PITUNBEE 9
9
Pɔli wi pama Jesu na we Damasi kàʔà klòʔò nî
1Ki nyiŋi na ge, Sɔli pɔɔ da gâ bo wí na wì sun adi wò fɔlɔ wi sɛrifɛɛ na be mâ yo wí bi da pe kpun ge, wɔ̀ɔ kɛri sraʔá farafɛɛ pe lagwɔ krugu we, 2mà yâ sɛbɛɛ nyɛri wí ma, bee wí yà gban bì jɛʔɛ́ Damasi kàʔà Juwifiyee pe sɛrigoro woo na be, jango, nòo yá wò fɔlɔ wi kloʔò ki tanʔafɛɛ pèè nya wa ge, nabii yoo cɛɛ yoo wi pe cò wi pan pé ni Jerusalɛmu kàʔà ni ge.
3Nyiŋi ga na wi da gáa sye kloʔò ni mâ na nori wa Damasi kàʔà tanla ge, wi kacɛnlɛ à paʔama mà ma jɛ wa namuru ni de mà bɔ́ɔ̀ kɛli. 4Wɔ̀ɔ to tra na de mà ákpolo là loʔo. À luu po: «Sɔli, Sɔli, nyaʔa ma po wa má na na cɔlɔ ge?» 5Sɔli wɔ̀ɔ yo: «Han wi má ni, na fɔlɔ?» Ki woo wɔ̀ɔ wí po: «Mì Jesu wi ŋa má na cɔlɔ ge. 6Ma jɛ̀ ma je kàʔà ni ge. Ga kí ma yala ma hanri ge, pé yàʔa yo wa ma kân.» 7Wi koblɛɛn be à pe po yerehaʔa. Pe ìn gban bì yrafyɛn yo. Mɛjɛn pe dáa yoʔo nuru ge, di pe ìn hɛn nya. 8Sɔli wɔ̀ɔ jɛ tra na de mà wi nyɛʔɛ nyɛʔɛ ge, di wi ìn da yrafyɛn nyaʔa. À poo co kyɛʔɛ na ge mà kɛri wí ni Damasi kàʔà ni ge. 9Wɔ̀ɔ yâ da wlɛrɛ tanri banya, bali, bajɔ.
10Àʔa hín bo sɛrifɔlɔ wà dà bo wa Damasi kàʔà ni ge pe dáa wi yeri Ananyasi. Wò fɔlɔ wɔ̀ɔ bâ yo wí ni nɛɛ ŋloʔo gi mòo po: «Ananyasi.» Ananyasi wɔ̀ɔ yo: «Na fɔlɔ, mí ŋa.» 11Wò fɔlɔ wɔ̀ɔ wí po: «Ma jɛ̀ maa sye kalama kloʔó ga ma pé na yeri Klosinŋi ge. Ma ya naŋa wà wele wa Judasi wi go nî ge, pé na ki naŋa yeri we Sɔli. Tarisi kàʔà woo wi. Wí nyɛ wa na Nyɛʔɛlɛ nyɛri le, 12mà gâ naŋa wà nya nɛɛ ŋloʔo gi, pé na ki naŋa yeri we Ananyasi, wi jé wa wì krugu mà yâ kyɛrɛ̀ pa de wi na, jango wi da nyaʔa nɛ.» 13Ananyasi wɔ̀ɔ yo: «Na fɔlɔ, mí ma ki naŋa ŋa wi kaʔa loʔo ge hɛnfafaʔa ma ní kapere tì bɛfu ní da wí ma hanri ma hɛɛn na be wa Jerusalɛmu kàʔà ni ge. 14Sye nyɛ wí ma naʔamɛ ge ŋa wí ma ta sraʔá farafɛɛ pe lagwɔɔ ma be wi gbàn wí hɛɛn pè bɛfu co bee pé na ma yele yeri le.» 15Di wò fɔlɔ wɔ̀ɔ wí po: «Ta sye, mɛjɛn ki naŋa ŋa we mí mòo fara nɛ pa na tungɔyraʔa nyɛ ge, jango wi yaa na yele jari le wa klòʔo ke tɔɔ ni ge ní klòʔo fɛɛ ní Israyɛli klo woo ma be. 16Cɔlɔʔɔ kì bɛfu ga kí ma yala wí cɔlɔ ná kan ge, do mì we, mí biʔi tyɛʔɛ wí na.»
