Luki 10

Zyezu n syɛ̀ɛnnɛ togoye taanri ní kpɔrigɔ ní siin tun

1Koro kàdoʔo ma a Kàfɔw níì syɛ̀ɛnnɛ togoye taanri ní kpɔrigɔ ní siin nyɛ́nɛ n wòlo, tɛ́ɛyee myɛ ni, ní kěyi myɛ ma woro tiimaa a kári lè, a wi bele bee tun siin-ziin paa syée yaà woro yɛ́ʔɛ na, 2#Mat 9:37-38 níì be pye: «Yaliilɛɛgwɔɔri n tɔ̀nɔ n nɛʔɛ séyi ni, kàjáa ti láafɔbèle ga nɛʔɛ í. Koro na gi yɛlɛ yaa séyi Kàfɔlɔ nyɛ́ɛri jàngó waa yaliilaabèle kɔ́ri waa tórogi wi séyi ma. 3#Mat 10:16 Yaa syée. Ye wéle, mii n yele tórigo àmɛɛ bàpiigéle nyɛ lè solomikaari nínge ni. 4#Mat 10:7-14; Mar 6:8-11; Luk 9:3-5 Yele si a kɔ́ wálile-yariya láa í, wàlá kpàbibēle yoo, wàlá taʔalaya yoo, yele a wɔ́ɔ kɔ́ yére bi syɔɔn faala syáanri kólogi na í. 5Yele ga sáà jée kpaʔa o kpaʔa ni, ye séli ye gi joo yé jo: ‹Kolocɔlɔɔ í yɛɛ̀nyingi kaan kpáagi naa wòolo ma!› 6Kapye yɛɛ̀nyingi pìiwaa i yaà, dùbaw yele kpéʔele lè yɛɛ̀nyingi kéele na, wi a foro wi ma. Kapye yɛɛ̀nyingi pìiwaa o yaà í, yɛɛ̀nyingi a lúru pan yele ma. 7#1Kor 9:14; 1Tim 5:18 Ye kòro kpáagi bee nibin ni, pe ga ni yáriree myɛ kaangi yele ma lè, yaa dee bee líi yáā gbo. Níì cán falipyeo n yɛlɛ ní wi sàraw ní. Ki ga yɛlɛ yele í kɔ́ yiri kpaagaa ni bi kàri kàa nikwɔɔ ni í. 8Yele ga sáà jée kàʔa o kàʔa ni, á kěgi bee syɛ̀ɛnnɛ yele sámaga n cò, pe ga ni yárigee myɛ kaangi yele ma lè, yaa gee bee líi, 9yáā yáabèle poori, yáā gi nyuu kěgi bee syɛ̀ɛnnɛ ma yé be pye: ‹Kolocɔlɔɔ fǎngi n nùuni yele na.› 10#Kap 13:51 Yele si ga sáà jée kàʔa o kàʔa ni, kapye pe ga yele sámaga n cò í, ye yiri yaa syée kěgi bee kàlari-kóloyo ni yé be pye: 11‹Alí yele kěgi cíbige ki nyɛ lè wolo tɔ́lɔyi na, wolo a gi kóri wo naa yele kánmi na. Koro ní ki myɛ ní ki n yɛlɛ ye gi cán Kolocɔlɔɔ fǎngi n nùuni yele na.› 12#Sél 19:24-28; Mat 11:24; 10:15 Mii a gi joo yele ma, ye gi cán Sodɔmi kěgi kútii a ba cɛ́rɛ bi sɔ̀lɔ kěgi bee wóo na cángi bee.

Kěyee yi lè yi da fɔ̀lɔ bi tága í

(Mat 11:20-24)

13 # Eza 23:1-18; Ezek 26:1—28:26; Zyow 4:4-8; Am 1:9-10; Zak 9:2-4 «Wɔʔɔli a pye mɔ na Korazɛn! Wɔʔɔli a wɔ́ɔ pye mɔ na Bɛtisayida! Níì cán kakpoloyi yi kpéʔele yele ni lè, yi ga maa kpéʔele Tiiri ní Siidɔn ni, yi wóbèle mǎà dée gɔ̀nvaʔaya búroyo le si cɔnʔɔ tɛ́ʔɛ bi peyɛɛ vílige bi gi tɛ̀ɛn poro n kàdoʔo wáa poro kapeegèle ma. 14Koro ní ki myɛ ní Tiiri ní Siidɔn kútiiw a ba cɛ́rɛ bi sɔ̀lɔ yele wów na kútiiw canjerige na. 15#Eza 14:13-15 A mɔ, Kapɛrinayumi, a pe a ba mɔ yìrige lé fwɔɔ bi sa nan nyɛ̀ʔɛni na? Eʔe, mɔ si a tìgi fwɔɔ bi sa nan tɛɛwɔʔɔgi na.

