HLIMI 17

Abramu wi yele lí ma krɛʔɛ Abrahamu

1Abramu wi da gâ da yɛʔɛ́ too ticɛrɛ ní kprɔʔɔ ní yɛʔɛ́ nacɛrɛ nyiŋi ga na, Bajegɔ Nyɛʔɛlɛ à li pan wì krugu mà bɔ́ɔ̀ po: «Mí nyɛ Nyɛʔɛlɛ la Sye wì bɛfu fɔlɔ we. Ma da danrí na yɛʔɛ̀ ma ge, ma po baʔahaʔa fun. 2Mí bi na yoflimi nofele le wa wò kpafoʔo ni mì nì mo ní we bì kluʔu pii fafaʔabaa kan má ma ceŋge.»

3Abramu wɔ̀ɔ to mà wi yɛʔɛ̀ kàn tra na. Nyɛʔɛlɛ à li ní màʔa yo wí ma nɛ mà yo: 4«Welé, domi na yoflimi nofele lí la ma namyɛlɛ na le: Má bi ba bo klòʔo fafaʔagaa tokpɔ. 5Pe ìn bi da ma yeri Abramu adi, di pé bi da ma yeri Abrahamu, mɛjɛn mí bi ba ma krɛʔɛ klòʔo fafaʔagaa tokpɔ. 6Mí bi kluʔu pii fafaʔabaa kan má ma bee pé bi ba grɛʔɛ klòʔo fafaʔagaa ge. Masaa pèè bi ba nyini wa ma kluʔu pii ni be. 7Mí bi ki yoflimi nofele yaʔa li kò mì nì mo ní wò kpafoʔo ni, li po wa nɛ mì nì ma kluru pii ní wò kpafoʔo ni ali nàʔa ja bo moò nyɛ naʔa adi ge. Lí bi go wa wò kpafoʔo ni su. Nàʔa po ban pa mi bo ma Nyɛʔɛlɛ bì bo nɛ ma kluʔu pii pe Nyɛʔɛlɛ kpo.#17:7 ma wèle wa Luk 1:55 ni wè.

8Mo ní ma kluʔu pii ní mí bi ba ki klo la lì bɛfu kan ye ma, la má nyɛ naʔa lí ni nabonŋo ge. Kana klo lì bɛfu lí bi ba bo pe wolo nyiŋi kì bɛfu na, pa mi bo pe Nyɛʔɛlɛ.»#17:8 ma wèle wa Pit 5:7 ni wè.

Wi legeme kayoʔo

9Nyɛʔɛlɛ à liʔi yo Abrahamu ma nɛ mà yo: «Mo ní ma kluru pii ní ye da na yoflimi nofele kpɔʔɔ le. 10Ga mí ma cori ye hanri jiji mo ní ma kluru pii ní be kí ga: Hɛn o hɛn ŋa wí nyɛ wa ye ni mâ po nabii wi, kí ma yala wi lege. 11Yè legeme mí bi bo jɛnlɛ yoflimi nofele kala na la mí ma le mì nì yèé ní wò kpafoʔo ni ge. 12Nyiŋi ga nì ki kluʔu nabipiʔi, ga nì ki kluʔu nabipiʔi kí ma yala pe da pe lege, nyiŋi ga na pé bi gà wlɛʔɛ natanri ta ge, ní ŋkloo bee ní pé ma he wa ma deʔe na, bee ní pe nyɛ nabonmoo mâ po má ma pe syɔ, áʔa hin bo pe ìn dà glu bì bo wa ma deʔe na ge. 13Ki pomo na kí ma yala ŋklo ŋa wí nyɛ wa ma deʔe na ní ŋa nì má ma syɔ pe pe lege, jango na yoflimi nofele la mí ma kon ye ma li nyòŋó wa ye wre na de la lí nyɛ nyiŋi kì bɛfu wolo li ge. 14Di nà naŋa wà bí bo wa balegee, pɔɔ fara wa hɛɛn pe tɔɔ ni be ga na wí ma ce, wi ìn na yoflimi nofele kayoʔo kpɔʔɔ ge.»