17Ananyasi wɔ̀ɔ kɛri mà yâ je wa ki go nî ge mà kyɛrɛ̀ pa de Sɔli na we mà yo: «Sɔli, na woo, wò fɔlɔ Jesu ŋa wi dá wì tyɛʔɛ má na wa kloʔò ni ge, ga ma dá gbe ná pan naʔamɛ ge, wí ma na tun naʔa má ma, jango ma da nyaʔa nɛ, ma po nyìŋì Nyɛʔɛlɛ li Nyìli ní le.»
18Ki nyidege na ge, à yrɛbɛ pà ma nyiŋi wa Sɔli wi nyɛʔɛ ni ge nɛbo fyɔ nagrɔbɔ bi mà to. Wɔ̀ɔ na nyaʔa kpo mà jɛ mà wì kân à poo batise. 19Wi gâ li ge, wɔ̀ɔ fanŋa ta.
Sɔli wí ma Nyɛʔɛlɛ li kayoro yo wa Damasi kàʔà ni
Wɔ̀ɔ wlɛrɛ tà kɔ wa sɛrifɛɛ bee ní pe dá bo wa Damasi kàʔà ni ge, 20màʔa hli kpo mà naʔa jari wa Juwifiyee pe sɛrigoro ni de mà yo Jesu wí nyɛ Nyɛʔɛlɛ Pyɔ. 21Hɛɛn pè bɛfu bee pe dáa nuru wí ma ge, àʔa na pe fun. À pe naʔa pin: «Hɛn ŋa wi dáa ki yele li yerifɛɛ cɔlɔ be wa Jerusalɛmu kàʔà ni ge wiì ban yo? Wi ìn dà ban naʔa kpo yo, jango bì ba ki woo co be bì gɛri pé ni sraʔá farafɛɛ pe lagwɔɔ kan be yo?»
22Di à fanŋa kà na hari wa Sɔli wi kayoro na de na sye. Juwifiyee bee pe dá bo wa Damasi kàʔà ni ge, wɔ̀ɔ na pe lama punŋu me pe na, nyiŋi ga na wi dáa ki teri pé na náʔa fligi mâ yo Jesu wí nyɛ Nyɛʔɛlɛ li wofràa ge.
23Pa wlɛfafaʔara dà gâ gɔ ge, Juwifiyee à pe pè nyaʔa na mà yo pé buu kpo.#9:23-25 ma wèle wa 2Kor 11:32-33 ni wè. 24Di Sɔli wɔ̀ɔ pe dɛnbɛrɛ cɛn we. Pe dáa kàʔà ki goyɛrɛ kɔrɔsi yaagbanʔa yebliʔi, jango bùu kpo. 25Di wi ploʔofɛɛ à pe bɔ́ɔ̀ kpe yebliʔi ni ge mà yɔ́ɔ̀ trigi wa kàʔà binŋi ki kruʔu ma ge kpogo ni.
Sɔli wí ma kɛri Jerusalɛmu kàʔà ni
26Sɔli wi gâ no wa Jerusalɛmu kàʔà ni ge, wɔ̀ɔ naʔa ca wí bi gboʔolo sɛrifɛɛ ní be. Di pe dáa fyaʔa wí na, mɛjɛn pe ìn dà baʔa na bì yo wí ma krɛʔɛ sɛrifɔlɔ. 27Di Baranabasi wɔ̀ɔ wí co mà kɛri wí ni pitunbee krugu be mà yáʔà yo pé kan Sɔli wi dá wò fɔlɔ nya we wa kloʔò na, wɔ́ɔ yo wí ni pomo ma na ge màʔa yo kpo wi dá horo ná nyu Jesu wi yele na le wa Damasi kàʔà ni pomo ma na ge. 28Sɔli wi dáa blɛn pé ni na sye Jerusalɛmu kàʔà ki dere tì bɛfu na mà na horo na nyu hɛɛn ní be wò fɔlɔ wi yele na le. 29Wi dáa nyu na kakara wa Juwifiyee bee ní pé na Grɛki hɛnrɛ nyu de. Di pee à pe naʔa ca bùu kpo. 30Sɛrifɛɛ pa pe gáʔà cɛn ge, à pe kɛri wí ni Sesare kàʔà ni ge mà yɔ́ɔ̀ troʔo Tarisi kàʔà ma ge.
