Sélimɛ 30

1A Arasyɛli ga gi nyaa woro ga pyà taa Zyakɔbi ma í, a wi yɛʔɛfɔw nyabɛɛnnɛ pye wi na. A wi gi joo Zyakɔbi ma níì jo: «Pìibēle kaan mii ma, kapye koro ban í, mii a kùu.» 2A Zyakɔbi fúngi tɔ̀nɔ n tanʔa Arasyɛli kurugo, a wi jo: «Mii lé wi nyɛ Kolocɔlɔɔ, woro wee wi mɔ kún pìiseeri na lè?» 3A wi jo: «Mii falipyecew Biiliha si wi wee, ki n yɛlɛ mɔ í pye ní wi ní koro ga pye wi see mii yégunri na, jàngó mii í wɔ́ɔ pìibēle taa wi bárigaw ni.»

4A wi wi falipyecew Biiliha kaan Zyakɔbi ma wi pye wi cɔɔ̀, a wi pye ní wi ní. 5A Biiliha fícɛnnɛ taa n nànbile see Zyakɔbi ma. 6A Arasyɛli jo: «Kolocɔlɔɔ n tànʔa kaan mii ma kútiiw ni, ní wɔ́ɔ̀ lóʔo mii ma níì nànbile kaan mii ma.» Koro na wi wi mɛ́ɛgi le ni wi yiri Dan#30:6 Dan: Mɛ́ɛgi naa kɔ́rɔ i nyɛ kútiijooo.. 7A Arasyɛli falipyecew Biiliha níì fícɛnnɛ taa n nànbiisiin wólo see Zyakɔbi ma. 8A Arasyɛli jo: «Mii n gbɛ̀ɛgbàɔn cò ní mii yɛʔɛfɔw ní, a mii fànʔa taa wi na.» A wi pìíw mɛ́ʔɛ le ni wi yiri Nɛfitalii#30:8 Nɛfitalii: Mɛ́ɛgi naa kɔ́rɔ i nyɛ mii gbɛ̀ɛcori..

9A Leya ga gi nyaa woro n láʔa pìiseeri na, a wi wi falipyecew Zilipa kaan Zyakɔbi ma wi pye wi cɔɔ̀. 10A Leya falipyecew Zilipa nànbile see Zyakɔbi ma. 11A Leya jo: «Lee naa i nyɛ kataanna.» Níì pìíw mɛ́ʔɛ le ni wi yiri Gadi#30:11 Gadi: Mɛ́ɛgi naa kɔ́rɔ i nyɛ lɔjanra..

12A Leya falipyecew Zilipa níì nànbiisiin wólo see Zyakɔbi ma. 13A Leya jo: «Mii n tɔ̀nɔ n fundaanra taa. Ncan cébèle a ra mii yiri fundaanra fɔ́lɔ.» A wi pìíw mɛ́ʔɛ le ni wi yiri Azɛɛri.#30:13 Azɛɛri: Mɛ́ɛgi naa kɔ́rɔ i nyɛ fundaanra.

14Cangaa, ki maa pye bilew làrilaala ni, a Wurubɛn yiri n kári seʔe ma ní sáà mandiragɔri#30:14 Mandiragɔri: Mandiragɔri i nyɛ fíinge, wee nìnge be sɔ̀ngí lè ki i syɔɔn dɛ̀ɛmɛ́ pìiseeri kólogi ni. taa yaà n pan wi nɔ́ɔw Leya ma. Lǎli bee ni a Arasyɛli Leya pye: «Mii i mɔ nyɛ́ɛri, ki n yɛlɛ mi mii kaan mɔ piiw mandiragɔriwaa na.» 15A Leya wi yari: «A mɔ mii nǎnw syɔɔ lé mii ma koro ga sèʔê mɔ yɛlɛ í, fwɔɔ a mɔ ní i mii pìíw mandiragɔri caa bi syɔɔ?» A Arasyɛli jo: «Ki ga pye nya, mɔ ní wi a sínɛ yébiligi naa ni mɔ piiw mandiragɔri kéele na.»

