Sélimɛ 25

Abirahami kùúw ní wi yòdaʔayee wozanya

1Abirahami maa níì cewaa nikwɔɔ láa, pe i wi yiri Ketura. 2A Ketura pìíbèle naa see Abirahami ma, poro be nyɛ Zimiran, ní Yokisyan, ní Medan, ní Madyan, ní Yisyibaki, ní Syuwa. 3A Yokisyan Saba ní Dedan see. Dedan yòdaʔayi si yi nyɛ Asyuri ye, ní Letusyi ye, ní Lewumi ye. 4Madyan jáabèle si i nyɛ Efa, ní Efɛɛri, ní Henɔki, ní Abida, ní Ɛlidaa. Bele bee myɛ be pye Ketura yòdaʔayi.

5Abirahami maa wi kɔlɔ̀ yáriri myɛ kaan Izaaki ma. 6Gee si gi pìíbèle bele kéele kwɔ́ɔ lè, bele Abirahami da see cébèle bele na pe da pye lè wi cefàra-mí-láabèle, wi maa yakaanraa kaan bele bee ma wi wéemi làla ni, níì be léeli Izaaki na, a be sáà tɛ́ɛn canʔafolomɔ kabangi tára ni. 7Abirahami sìíw yɛ̀ʔɛlɛ myɛ nyɔ́ɔ n pye togoye kɔrɔtaanri ní kpɔrigɔ ní kagunɔ, á wi kùu. 8Abirahami fundaanratɔw maa tɔ̀nɔ n lɛɛ n tín níì kùu n fàra wi toolɛɛbèle na pe da kùu lè. 9Wi pìíbèle be lè Izaaki ní Isimayɛli, a poro sáà wi tɔ́n Makpela nyanbeweegi ni. Ki maa pye Efurɔn ségi ni, Efurɔn wi lè Sohari jáaw, Sohari wi lè Hɛti yòdaʔagaa. Tɛ́ɛgi bee maa pye Mamire zǐnmi na. 10#Sél 23:19-20 Abirahami maa ségi bee syɔɔ lɔrɔ na Hɛti yòdaʔayi ma. A be Abirahami tɔ́n yaà beè n fàra wi céw Sara na. 11Abirahami kùúli kàdoʔo ma, a Kolocɔlɔɔ dùbaw taʔa Izaaki na. Izaaki maa sáà kòro Lahayi-Woroyi kɔ̀lɔ́w taana.

12Abirahami pìíw Isimayɛli yòdaʔayi yi yee naa: Sara pulocew Agari, wi da pye lè Ezyipiti ye wów, woro wi da pìíw bee see Abirahami ma. 13Isimayɛli pìíbèle mɛ́ɛyɛ yi nyɛ yee naa n yɛlɛ ní gi ní àmɛɛ be taʔala peyɛɛ na lè seeli ni. Wi pìiseliw pe da ni yiri Nɛbayɔti, á Kedaari taʔa, á Adibeyɛli taʔa, á Mibisami taʔa, 14á Misyima taʔa, á Duma taʔa, á Masa taʔa, 15á Hadadi taʔa, á Tema taʔa, á Yeturi taʔa, á Nafiisyi taʔa, á Kedima taʔa. 16Bele bee be pye Isimayɛli pìíbèle. Pe mɛ́ɛyi si wɔ́ɔ i nyɛ yoro. A be pye fànʔafɔbiigéle kɛɛ ní siin n yɛlɛ ní be syɛɛnfeleyi kánma ní. Pe maa be mɛ́ɛyi le be kěyi ní be tɛ́nɛmi vòyo na. 17Isimayɛli sìíw yɛ̀ʔɛlɛ myɛ nyɔ́ɔ n pye togoye kɔrɔni ní kpɔrigɔ ní kɔrɔsiin, á wi kùu n fàra wi toolɛɛbèle na pe da kùu lè. 18A Isimayɛli yòdaʔayi tɛ́ɛn tɛ́nɛmee ni bi nyɛ lè Havila, ní Syuri níngi ni. Syuri i nyɛ Ezyipiti taana Asirii tári kàbaan na. A Isimayɛli yòdaʔayi tɛ́ɛn n yɛʔɛ̀ wáa yi senyɛnbèle bele myɛ ma pe wɔ́ɔ̄ nyɛ lè Abirahami pìibēle.