31Ki tɔ na ge, hɛɛn bee pe dá bo wa sɛrigo ni ge Jude klo nì, Galile klo nì, Samari klo nì le kè bɛfu ke hɛɛn à pe po nyimi na. Sɛrigo àʔa na kpɔʔɔ na sye. Ki hɛɛn à pe na wò fɔlɔ fyaʔa we na nyɛʔɛ Nyɛʔɛlɛ li Nyìli li haʔama nì me.
Ene wi pwɔʔɔmo
32Pyɛri pɔɔ da gáa sye dere tì bɛfu na ge, wɔ̀ɔ kɛri wa sɛrifɛɛ krugu be kpo, bee pe dá bo wa Lida kàʔà ni ge. 33Wɔ̀ɔ yâ naŋa wà nya wa pe dáa wi yeri Ene. Wi dá bo wi syɛ́n mà ta yɛʔɛ́ natanri wa asyɛnʔɛ na ge, mɛjɛn wi dá bo lemloʔoŋo. 34Pyɛri wɔ̀ɔ wí po: «Ene, Jesu Krisi wí ma ma pwɔʔɔ. Ma jɛ̀, ma ma asyɛnʔɛ kondo ge mà yɛ.» Wɔ̀ɔ jɛ kpo. 35Lida kàʔà woo pè bɛfu ní, ní Saron deʔe woo ní be, à poo nya pee yo kpo. À pe yɛʔɛ̀ kan wò fɔlɔ ma we.
Pyɛri wí ma Dɔrikasi nyɛ
36Sɛrifɔlɔ wà dà bo wa Jɔpe kàʔà ni ge mà po cɛlɛ, pe dáa wi yeri Tabita. Pe na yo “Dɔrikasi” Grɛki hɛnrɛ ni de, ki na po pé yo “Gafa”. Nyiŋi kì bɛfu na wi dáa kakmaʔa hanri na fyomo fɛɛ kanʔa be nadanma yrɛbɛ ní. 37Wɔ̀ɔ bâ do yaŋa ki wlɛrɛ ni de mà ku. Pe gɔ́ɔ̀ fogo kɔ ge, à pe yɔ́ɔ̀ sinŋi namuru go pyɔ ni. 38Pa Lida kàʔà ki ìn dà bo leʔe Jɔpe kàʔà nì ge, sɛrifɛɛ á péʔe loʔo mâ yo Pyɛri wí nyɛ waʔa nî ge, à pe hɛɛn syɛn tun wa wi ma mà yo pe yɔɔ fɛn poo po: «Ma fyala ma pan naʔa wo ma.» 39Pyɛri wɔ̀ɔ jɛ mà plɛn pé ni mà kɛri. Wi yâ no wa, à pe luʔu wí ni namuru go pyɔ ni we. Kucaa pè bɛfu à pe flo wì tanla na kpele na pe drere nì pe kpasyoro teri de wi na da Dɔrikasi wi dáa lyɔli, nyiŋi ga na wi dá bo wa pe nî ge. 40Pyɛri wɔ̀ɔ pè bɛfu yrigi dala na le mà kunbiʔi kán mà na Nyɛʔɛlɛ nyɛri le. Ki kruʔu ma wɔ̀ɔ yɛʔɛ̀ kan kpó ma we mà yo: «Tabita, jɛ̀.» Wɔ̀ɔ nyɛnʔɛ nyɛʔɛ ge. Wi gâ Pyɛri nya we, wɔ̀ɔ jɛ mà klɛn. 41Pyɛri wɔ̀ɔ wí co kyɛʔɛ na ge mòo jrɛʔɛ mòo yrigí mà sɛrifɛɛ yeri be ní pe kucaa ní be mà bɔ́ɔ̀ tyɛʔɛ pé na wyee. 42Ki woʔo ga ge, Jɔpe kàʔà woo pè bɛfu à peʔe cɛn. À hɛnfafaʔa ma yere wò fɔlɔ na we. 43Pyɛri wɔ̀ɔ wlɛrɛ fafaʔa kɔ wa Jɔpe kàʔà ni ge. Wi dá drigi hlɛrɛ kporifɔlɔ wà na, pe dáa wi yeri Simo.
Currently Selected:
PITUNBEE 9: NLK10
Highlight
Share
Copy

Want to have your highlights saved across all your devices? Sign up or sign in
Bible Society of Côte d'Ivoire