HLIMI 33

Jakɔbe wí ma flin Esawu nì

1Jakɔbe wi gâ yɛʔɛ̀ jrɛʔɛ mâ wele mà Esawu nya wí na pan wa hɛɛn saa syɛn ní, wɔ̀ɔ wi pii tiʔibi be Leya nì Hrasyɛli nì, ní pe tungɔɔ cɛɛ syɛn na be. 2Wi dá pe tungɔɔ cɛɛ pee klu yɛʔɛ̀ ní pe pii ní be. Ki kruʔu ma Leya wɔ̀ɔ pa pé na wi pii ní be. Hrasyɛli wɔ̀ɔ tanʔa naʔa Josɛfu nì we. 3Wiì wi da glú pe yɛʔɛ̀. Wɔ̀ɔ yâ kunbiʔi kán tra na fɔ mà yâ no wa wi lɛ na. 4Esawu wɔ̀ɔ fɛ mà yɔ́ɔ̀ flin mòo co atiʔi ni mòo traʔa wi na. Pè syɛnmu à pe kpele. 5Esawu wi gâ wi yɛʔɛ̀ jrɛʔɛ mâ wele, wɔ̀ɔ cɛɛ ní pii nya be. Wɔ̀ɔ yo: «Han woo bɛ má ni bee be?» Jakɔbe wɔ̀ɔ wí po: «Pii bee Nyɛʔɛlɛ lí ma kan ma tungɔɔ má we pee bɛ.»

6Tungɔɔ cɛɛ à pe na flo naʔa mà bâ kunbiʔi kán wì tanla pe pii ní be. 7Leya nì wi pii ní à pe na flo naʔa kpo mà bâ kunbiʔi kán ge. Ki kruʔu ma Hrasyɛli wɔ̀ɔ flo naʔa mà bâ wi woʔo kán kpo Josɛfu nì we. 8Esawu wɔ̀ɔ wí po: «Má bi nyaʔa hanri ki janma ŋa nì mí ma flin ge?» Jakɔbe wɔ̀ɔ yo: «Mí naʔa ca jango bì ma glan.» 9Esawu wɔ̀ɔ wí po: «Yrɛbɛ̀ fafaʔa nyɛ ná ma, na conlo. Ba pí nyɛ má ma ta sye pí ni.» 10Jakɔbe wɔ̀ɔ wí po: «Ayo, mí na ma fɛn, nàʔa po mí na ma glanʔa cɛnŋɛ na, ma na kyɛʔɛ yrɛbɛ kpe ba mí ma kan má ma ge, mɛjɛn piì kala na mí ma gban mâ ma wele yɛʔɛ̀ na nɛ pa pé na Nyɛʔɛlɛ wele le, à ma ná flin kmaʔa. 11Ki kala na, maʔa ta ma na kyɛʔɛ yrɛbɛ kpe ba mí ma kan má ma ge, mɛjɛn Nyɛʔɛlɛ lí ma hli mà na haʔa ceŋge mà na kyɛʔɛ nyi ge. Yraʔa kɛ̀ ìn na la.»

Wi dáa wi ciʔili fɔ Esawu wɔ̀ɔ gáʔà ta. 12Esawu wɔ̀ɔ wí po: «Ma pan wo kloʔò kpe wo da sye. Mí bi glu ma yɛʔɛ̀.»

13Jakɔbe wɔ̀ɔ wí po: «Na lɛ, kí nyɛ cɛnŋɛ pii pe kala lí nyɛ kpangbanla. À mbara ma po na ma ní niri nì da tí na ti pii kanʔa á pe na ŋori ge. Nàʔa po pe da tí ciʔili mà yo ti kloʔò kì bɛfu tanʔa wlɛʔɛ nigbe, ajobo pì bɛfu pi dá bi jɔʔɔ. 14Kí ma yala mo bí da bin kplɛɛ nà na. Domi pa mi da ba ma na bì da danri teme na ajobo nì ba pí bi glu na yɛʔɛma ní bì da danri kpo teme na pìi ní be fɔ bì yà no wa ma deʔe na wa Seyiri ni we.»

15Esawu wɔ̀ɔ yo: «Mí ma cori bì na hɛɛn pee yaʔa naʔa má ni.» Jakɔbe wɔ̀ɔ yo: «Ki woʔo ga ki kɔ̀rɔ́ wí nyɛ nyaʔa ní? Na lɛ, Maʔa yaʔa ma na haʔa.» 16Ki wlɛdege na, Esawu wɔ̀ɔ kloʔò kpe mà na sye Seyiri ni we. 17Jakɔbe wɔ̀ɔ kɛri su ni. Wɔ̀ɔ yâ go fan wiì wi woʔo ma kajoʔolo kán wi ajobo kan be. À kiì ma kan á pe na ki deʔe yeri Sukɔti ge.

Jakɔbe wí ma klɛn wa Sisyɛmu tanla

18Pɔ̀ɔ da gâ jɛ wa Babilɔni ni, àʔa tonli wí kan kmaʔa ceŋge. Wɔ̀ɔ bâ je wa nɛ Sisyɛmu kàʔà ni wa Kana klo ni le mà bâ glɛn wa kàʔà kruʔu ma. 19Wi dá ki kere syɔ da ni wi da glɛ́n ge. Wɔ̀ɔ tí syɔ Amori pii ma be, ŋa wi dá bo Sisyɛmu wi to we. Wi da tí syɔ waafiʔi too kɔgunnu na. 20Be ki deʔe na, wɔ̀ɔ sraʔá farahaʔa fan be mà naʔa yeri Ɛli Elohe Israyɛli.

Currently Selected:

HLIMI 33: NLK10

Highlight

Copy