PITUNBEE 11

Pyɛri wí ma wi tanʔama nyɛli me

1Pitunbee ní, ní sɛrifɛɛ bee ní pe dá bo wa Jude klo lì bɛfu ni ge à peʔe loʔo mà yo klòʔo ke tɔɔ ke hɛɛn pèè na leʔele kpo Nyɛʔɛlɛ li kayoro ní de. 2Nyiŋi ga na Pyɛri wi da gâ gɛri Jerusalɛmu kàʔà ni ge, hɛɛn bee pe dáa ki nyu mâ yo kí ma cori hɛn wì bɛfu poo lege ge, à pe yáa kakara wa wí ni, 3mà yo: «Ma yâ je bee poò na lege pe goro ni de mà li pe ní.» 4Ki nyiŋi na, Pyɛri wɔ̀ɔ ki hli mà na ki kaʔa kè bɛfu tanli pé kan mà kpe ke hlihaʔa na fɔ mà yâ sun ke tanʔahaʔa na, mà yo:

5«Mi mi dá bo wa Jɔpe kàʔà ni ge mà na Nyɛʔɛlɛ nyɛri le wa mà gâ bo nɛɛ mí na ŋolo. À mi yraʔa kà nya kí na tiʔi na pan. Ki dá bo nɛ pa kpasyokpɔʔɔ nyɛ ge mà po pwɔʔɔ ki kanŋaa ticɛrɛ na we. Àʔa na trigi ké na wa namuru ni de mà tiʔi mà pan fɔ mà bâ no ná na. 6Mi gâ nyɛʔɛ kán geʔe na mâ na wele wa ki lama ni me kmaʔa ge, à mi ceʔe ticɛɛjɛɛ ajobo nya be wa ní nya wobo ní be mà plɛn yrɛbɛ ba nì pí na flolo ge ní nya kajɛnʔɛ ní ge. 7Ki nyiŋi na ge, à mi ákpolo là loʔo. A li ná po: ‹Pyɛri, jɛ̀ ma pà kpo ma pi ka.› 8Di à mi yo: ‹Ayoʔolo, na fɔlɔ, mɛjɛn yraʔa ga kí nyɛ tipeʔe mâ po kranʔa ma yɛʔɛ̀ na ge, kɛ ìn je jé wa na nò nî ge.› 9Ákpolo à liʔi yo wa namuru ni de syɛnwoʔo na ge mà yo: ‹Ga Nyɛʔɛlɛ lí yo kí nyɛ ylɛʔɛ ge, mo mò gá yo kí nyɛ kranʔa.› 10Ki woʔo ga ki dá hanri mà ta hanrihaʔa tanri. Ki kruʔu ma, pì bɛfu à pi luʔu nɛ mà kɛri namuru ni de. 11Ki nyidege na ge, àʔa po hɛɛn tanri ma yere be go ga tanla mi dá bo ge mà po pe jɛ́ Sesare kàʔà ni. Àʔa po hɛn wà ma pe tun naʔa ná ma. 12Nyɛʔɛlɛ li Nyìli à li ná po bi blɛn pé ni, ho gá kakara le waʔa nî. Wò woo noli bee be à pe plɛn ná ni kpo. À wo yâ je wa Kɔrinɛyi wi go nî ge. 13Ki naŋa wɔ̀ɔ kí tanli wo kan wi dá mlɛŋɛ nya we wa yerehaʔa wi go nî ge, mlɛŋɛ wɔ́ɔ yo wí ni pomo ma na mâ yo: ‹Ma hɛɛn pèè tun Jɔpe kàʔà ni pe ya Simo Pyɛri yeri we wa. 14Wí bi ba kayoro tà yo má kan, da tí bi gân má syɔ ge, mo ní, ní ma go woo pè bɛfu ní ge.› 15Nyiŋi ga mi da gâ do kayoʔo na mâ naʔa nyu ge, Nyɛʔɛlɛ li Nyìli à li trigi pè na nɛ pa li da glú mâ trigi wòó na be pomo ma na ge. 16À mi lama to wò fɔlɔ wi kayoʔo ga nì wi dá yo mâ yo: ‹Jan wi dá ye batise nyumu ní, di yèé be Nyɛʔɛlɛ lí gà ba ye batise Nyɛʔɛlɛ li Nyìli ní.›#11:16 ma wèle wa Pit 1:5 ni wè. 17Ki kala na le, nàʔa po Nyɛʔɛlɛ lí ma ki akantege kan ge pe ma, nɛ pa ga nyɛ li dá gan wòó ma be, nyiŋi ga na wo da yeré wò fɔlɔ Jesu Krisi na we, do mì we han wi ná ni bí gban bí da jan Nyɛʔɛlɛ ní le?» 18Pe gâ ki kaʔa loʔo ge kɔ ge, à pe pyeri mà na Nyɛʔɛlɛ kpɔʔɔ le mà yo: «Nyɛʔɛlɛ lí ma klòʔo ke tɔɔ ke hɛɛn kan be kpo pe kruʔu wa pe kapere ma de pe nyuwyefonŋo ta ge.»

