HLIMI 15

Nyɛʔɛlɛ lí ma yoflimi nofele kon Abramu ma we

1Ki kaʔa ke kruʔu ma, Bajegɔ Nyɛʔɛlɛ à li bâ yo Abramu nì ŋlonʔo na mà yo: «Mò ga fya, Abramu! Mí nyɛ ma kɔrɔsi fɔlɔ. Mí bi tonro kpangbanŋa kan má ma.»

2Abramu wɔ̀ɔ yo: «Na fɔlɔ Bajegɔ Nyɛʔɛlɛ, má bi ba nyaʔa kan ná ma? Mí na sye pyɔ fun. Na krɔʔɔ lifɔlɔ ŋa wa na go nî ge Elyesɛri wi ŋa Damasi kàʔà woo we. 3Wɔ̀ɔ ní mà yo nɛ: Mɛ ìn kluʔu pii kan ná ma. Ki kala na ŋa wí ma he wa na go ni wí bi bo na krɔʔɔ lifɔlɔ.»

4Bajegɔ Nyɛʔɛlɛ à luu po: «Ayo, wiì ban wí bi ba ma krɔʔɔ li. Di ma pihee wi wí bi baʔa li ge.»

5Ki kruʔu ma mà Abramu co mà nyini wí ni wa wi kpasyoro go nî mòo po: «Ma yɛʔɛ̀ jrɛʔɛ ma nyɛʔɛlɛ wele le, ma ŋoŋoo tonli, nàʔa po pa ma gban ge mà nì mòo po nɛ: Ké nyɛ pomo ma na, ma kluʔu pii pé bi ba nyɛʔɛ ban kpo.» 6Abramu wi da bá Bajegɔ Nyɛʔɛlɛ na le. À li noo cun hɛnsinŋi.#15:6 ma wèle wa Hrɔm 4:3; Gal 3:6; Jake 2:23 ni wè.

7Li daʔá yo wí ma nɛ mà yo: «Mì wi Bajegɔ Nyɛʔɛlɛ la li da má yrigi wa Uri ni ŋa Kalideyee woo we, jango bì ba ki klo la kan le ma ma ma krɔʔɔ.» 8Abramu wɔ̀ɔ yo: «Na Fɔlɔ Bajegɔ Nyɛʔɛlɛ, mí biʔi po mɛlɛ biʔi cɛ́n bí yo lí bi ba bo na wolo ge?»

9Bajegɔ Nyɛʔɛlɛ à luu po: «Ma pan ná kan noproo ní, ŋkano nì, ní mbapɔlɔ ni pi po pí ma yɛʔɛ́ tanri ta, ní kòtolo ní krokpɛnlɛ ní.»

10Abramu wɔ̀ɔ pan ki ajobo nì be mà bâ pì jaʔabu pi nulala ni mà pi wojabubu pa be pì na ma kajɛnʔɛ kee yaʔa. 11Kakadubayee à pe na pan mà báa glɛn wa ki akubu na be, di Abramu wɔ̀ɔ na pe prɔ.

12Yaa ki gâ ba je kɔ, Abramu wɔ̀ɔ ŋolo mà ku kpligi. Fyara ti dɔɔ́ co, à yebliwɔlɔ mà kmo wí na ceŋge. 13Bajegɔ Nyɛʔɛlɛ à luu po: «Maʔa cɛn ma yo ma kluʔu pii pé bi ba gɛri ŋklomo ni wa klo là ni. Pa pe yàá pe cɔlɔ wa fɔ bi da yɛʔɛ́ saa syɛn.

14Di ki kruʔu ma, nà mi ga ba cɔlɔʔɔ wa ki klo hɛɛn bee na, ma kluʔu pii pé bi ba bo pe ŋkloolo ge, pa pe ba gban bì nyini wa ki klo ni le bì gɛri masaʔa fafaʔa nì.#15:14 ma wèle wa Nyi 12:40-41; Pit 7:6 ni wè. 15Di mo we má bi ba gu nyimi na, pe ma le ki po má ma lɛ kmaʔa ceŋge. 16Ma kluʔu pii pe ìn bi je ga hru bì ban naʔamɛ kí po kluru ticɛrɛwoʔo ban ge, mɛjɛn Amorite woo pe ìn je doro ki kanla na kpɛn wa pe tipere hranma ni me jango bì pe prɔ.»

17Nyiŋi ga na yaa ki da gâ je wa ki gò ní, yebliʔi áʔa kmo ge, cɛncɛnbo à kwɔwriʔi ní kwɔnyigee ma jɛ wa mà bâ doro be ki ajobo pi wokonbo kpafoʔo ni ge. 18Ki wlɛʔɛ na Bajegɔ Nyɛʔɛlɛ à li yoflimi nofele kon Abramu ma we mà yo: «Mí bi ba ki klo la kan le ma kluʔu pii ma be bì gbe wa Ejipite klo kanla lɔple na fɔ bì ba no wa Ufrate na, ga kí nyɛ lɔkpɔʔɔ gi ge.#15:18 ma wèle wa Pit 7:5 ni wè.

19Ki klo lí nyɛ bee wolo pé bee: Keni kluʔu woo ní Kenisi kluʔu woo ní, ní Kadimoni kluʔu woo ní, 20Ɛti kluʔu woo ní, Fɛrɛsi kluʔu woo ní, Hrefayimu kluʔu woo ní, 21Amɔ́ri kluʔu woo ní, Kana kluʔu woo ní, Girigasi kluʔu woo ní, ní Jebusi kluʔu woo ní pee bɛ.»

Currently Selected:

HLIMI 15: NLK10

Highlight

Copy