HLIMI 41

Farahon wi ŋlonʔo

1Yɛʔɛ́ syɛn da gâ doro kɔ ge, Farahon wɔ̀ɔ ŋlonʔo ŋolo maʔa nya nɛɛ wí ma yere Nili lɔkpɔʔɔ tanla. 2À niri nasyɛn ma nyini wa lɔkpɔʔɔ ni ge. Ti dá bo kmara mà po nylanʔa nì ceŋge. À ti báa nya ka lɔʔɔ tanla. 3À niri nasyɛn tà ma nyini wa nɛ lɔkpɔʔɔ ni. Ti dá bo tipere wre na mà po waʔara ceŋge. À ti yere be ti tɔ tanla lɔgogo na ge. 4Niri da ti dá bo tipere mâ po waʔara à ti nasyɛn ti tɔ ka da ti dá bo kmara mâ po nylanʔa nì ge. Ki kruʔu ma Farahon wɔ̀ɔ nyɛ ŋlonmo na me.

5Wɔ̀ɔ ní mà ŋolo nɛ mà ŋlonʔo kà ŋolo nɛ. 6Syɔʔɔ katoro nasyɛn dà sɛ syɔglanʔa nigbe na mà po kpandoro kmara ceŋge. Ki kruʔu ma à katoro nasyɛn yriri mà nyini wa ti tɔ ti kruʔu ma ge. Tiflɛtifugu ki da ti hogó. 7Katoro da waʔara à ti bâ da jɔ tí nyɛ kpandoro mâ po nyiri pibi na be. Farahon wɔ̀ɔ nyɛ ŋlonmo na me, ŋlonʔo kiì gi ga ge.

8Ki kpɛntoʔo jɛfanʔa na, Farahon wi honriʔi àʔa wlele wí na. Wɔ̀ɔ Ejipite klo kaʔa cɛnfɛɛ yeri be ní ticlimi fɛɛ ní be. Farahon wɔ̀ɔ bâ wi ŋlonro tanli pe ma. Di wɛ̀ ìn dà gban bì ti kɔ̀rɔ́ fligi Farahon kan we.#41:8 ma wèle wa Dan 2:2 ni wè.

9Ki nyiŋi na klo fɔlɔ wi hunmù kanfɛɛ lagwɔ wɔ̀ɔ kí yo Farahon ma mà yo: «Alaʔa nî mí ma lama to na klomo kaʔa gee ní mi dá hanri kplɛʔɛ na ge. 10Farahon wi dá lama gban wi tungɔɔ ní be, wɔ̀ɔ ná co mà na wa wa kaso nî, wi kaso go welefɛɛ pe lagwɔ go ni, do mi nì ní wi bru kmofɛɛ pe lagwɔ ní we. 11Yebliʔi kà ni wò syɛnmu à wo bâ ŋlonro tà ŋolo, ga nì ki kɔ̀rɔ́. Wɔ̀ɔ po wì yɛ wì yɛ. 12Ebruyee najɛ wà dà bo wa wo nì teme na kaso nî we. Wɔ̀ɔ po kaso go welefɛɛ pe lagwɔ wi tungɔɔ. À wo wò ŋlonro tanli de wì ma. Wɔ̀ɔ ti kɔ̀rɔ́ nyɛli wo kan ŋa nì wi woʔo, ŋa nì wi woʔo.

13Ki kaʔa kè bɛfu à ke bâ funŋu nɛ pa wi da ké yo wo kan pomo ma na ge. Farahon wɔ̀ɔ bâ na tɛnŋɛ nɛ na nolo ni wa na tunŋu ni ge, di à pe bru kmofɛɛ pe lagwɔ pwɔ tiʔi na.»