Ancɔsi kàʔà sɛrigo

19Cɔlɔʔɔ ga ki dá do sɛrifɛɛ na be Ecɛnni wi kùʔù ki kruʔu ma ge, ki kala na, bee pe dá janmu ge, à pe kɛri fɔ mà yâ no wa Fenisi klo ni le, ní Sipre klo nì, ní Ancɔsi kàʔà nì ge. Pe ìn dà bo na Nyɛʔɛlɛ li kayoro nyu de hɛn wà ma fɔ mà gâ laʔa Juwifiyee pee nigbe ma.#11:19 ma wèle wa Pit 8:1-4 ni wè. 20Sipre klo woo ní Sirɛne kàʔà woo pèè dá bo pé ni. Ki woo pe gâ no wa Ancɔsi kàʔà ni ge, à pe na wò fɔlɔ Jesu wi kaʔa ke kayotanʔa nyu ge klòʔo ke tɔɔ ke hɛɛn ma be. 21Wò fɔlɔ wi fanŋa ki dá bo pé ni. À hɛnfafaʔa ma kyɛʔɛ paʔa na mà yɛʔɛ̀ kan wò fɔlɔ ma we.

22Pe jase wi da gâ no wa sɛrigo ga ma ki dá bo wa Jerusalɛmu kàʔà ni ge, ki woo à pe Baranabasi troʔo we wa Ancɔsi kàʔà ni ge. 23Nyiŋi ga na wi da gâ no wa, wɔ́ɔ Nyɛʔɛlɛ li haʔama nya me, wi lama à mi fiʔi. Wɔ̀ɔ na pè bɛfu fɛn mà yo pe pè kân wò fɔlɔ ma we pe dihon wì bɛfu ní, pe da wi kloʔò tanri ge su. 24Baranabasi wi dá bo hɛnkmaa mà po nyiŋi Nyɛʔɛlɛ li Nyìli ní le. Wi pama à mi po kpangbanma. À hɛnfafaʔa ma haʔa wa wò fɔlɔ ma we.

25Ki kruʔu ma ge, Baranabasi wɔ̀ɔ kɛri Tarisi kàʔà ni wí yà Sɔli ca we wa. 26Wi gɔ́ɔ̀ nya ge, wɔ̀ɔ wí co mà kɛri wí ni Ancɔsi kàʔà ni ge. À pe yáa pè kpoʔolo wa sɛrigo hɛɛn ní be fɔ mà ta yɛpolo mà na hɛnfafaʔa ploʔo wa. Ki da hlí wa Ancɔsi kàʔà kiì ni, á pe na sɛrifɛɛ yeri be Krisi woo ge.

27Ki wlɛrɛ ni de, Nyɛʔɛlɛ leyoo pèè dá jɛ wa Jerusalɛmu kàʔà ni mà kɛri wa Ancɔsi kàʔà ni ge. 28À wà ma jɛ ki woo ni be pe dáa wi yeri Agabusi. Wɔ̀ɔ yo Nyɛʔɛlɛ li Nyìli li fanŋa ni ge mà yo funŋu kà bi gà ba do kpangbanŋa drunya wì bɛfu na. Ki woʔo ge àʔa bâ hanri ban klo fɔlɔ Klode wi nyiŋi na ge.#11:28 ma wèle wa Pit 21:10 ni wè. 29Sɛrifɛɛ à peʔe yo mà flinʔi na mà yo: Hɛn ŋa fanŋa bi da yraʔa ga na ge, wiʔi troʔo wa sɛrifɛɛ bee ma pé nyɛ wa Jude klo ni le, jango wo pe haʔa. 30À peʔe hanri ban mà ki yrɛbɛ troʔo be wa ki sɛrifɛɛ pe lagwɔɔ ma be Baranabasi nì Sɔli nì pe kyɛrɛ̀ ni de.

Currently Selected:

PITUNBEE 11: NLK10

Highlight

Copy