HLIMI 14

Abramu nì masaa ní, ní Mɛlikisedɛki nì

1Ki nyiŋi na masaa bee Amrafɛli ŋa Babilɔni woo ní, Ariyɔke nì ŋa Eleyasari woo ní, ní Kedɔrilawomɛri nì ŋa Elamu woo we, ni Tideyale nì ŋa Goyimu woo we 2à pe bâ mlaʔa kmo ki masaa bee ní be: Sodɔmu masanaŋa, Bera nì, ní Gɔmore woo ní ŋa pé na yeri Birisya ge, Syinabe nì ŋa Adima klo woo, ní Syemebɛri nì, Seboyimu woo ní, Bela masanaŋa nì we. Ki na po pé yo ŋa wí nyɛ wa Sowari ni we. 3Ki masaa pè bɛfu pe dá pè kpoʔolo wa Sidimu deʔe na ga alaʔa ni Kɔ nyugbɔmo mí ma tòn ge. 4Pe da glɛ́n mà Kedɔrilawomɛri kan fɔ mà ta yɛʔɛ́ kɛ̂ mà kɛ̀ syɛn. Di ki yɛʔɛ́ kɛ̂ ma kɛ̀ tanri wolo na, à pe ce wí ma. 5Ki yɛ̀ʔɛ́ kɛ̂ ma kɛ̀ ticɛrɛ wolo na Kedɔrilawomɛri nì, ní masaa bee ní pe dá bo wí ni à pe kɛri mà yâ Hrefayimu kluʔu woo ja be wa Asitarɔti Karinayimu mà we; mà Susimu kluʔu woo ja be wa Amu ni, mà Emini kluʔu woo ja be wa Kiriyatayimu gbedeʔe ma ge 6mà Seyiri kluʔu woo ja be wa pe deʔe kiì na wa Seyiri angoro ni mà pe prɔ fɔ mà yâ no wa Eli Paran ni ga kí nyɛ wa sinbriʔi tanla ge. 7Ki kruʔu ma à pe hru mà pan An Misyepate, ki na po pé yo: Kadɛsi. À pe bâ Amalɛke woo pe klɛnmɛ mì bɛfu cɔʔɔ mà Amɔri kluʔu woo ja bee pe dáa goro wa Asason Tamari ni we. 8Ki masaa bee pe dá gboʔolo teme na. Pé bee: Sodɔmu kàʔà woo ní Gɔmore kàʔà woo ní, Adima woo ní, Soboyimu woo ní, ní Bela woo ní, ki na po pé yo: Sowari. Ki masaa pe dá pe hɛɛn pè bɛfu kpoʔolo mà kɛri mà yáa mlaʔa kmo wa Sidimu tindɛʔɛ nî, 9masaa bee ní Kedɔrilawomɛri, ŋa Elamu woo ní, Tideyale nì ŋa Goyimu woo we, Amrafɛli nì Babilɔni woo we, Ariyɔke nì ŋa Eleyasari woo we. Masaa ticɛrɛ dá bo na can masaa kɔgunnu nì. 10Tindɛrɛ fafaʔa dà bo wa da ni pe dáa tra kro fara mâ na kogbɔrɔ hanri de. Ki tindɛrɛ ti dá bo wa Sidimu tindɛʔɛ deʔe kì bɛfu na. Masaa bee Sodɔmu nì, ní Gɔmore woo ní à pe na fe na tun wa ti nî, bee pe dá go nyuwyeʔe na à pe yâ hra wa angogo ni. 11Bee pe da pe já à pe masaʔa kì bɛfu kpe ga ki dá bo wa Sodɔmu kàʔà ni, ní Gɔmore woʔo ní mà akaba pì bɛfu plɛn mà pi kpe ba pi dá bo wa mà kɛri pí ni. 12Lɔte ŋa wi dá bo Abramu wi lɛ pyɔ we wi dá bo wa Sodɔmu kàʔà kiì ni. Ki woo à poo kpe màʔa plɛn wi masaʔa nì mà kɛri wí ni.