Josɛfu wí ma Farahon wi ŋlonro ti kɔ̀rɔ́ tyɛʔɛ wi na

14Farahon wɔ̀ɔ yo pe ya Josɛfu co pe pan wí ni wí kan. À pe fyala mà yɔ́ɔ̀ fara wa kaso nî we. Wɔ̀ɔ wi yɛʔɛ̀ yujoro kpoʔori de mà drere tà le fonro mà kɛri Farahon krugu we. 15Farahon wɔ̀ɔ kí yo Josɛfu kan mà yo: «Mí ma ŋlonʔo kà ŋolo. Hɛn wɛ̀ ìn gban bì ki kɔ̀rɔ́ cɛn bùu tanli ná kan. Àʔa hin bo mí maʔa loʔo mà yo nà pe ŋlonʔo kà tanli má kan, ma na gban mà ki kɔ̀rɔ́ cɛn mòo nyɛli.» 16Josɛfu wɔ̀ɔ kí yo Farahon ma mà yo: «Domi ban, di Nyɛʔɛlɛ li lí bi gban bí ma ŋlonʔo ki kɔ̀rɔ́ tyɛʔɛ Farahon na, ŋa wí nyɛ kmaa we.»

17Farahon wɔ̀ɔ kí yo Josɛfu ma mà yo: «Wa na ŋlonʔo ni mi diʔí nya mí ma yere Nili lɔkpɔʔɔ gogo na. 18Welé, à mi gâ niri tà nya nasyɛn kmara mà po nylanʔa nì ceŋge. À ti nyini wa lɔʔɔ ni mà báa nya ka lɔʔɔ tanla. 19À niri nasyɛn tà ma nyini wa nɛ waʔara mà po tipere ceŋge. Kmabre tɛ ìn bo ti na. Ali mi ìn je glu bi ki tipere tyɛnlɛ li nyoʔo kà nya naʔa Ejipite klo ni le. 20Niri da ti dá bo tipere mâ po waʔara de à ti bâ niri nasyɛn kplɛrɛ ka de da ti dá bo nylanʔa nì ge. 21Ali ma jâ bo ti dá ti tɔ kpandoro nylanʔa woro jɔ de, hɛn ìn dàʔa cɛn bì yo nylanʔa woro tí ma je wa waʔara ti lama ni me, mɛjɛn ti dá go tipere nɛ pa ti da glú mà po fan pomo ma na ge. 22À mi ní ma syɔʔɔ katoro nasyɛn nya kmara. Tí ma sɛ syɔglanʔa nigbe na. 23Mà nì mà katowaʔafere nasyɛn nya. Ti ní waʔara. Tiflɛʔɛ ki da ti hogó. À ti sɛ wa kplɛrɛ ti kruʔu ma ge. 24Katowaʔara à ti katokmara nasyɛn jɔ de. Mí maʔa yo na klo kaʔa cɛnfɛɛ kan be, di wɛ̀ ìn gban bì ki kɔ̀rɔ́ nyɛli na kân.»

