Sélimɛ 28

1A Izaaki si Zyakɔbi yeri n baa dùba kpéʔele wi ma ní wɔ́ɔ̀ gi joo n gbàn wi ma níì wi pye: «Mɔ a tíi si kɔ́ Kanaan tári céwaa pɔri í. 2Yìri maa syée Padan-Arami ma mɔ nɔ́ɔw tóo Betuwɛli ma, mi sa mɔ syɛɛnlɛɛw Laban pìiwaa láa yaà beè. 3Kolocɔlɔɔ wi lè Séew Myɛ Kàfɔlɔ, ki n yɛlɛ woro í dùbaw taʔa mɔ na, mɔ í pìinɛʔɛrɛ taa bi pye syɛɛnnɛʔɛmɛ. 4#Sél 17:4-8 Ki n yɛlɛ wi Abirahami dùbaw wonijaɔn kaan mɔ ma, si wɔ́ɔ wi kaan mɔ yodaʔayi ma, koro ga pye táree ni mɔ tɛ́ɛn lè dee, àmɛɛ nibɔɔn nyɛ lè, toro dee Kolocɔlɔɔ kaan Abirahami ma lè, tári bee í pye mɔ wóro.»

5A Izaaki Zyakɔbi yaʔa a wi kári. A Zyakɔbi kári Padan-Arami ma Laban ma, wi lè Betuwɛli jáaw, Betuwɛli wi lè Arameyɛnw. Zyakɔbi ní Ezau nɔ́ɔw Erebeka senyɛnnɛ wi da pye Laban.

6A Ezau gi nyaa àmɛɛ Izaaki dùba kpéʔele Zyakɔbi ma lè níì wi tórigo Padan-Arami ma wi sa cɔlɔɔ láa yaà beè, ní wɔ́ɔ̀ gi nyaa lǎli ni Izaaki da ni dùbaw kpéʔele Zyakɔbi ma lè, si wi tórigo, a wi gi joo n gbàn wi ma níì jo: «Mɔ a tíi si kɔ́ Kanaan tári céwaa láa í.» 7A wi si wɔ́ɔ̀ gi nyaa a Zyakɔbi wi tóow ní wi nɔ́ɔw syɛ́ɛnrɛ lóʔo níì kári Padan-Arami ma. 8Lǎli bee ni a Ezau fala n gi cán ncan Kanaan tári càbala kéele ga woro tóow dɛ́nɛ í. 9A Ezau fala n kári Isimayɛli ma n sáà cewaa láa yaà beè n fàra wi cébèle bele na. Abirahami jáaw wi lè Isimayɛli, woro pìíw pe da ni yiri lè Mahalati, woro wi da pye céw bee. Céw bee senyɛnnɛ pe da ni yiri Nɛbayɔti.

Zyakɔbi ŋúnɔgi kéele

10A Zyakɔbi yiri Bɛɛri-Syeba ni ni syée Karan ma. 11A wi sáà nan tɛɛgaa na, a wi syɔ́ɔn beè níì cán cángi maa too. Wi maa tɛ́ɛgi bee kàdɛnɛgaa láa n wi nyǔngi taʔa níì sínɛ ni ŋúnɔ tɛ́ɛgi bee ni. 12#Zyan 1:51 A ŋúnɔgɔ jée wi ni. A wi yalúgugo nyaa tári na woyérigege ní á gi sáà sígi nyɛ̀ʔɛni na, níì Kolocɔlɔɔ nyɛ̀ʔɛni tundunbéle nyaa pe i lúru ní i tíri gi na, 13#Sél 13:14-15 Yawe si i nyɛ woyéreo ní ki ǹjogi ni. A Yawe wi pye: «Mii wi nyɛ Yawe, mɔ tóolɛɛgi Abirahami Kolocɔlɔw, ní mɔ tóow Izaaki Kolocɔlɔw. Táree na mɔ sínɛ lè dee, mii a di kaan mɔ ní mɔ yodaʔayi ma. 14#Sél 12:3; 22:18 Mɔ yodaʔayi a ba pye córomɔ fun àmɛɛ támiigi nyɛ lè. Mɔ a ba cariga bi fala canʔajeemɛ, ní canʔafolomɔ, ní solomɔkulo, ní wòrogulo kàbanyi na. Tári narigbaaya myɛ a ba dùbaw taa mɔ ní mɔ yodaʔayi báriga ni. 15Wéle, mii i nyɛ ní mɔ ní. Tɛʔɛ o tɛʔɛ ni mɔ ga kári lè, mii a ra mɔ kɔ̀rɔsíi bi ní mɔ lúrugo pan tári naa ma. Níì cán mii a tée mɔ yaʔa í, fwɔɔ bi taa gee mii joo mɔ ma lè, mii í gi foro.»

16A Zyakɔbi yìri wi ŋúnɔmi na níì jo: «Yawe tɔ̀nɔ́ i nyɛ tɛ́ɛgi naa ni. Mii si da koro cán í.» 17A wi i fɛ̀ɛgí níì jo: «Tɛ́ɛgi naa tɔ̀nɔ́ i nyɛ fyáara tɛ́ʔɛ. Kolocɔlɔɔ kpáagi tɔ̀nɔ́ gii, tɛɛgaa nikwɔɔ ban í. Koro gi wɔ́ɔ̄ nyɛ nyɛ̀ʔɛni kpàánweele.» 18A Zyakɔbi sɔ̀li n yìri nyǐngi nyɔ́ɔ na níì kàdɛnɛgi láa, gee na wi da nyǔngi taʔa lè n gi yérige gàánna níì sìnmɛ wo ki ǹjogi ni. 19Níì tɛ́ɛgi bee mɛ́ʔɛ le ni gi yiri Betɛli. Kěgi bee pe da ni yiri booma ni Luzi. 20A Zyakɔbi nyɔɔfaliga kpéʔele níì jo: «Kolocɔlɔɔ ga pye ní mii ní, ni mii kɔ̀rɔsíi kólogi na, ní wɔ́ɔ i yaliiri ní yaleri kaangi mii ma, 21n taa a mii lúru n pan mii tóow tɛ́ʔɛ ma yɛɛ̀nyinge na, lǎli bee ni Yawe a pye mii Kolocɔlɔw. 22Kàdɛnɛgi naa mii yìrige n yérige lè gee gàánna, ki a pye Kolocɔlɔɔ kpaʔa. Yáriree myɛ wi ga kaan mii ma lè, mii a di yáʔaw wòlo bi kaan wi ma.»

Currently Selected:

Sélimɛ 28: CB10

Highlight

Copy