PITUNBEE 17

Pɔli nì Silasi nì Tesalonike kàʔà ni

1Pɔli nì Silasi nì we à pe Anfipolisi kàʔà nì, ní Apoloni kàʔà nì ki kpafoʔo pari ge màʔa kon mà yâ je wa Tesalonike kàʔà ni, deʔe ga na Juwifiyee pe sɛrigo kà dà bo wa ge. 2Pɔli wɔ̀ɔ je waʔa nî nɛ paʔa dá bo wi kalɛʔɛ ge mà ta wa canwyeʔe tanri na nyu pé ni mà naʔa fligi pé kan Nyɛʔɛlɛ li nyoŋomo kayoro ní de, 3na ti fligi naʔa teri pé na wa ti nî mà yo ki dá jori Nyɛʔɛlɛ li wofràa wi cɔlɔ wi nyɛ̀ wi nyini kuu ni be. Wɔ̀ɔ naʔa pin: «Jesu ŋa mí na wi kayoʔo nyu ye kan ge, wiì wi ŋa Nyɛʔɛlɛ li wofràa we.» 4Juwifiyee pèè da yeré Pɔli wi kayoro na de mà pa Pɔli nì Silasi na we. À Grɛkiyee bee pé na Nyɛʔɛlɛ kpɔʔɔ le pe fafaʔa nì, ní cɛɛ yegbɔʔɔ fɛɛ fafaʔa ma pa Pɔli nì Silasi na we kpo.

5Di yejaʔa àʔa jɛ Juwifiyee ma be. À pe yâ hɛnpee pèè co wa hɛnfayee ni be mà pe kpoʔolo mà kɛri pé ni mà yâ kàʔà hɛɛn pri mà pe wa pé na. Pe yâ no wa Jason wi go na ge, à pe naʔa ca bì Pɔli nì Silasi co we bì gɛri pé ni hɛɛn pe kpoʔolomo mi yɛʔɛ̀ ma ge. 6Pa pe ìn gà pé nya ge, à pe Jason nì sɛrifɛɛ pe tɔɔ pèè co mà pe kle mà kɛri pé ni kàʔà fɛɛ krugu be mà yáa daʔara mà yo: «Hɛɛn bee pé ma drunya wlele we ge, pé bee pé pan naʔamɛ ge kpo. 7Jason wɔ̀ɔ trigihaʔa kân pé ma. Ga klòʔo fɔlɔ Sesare wí na nyu ge, pee pè bɛfu wà wò na ki kloʔò tanri ge, mɛjɛn pé naʔa pin klòʔo fɔlɔ wà nyɛ wa nɛ, Jesu wi.» 8Janma ní, kàʔà fɛɛ ní pe gâ ki woʔo ga loʔo ge, àʔa pe honriri wlele de pe na. 9À pe gbejanra syɔ Jason nì pe tɔɔ ma be mà nà na pe wa.

Pɔli nì Silasi nì Bere kàʔà ni

10Ki nyidege na, yebliʔi ni ge, sɛrifɛɛ à pe Pɔli nì Silasi troʔo wa Bere kàʔà ni ge. Pe yâ no wa ge, à pe yâ je wa Juwifiyee pe sɛrigo ni ge. 11Ki woo pe kala li dá bo pronlo Tesalonike kàʔà woo pe wolo na le, mɛjɛn pee pe dá Nyɛʔɛlɛ li kayoro co de lafiʔimi nì mà na wele wa wlɛʔɛ kì bɛfu na li nyoŋomo ni me jango, nàʔa po ki kaʔa ké nyɛ ban ge, peʔe cɛn. 12Ki hɛɛn ni be à pe fafaʔa ma yere Jesu na we mà plɛn Grɛkiyee cɛɛ pèè ní, yegbɔʔɔ fɛɛ be, ní nabii pèè ní fafaʔabaa. 13Di Tesalonike kàʔà Juwifiyee pa pe gáʔà cɛn mâ yo Pɔli wí na Nyɛʔɛlɛ li kayoro nyu de wa Bere kàʔà ni ge kpo ge, à pe kɛri wa mà yâ hɛɛn pe honriri wlele de pe na mà pe pri mà pe wa wí na. 14Ki nyidege na ge, sɛrifɛɛ à pe Pɔli troʔo we wa fɔ nyugbɔmo nò na ge. Di Silasi nì Timote nì we à pe ko wa Bere kàʔà ni ge. 15Pɔli wi troʔofɛɛ à pe kɛri wí ni fɔ mà yâ no wa Atɛnni kàʔà ni ge. Wi gâ pe tun mâ yo pe ya Silasi nì Timote po we pe fyala pe pan wì krugu ge, ki woo à pe hru mà kɛri.