25Josɛfu wɔ̀ɔ kí yo Farahon ma mà yo: «Farahon wi ŋlonro ti kɔ̀rɔ́ wí nyɛ nigbe. Tí nyɛ ŋlonʔo nigbe wi. Ga kí ma yala Farahon wí hanri Nyɛʔɛlɛ lí maʔa tyɛʔɛ wí na. 26Niri kpandoro nasyɛn tí nyɛ yɛʔɛ́ nasyɛn wi. Syɔʔɔ katoro nasyɛn kmara de tí nyɛ yɛʔɛ́ nasyɛn wi. Ŋloʔo nigbe wi. 27Niwaʔara tipere nasyɛn da ti dá nyini mâ pa kplɛrɛ na de tí nyɛ yɛʔɛ́ nasyɛn wi. Pibi fun katoro nasyɛn da tiflɛʔɛ ki da hogó ge tí bi ba bo funŋu yɛʔɛ̀ nasyɛn wi. 28Ki kala na nɛ pa mí maʔa yo Farahon ma kɔ, ga Nyɛʔɛlɛ lí bi hanri lí maʔa tyɛʔɛ Farahon na we. 29Welé, yɛʔɛ́ nasyɛn na pan wa gee ni Ejipite klo akaba pí bi ba no ceŋge. 30Funŋu yɛʔɛ́ nasyɛn bi ba ba ki yɛʔɛ́ gee na ge. Hɛɛn pè bɛfu pa pe ba lama wɔ naʔa Ejipite klo ni ki akaba fafaʔa tama ní me. Ki funŋu kí bi ba klo wa bì li krɛʔɛ lò gá go yraʔa adi. 31Ki kruʔu ma pòo ba lama to klo li akaba pi fafaʔa nì me adi. Ki funŋu ki kpangbanma kala na, mɛjɛn kí bi ba do bì bo fungbɔʔɔ ceŋge. 32Nà ma ki ŋlonʔo nya Farahon wí maʔa ŋolo ŋolohara syɛn, Nyɛʔɛlɛ liì bi ki woʔo ga hanri ge. Lí biʔi hanri ticaʔaga ceŋge. 33Ki tɔ na, Farahon wi naŋa wà fara wi po ticliŋi, wi po nɛ kaʔa cɛnfɔlɔ jango wuu tɛnŋɛ Ejipite klo li yugu na. 34Farahon wiʔi hanri ban, wi caflaa kundiʔiyee pee fara wi pe tɛnŋɛ klo li yugu na ge, jango pe akaba pi kɔgunnu kɔgunnu wobo pì bɛfu fara pe pi tyɛʔɛ wa ki akaba yɛʔɛ́ nasyɛn gee ni ge. 35Pe ki yɛkmaʔa gee ke akaba fara pe pi kpoʔolo bogoo ni Farahon wi fanŋa ni ge. Pe pi kpoʔolo wa kpo kyɛ̀rɛ̀ tì bɛfu ni pe da pi kɔrɔsi kmaʔa. 36Ki akaba pi kò wa tyɛʔɛhaʔa klo kan le funŋu yɛʔɛ́ nasyɛn gee kala na ké na pan wa ge. Ki funŋu ga kí bi ba do Ejipite klo na le, jango ki funŋu kò gá ba klo cɔʔɔ le.»

Josɛfu wí ma krɛʔɛ Farahon wi lekpangbanŋa

37Ki kayoʔo ki da glán Farahon ni ceŋge ní wi tungɔɔ ní be. 38Farahon wɔ̀ɔ kí yo pé kan mà yo: «Pa wo hɛn wà ta nɛ pa ki naŋa ŋa nyɛ we yo, Nyɛʔɛlɛ li Nyìli li po wí ni ge?»

39Farahon wɔ̀ɔ kí yo Josɛfu ma we mà yo: «Nyɛʔɛlɛ pa li gâ ma haʔa á ma ki woʔo ga kì bɛfu cɛn ge, hɛn wà wo naʔa ŋa wí bi bo ticlimi nì bì bo kaʔa cɛnfɔlɔ bì doro mo na we. 40Mo wi má bi glɛn na go ki yugu na. Na klo hɛɛn pè bɛfu pé bi da ma kayoro kpɔʔɔ de. Masaʔa aconʔo kiì nigbe bi na kân bì gbɔʔɔ má na ge.» 41Farahon wɔ̀ɔ Josɛfu po we: «Welé, mí ma ma tɛnŋɛ Ejipite klo lì bɛfu li yugu na ge.»

42Ki kruʔu ma Farahon wɔ̀ɔ wi klo flɛmɛ feʔeŋe fara wa wi kabɛlɛ na mòo le wa Josɛfu wi wolo na le mà drekmara le wí na mà tɛ nyoʔomo le wí na wa atiʔi ge.#41:42 ma wèle wa Dan 5:29 ni wè. 43mòo tɛnŋɛ syongida kɔ̀rɔ̀ kà na ga ki dáa ba wi woʔo na ge. Hɛɛn à pe klu yɛʔɛ̀ na taʔara naʔa nyu mà yo: «Ye kloʔò yaʔa ge!» Ki pomo na me Farahon wí ma Josɛfu krɛʔɛ Ejipite klo li kundiʔi.

44Farahon wɔ̀ɔ kí yo Josɛfu ma nɛ mà yo: «Domi mí nyɛ Farahon. Di mo na mɛɛ kloʔò kan ki woo ma we, hɛn wà wo naʔa Ejipite klo lì bɛfu ni bì gban bi kyɛʔɛ jrɛʔɛ namuru, ná kiì ban, cele li yoo ge.»

