PITUNBEE 15

Kpoʔolomo Jerusalɛmu kàʔà ni

1Hɛɛn pèè dá jɛ wa Jude klo ni le mà pan Ancɔsi kàʔà ni mà báa sɛrifɛɛ ploʔo be mà yo: «Nà ye ìn da lege nɛ pa Mowisi wi kalɛlɛ lí na ga nyu ge, yòo gban bì syɔ.»#15:1 ma wèle wa Sraʔa 12:3 ni wè.

2Nyiŋi ga na Pɔli nì Baranabasi nì pe dáa gon ki hɛɛn ní be mâ na kakafafaʔara wa pé ni ge, sɛrifɛɛ à pe yo Pɔli nì Baranabasi nì we ní sɛrifɛɛ pèè ní pe kɛri Jerusalɛmu kàʔà ni ge pe ya pitunbee ní lagwɔɔ yugu be ki kala la nì le.

3Sɛrigo paʔa gâ pe troʔo kɔ ge, à pe yâ Fenisi klo nì Samari klo pari le mà li kon naʔa tanli wa sɛrifɛɛ kan be klòʔo ke tɔɔ ke hɛɛn pé ma yɛʔɛ̀ kan Nyɛʔɛlɛ ma le pomo ma na ge. Àʔa ki woo pe lama fiʔi me ceŋge. 4Pɔli nì Baranabasi nì we pe yâ no wa Jerusalɛmu kàʔà ni ge, sɛrigo ní, pitunbee ní, ní lagwɔɔ ní be à pe pé co kmaʔa. Kaʔa gee Nyɛʔɛlɛ lí ma hanri wa pee pitunbee syɛn pe kyɛrɛ̀ ni de ge, à pe ké yo pe kan. 5Di sɛrifɛɛ bee pe dá bo Farisiyee ge, à pèè ma jɛ wa mà yo: «Kí ma yala klòʔo ke tɔɔ ke hɛɛn be pe da lege, ye pe po pe da Mowisi wi kayoro ti kloʔò tanri ge.»

6Pitunbee ní, lagwɔɔ ní be à pe pè kpoʔolo bì pè nya ki kayoʔo ga na ge. 7Pe gâ kakafafaʔara wa de kɔ ge, Pyɛri wɔ̀ɔ jɛ mà pe po: «Na woolo, yèé yé maʔa cɛn mà yo, mà kpe fanfan ni ge, Nyɛʔɛlɛ li da ná fara yè nulala ni le bì yà kayotanʔa yo ge klòʔo ke tɔɔ ke hɛɛn kan be pe yèré wò fɔlɔ na we.#15:7 ma wèle wa Pit 10:1-43 ni wè. 8Nyɛʔɛlɛ la hɛɛn pe dihon cɛnfɔlɔ we, à li naʔa teri hɛɛn na be mà yo loò na ceʔe klòʔo ke tɔɔ ke hɛɛn ma be, di li da pé kan Nyɛʔɛlɛ li Nyìli ní le nɛ pa li da lí kan wòó ma be pomo ma na ge.#15:8 ma wèle wa Pit 2:4; 10:44 ni wè. 9Li ìn wà kon wà na wòó ní ki hɛɛn ní be. Lí ma pe dihon yɛli we, mɛjɛn pé ma pa lí na. 10Ŋaŋa ni ge, nyaʔa ma po wa, á ye na Nyɛʔɛlɛ pin le ná li wele ge mâ na tuʔuru tiluʔuru pa sɛrifɛɛ ma be ge, da wòó ní, wò tee ní wo ìn dà gban bí dugu ge? 11Di wó ma yereʔe na mà yo wó ma syɔ wò fɔlɔ Jesu wi kmama mi kala na le nɛ pa pee pé ma syɔ pomo ma na ge.»

