HLIMI 16

Isimayɛli wi heme

1Sarayi ŋa wi dá bo Abramu wi cɔ we wi ìn dà pyɔ wà he Abramu kan we. Di tungɔɔ wà dà bo wí ma cɛlɛ mà po Ejipite klo woo cɔ wi. À pe noo yeri Agari. 2Sarayi wɔ̀ɔ kí yo wi pɔlɔ ma mà yo: «Welé, má maʔa nya, Bajegɔ Nyɛʔɛlɛ li ìn jeʔe ta domi bì pii ta. Kana pa mi gban bi nabiple là ta na tungɔɔ cɛlɛ wi fanŋa ni ge. Ma ya syɛ̀n wa wi ní yebliʔi ni ge.»

Abramu wɔ̀ɔ Sarayí wi kayoʔo kpɔʔɔ ge. 3Sarayi wɔ̀ɔ wi tungɔɔ Agari co mòo kân wi pɔlɔ Abramu ma nɛ pa wi cɔ nyɛ we. Abramu wi dá bo wí ma ta wa Kana klo ni yɛʔɛ́ kɛ̂. 4Abramu wɔ̀ɔ syɛn wa Agari nì ki yebliʔi ni, wɔ̀ɔ acɛnlɛ ta. Nyiŋi ga na wi da gáʔà cɛn mâ yo wí bi ba pyɔ he ge, wɔ̀ɔ na wi kafɔjɔ wele noo nyaʔa wí ma cɛrɛ wi yɛʔɛ̀ na ge. 5Sarayi wɔ̀ɔ Abramu po we: «Kí ma yala mo bí ki tyɛʔɛgɛɛ gee kun ge ma ni! Mì wi mi dá na tungɔɔ kan ma ma, di mà jâ gbe wí ma acɛnlɛ ta wí na na cɛrɛ su. Bajegɔ Nyɛʔɛlɛ li krɛ̀ʔɛ̀ mì nì mo ní wò kiti konfɔlɔ.»

6Abramu wɔ̀ɔ wí po: «Ma ŋkojɔ wí nyɛ wa ma kyɛʔɛ ni. Ga kí na ma glanʔa maʔa hanri wí na.» Ki nyiŋi na Sarayi wɔ̀ɔ na Agari cɔlɔ we ceŋge fɔ wɔ̀ɔ gâ fɛ mà kɛri sinbriʔi ni. 7Bajegɔ Nyɛʔɛlɛ li mlɛŋɛ wɔ̀ɔ wí nya wa pluʔu ga tanla, kí nyɛ wa Suri klòʔò tanla ge 8mòo yugu mà yo: «Agari, Sarayi wi ŋkojɔ, má ma jɛ hanbe, má mɛɛ na sye hanbe?»

Wɔ̀ɔ yo: «Mí na fe na kafɔjɔ na we.»

9Bajegɔ Nyɛʔɛlɛ li mlɛŋɛ wɔ̀ɔ wí po: «Hru, maa sye ma kafɔjɔ krugu ma yaa mà cɛrɛ wí kan. 10Bajegɔ Nyɛʔɛlɛ li mlɛŋɛ wɔ̀ɔ kí yo wí ma mà yo: Mí bi kluʔu pii kan má ma fafaʔabaa fɔ hɛn wà woo gban bì pe tonli. 11Bajegɔ Nyɛʔɛlɛ li mlɛŋɛ wɔ̀ɔ kí yo wí ma mà yo: Welé, má nyɛ acɛnlɛ nì. Má bi ba nabii he. Ma baa wi yeri Isimayɛli, mɛjɛn Bajegɔ Nyɛʔɛlɛ lí ma ma cɛnʔɛ loʔo ge. 12Ma pyɔ wí bi ba bo nɛ pa sofɛnlɛ la nyɛ lí nyɛ wa nya ni. Wí bi baa mlaʔa kmo hɛɛn pè bɛfu ní. Hɛɛn pè bɛfu pa pe da mlaʔa kmo wí ni kpo. Wí bi baa goro wì yɛ wi hɛnnyɛɛ pè bɛfu ní.»

13Wɔ̀ɔ yele kan Bajegɔ Nyɛʔɛlɛ na le mà na li yeri Ata Ɛli Hruwayi,#16:13 Hruwayi (Ata Ɛli): Ma nyɛ Nyɛʔɛlɛ la li na na nyaʔa ge. mɛjɛn wi dá yo: Mí ma nyaʔa nya naʔamɛ ge, liì pa li gâ na nya kɔ ge? 14Kiì kala na, kɔ̀lɔ́ ŋa wí nyɛ Kadɛsi nì, ní Berɛdi nì pi kpafoʔo ni pé noo yeri Lahayi Hruwayi.#16:14 Hruwayi (Lahayi): Ŋa wí nyɛ nyuwyeʔe na mà na na nyaʔa ge wi kɔ̀lɔ́.

15Agari wɔ̀ɔ bâ pyɔ he. Wɔ̀ɔ po nabii. Wi to Abramu wɔ̀ɔ noo yeri Isimayɛli. 16Abramu wi dá bo wí ma ta yɛʔɛ́ too ticɛrɛ ní yɛʔɛ́ noli Agari wɔ́ɔ ki pyɔ nabii he wi ma ge.

Currently Selected:

HLIMI 16: NLK10

Highlight

Copy