45Farahon wɔ̀ɔ yele kan Josɛfu na noo yeri Safinati Payeneyaki. Ki kruʔu ma wɔ̀ɔ Oni kàkpɔ̀ʔɔ sraʔá farafɔlɔ Potifera picɛ Asinati kan wí ma wi po wi cɔ. Josɛfu wɔ̀ɔ jɛ mà nyari mà Ejipite klo wele le. 46Nyiŋi ga na Josɛfu wi da bâ yere be Ejipite klo fɔlɔ Farahon tanla we, wi dá bo wí ma ta yɛʔɛ́ fonɛrɛ ma kɛ̀ kɛ̂.

Ki kruʔu ma wɔ̀ɔ nyari wa Ejipite klo lì bɛfu ni. 47Yɛkmaʔa nasyɛn ni Ejipite klo tra à ti akaba fafaʔa sɛ ceŋge. 48Ki yɛʔɛ́ nasyɛn akaba be, Josɛfu wi da pí kpoʔolo wa Ejipite klo kyɛ̀rɛ̀ ni de. Wi da pí kpoʔolo klɛnmɛ ma nì mi kere akaba wi na pi kpoʔolo wa ki klɛnmɛ mi kàʔà kà ni. 49Josɛfu wi dá bru tya tiʔi pibi kpoʔolo mà pi tyɛʔɛ fafaʔa ceŋge nɛ pa nyugbɔmo tanla tanyrɛʔɛ nyɛ ge. Pe ìn dàá pi tonli adi mɛjɛn pe ìn dà bî gban bìʔi hanri.

50Sanni funŋu kí bi do yɛkplɛlɛ na le, Oni kàkpɔ̀ʔɔsraʔá farafɔlɔ ŋa pé na yeri Potifera wi picɛ Asinati wɔ̀ɔ pii syɛn he Josɛfu ma we, à pe po nabii. 51Josɛfu wɔ̀ɔ wi pikplɛɛ wi yele kan mà noo yeri Manase, mɛjɛn wi daʔá yo mà yo: «Nyɛʔɛlɛ lí ma na kan, à mi lama wɔ na cɔlɔʔɔ ní, ní na to wi go ní ge.»

52Wɔ̀ɔ syɛnwoo wi wolo kan le noo yeri Efrayimu, mɛjɛn wi dá yo Nyɛʔɛlɛ lí ma na kân, à mi na hin naʔa klo la ni pe dáa na cɛrɛ ge.

53Ejipite klo li dá akaba ta yɛʔɛ́ nasyɛn gee ni, à ke ga bâ gɔ. 54Funŋu yɛ̀ʔɛ́ nasyɛn gee Josɛfu wi dá ki kayoʔo yo ge, à keʔe hli mà na pan. Funŋu ki dá do wa klòʔo kè bɛfu ni, di bru wɔ̀ɔ po wa Ejipite klo ni le. 55Funŋu ki da gâ do Ejipite klo woo na be nyiŋi ga na, à pe taʔara mà Farahon yeri we jango wi bru wà kan pé ma. Farahon wɔ̀ɔ kí yo Ejipite klo woo pè bɛfu ma mà yo: «Yee sye Josɛfu krugu. Nòo ya yo ye ga hanri, yeʔe hanri.» 56Funŋu ki dá bo wa ceŋge Ejipite klo ni le. Josɛfu wi dá akaba ba fara má pi tyɛʔɛ ge. Wɔ̀ɔ pi nyɛʔɛ mà na pi pɛrɛ Ejipite klo woo ma be. Funŋu ki dá do kpangbanŋa ceŋge wa Ejipite klo ni le. 57Klòʔo kè bɛfu ke dáa ban Ejipite klo ni mà báa akaba syo Josɛfu ma we. Mɛjɛn wa klòʔo kè bɛfu ni funŋu ki dá bo wa tipeʔe ceŋge.

Currently Selected:

HLIMI 41: NLK10

Highlight

Copy