16 # Mat 10:40; Mar 9:37; Luk 9:48; Zyan 13:20 Wee wi ga ni lúro yele ma lè, wee bee wɔ́ɔ i lúro mii ma. Wee si wi ga yele cée lè, wee bee n wɔ́ɔ̀ mii cée. Wee si wi mii cée lè, mii Tunvɔw wi wɔ́ɔ̀ cée.»

Togoye taanri ní kpɔrigɔ ní siinw lúrubanna kéele

17A togoye taanri ní kpɔrigɔ ní siinw lúru n pan ní fundaanra ní n baa wi pye: «Kàfɔw, àlí màdebèle n sa ni lúro wolo ma mɔ mɛ́ɛgi yerile báriga ni.»

18A Zyezu be pye: «Mii maa Sutanaw nyaa a wi yìri nyɛ̀ʔɛni na n tìgi n too tári na àmɛɛ nyɛ̀ʔɛni nyɛ́ʔɛnɛmɛ nyɛ lè. 19#Ŋún 91:13 Ye wéle, mii n séew kaan yele ma yele í da wàbiyi, ní náabèle tánʔana, ní wɔ́ɔ̀ wi kaan yele ma yele í nigoow fànʔa myɛ jáa, yarigaa faala a gbǎn yafyɛn kpéʔele yele na í. 20Koro ní ki myɛ ní ki ga yɛlɛ yele í da fundaanra kpéʔele àmɛɛ màdebèle lúro yele ma lè í, fwɔɔ yaa fundaanra kpéʔele àmɛɛ yele mɛ́ɛyi sɛ́bɛ lè nyɛ̀ʔɛni na.»

Zyezu n fundaanra kpéʔele

(Mat 11:25-27; 13:16-17)

21Lǎli bee wonijanna ni a Zyezu tɔ̀nɔ n fundaanra kpéʔele Pìicǎnni báriga ni níì jo: «Abaa, mii i bariga kaangi mɔ ma, mɔ wi lè nyɛ̀ʔɛni, ní tári Kàfɔlɔ, níì cán mɔ n kérigèle naa làriga sícilibèle, ní kacánbèle na, níì ge tɛ̀ɛn pìíbèle na. Ɛɛn, Abaa, ncan ki maa pye mɔ nyɛ́nɛ kéele bi gi kpéʔele ànbée.

22 # Zyan 3:35; 10:15 Mii Tóow n yáriri myɛ le mii kɔ́yi ni. Syɔɔn faala ga Jaafɔw cán í, kapye Tofɔw ban í. Syɔɔn faala si ga wɔ́ɔ̀ Tofɔw cán í, kapye Jaafɔw ban í, ní wee na Jaafɔw caa bi wi tɛ̀ɛn lè, fwɔɔ woro.»

23A wi fíige n gi joo wi pìitamabèle yagana ma níì jo: «Bele nyapiigéle ge kérigèle nyaagi lè, gele yele nyaagi lè, bele bee i nyɛ dùba pìibēle. 24Níì cán mii a gi joo yele ma, kérigèle yele nyaagi lè, kanyaajoobèle ní fànʔafɔbèle pèle saʔa maa ni caa bi gele bee nyaa, kàjáa pe ga gi nyaa í, ní wɔ́ɔ i caa bi gi lóʔo, gee yele lúro lè, kàjáa pe ga gi lóʔo í.»

Samarii ye funjàngafɔw kàseele

25 # Mat 22:35-40; Mar 12:28-34 Lǎli bee ni a làlwaw sɛ́bɛwelewaa yìri n yére bi Zyezu nyɔ́ɔgi pye wéle níì jo: «Tamafɔw, nyàʔá gi yɛlɛ mii í kpéʔele jàngó mii í sìibangwɔɔw taa?» 26A Zyezu wi pye: «Nyàʔá gi sɛ́bɛ Mowizi làlwaw sɛ́bɛ ni? Mɔ ga ni wi wéle, nyàʔá mɔ gáà nyaa yaà?» 27#Lev 19:18; Làlw 6:5 A làlwaw sɛ́bɛweleo wi yari: «Ki n sɛ́bɛ níì jo:

‹Ki n yɛlɛ mi mɔ Kafɔw Kolocɔlɔɔ kéeli yaʔa

li mɔ dɛ́nɛ ní mɔ zɔnw myɛ ní,

ní mɔ fúngi myɛ ní,

ní mɔ bárigaw myɛ ní,

ní mɔ sɔngumi myɛ ní.

