HLIMI 47
47
1Josɛfu wɔ̀ɔ kɛri mà yáʔà yo Farahon ma mà yo: «Na lɛɛ ní, ní na to nì pé ma jɛ wa Kana klo ni le mà pan pe ajobo nì be yribi bi yoo, kpandobo bi yoo mà plɛn pe kyɛʔɛ yrɛbɛ pì bɛfu ní, pé bee pe bâ glɛn wa Gosyɛn klo ni le.»
2Wɔ̀ɔ wi lɛɛ pee co kɔgunnu mà yâ pe tyɛʔɛ Farahon na we. 3Farahon wɔ̀ɔ Josɛfu wi lɛɛ yugu be mà yo: «Yé na nyaʔa tunŋu ko?» À pe Farahon po we: «Ma tungɔɔ pé nyɛ ajoyribi naʔafɛɛ bɛ nɛ pa pe tee pe dá bo ge.» 4À peʔe yo nɛ Farahon kan mà yo: «Wó ma pan bì ba glɛn naʔa ki klo ni le. Funŋu kí ma to wa Kana klo ni le kpangbaŋa ceŋge. Nya ìn go wa ma tungɔɔ pe ajobo naʔahaʔa na ge adi. Ki kala na wó na ma fɛn màʔa yaʔa ma tungɔɔ pe klɛn wa Gosyɛn klo ni le.»
5Farahon wɔɔ kí yo Josɛfu ma mà yo: «Ma to nì, ní ma lɛɛ ní pé mà pan mà krugu. 6Ejipite klo li klɛn mà mo kan. Ma ma to nì, ní ma lɛɛ tɛnŋɛ be wa klo li degmaʔa na ge. Pe klɛn wa Gosyɛn klo ni le. Nà ma pèè nya wa pe nî ticlibee, ma pe tɛnŋɛ na ajobo pi yugu na.»
7Josɛfu wɔ̀ɔ pan wi to Jakɔbe nì mà bɔ́ɔ̀ tyɛʔɛ Farahon na we. Jakɔbe wɔ̀ɔ Nyɛʔɛlɛ wá mà Farahon kan we 8Farahon wɔ̀ɔ Jakɔbe yugu mà yo: «Má ma ta yɛʔɛ́ jori ma nyuwyeʔe kì bɛfu ni ge?» 9Jakɔbe wɔ̀ɔ Farahon po we: «Na klɛn na hɔlɔ yɛlɛ la lí nyɛ ki yɛʔɛ́ too noli ní kprɔʔɔ wolo li. Na nyuwyeʔe ki yɛʔɛ koò nyɛ fafaʔagaa, di à ke po tipeʔele kpo. Ke ìn no wa na tee pe woʔolo na ge, nyiŋi ga na pe dáa nyari má na klɛn na hɔlɔ ge.»
10Jakɔbe wɔ̀ɔ ní mà Nyɛʔɛlɛ wa ma Farahon kan nɛ, ki kruʔu ma mà jɛ be wì tanla.
11Josɛfu wɔ̀ɔ wi to nì, ní wi lɛɛ tɛnŋɛ be mà klo li degmaʔa kan pé ma wa Ejipite klo ni le, Hramise klo klɛnmɛ ni nɛ pa Farahon wi daʔá yo pomo ma na ge. 12Josɛfu wi dáa wi to nì, ní wi lɛɛ ní, ní wi to heme mì bɛfu cromo yrɛbɛ kanʔa be mà yala pii pe no ní ge.
Josɛfu wi ticlimi kala funŋu nyiŋi na
13Bru wi da gɔ́ wa klo lì bɛfu ni mɛjɛn funŋu ki dá do kpangbanŋa ceŋge. Fanŋa àʔa kɔ Ejipite klo nì, ní Kana wolo ní le funŋu ki kpangbanma kala na le. 14Josɛfu wi dá gbejanra tì bɛfu kpe da ti dá bo wa Ejipite klo ni, ní Kana wolo ní le, nyiŋi ga na pe dáa akaba syo tí ni wí ma ge. Wɔ̀ɔ ki gbejanra kpe mà yâ ti tyɛʔɛ wa Farahon go nî ge. 15Nyiŋi ga na Ejipite klo gbejanra ti da gâ gɔ ní Kana klo woro ní de, Ejipite klo woo à pe pan mà báʔà yo Josɛfu ma we ma yo: «Ma bru wà kan wo ma! Ma yɛʔɛ̀ na kí ma yala wo kù yo, ga na wò gbejanra tí ma kɔ ge?» 16Josɛfu wɔ̀ɔ pé po: «Ye yè ajobo kan be, pa mi bru kan ye ma yè ajobo pi nolo ni le, mɛjɛn gbejanra tí ma kɔ ye ma.»