15Ki kruʔu ma Nyɛʔɛlɛ à liʔi yo Abrahamu ma we mà yo: «Mò gáa ma cɔ yeri we Sarayi adi, mɛjɛn kí ma yala pe dɔɔ yeri Sara. 16Mí bi frɛmɛ pa wí na bùu hanri wi pyɔ nabii wà he má kan. Mí bi frɛmɛ pa wí na bùu hanri wi ba bo klòʔo fafaʔa no. Klòʔo fafaʔa masaa bi ba nyini wa wi kluʔu ni ge.»

17Abrahamu wɔ̀ɔ to mà wi yɛʔɛ̀ kàn tra na mà tyɛʔɛ ceŋge, mɛjɛn wi daʔá yo mà yo: Mí biʔi po mɛlɛ bí pyɔ ta mì ŋa mí ma ta yɛʔɛ́ too kɔgunnu ge? Sara pɔɔ ki po mɛlɛ bí grɛʔɛ pyɔ no, wiì ŋa wí ma ta yɛʔɛ́ too ticɛrɛ ní kprɔʔɔ ge? 18Wɔ̀ɔ kí yo Nyɛʔɛlɛ ma le mà yo: «Jango Isimayɛli wiì bí go nyuwyeʔe na, wi kala li da ma glànʔá. Ho na yraʔa kà ca adi bì doro ki woʔo ga na ge.»

19Nyɛʔɛlɛ à li yo: «Ayo! Ma cɔ Sara wí bi ba nabiple he má kan. Ma baa wi yeri Isake. Mí bi ba na yoflimi nofele funŋu le wiì ma ní wi kluʔu pii ní be. Ki yoflimi nofele lí bi bo nyiŋi kì bɛfu wolo. 20Bì haʔa wa ki woʔo na mí ma ga loʔo má ma nyɛri ná ma Isimayɛli wi kala na le. Mí bi frɛmɛ pa wí na. Mí bi bɔɔ hanri wi nyɛʔɛ. Mí bi ba wi kluʔu pii nyɛʔɛ be. Wí bi ba bo masaa kɛ̂ ma kɛ̀ syɛn to. Wi kluʔu pii pé bi ba grɛʔɛ klo kpangbanla.

21Di na yoflimi nofele lí bi ba bo Isake wolo, nabiple la Sara wí bi ba he má kan yɛlaban ni ki nyidege ga na ge.»

22Nyiŋi ga na Nyɛʔɛlɛ li da gâ yo kɔ Abrahamu nì we, à li jɛ be wì tanla mà kɛri namuru ni. 23Abrahamu wɔ̀ɔ jɛ mà wi pyɔ Isimayɛli co mà plɛn ŋkloo bee ní pe dá bo wa wì ní, ní bee ní wi dá syɔ, ki na po pé yo nabii pè bɛfu bee pe dá bo wa wi go nî ge. Wɔ̀ɔ pe lege ki wlɛdege na nɛ pa Nyɛʔɛlɛ li daʔá yo mâ yo wiʔi hanri pomo ma na ge. 24Nyiŋi ga na pe da legé, Abrahamu wi dá bo wí ma ta yɛʔɛ́ too ticɛrɛ ní kprɔʔɔ ní yɛʔɛ́ nacɛrɛ. 25Wi pyɔ Isimayɛli wɔ̀ɔ po wí ma ta yɛʔɛ́ kɛ̂ ma kɛ̀ tanri. 26Ki wlɛdege na, Abrahamu wi da legé, wi pyɔ Isimayɛli nì we kpo, 27mà plɛn nabii pè bɛfu ní bee pe dá bo wa Abrahamu wi go ni ge, ŋkloo bee pe he wa wi go nî yoo, bee ní wi dá syɔ nabonmoo pee ma yoo.

Currently Selected:

HLIMI 17: NLK10

Highlight

Copy