Mí wɔ́ɔ mɔ syɛɛnnyɛnw kéele yaʔa li mɔ dɛ́nɛ

àmɛɛ mɔ miyɛɛ dɛ́nɛ lè.› »

28 # Lev 18:5 A Zyezu wi pye: «Mɔ syɛɛnlurugori n tɔ̀nɔ n nyɔɔ. Maa gee bee kpéʔele, mɔ a sìi taa.»

29Kàjáa nǎnw bee maa ni caa bi tànʔa kaan wiyɛɛ ma. Gee bee na wi Zyezu pye: «Wìí si wi déē nyɛ mii syɛɛnnyɛnw?»

30A Zyezu wi yari: «Nànwaa maa yìri Zyerusalɛmi ma ni syée Zyeriko ma. A kàyuu-fànʔafɔbèle sáà too wi na n wi yáriri wòlo wi na, níì wi kpúmɔn gbanʔama, níì fala níì wi yaʔa beè, a wi kòro cɛɛri si kùu. 31A sáriga-wòlowaa kɔ́ɔ̀ yìri yaà ni maa kólogi bee ni. A wi ga baa nǎnw bee nyaa, a wi sɔ́lɔgɔ n sɔ̀lɔ kɔlɔ̀ na. 32Kánmi bee na Levii ye wówaa wɔ́ɔ baa nan tɛ́ɛgi bee na níì wi nyaa, a woro wɔ́ɔ̀ sɔ́lɔgɔ n sɔ̀lɔ kɔlɔ̀ na. 33#2Cán 28:15 Kàjáa Samarii ye wówaa maa ni syée kùlo ni ní sáà nan wi na. Amɛɛ wi wi nyaa lè nya, a wi nyínimi wi taa. 34A wi nùuni wi na, n baa sìnmɛ ní dùvɛɛn wo wi tɛɛ̀kpumɔ-gbàliyi na, níì yi pwɔɔ pwɔɔ, níì wi lúrugo woro tiimaa jòfaniw na n kári ní wi ní nibɔnbèle tɛɛtìrigegaa ma n sa ni wi kɔ̀rɔsíi. 35Ki nyǐndaligi na a wi wáli togoye siin wòlo n kaan nibɔnbèle tɛɛtìrigege kàfɔlɔ ma níì wi pye: ‹Da wi kɔ̀rɔsíi beè, gee mɔ ga kɔ́ɔ̀ kaan n sɔ̀lɔ lè gee naa na, mii ga lúru ni sɔ̀lɔ́, mii a gi sàra mɔ ma.›

36Nǎnwee na kàyuu-fànʔafɔbèle da too lè, syɛ́ɛnbèle bee taanri ni, wìí mɔ sɔ̀ngí wi i nyɛ nǎnw bee syɛɛnnyɛnnɛ?» 37A wi jo: «Wee wi nyínimi taa wi na lè.» A Zyezu wi pye: «Maa syée mi wɔ́ɔ mi sa ra gi kpéʔele ànbée.»

Zyezu i nyɛ Mariti ní Marii ye tɛ́ɛgi ni

38 # Zyan 11:1 Lǎli ni Zyezu ní wi pìitamabèle syée lè, a wi sáà jée kègaa ni, a cewaa wi tìrige wi kpáagi ni, pe i céw bee yiri Mariti. 39Cɔnɔvɔlɔ si maa pye wi ma cɔlɔɔ, pe i wi yiri Marii, a woro tɛ́ɛn ni puugu Kàfɔw taana ni wi syɛ́ɛnri lúro. 40Kàjáa Mariti fúngi maa nyáʔami wi na àmɛɛ kpáagi fáli nɛʔɛ lè. A wi nùuni Zyezu na n baa wi pye: «Kàfɔw, àmɛɛ mii cɔnɔw mii nibin yaʔa mii i fáliw kpéʔele lè, ki o nyɛ mɔ nyɛ́nɛ na yarigaa ì? Koro na mi gi joo wi ma wi mii dɛ̀ɛmɛ.» 41A Kàfɔw wi yari: «Mariti, Mariti, mɔ i mɔ fúngi curugu, ní i miyɛɛ vɔ̀rɔgí kèlē saʔa na. 42Kàjáa kéelee li yɛlɛ bi syɔɔn makow nyɔɔ lè, li i nyɛ nibin. Marii n lɛɛjanna nyɛ́nɛ n wòlo, lee li nyɛ lè syɔɔn a li syɔɔ wi ma í.»

Currently Selected:

Luki 10: CB10

Highlight

Copy