Sélimɛ 4
4
Kayɛn ní Abɛli kéeli
1A Adami wi céw Ɛvi cán wi cɔɔ̀, a wi fícɛnnɛ taa n Kayɛn see. A wi jo: «Mii n nàɔn see Yawe bárigaw ni.» 2Koro kàdoʔo ma a wi Kayɛn cɔnɔw Abɛli see.
A Abɛli baa pye bànaʔaɔ, Kayɛn si i nyɛ tèfalaɔ. 3A làlaa ga kwɔ́ɔ, a Kayɛn kári ní tári yaliifálaraa ní n sáà wòlo sáriga Yawe ma. 4#Heb 11:4 A Abɛli si kári ní wi bǎbèle pìiselibèle pèle, ní be sǐnmi myɛ ní. A Yawe fɔ̀lɔ Abɛli ní wi sárigaw na. 5Kàjáa wi ga fɔ̀lɔ Kayɛn, ní wi sárigaw na í. A Kayɛn fúngi tɔ̀nɔ n tanʔa gbanʔama, a wi yɛ́ɛgi tanʔa. 6A Yawe wi yari: «Nyàʔá na mɔ mɔ fúngi tanʔa, ba nyàʔá na mɔ mɔ yɛ́ɛgi tanʔa? 7Mɔ ga ni síngi mɔ a mɔ nyúngi yìrige. Mɔ si ga pye mɔ o síngi í, kapeeli li lee mɔ kpaaweeli na, li i caa bi tɛ́ɛn mɔ nyúngi na, mɔ má si gi nyɛ mɔ í pye li nyúngi na.»
8 #
Mat 23:35; Luk 11:51; 1Zyan 3:12 A Kayɛn si kɔ́ɔ̀ joo ní wi cɔnɔw Abɛli ní. Amɛɛ be pye ségi ni lè, a Kayɛn yìri wi cɔnɔw Abɛli kurugo n wi kpúmɔn n kpóo.
9A Yawe Kayɛn yíbe níì jo: «Sán mɔ cɔnɔw Abɛli nyɛ?»
A Kayɛn jo: «Mii ga cán í. Mii lé wi nyɛ mii cɔnɔw kpaàweleo?» 10#Heb 12:24 A Yawe jo: «Nyàʔá na mɔ koro pye? Mɔ cɔnɔw sìsyaan i yákpoli wáa tári na fwɔɔ a li i nangi mii na. 11Mɔ cɔnɔw mɔ kpóo lè, tásaligi ki gi nyɔ́ɔgi múgu n wi sìsyaanw syɔɔ mɔ kɔ́gi ni n gbaa lè, tɔ́ɔliw ni mɔ a dánga bi léeli gi na. 12Mɔ ga tári fála, ti a tée ní di yasanri kaan mɔ ma í. Mɔ a pye ninyaari-mí-màʔaga, ní nifaalaga tári na.»
13A Kayɛn gi joo Yawe ma níì jo: «Mii kolomi wɔʔɔgɔ túgoro n líbe n tóro mii í gbǎn di tugo. 14Wéle, mɔ n mii nɛnɛ n léeli tɛɛ̀falagi naa na níjanʔa a gi nyaa mii n yɛlɛ bi kári sa làra léelige mɔ na. Mii a pye ninyaari-mí-màʔaga, ní nifaalaga tári na. Syɔ́ɔnwee faala wi ga sáà mii nyaa lè, wi a mii kpóo.» 15A Yawe wi yari: «Syɔ́ɔnwee wi ga mɔ Kayɛn kpóo lè, mɔ kpóoli kapeele gɔlɔ́ a wòlo wee bee na bi ba taa ki tɛɛyɛ kɔrɔsiin.»
A Yawe fɛ̀ɛ kpúmɔn Kayɛn na koro ga pye syɔ́ɔnwee faala wi ga wi nyaa lè, wi a kɔ́ wi kpóo í. 16A Kayɛn núngo Yawe taana n kári n sáà tɛ́ɛn Nɔdi tári ni, Edɛn canʔafolomɔ kabangi na.
Kayɛn yòdaʔayi
17A Kayɛn sínɛ ní wi céw ní, a wi ficɛnnɛ taa n Henɔki see. A wi si baa kègaa faan níì gi mɛ́ɛgi le ni gi yiri Henɔki, wi jáaw mɛ́ʔɛ na. 18A Henɔki baa Iradi see, á Iradi Mehuyayɛli see, á Mehuyayɛli Metusyayɛli see, á Metusyayɛli Lemɛki see.
19A Lemɛki càbala siin láa. Pe maa ni wozeliw yiri Ada, ní i siin wów yiri Siila. 20A Ada Yabali see. Syɛ́ɛnbèle bele be kòró fànikpaayi ni lè, ní i yaweeri gbóo, Yabali wi nyɛ bele bee tóolɛʔɛ. 21Pe maa ni wi senyɛnw mɛ́ʔɛ yiri Yubali. Bele be kɔ̀ríw kpúmɔn, ní i máagèle wíi lè, Yubali wi nyɛ bele bee tóolɛʔɛ. 22A Siila si wɔ́ɔ̀ Tubali-Kayɛn see. Tubali-Kayɛn wi pye kanyɛɛnri ní túnmɔri yárira myɛ sámagafɔlɔ. Pe maa ni wi senyɛnjew mɛ́ʔɛ yiri Naama.
23A Lemɛki gi joo wi cébèle ma níì jo:
«Ada ní Siila, ki n yɛlɛ ye mii jóomi lóʔo.
Lemɛki cébèle, ki n yɛlɛ ye líiyi cáan ye lóʔo.
Mii n nàɔn kpóo mii kpàligi kéele na,
mii n nìgɔcariɔ kpóo mii kpumɔnnamigi kéele na.
24Kapye Kayɛn kpóoli kapeele gɔlɔ́ a wòlo gi tɛɛyɛ kɔrɔsiin,
mii Lemɛki kpóoli kapeele gɔlɔ́-wòloro a pye
tɔlɔyɔ togoye taanri ní kpɔrigɔ ní kɔrɔsiin.»
25A Adami níì sínɛ ní wi céw ní, a wi nànbile see níì li mɛ́ɛgi le ni li yiri Sɛti, ncan wi maa jo: «Kolocɔlɔɔ n níì yòdaʔagaa nikwɔɔ kaan mii ma Abɛli sìndɛɛgi ni, woro wee Kayɛn kpóo lè.»
26A Sɛti wɔ́ɔ baa nànbile see níì li mɛ́ɛgi le ni li yiri Enɔsyi. Lǎli bee ni syɛ́ɛnbèle séli ni Yawe mɛ́ɛgi yiri.
Currently Selected:
Sélimɛ 4: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.