12Janma mì bɛfu à mi pyeri na nuru Baranabasi nì, ní Pɔli ma we. À pe na jɛnʔɛlɛ tanli ge ní kakpɔʔɔ ní ge gee Nyɛʔɛlɛ li dá hanri wa pe kyɛrɛ̀ ni de klòʔo ke tɔɔ ke hɛɛn ni be ge. 13Pe gâ yo mâ kɔ kɔ ge, Jake wɔ̀ɔ kayoʔo kpe ge mà yo: «Na woolo, ye lòʔó ná ma. 14Simo wí maʔa nyɛli wo kan kɔ Nyɛʔɛlɛ li da glú mâ na wele klòʔo ke tɔɔ ke hɛɛn na be pomo ma na ge, jango lí hɛɛn pèè fara wa pe nî pé po liì tapolo li hɛɛn ge. 15Nyɛʔɛlɛ leyoo pe kayoro tí ma po teme na ki woʔo ga nì ge, nɛ pa kí nyɛ wa nyoŋoʔo mâ yo:

16 Nyɛʔɛlɛ à li yo:

Ki kaʔa ke kruʔu ma ge,

mí bì ba hru bì ban

bì ba Dafide wi kpasyoro gotoʔo

jrɛʔɛ ge fonŋo.

Mí bi ba ki cɔʔɔhara hanri de

bì nì bìʔi jrɛʔɛ bìʔi yrigí, # 15:16-18 ma wèle wa Amo 9:11-12 ni wè.

17 jango hɛɛn pe tɔɔ

pe da wò fɔlɔ ca we,

ali klòʔo ke tɔɔ ke hɛɛn

pè bɛfu bee mí ma yeri

pe klɛ́n pé mì kan ge.

18 Wò fɔlɔ wɔ̀ɔ yo ban,

ŋa wí na ki kaʔa teri ge

hɛɛn na be

mà kpe fanfan nyiŋi na ge.»

19Jake wɔ̀ɔ kà haʔa wa mà yo: «Ki kala na le, mì mí maʔa nya bee pé nyɛ wa klòʔo ke tɔɔ ke hɛɛn ni be ná yɛʔɛ̀ kanʔa Nyɛʔɛlɛ me le ge, wò gáa pe teʔe. 20Di wo sɛbɛ troʔo wa pe ma wo pe po: Yraʔa o yraʔa ga pe sunʔú ni ki hín bo kranʔa Nyɛʔɛlɛ li yɛʔɛ̀ na ge, ní kyɛnrɛ ní, ní yraʔa ga nì pé ma kpo, pe ìn ki konli ge, piì nì, disyan ni pe da pi flìgí.#15:20 ma wèle wa Nyi 34:15-17; Sraʔa 17:10-16; 18:6-23 ni wè. 21Mɛjɛn mà kpe fanfan hɛɛn pe nyiŋi na ge, Mowisi wi kayoro jarifɛɛ pé nyɛ wa kyɛ̀rɛ̀ tì bɛfu ni mà na wi sɛbɛ nyu we wa Juwifiyee pe sɛrigoro ni de fyonriwlɛʔɛ kì bɛfu na.»

Sɛbɛ ŋa pe troʔó kloʔo ke tɔɔ sɛrifɛɛ ma bee

22Ki nyiŋi na ge, àʔa klan pitunbee ní, lagwɔɔ ní, ní sɛrigo kì bɛfu ni, à pe hɛɛn pèè fara wa pee ni be mà pe plɛn Pɔli nì Baranabasi nì we pe ya pe troʔo wa Ancɔsi kàʔà ni ge. À pe Jude fara, ŋa pé na yeri Baranabasi we ge, ní Silasi nì. Ki woo pe dá bo yɛkluu wa sɛrifɛɛ ni be. 23À pe sɛbɛ nyoŋo mòo kân pé ma. Wa ki sɛbɛ ni we, à pe yo:

Wòó pitunbee ní, ní lagwɔɔ ní be, wòó bee wó nyɛ yè woo ge, wó ma ki sɛbɛ troʔo we wa yèé bee ma yé nyɛ wò woolo mâ po klòʔo ke tɔɔ ke hɛɛn wa Ancɔsi kàʔà ni ge, ní Siri klo nì le, ní Silisi klo nì le. Wó na ye syeri. 24Wó maʔa loʔo naʔa mà yo wò woo pèè ma kɛri mà yâ yè honriri wlele de mà yè lama punŋu me ye na kayoro tà nì. Àʔa hín bo wo ìn dà pé tun ki woʔo na ge. 25Ki kala na le, wó ma yo mà flinʔi na. Àʔa klan wo ni wo hɛɛn pèè fara wo pe plɛ̀n wò tanma fɛɛ Baranabasi nì Pɔli nì we, wo ki hɛɛn troʔo be wa ye ma. 26Pee bee pé ma pè kân kùʔù ma ge wò fɔlɔ Jesu Krisi wi tunŋu ki kala na le. 27Wó ma Jude nì Silasi tun we wa ye ma. Pee tapoboo pé yà ki kayotege yo ge wa ye kan. 28Mɛjɛn kí ma klan Nyɛʔɛlɛ li Nyìli ní, ní wòó ní be mà yo wò gá tuʔuru tà pa ye ma adi fɔ mà gâ laʔa ki cromo kaʔa kee na. Ké gee: 29Ye da hɛnʔɛ sraʔá fligi we, ní disyan kama ní me, ní yraʔa ga nì pé ma kpo, pe ìn ki konli ge, mà plɛn kyɛnrɛ ní de. Nà ye da yè kɔrɔsi pí ni ge, paʔa bo yé naʔa hanri kmaʔa. Nyɛʔɛlɛ li ye haʔa.

30Pe gâ pe kân kloʔò nì ge kɔ ge, à pe kɛri Ancɔsi kàʔà ni ge mà yâ sɛrifɛɛ pè bɛfu kpoʔolo mà sɛbɛ kan we pe ma. 31Pe gɔ́ɔ̀ yo ge, wi fɛnmɛ kayoro à ti pe lama fiʔi me pe na. 32Jude nì Silasi nì we pee pè tala pe dá bo Nyɛʔɛlɛ leyoo kpo. À pe sɛrifɛɛ fɛn be kayofafaʔa nì mà fanŋa kan pé ma. 33Pe da gâ nyiŋi kà kɔ wa kɔ ge, sɛrifɛɛ à pe pé kan kloʔò nì ge nyimi na, pe hrù pe kɛri pe tunfɛɛ ma be. 34[Di Silasi wɔ̀ɔ cori bì go wa pe ní.]

35Pɔli nì Baranabasi nì we, à pe ko wa Ancɔsi kàʔà ni ge. Pee ní, hɛɛn pèè ní fafaʔabaa à pe plɛn mà na hɛɛn ploʔo be na kayotanʔa nyu ge wa pe kân.

Pɔli nì Baranabasi nì pe laʔá pè na

36Wlɛrɛ tà dà gâ gɔ kɔ ge, Pɔli wɔ̀ɔ kí yo Baranabasi ma we mà yo: «Kyɛrɛ̀ tì bɛfu ni da wo dá wò fɔlɔ wi kayoro yo de wa ge wo hrù wo kɛri wa wo ya wò woo wele be wa, pé nyɛ wa pomo ma na ge, woʔo cɛn.» 37Baranabasi wi dá jori bì Jan Marike plɛn we pe ní kpo. 38Di ki ìn dà Pɔli glan we ki woo wi plɛ̀n pé ni, mɛjɛn wi da laʔá pé na wa Panfili klo ni le. Wi ìn blɛn pé ni tunŋu ma ge.#15:38 ma wèle wa Pit 13:13 ni wè. 39À pe kakara wa. À ti gban pé ma fɔ à pe laʔa pè na. Baranabasi wɔ̀ɔ Marike plɛn we wi ní mà yâ je wí ni nyumu kɔrɔ kà ni mà kɛri Sipre klo ni le. 40Di Pɔli wi dá Silasi fara we. Sɛrifɛɛ à pe Pɔli le we wò fɔlɔ wi kyɛrɛ̀ ni de, ní wi kmama nì me. 41À pe plɛn Silasi nì we mà kɛri, mà yâ Siri klo pari le mà li kon mà plɛn Silisi klo nì le na fanŋa kanʔa sɛrigoro ma de.

Currently Selected:

PITUNBEE 15: NLK10

Highlight

Copy