lí pwɔ. Hɛn wɛ̀ ìn je glɛn lí na kpɛn. Ye li hàʔàlá, yee ban lí ni. 31Na hɛn wà bí ye yugu bì yo: ‹Nyaʔa ma po yé na li haʔala ge,› yoo po: ‹Mɛjɛn wò fɔlɔ wí ma cori li na.› » 32Bee wi dá dun ge, à pe kɛri mà yáʔà nya nɛ pa wi daʔá yo pé ma pomo ma na ge. 33Pe da gáa sofɛnlɛple haʔala le nyiŋi ga na ge, li fɛɛ à pe pé po: «Nyaʔa ma po yé na sofɛnlɛple haʔala le?» 34À pe yo: «Mɛjɛn wò fɔlɔ wí ma cori li na.» 35À pe pan lí ni Jesu kan we mà bâ pe kpasyoro pa de wa sofɛnlɛple na le mà Jesu haʔa wɔ̀ɔ luʔu mà klɛn lí na.

36Pɔɔ da gáa sye ge, à hɛɛn pèè na pe kpasyoro can de wa kloʔò na ge.

37Wi da gáa nori wa Olife tiri angolo tonlimo ní me wa Jerusalɛmu kàʔà tanla ge, wi ploʔofɛɛ fafaʔabaa pè bɛfu à pe po lafiʔigbɔmo nì. À peʔe hli na Nyɛʔɛlɛ sonni le mà na taʔara kafonŋoo kè bɛfu kala na gee pe dá nya ge. 38À pe na taʔara naʔa pin: «Frɛmɛ bí bo klo fɔlɔ ŋa ma wí na pan wò fɔlɔ wi yele na le. Nyimi bí bo wa Nyɛʔɛlɛ kaʔa ni ge. Ee, kmara bí bo wa namuru dere tì bɛfu na.»#19:38 maʔa tonli Ŋuʔu 118:26 ni wè.

39Ki nyiŋi na ge, Farisiyee bee pe dá bo wa janma ni me, à pèè ma Jesu po we: «Krɛʔɛfɔlɔ, maʔa yo ma ploʔofɛɛ ma be ma yo pe pyèrì.» 40Wɔ̀ɔ pé po: «Kanyɛmɛ na, ali ki woo bee nà pe ja byeri ge, ŋglɛnrɛ pa ti da daʔara.»

Jesu wí ma kpele Jerusalɛmu kàʔà kala na le

41Pɔɔ da gáa nori kàʔà na náʔa wele náʔa nyaʔa ge, wɔ̀ɔ taʔa na kpele ki kala na le, 42mà yo: «Jerusalɛmu, yraʔa ga ki dí bì gban bí nyimi kan má ma ge, mo fanna, nàʔa po ma diʔi cɛ́n alaʔa nî ge, ki dí bì bonro ceŋge. Di ŋaŋa ni ge, kí ma hra ma na. 43Mɛjɛn nyiŋi kà na pan wa, ma bɛnfɛɛ pé bi ba gunru fan bì ma kɛli bì ma nyinihara tì bɛfu ton bì da ma frɛnʔɛ namyɛʔɛ kè bɛfu na.

44Mo ní, ma pii ní, pé bi ba yè bɛfu cɔʔɔ. Pe ìn bi ba ŋglɛnʔɛ kà yaʔa paʔa kà na. Mɛjɛn Nyɛʔɛlɛ li dí ban mà krugu bì ba ma syɔ nyiŋi ga na ge, mɛ ìn ki cɛn.»

Jesu wí ma je Nyɛʔɛlɛ li sràʔá go ni

(Mat 21:12-17; Mar 11:15-19; Jan 2:13-22)

45Wɔ̀ɔ yâ je wa Nyɛʔɛlɛ li sràʔá go ni ge màʔa hli na pɛɛfɛɛ prɔ be waʔa nî mà pe po: 46«Kí nyɛ wa nyoŋoʔo Nyɛʔɛlɛ li sɛbɛ ni we mà yo: ‹Na go kí bi bo Nyɛʔɛlɛ nyɛrihaʔa go›, di yèé à ye báʔà krɛʔɛ nikonmoo hrahaʔa.»#19:46 ma wèle wa Esa 56:7; Jer 7:11 ni wè.

47Ki kruʔu ma, wɔ̀ɔ báa hɛɛn krɛʔɛ be wa Nyɛʔɛlɛ sraʔá go ni ge wlɛrɛ tì bɛfu na. Di sraʔá farafɛɛ kpandoo ní, Furu sɛbɛ cɛnfɛɛ ní, ní hɛɛn pe yɛkluu ní be, pe dáa ki ca bùu kpo.#19:47 ma wèle wa Luk 21:37 ni wè. 48Di pe ìn dà gban bì yraʔa kà hanri wí na, mɛjɛn hɛɛn pè bɛfu pe dáa nagruʔu can na wi kayoro nuru de kmaʔa ceŋge.

Currently Selected:

LUKE 19: NLK10

Highlight

Copy