HLIMI 42

Jakɔbe wí ma wi pii tun be wa Ejipite klo ni

1Jakɔbe wi gáʔa loʔo mâ yo akaba nyɛ wa Ejipite klo ni le, wɔ̀ɔ kí yo wi pii ma be mà yo: «Nyaʔa ma po wa á ye na yè wele ge? 2Ki kala na wɔ̀ɔ kí yo pé kan mà yo: Ye wèlé, mí maʔa loʔo mà yo akaba nyɛ wa Ejipite klo ni le. Ye kɛri ye ya pà syɔ jango wo ba nyuwyeʔe ta, wò gá gu.»

3Josɛfu wi lɛɛ kɛ̂ à pe kɛri Ejipite klo ni bì yà akaba syɔ. 4Jakɔbe wi ìn daʔa ta bì Josɛfu wi conlo Bɛnjamɛ plɛn pe ní, mɛjɛn wi dáa fyaʔa mà yo kana kala là bi yɔ̀ɔ́ ta tipele yo. 5Israyɛli wi pii à pe pan bi ba akaba syɔ. Pe dá gboʔolo teme na bee ní pe dá ban bì ba pà syɔ kpo ge. Mɛjɛn funŋu ki dá do wa Kana klo ni ceŋge.

Josɛfu wí ma wi lɛɛ co be cɛnmɛ fun

6Josɛfu wi dá bo klo li yugu na. Wɔ̀ɔ naʔa nyu, à pe na akaba pɛrɛ klo woo pè bɛfu ma. Josɛfu wi lɛɛ pe dá ban mà bâ kunbiʔi kán wì tanla mà pe yɛrɛ kàn tra na de. 7Josɛfu wi da gâ wi lɛɛ nya be, wɔ̀ɔ pe cɛn, di wɔ̀ɔ ki hanri nɛ pa hɛɛn bee nyɛ wi ìn pe cɛn, mɛjɛn wi dá yo pé ni gbanʔa mà yo: «Ye jɛ́ hanbe?» À poo po: «Wo jɛ́ Kana klo ni mà pan bì ba akaba syɔ.»

8Josɛfu wi dá wi lɛɛ cɛn be, di pee pe ìn wi cɛn. 9Josɛfu wi da lama to wi ŋlonro da nì wi da ŋoló pé ni ge. Wɔ̀ɔ pé po: «Yé nyɛ kɔrɔsi cofɛɛ bɛ ye nì. Yé ma pan bì ba klo li tifaʔama dere ca bì ti cɛn.» 10À poo po: «Ayo, na kafɔlɔ, ma tungɔɔ pé ma pan bì ba akaba syɔ. 11Wó nyɛ naŋa nigbe pii bɛ wo nì. Kanyɛmɛ fɛɛ bɛ wo nì. Ma tungɔɔ pe ìn ban bì ba kɔrɔsi co.» 12Wɔ̀ɔ pé po: «Kayocɛnŋɛ ban! Yé ma pan bì ba klo li fanŋa fun dere tiì ca bì ti cɛn.» 13À poo po: «Wòó, ma tungɔɔ be, wó nyɛ kɛ̂ ma kɛ̀ syɛn mà po naŋa nigbe pii wa Kana klo ni. Ali wò conlo tatunŋu wí nyɛ wa wò to ní we. Àʔa hin bo wò conlo wà mà la wo ni nigbe.» 14Josɛfu wɔ̀ɔ pé po: «Mi dí kiì cɛn mâ yo yé nyɛ kɔrɔsifɛɛ bɛ ye nì. 15Pomawleʔe ga mí bi gân ye ma kí ga: Bì Farahon yaʔa nyuwyeʔe na, ye ìn bì gban bì jɛ naʔamɛ kí po yè conlo wi ìn ban ge. 16Wa yèé ni be ye wà troʔo wi ya yè conlo co wi pan wí ni. Ye tɔɔ yé bi je kaso nî. Wó bi yè kayoro po bì ti wele nàʔa po yé ma kayocɛnŋɛ yo ge. Ná kiì ban, bì Farahon yaʔa nyuwyeʔe na yé pan bì ba klo liì kɔrɔsi.»

17Wɔ̀ɔ pè bɛfu co mà pe wa kaso nî, à pe ta wa wlɛrɛ tanri. 18Wlɛrɛ tanriwoʔo na, Josɛfu wɔ̀ɔ pé po: «Ye ki woʔo ga hanri, pa ye nyuwyeʔe ta. Mí na fyaʔa Nyɛʔɛlɛ na le. 19Nàʔa po yé ma kayocɛnŋɛ yo, ye yè conlo wà yaʔa wa kaso nî nigbe, di ye tɔɔ ye akaba pà kpe ye kɛri pí ni yè heme woo kan be jango ye pe syɔ funŋu ma ge. 20Di ye ya ban ná kan yè conlo tatunŋu ní we bì ba yè kayoro ceʔege de, nàʔa po yé ma kayocɛnŋɛ yo ge, jango yò gá gu.»

À peʔe hanri ban, 21mà naʔa nyu pè ma mà yo: «Ee, wo dá kapeʔe hanri wò conlo na we, mɛjɛn wo dá bì gban bì nyugara ta wi nyìli na le, nyiŋi ga na wi dáa wo fɛn mâ yo woʔo yaʔa woo haʔa ge. À wo ce. Wo ìn ki ta. Kiì ma kan ki tipeʔe ga áʔa wo ta ge.»