ZYAKƆBI

Ezau ní Zyakɔbi kéeli

19Abirahami jáaw Izaaki yòdaʔayi yi nyɛ yee naa:

Abirahami wi Izaaki see. 20Izaaki maa taa yɛ̀ʔɛlɛ togoye siin lǎli ni wi Erebeka láa lè wi cɔɔ̀, Erebeka wi lè Betuwɛli pìíw, Betuwɛli wi lè Arameyɛnw, ní i nyɛ Padan-Arami ye wóo. Erebeka yɛʔɛfɔw wi da pye Laban, wi lè Arameyɛnw. 21A Izaaki Yawe nyɛ́ɛri gbanʔama wi céw kéele na, níì cán wi maa pye cenaa-sìnzeeo. A Yawe wi nyɛ́ɛrigbɔɔgi lóʔo, a wi céw Erebeka yére ŋǎnbéle fícɛnnɛ na. 22N pìíbèle yaʔa pe nɔ́ɔw láʔa ni, a be i peyɛɛ cínɛ yaà. A Erebeka jo: «Ki ga pye nya, nyàʔá na mii yére fícɛnnɛ na?» A wi kári n sáà Yawe yíbe. 23#Wɔr 9:12 A Yawe wi yari:

«Syɛɛnfeleye siin yi nyɛ mɔ fícɛnni ni,

mɔ a syɛɛnfeleye siin see.

Syɛɛnfeleyi bee a ba wàli

bi láʔa yiyɛɛ na.

Syɛɛnfelegaa nibin fànʔa a ba

kpɔ́ʔɔ bi sɔ̀lɔ kàa wóʔo na.

Yɛʔɛfɔw a ba wiyɛɛ gaan cɔnɔvɔw ma.»

24Lǎli ni Erebeka làrizeeli baa nan lè, a be gi nyaa ncan ŋǎnbéle fícɛnnɛ li nyɛ wi na. 25A wozeliw yiri wonyɛɛɔn ní. Wi céri myɛ si i nyɛ mɔ a jo síire búrogo gii. A be wi mɛ́ɛgi le ni wi yiri Ezau. 26A wi senyɛnw náà yiri. Wi si maa Ezau cò yédeleeli na. A be wee bee mɛ́ʔɛ le ni wi yiri Zyakɔbi#25:26 Zyakɔbi: Mɛ́ɛgi naa kɔ́rɔ i nyɛ yédeleeli còvɔlɔ. 27:36 wéle.. Lǎli ni Erebeka be see lè, Izaaki maa taa lǎli bee ni yɛ̀ʔɛlɛ togoye taanri.

27A pìíbèle bee baa lɛɛ. A Ezau pye tòzoo-sícilio, wee senyaariri da dɛ́nɛ lè cama ni. A Zyakɔbi si pye syɛɛnnyíɔn, fànikpaayi kòrofɔwaa wi da pye. 28Ezau kéeli maa Izaaki dɛ́nɛ, níì cán Ezau seʔe káari tàanma maa wi nyúngi cò, á Zyakɔbi kéeli si Erebeka dɛ́nɛ.

29Cangaa Zyakɔbi maa jàʔala sɔʔɔ. A Ezau yìri sìnbirigi ni n lúru n pan. Wi maa tɔ̀nɔ n fɔ̀rɔ gbanʔama. 30A wi Zyakɔbi pye: «Jànyɛɛnri bee tàa kaan mii ma mii í lìi, níì cán mii fǎngi n tɔ̀nɔ n kwɔ́ɔ.» Koro na pe wi mɛ́ɛgi le ni wi yiri Edɔmi#25:30 Edɔmi: Edɔmi kɔ́rɔw wi nyɛ wonyɛnʔɛ..

31A Zyakɔbi wi yari: «Ki n yɛlɛ mi mɔ lɛ́ɛgi tɔ̀nɔ pára mii ma níjanʔa.» 32A wi Zyakɔbi yari: «Kateegi gi syée sa mii kpóo wee, nyàʔá lɛʔɛ tɔ̀nɔw bee a nyɔɔ mii na?»

33 # Heb 12:16 A Zyakɔbi wi pye: «Ki n yɛlɛ mi kàli mii ma gbɛnʔɛnɛ.» A Ezau kàli wi ma níì wi lɛ́ɛgi tɔ̀nɔ pára wi ma. 34Lǎli bee ni a Zyakɔbi búru ní jàsɔ̄ʔɔraa kaan Ezau ma, a wi lìi níì gbaa. Níì yìri n kári. Kánmi bee na Ezau lɛ́ɛgi tɔ̀nɔ faʔa.

Currently Selected:

Sélimɛ 25: CB10

Highlight

Copy