16A ki ga pye cângwɔɔgi nyɔ́ɔ na lǎli ni Zyakɔbi yìri ségi ma ni maa lè, a Leya yiri n sáà wi fàra níì wi pye: «Mii ní mɔ a pye, níì cán mii n gi sàraw kaan n kwɔ́ɔ ní mii pìíw mandiragɔri ní.» Koro na Zyakɔbi sínɛ ní wi ní yébiligi bee ni. 17A Kolocɔlɔɔ Leya nyɛ́ɛrigi lóʔo. A Leya yére fícɛnnɛ na n baa nànbii-kagunɔ wólo see Zyakɔbi ma. 18A Leya jo: «Amɛɛ mii mii falipyecew kaan mii nǎnw ma lè, Kolocɔlɔɔ n gee bee sàra kaan mii ma.» A wi pìíw mɛ́ʔɛ le ni wi yiri Isakari#30:18 Isakari: Mɛ́ɛgi naa kɔ́rɔ i nyɛ sàraw wii.. 19A Leya níì fícɛnnɛ taa n nànbii-kɔrɔni wólo see Zyakɔbi ma. 20A Leya jo: «Kolocɔlɔɔ n yakaanjànga kaan mii ma. Kátali naa na, mii nǎnw a náa mii kéeli kpɔ́ʔɔ. Níì cán mii n nànbiigéle kɔrɔni see wi ma.» A Leya pìíw mɛ́ʔɛ le ni wi yiri Zabulɔn#30:20 Zabulɔn: Mɛ́ɛgi naa kɔ́rɔ i nyɛ kpɔʔɔrɔ taʔa..

21Koro kàdoʔo ma a wi calipile see níì li mɛ́ɛgi le ni li yiri Dina.

22Lǎli bee ni a Kolocɔlɔɔ sɔ̀ngi n taa Arasyɛli na níì wi nyɛ́ɛrigi lóʔo, níì wi ceseegi múgu. 23A wi fícɛnnɛ taa n nànbile see. A wi jo: «Kolocɔlɔɔ n mii fɛ̀ɛ́ri láʔa mii na.» 24#Sél 25:21; 1Sam 1:19,20; Ŋún 113:9 A wi pìíw mɛ́ʔɛ le ni wi yiri Zyozɛfu#30:24 Zyozɛfu: Mɛ́ɛgi naa kɔ́rɔ i nyɛ kàa i taari., ní níì jo: «Ki n yɛlɛ Yawe í ní nànbilaa kaan mii ma bi fàra lee naa na.»

Zyakɔbi n lɔnɛʔɛrɛ taa

25A Arasyɛli ga tɛ́nɛ baa Zyozɛfu see, a Zyakɔbi gi joo Laban ma níì jo: «Ki n yɛlɛ mi mii yaʔa mii í lúru kári mii tɛ́ʔɛ ma mii tári ma. 26Mii cébèle ní mii pìíbèle kéele na mii báara mɔ ma lè, mí wɔ́ɔ be kaan mii ma mii í da syée ní be ní. Níì cán mɔ tiimaa n gi cán kánmee na mii báara n sɛ́ɛ mɔ ma lè.»

27A Laban jo: «Mii i caa mɔ í nyɔɔ mii na si lóʔo mii ma. Mii kolocɔlɔbèle n gi tɛ̀ɛn mii na ncan Yawe n tɔ̀nɔ n dùbaw taʔa mii kɔ́lɔ yáriri na mɔ kéeli na. 28Sàrawee na mii yɛlɛ bi mɔ sàra lè, wi tɛ̀ɛn mii na, mii a wi kaan mɔ ma.»

29A Zyakɔbi wi pye: «Kánmee na mii báara mɔ ma lè, ní àmɛɛ mɔ yaweeri baa pye n sɛ́ɛ lè mii bárigaw ni, mɔ n koro cán. 30Yáriri di pye mɔ ma sáni mii í pan lè, ti da nɛʔɛ í. Toro si ti baa nɛʔɛ dee. Nlaa mii baa nyɔ̌nnɔ cáan mɔ tɛ́ɛgi ni lè, a Yawe tɔ̀nɔ n dùbaw taʔa mɔ na. Tɔ́ɔliw ni doò, làlìí ni mii a kɔ́ mii tiimaa kpáagi fáli kpéʔele?» 31A Laban jo: «Nyàʔá mii yɛlɛ bi kaan mɔ ma mɔ saraw?»