22Hrubɛn wɔ̀ɔ kí yo pé kan mà yo: «Mi ìn daʔa yo ye kan yo mâ yo ki ìn yala ye ki pyɔ ŋa kpo we? Di ye ìn ki ta bì loʔo ná ma. Ki tɔ na, wi disyan fwɔʔɔ kí na yugu wo na.»

23Pe ìn dàʔa cɛn bì yo Josɛfu wi dáa ki nuru, di hɛn wà dàá nyu wi no na ge. 24Wɔ̀ɔ jɛ be pè tanla mà kɛri mà yâ gbele.

Jakɔbe wi najɛɛ pé ma hru mà kɛri Kana klo ni le

Ki kruʔu ma, wɔ̀ɔ pan mà bâ yo pé ni mà Simenyo fara pe ni mà yɔ́ɔ̀ wa kaso nî pe yɛʔɛ̀ na ge. 25Josɛfu wɔ̀ɔ yo pe pe tuʔuru nyi de pe kân akaba nì be. Pe pe gbejanra le de wa pe kân pe kasyara ni de. Pe akaba pà kan pé ma ba pé bi yà ga wa kloʔo na ge. À pe kiì hanri pé kan. 26À pe pe akaba pa be wa pe sofɛnŋɛɛ kadoro na de mà kɛri.

27Wa pee ni be wà dà gáa ki ca wí bi wi sofɛnlɛ kan li lì. Wi gâ wi kasyaʔa nyɛʔɛ mà wi gbejanra nya wa wi kasyaʔa ki lama ni me. 28Wɔ̀ɔ kí yo pe tɔɔ ma be mà yo: «Pé ma na gbejanra nuŋu de na ná nɛ, ti da wa na akaba kasyaʔa ni ge.»

Ki nyiŋi na pe dihonyee à pe kon pé na. À pe naʔa nyu pè ma pomo ma na pe lama mi da wlelé pé na mà yo: «Nyɛʔɛlɛ lí ma nyaʔa hanri wo nì banmɛ ge?»

29À pe kɛri mà yâ je wa pe to krugu wa Kana klo ni mà kì bɛfu tanli wí kan ga kí da pé ta ge, 30mà yo: «Naŋa ŋa wí nyɛ klo li fɔlɔ wi di yâ yo wo nì gbanʔa ceŋge. Wi dáa wo cun hɛɛn bee pe kɛri bì ya pe klo kɔrɔsi le. 31À woʔo yo wí kan mà yo: ‹Wó nyɛ kanyɛmɛ fɛɛ bɛ wo nì. Wo ìn gɛri jango bì ya kɔrɔsi co. 32Wó nyɛ wò to ma we pii kɛ̂ mà kɛ̀ syɛn. Wà ma la wo nì nigbe, di wò conlo tatunŋu we alaʔa nî wí nyɛ wa wò to ní wa Kana klo ni le.› 33Naŋa ŋa wí nyɛ klo li fɔlɔ wɔ̀ɔ wo po: ‹Yeʔe wèlé pomo ma na mí biʔi cɛn nàʔa po yé nyɛ kanyɛmɛ fɛɛ ge. Ye yè woo wà yaʔa nà tanla. Akaba ba pí bi yà gban bí yè heme jo me, ye pi kpe ye kɛri. 34Ye ya ban ná kan yè conlo tatunŋu ní we. Pa miʔi cɛn ki deʔe na bì yo ye ìn ban bì ba klo kɔrɔsi, di yé nyɛ kanyɛmɛ fɛɛlɛ. Ki nyiŋi na pa mi ba yè conlo kan we ye ma, ye gbàn ye nyari naʔa klo li lama ni me.› »

35Nyiŋi ga na pe da gáa pe akaba fara be wa pe kasyara ni de, pè bɛfu nigbe nigbe à pe pe gbejanra nya de wa pe kasyara ni de. Pee ní pe to nì à pe dá gbejanra nya de, fyara à ti pé co ceŋge. 36Pe to Jakɔbe wɔ̀ɔ pé po: «Yé na na pii lari be ná na! Josɛfu woò naʔa adi. Simenyo woò naʔa kpo. Yé bi nì bì Bɛnjamɛ kpe nɛ. Ki woʔo ga kì bɛfu kí na tun domi na.»

37Hrubɛn wɔ̀ɔ kí yo wi to ma we mà yo: «Ma ba na pii nabii syɛn kpo we, nà mi ìn yà hru bì ban má kan Bɛnjamɛ nì we. Moo le domi na kyɛrɛ̀ ni, pa mi ya ban wí ni má kan.» 38Jakɔbe wɔ̀ɔ yo: «Na pyɔ woò na sye wa ye nì. Mɛjɛn wi lɛ wí ma ku. Wiì nigbe ma koro. Nà yraʔa kà bi yɔɔ́ ta tipeʔe wa kloʔò na nyiŋi ga na yé na sye ge, pa ye na kan bì gu yufiʔi ni, yɛpɛnʔɛ bí bo ná ma bì gɛriʔi ni wa kuu kaʔa ge.»

Currently Selected:

HLIMI 42: NLK10

Highlight

Copy