HLIMI 4

Kanyɛ nì Abɛli nì

1Adan pɔɔ da gâ wi cɔ Ɛfe cɛn cɛlɛ, wɔ̀ɔ̀ acɛnlɛ ta mà bâ Kanyɛ he mà yo mí ma nabii wà he naʔa drunya ni Bajegɔ Nyɛʔɛlɛ li fanŋa ni ge. 2Ɛfe wɔ̀ɔ bâ Kanyɛ wi conlo Abɛli he we.

Abɛli wi dá bo ajobo naʔafɔlɔ. Kanyɛ wɔ̀ɔ po caflaa. 3Nyiŋi kà dà gâ doro kɔ, Kanyɛ wɔ̀ɔ pan wi kere akaba pà nì bì ba pi fara sraʔa Bajegɔ Nyɛʔɛlɛ ma le. 4Abɛli wiì fanna wɔ̀ɔ pan wi mbara pikplɛɛ pèè ní mà bâ ti fara sraʔá mà degmaʔa kan Nyɛʔɛlɛ ma le. Bajegɔ Nyɛʔɛlɛ à li Abɛli kpe ní wi sràʔá ní we.#4:4 ma wèle wa Ebr 11:4 ni wè.

5Di li ìn Kanyɛ kpe ní wi sràʔá ní we. Kanyɛ wi lama à mi gban wi na ceŋge, wɔ̀ɔ yɛʔɛ̀ pɛn ge. 6Bajegɔ Nyɛʔɛlɛ à li Kanyɛ po we: «Nyaʔa ma kan á ma lama gban me? Nyaʔa ma kan má ma yɛʔɛ̀ pɛn? 7Nà ma da kmaʔa hanri, pa ma gban bì ma yugu jrɛʔɛ ge. Di nà mɛ ìn da kmaʔa hanri, kapeʔe kí nyɛ nɛ pa ajoʔo nyɛ ga kí na kori be ma goyɛʔɛ na ge. Ki laa àʔa na ma cun, di mo ma fanŋa taʔa na.»

8Ki nyiŋi na, Kanyɛ wɔ̀ɔ wi conlo po: «Ma pan wo nyini finmi na.» Pe gâ nyini nyiŋi ga na, Kanyɛ wɔ̀ɔ to wi conlo Abɛli na mòo kpo.#4:8 ma wèle wa Mat 23:35, Luk 11:51; 1Jan 3:12 ni wè.

9Bajegɔ Nyɛʔɛlɛ à li Kanyɛ yugu mà yo: «Ma conlo Abɛli wí nyɛ hanbe?» Kanyɛ wɔ̀ɔ yo: «Mi ìn ki cɛn. Mì wi mí nyɛ na conlo wi welefɔlɔ we yo?»

10Nyɛʔɛlɛ à li yo: «Nyaʔa gi má ma hanri ge? Má ma ma conlo wi disyan wo tra na de. Ki disyan kí nyɛ ma syɛnwoo mà na can ma ní. Kí nyɛ nɛ pa hɛn akpolo nyɛ la lí naʔa ca pe ma cɔlɔ ga kala na má ma hanri ge.#4:10 ma wèle wa Ebr 12:24 ni wè.

11Tra da tí ma ma conlo wi disyan jɔ ŋa ma kpó ge, ki tɔ na, má ma danŋa wa ti na. 12Nà ma da tra fali de, tòo da ti akmama kanʔa ma ma adi. Má bi bo kasyɛn fun bì bo lefaʔa naʔa tra na de.»

13Kanyɛ wɔ̀ɔ Bajegɔ Nyɛʔɛlɛ po le: «Na cɔlɔʔɔ kí ma kpɔʔɔ mà toro na fanŋa na ge. 14Alaʔa nî má ma na prɔ naʔa trakmara na de. Mí bi gɛri leʔe bì yà hra ma na. Mí bi bo kasyɛn fun bì bo lefaʔa su naʔa tra na de. Nà hɛn ŋa bi ná nya tɔʔɔ, pɔɔ na kpo.»