17À pe na pan pe ajobo nì Josɛfu kan we. Josɛfu wɔ̀ɔ na bru kanʔa pé ma pi nolo ni le, pe syongidayee yoo, pe ajoyribi yoo, kpandobo yoo, sofɛnŋɛɛ yoo. Ki yɛlɛ ni le wɔ̀ɔ bru kan pé ma pe ajobo pi nolo ni le. 18Ki yɛlɛ li gâ doro kɔ ge, la li pa be syɛnwolo le, à pe pan mà báʔà yo wí kan nɛ mà yo: «Wòo gban bì hra wò fɔlɔ na bí yo wò gbejanra ti kɔ́, wò ajobo fanna à pi kɔ. Wò wre tiì ma koro kpo ní wo tra ní de, wò fɔlɔ kan we. 19Kí ma yala wo kù ma nyɛʔɛ nyama na me yo, wòó ní wò tra ní de? Ma wo syɔ wò tra ní de jango ma bru kan wo ma, wo krɛ̀ʔɛ̀ Farahon wi ŋkloolo, wòó ní wò tra ní de. Ma akaba pà kan wo ma wo pi fali jango wò gá gu, wò tra ti kò waʔafe.»
20Josɛfu wɔ̀ɔ Ejipite klo tra tìbɛfu syɔ Farahon kan we. Ejipite klo woo pè bɛfu pe dá pe kere pɛrɛ de, mɛjɛn funŋu ki dá do pé na ceŋge. Klo lì bɛfu à li krɛʔɛ Farahon wolo. 21Wɔ̀ɔ pè bɛfu craʔa wa Ejipite klo lì bɛfu ni fɔ mà no wa li kanŋaa na ge. 22Di wi ìn dà sraʔá farafɛɛ pe tra syɔ de pe ma, mɛjɛn Farahon wi dá kayoʔo kà nyoŋo pe kala na le jango bi pe haʔa. Sraʔá farafɛɛ pe dáa pe nyuwyeʔe hanri. Ki kayoʔo kiì fanŋa ni ga Farahon wi dá yo pe kala na le. À kiì ma kan wi ìn pe kere pɛrɛ de.
23Josɛfu wɔ̀ɔ kí yo hɛɛn ma be mà yo mí ma ye syɔ alaʔa ni mà yè tra plɛn de Farahon kan we. Akaba pí ba. Ye pi kpe ye pi fali wa tra na de. 24Nà ye gá ba pi kon, ye pi tyɛʔɛ tyɛʔɛhaʔa kɔgunnu. Ye tyɛʔɛhaʔa nigbe kan Farahon ma we. Ye cɛʔɛhara ticɛrɛ ti tɔ kpe de. Ye ba pà fali wa kere ni de. Yee pa li yèé ní yè pii ní be. 25À poo po: «Má ma nyuwyeʔe kan wo ma! Wò fɔlɔ wí ma wo haʔa wo bi glɛn bì bo Farahon wi ŋkloo.»
26Josɛfu wɔ̀ɔ ki woʔo ga yo à peʔe nyoŋo mà kpe ki nyiŋi na fɔ mà bâ no alaʔa wlɛʔɛ na mà yo Ejipite klo tra akaba pi konmo kɔgunnu woʔo ki klɛ́n mà Farahon kan fɔ mà gâ laʔa sraʔá farafɛɛ pe tra na de da ti ìn glɛn bí Farahon kan ge.
Jakɔbe wi trodanʔama
27Israyɛli wi da glɛ́n wa Ejipite klo ni wa Gosyɛn klo ni, à li klɛn mòo kan. Pe dá he mà nyɛʔɛ ceŋge. 28Jakɔbe wi dá da wa yɛʔɛ́ kɛ̂ mà kɛ̀ nasyɛn wa Ejipite klo ni le. Jakɔbe wi nyuwyeʔe yɛʔɛ kè bɛfu ke dá bo too nasyɛn ní yɛʔɛ nasyɛn.
29Israyɛli wi nyuwyeʔe ki da báa jɛn kí bi gɔ nyiŋi ga na, wɔ̀ɔ wi pyɔ Josɛfu yeri mà báʔà yo wí kan mà yo: «Naʔa po má ma cori bì kmaʔa hanri ná na ge, mí na ma fɛn, ma ma kyɛʔɛ le wa na cekpɔmo noʔo na, ma kmaʔa hanri ná na sinmi ní, Mí na ma fɛn, mò gá na wrekuru le naʔa Ejipite ni we. 30Nà mi gá syɛn bì gu bi yá bo wa na tee ní be teme na ge, ma na kpe ma nyini na ni naʔa Ejipite klo ni le, ma ya na le wa pe fanʔa ni ge.» Josɛfu wɔ̀ɔ wí po: «Ga má ma yo ná kan mí bi baʔa hanri.» 31Jakɔbe wɔ̀ɔ yo: «Ma mà klan nà kan ki kayoʔo na ge.»
Josɛfu wɔ̀ɔ wì klanʔa na wí kan. Ki kruʔu ma Israyɛli wɔ̀ɔ kunbiʔi kan be wì tanla wi yugu tyɛʔɛhaʔa na ge.
Currently Selected:
HLIMI 47: NLK10
Highlight
Share
Copy

Want to have your highlights saved across all your devices? Sign up or sign in
Bible Society of Côte d'Ivoire