A Zyakɔbi wi yari: «Mɔ a yafyɛn kaan mii ma í. Mɔ ga fɔ̀lɔ mii wógi na, mɔ a ní gi yaʔa mii í da mɔ yaweeyiligèle nàʔá sáā ge kɔ̀rɔsíi. 32Mii a nyaari bi sɔ̀lɔ mɔ yaweeyiligèle gboogéle myɛ nínge ni níjanʔa, bi bàpii-nyɔ́ngɔ-nyɔngɔgèle, ní tɛɛwɔɔyi wòʔolo myɛ cɔɔnri n fàra wowɔɔgèle na bi yirige bǎbèle ni bi yaʔa kɔlɔ̀ na, si wɔ́ɔ koro wonijangi kpéʔele sikebèle na. Bele myɛ pe ga pye lè wonyɔngɔ-nyɔngɔbèle ní tɛɛwɔɔyi wòolo, poro pe a pye mii sàraw. 33Mii funviiw a ba pye mii séera nyɛ̀ʔɛna, lǎli ni mɔ ga pan ba mii sàraw wéle lè. Sikaà o sikaà wi ga pye lè wi o nyɛ wonyɔngɔ-nyɔngɔɔ ní sikebèle ni í, wàlá a tɛɛwɔɔyɔ fun bàpile nyaa bàpiigèle ni, ki a córo mii n wi yùu.» 34A Laban jo: «Ki n yɛlɛ. Amɛɛ mɔ gi joo lè, ki n yɛlɛ gi pye nya.» 35A Laban si fala n kapɔ-nyɔ́ngɔ-nyɔngɔbèle cɔɔnri n yaʔa kɔlɔ̀ na cángi bee tiimaa na, n fàra sikecebèle myɛ na be pye lè wonyɔngɔ-nyɔngɔbèlē ní, poro bele myɛ na tɛɛfiiye pye lè, n fàra bàwɔɔbèle myɛ na. A wi poro le wi pìíbèle kɔ́yɔ ni, 36níì be léeli Zyakɔbi na canya taanri tánʔana kánma.

A Zyakɔbi i Laban yaweeyiligèle wozangèlē nàʔá. 37A Zyakɔbi kàgbeepirigéle cɛnɛ pupiliye tiige, ní amandi tíige, ní pilatani tíige káganya na, níì tɛɛgèlē sála ge na koro ga pye ke tɛɛfiigèle í da nyaagi. 38Yaweeyiligèle ga pan tɛɛgbaagi ni lǎlee ni lè, kàgbeegèle wi sála lè wi n ge le yaweeri yagbaaya ni gee bee n jo yaweeyiligèle yagbaaya ni yaweeri yɛ́ʔɛ ma téw, beè ti maa ni gbo ní i lúru tiyɛɛ na lè. 39A yaweeri i lúru tiyɛɛ na kàgbeegèle yɛ́ʔɛ ma, a ti i pìíbèle sii tɛɛ̀nyɔngɔyɔ woolo, ní tɛɛwɔɔyɔ wòolo, ní kàgbaa wòolo. 40Bǎbèle si na a Zyakɔbi poro wàli ní i yawee-nyɔ́ngɔ-nyɔngɔri, ní kàgbaaw wóro, ní wowɔɔri yéregi tiyɛɛ daana, toro dee myɛ di pye lè Laban yaweeri ni.

A wi wi tiimaa yaweeri gboogéle yaʔa kɔlɔ̀ na. Wi ga di pínɛ Laban wóri ni í. 41Yaweeri di pye ní fànʔa ní lè, lǎli ni ti ga ni lúru tiyɛɛ na lè, Zyakɔbi n kàgbeegèle le yaweeri yagbaaya ni ti nyɛnɛ na, koro ga pye taa lúru tiyɛɛ na ge taana. 42Lǎli ni yaweeri ga waʔa lè, wi o gáà kàgbeegèle le yaà í. Kánmi bee na yaweegèle ge waʔa lè, koro maa pye Laban wòʔolo, á wogbologèle pye Zyakɔbi wòʔolo.

Zyakɔbi n fàn n yiri Laban tɛ́ɛgi ni

43A Zyakɔbi tɔ̀nɔ n lɔrɔ taa gbanʔama, yaweeyiligēle saʔa maa pye wi ma. A falipyecabala, ní falipyenànbēle wɔ́ɔ̀ pye wi ma, n fàra fàlibaaya, ní jòfanibēle na.

Currently Selected:

Sélimɛ 30: CB10

Highlight

Copy