Pɔli wí ma Nyɛʔɛlɛ li kayoro yo Atɛnni kàʔà ni

16Pɔli pɔɔ da gáa pe hanni wa Atɛnni kàʔà ni ge, wi lama à mi gban wí na, mɛjɛn wi daʔá nya ki kàʔà kí nyɛ nyìŋì gbosuu ní be. 17Ki kala na le, wi dá bo na nyu Juwifiyee ní, ní hɛɛn bee ní pe dáa Nyɛʔɛlɛ kpɔʔɔ le kpo wa Juwifiyee pe sɛrigo ni ge. Wlɛʔɛ kì bɛfu na wɔ̀ɔ na nyu kpo hɛɛn bee ní wi dáa finni wa foroba dere na de. 18Krɛʔɛfɛɛ bee pé na yeri Epikuriyee#17:18 Epikuriyee Epikurisi wi ploʔofɛɛ bɛ, Epikurisi wi dáa hɛɛn krɛʔɛ be mà yo ki ma yala hɛn wi da lafiʔimi ca naʔa drunya ni we pomo mi bɛfu na. ge, ní bee ní pé na yeri Sitowisiyee#17:18 Sitowisiyee Kacɛnŋɛ wa dà bo wa à pe noo yeri Seno. Bee pe da bá wi na à pe na pe yeri Sitowisiyee. Wi dáa hɛɛn krɛʔɛ be mà yo kí ma yala hɛn wi po wi kân kaʔa kè bɛfu ni, nà li po kmala yoo, nà li po tipele yoo. Kii gi pe na yeri hɛnwyee wi nomo me. ge à ki woo pèè na nyu Pɔli nì we. À pèè ma yo: «Ki kayofara yofɔlɔ wí naʔa ca wí bi nyaʔa yo sin?» À pèè ma yo: «Wí na nabonmoo pee nyɛʔɛŋɛɛ kayoʔo jari. Pe dáa ki nyu ban, mɛjɛn wi dáa Jesu wi kaʔa ke kayotanʔa nì, ní kuu pe nyɛmanyinimi woro nyu de pe kân.» 19Ki nyiŋi na ge, à poo co mà kɛri wí ni kayoro plehaʔa ga na pé na yeri Areyɔpaje#17:19 Areyɔpaje: Angolo là yele li la na Atɛnni kàʔà kpoʔɔlomo hɛɛn pe daáa pè kpoʔolo wa ge. À pe báa ki kpòʔolomo yeri me Areyɔpaje, àlí mà ja bo pe ìn dàá pè kpoʔolo wa adi ki angolo na le ge. ge mà yɔ́ɔ̀ po: «Krɛʔɛfonmo ma má na hɛɛn krɛʔɛ be, pa wo gban bì mi cɛn yo? 20Mɛjɛn wó na kafonŋoo kèè nuru má ma. Ɛɛn wó ma cori bì ki kaʔa ke kɔ̀rɔ́ cɛn we.» 21Àʔa hín bo Atɛnni kàʔà woo pè bɛfu ní, ní nabonmoo bee ní pe dá bo wa ge, pe dáa ki ca dron nyiŋi kì bɛfu na bì da kayofonro nyu, ná kiì ban, bì da kayofonro nuru.