13Wà dà fɛ mà syɔ. Ki woo wɔ̀ɔ pan mà báʔà yo Abramu ma we ŋa wi dá bo Ebruyee woo, wɔ́ɔ bâ glɛn wa deʔe ga na Amɔri woo Mamre syɛni tiri deʔe na ge. Mamre wi dá bo Esikɔli nì, ní Anɛri nì pe heme woo. Pè bɛfu tanri pe dá bo yoflinmi ni Abramu nì we. 14Nyiŋi ga na Abramu wi da gáʔà loʔo mâ yo wi lɛ pyɔ pe kɛrí wí ni ŋklomo ni, wɔ̀ɔ wi hɛɛn pè bɛfu kpoʔolo hɛɛn saakere ní too kɔgunnu ní kprɔʔɔ ní hɛɛn natanri bee pe dá he wa wi go ni wɔ́ɔ pe ploʔo mlaʔa kmomo ní me mà jɛ mà pa pe bɛnfɛɛ na be mà pe prɔ fɔ mà yâ no wa deʔe ga na pé na yeri Dan ge. 15Abramu wɔ̀ɔ wi hɛɛn konʔolo be klɛnmɛ klɛnmɛ mà yâ do pe bɛnfɛɛ na be yebliʔi ni. Wi dá ki masaa ja be mà pe prɔ fɔ mà yâ no wa deʔe ga na pé na yeri Oba wa Damasi wi kamolo namyɛlɛ na le. 16Wi da wi bɛnfɛɛ pe yrɛbɛ pì bɛfu syɔ pé ma mà Lɔte plɛn wi yrɛbɛ ní ŋa wi dá bo wi lɛ pyɔ we, cɛɛ ní, ní hɛɛn pe tɔɔ ní be.

17Nyiŋi ga na Abramu wi da gâ hru mâ pan, ki ní wí ma masanaŋa Kedɔrilawomɛri ja we ní masaa pe tɔɔ bee ní pe dá bo wí ni ge. Sodɔmu masanaŋa wɔ̀ɔ bɔ́ɔ̀ flin wa Syafe tindɛʔɛ ni, ki na po pé yo masanaŋa wi tindɛʔɛ ge.

18Mɛlikisedɛki ŋa wi dá bo Salɛmu masanaŋa mâ ní mâ po nɛ Nyɛgbɔfiʔi sraʔá farafɔlɔ ge, wɔ̀ɔ pan bru ní, ní dufɛn nì, 19mà bâ Nyɛʔɛlɛ wa ma Abramu kan we mà yo:

«Nyɛgbɔfiʔi ga ki dá namuru ní tra hanri de,

ki frɛmɛ pa Abramu na we.

20Pe dá Nyɛgbɔfiʔi sonni

ga ki dá ma bɛnfɛɛ kan be má ma á ma pe ja ge!»

Abramu wɔ̀ɔ nigbe nigbe laʔa wa yrɛbɛ kɛ̂ kɛ̂ wi bɛfu na ba wi dá jɛ wa mlaʔa kmohaʔa na mà pi kân wí ma.

21Sodɔmu masanaŋa wɔ̀ɔ Abramu po we: «Ma hɛɛn kan be na ma, di ma yrɛbɛ pì bɛfu kpe, masaʔa nì ge kpo.»

22Abramu wɔ̀ɔ wí po: «Mí bi na kyɛʔɛ jrɛʔɛ bìʔi wa Bajegɔ Nyɛʔɛlɛ ma la Nyɛgbɔfiʔi mâ po li dá namuru ní tra hanri de. 23Mí bi nà klan bì yo mi ìn bi ma yrɛbɛ kà nigbe kpe ba pí nyɛ má ma ge, ali jese wi yo, ná kiì ban, sabara maʔala li yo. Nàʔa po ban moo gà gban bì yo: Mí ma Abramu hanri, wɔ̀ɔ krɛʔɛ masa. 24Mi ìn bi yraʔa kà kpe naʔa laʔa ba na na hɛɛn pe di gá, ní bee wobo ní pe di blɛn ná ni ge, Anɛri nì, Esyikɔli nì, Mamre nì, pee be kí ma yala pe pe tama ta me.»

Currently Selected:

HLIMI 14: NLK10

Highlight

Copy