15Di Bajegɔ Nyɛʔɛlɛ a luu po: «Ayo, mɛjɛn nà hɛn ŋa bi ma kpo, kí ma yala pe hɛɛn nasyɛn kpo ki na bo ma kpolo fwɔʔɔ kí ma ton.»

Ki nyiŋi na, Bajegɔ Nyɛʔɛlɛ à li jɛnlɛ là pa Kanyɛ na we jango hɛɛn wà wo gɔɔ kpo, ŋa wí buu nya wuu cɛn. 16Ki nyiŋi na, Kanyɛ wɔ̀ɔ kɛri mà yâ glɛn wa klo la ni pé na yeri Node ge mà po leʔe Bajegɔ Nyɛʔɛlɛ ní wa Edɛn wi yaa jɛhaʔa namyɛlɛ na le.

Kanyɛ wi kluʔu pii

17Kanyɛ wi da gâ wi cɔ cɛn cɛlɛ kɔ, wɔ̀ɔ acɛnlɛ ta mà pyɔ wà he, wɔ̀ɔ po nabii. À pe noo yeri Enoke. Kanyɛ wɔ̀ɔ kàʔà kà fan mà wi pyɔ yele kanʔa na naʔa yeri Enoke. 18Enoke wi dá bo Irade wi to. Irade wɔ̀ɔ po Meehuyayɛli wi to. Meehuyayɛli wɔ̀ɔ po Metusyayɛli wi to. Metusyayɛli wɔ̀ɔ po Lemɛki wi to.

19Lemɛki wɔ̀ɔ bâ cɛɛ syɛn pɔri. Cɛkplɛɛ pe dáa wi yeri Ada na syɛnwoo yeri Sila. 20Ada wɔ̀ɔ bâ Yabale he. Yabale wi kluʔu pii pee bɛ bee ni pé na ajobo naʔa na kori kpasyoro goro ni ge. 21Yabale wi conlo pe dáa wi yeri Yubale. Yubale wi kluʔu pii pee bɛ pé na akɛɛ kmo ná máʔa wyeri ge. 22Sila wi dá nabii wà he kpo. À pe noo yeri Tubalekanyɛ. Wi dá bo na kanyɛrɛ timoro kmo. Wɔ̀ɔ na tungɔyrɛbɛ hanri kanyɛrɛ nì, ní timoro nì. Wi cɛpii pe dáa wi yeri Naama.

23Lemɛki wɔ̀ɔ kí yo wi cɛɛ ma be mà yo:

«Ada ní Sila, ye lòʔó ná ma.

Ee, yèé bee yé nyɛ Lemɛki wi cɛɛ be,

ye da nurú kmaʔa.

Nà pe na kmo, mi na hɛn kpo.

Nà pe ná kla, mi na najɛpii wà kpo.

24Nàʔa po kí ma yala pe hɛɛn nasyɛn kpo kpɛn pe na Kanyɛ wi kùʔù fwɔʔɔ ton ge,

kí ma yala pe hɛɛn too tanri ní kprɔʔɔ ní nasyɛn kpo pe na da pe na woʔo ton ge.»

25Ki kruʔu ma Adan nì, wi cɔ nì, à pe bâ nabii wa he nɛ. Ɛfe wɔ̀ɔ noo yeri Sɛti, mɛjɛn wi dá yo: «Ki tɔ na, Nyɛʔɛlɛ lí ma na kân nabii wà nì nɛ Abɛli wi nolo, ŋa Kanyɛ wi da gbó ge.»

26Sɛti wɔ̀ɔ bâ nabii wà he noo yeri Enose. Ki nyiŋi kiì gi hɛɛn pe daʔa hlí mà na Bajegɔ Nyɛʔɛlɛ yele yeri le wa pe nyɛrimi ni me.

Currently Selected:

HLIMI 4: NLK10

Highlight

Copy