22Ki nyiŋi na ge, Pɔli wɔ̀ɔ jɛ mà yere wa Areyɔpaje kpoʔolomo mi nulala ni le mà yo: «Atɛnni kàʔà woo, mí maʔa nya yé ma yè kân gbosuu pe kpɔʔɔmo ma me gbanʔa ceŋge yè kaʔa kè bɛfu ni. 23Mɛjɛn nyiŋi ga na mi dá bo na toro ná yè asunmu wele be, à mi yâ sraʔá farahaʔa kà nya wa kpo, kí nyɛ waʔa na nyoŋoʔo mà yo: “Nyɛʔɛlɛ la wo ìn jɛn ge li sraʔá farahaʔa kiì gi ga ge”. Ɛɛn yé na la kpɔʔɔ, áʔa po ye ìn li cɛn ge, liì li mì mí bi li kayoʔo yo ge ye kan. 24Nyɛʔɛlɛ la li dá drunya ní, ní wi lama yrɛbɛ pì bɛfu hanri ge, pa li gâ bo namuru ní tra ní pi fɔlɔ, loò na kori sɛrigoro da ni hɛɛn pé ma fan ge.#17:24-25 ma wèle wa 1Mas 8:27; Esa 42:5; Pit 8:47 ni wè.

25Pa liì li la lí na nyuwyeʔe kanʔa ge hɛɛn pè bɛfu ma, ní ŋoʔo nì ge, mâ plɛn yrɛbɛ pì bɛfu ní ge, li ìn jori hɛɛn pe da hanri lí kan bì daʔa honri bì yo lí ma cori yraʔa kà na. 26Li da gâ klòʔo kè bɛfu ke hɛɛn pe nyiri nì pe klɛnhara nì pi kanŋaa kon ge ge, à li pé yrigi hɛn nigbe ni mà pe tɛnŋɛ tra ti namyɛʔɛ kè bɛfu na. 27Li da pé hanri jango pe da li ca, nàʔa po nà wo da dali bí da hɔlɔ, pa wo gban bi lí nya ge. Àʔa hín bo loò leʔe wòó wà nì. 28Mɛjɛn:

‹Li fanŋa kiì gi

wó nyɛ nyuwyeʔe na ge

ná tanri mâ po hɛɛn ge.›

Kí nyɛ nɛ pa yè ŋuru ŋufɛɛ pèè daʔá yo kpo ge mâ yo:

‹Wòó fanna wó nyɛ li kluʔu pii.›

29Pa wo gâ bo Nyɛʔɛlɛ li kluʔu pii ge, ki ìn yala wo daʔa nyaʔa nɛɛ Nyɛʔɛlɛ lí nyɛ nɛ pa tɛ nyɛ we, ná kiì ban nɛ pa waafiʔi nyɛ ge, ná kiì ban nɛ pa ŋglɛnʔɛ nyɛ ge, ba pí nyɛ tɛbɛ hɛn wi ticlimi nì wi honriʔi na ge. 30Nyɛʔɛlɛ li ìn dà kabajɛnrɛ nyiŋi ki kaʔa tonli ge, di ŋaŋa ni ge, lí naʔa nyu hɛɛn pè bɛfu ma deʔe kì bɛfu na mà yo pe kruʔu wa pe kapere ma de. 31Mɛjɛn lí ma wlɛʔɛ kà fara ga lí bi ba sinmi kiti kon drunya na we hɛn wà kyɛ̀rɛ́ ní ŋa liì lí ma fara ge. Lí ma ki woo wi frama tyɛʔɛ me hɛɛn na be wi nyɛmanyinimi kala liì nì kuu ni be.»

32Pe gâ kuu pe nyɛmanyinimi woʔo loʔo ge Pɔli ma we, à pèè noo tyɛʔɛ wa pe nî. Di à pèè ma yo: «Wó gà ba ki woʔo ga loʔo ge ma ma wlɛʔɛ kà na kì yɛ.» 33Ki nyiŋi na ge, Pɔli wɔ̀ɔ nyini wa pe nulala ni le. 34Kiì nì kì bɛfu ní, à pèè ma pa wí na mà yere Jesu na we. Wà dà bo wa ki woo ni be Areyɔpaje woo wà wi. Pe dáa wi yeri Denisi, wiì nì cɛlɛ wà nì pe dáa wi yeri Damarisi, ní hɛɛn pèè ní nɛ.

Currently Selected:

PITUNBEE 17: NLK10

Highlight

Copy