Sélimɛ 14
14
Abirami ní fànʔafɔbèle ní Mɛlikizedɛki kéeli
1Amirafɛli wi pye lè Syineyari fànʔafɔw, ní Ariyɔki wi pye lè Elazari fànʔafɔw, ní Kedɔrilawomɛɛri wi pye lè Elami fànʔafɔw, ní Tideyali wi pye lè Goyimi fànʔafɔw, fànʔafɔbèle naa làla ni, 2a gi pye a be pan ba kapɛɛnnɛ kpúmɔn ní fànʔafɔbèle bele ní be pye lè Sodɔmi ye fànʔafɔw Bera, ní Gomɔri ye fànʔafɔw Birisya, ní Adima ye fànʔafɔw Syineyabi, ní Seboyimi fànʔafɔw Syemeyebɛɛri n fàra Bela fànʔafɔw na. Pe wɔ́ɔ i Bela yiri Sowari. 3A bele bee myɛ sáà peyɛɛ gbóʔoro Sidiimi jǐnlɔgi ni. Tɛ́ɛgi bee gi nyɛ Solonɛʔɛmi lɔ̀ʔɔ. 4Pe maa sélì peyɛɛ gaan Kedɔrilawomɛɛri ma yɛ̀ʔɛlɛ kɛɛ ní siin fúngo ni, kàjáa yɛ̀ʔɛlɛ kɛɛ ní taanri wóli na, a be wi cée. 5Yɛ̀ʔɛlɛ kɛɛ ní sicɛrɛ wóli na, a Kedɔrilawomɛɛri kári n fàra fànʔafɔbèle bele na pe da pye ní wi ní lè, a be sáà Erefa ye jáa Asyitarɔti-Karinayimi ni, níì Zuzii ye jáa Hami ni, níì Emii ye jáa Syave-Kiriyatayimi ni. 6Horii ye si na, pe maa poro jáa pe nyanbeleyi na yi lè Seyiiri wóyi, níì be kɔ́ri n láa fwɔɔ n sáà nan Ɛli-Paraan na, ki nyɛ lè fìími tára taana. 7Koro kàdoʔo ma a be lúru n pan Ɛn-Misyipati ma, gee bee n jo Kadɛsyi ma, níì pan n baa Amalɛki ye jáa pe tásaligi myɛ na, ní wɔ́ɔ̀ Amɔri syɛɛnfelegi kálagi, poro bele be pye lè wodɛ́ɛnbéle ní Asasɔn-Tamari ni. 8Lǎli bee ni a Sodɔmi fànʔafɔw ní Gomɔri fànʔafɔw yiri, n fàra Adima fànʔafɔw, ní Seboyimi fànʔafɔw, ní Bela fànʔafɔw na, Bela pe wɔ́ɔ̄ yiri Sowari. A be sáà wáa fànʔafɔbèle bele na kapɛɛnnɛ na Sidiimi jǐnlɔgi ni. 9Bele na pe da sáà wáa lè, poro be nyɛ Kedɔrilawomɛɛri wi pye lè Elami fànʔafɔw, ní Tideyali wi pye lè Goyimi fànʔafɔw, ní Amirafɛli wi pye lè Syineyari fànʔafɔw, ní Ariyɔki wi pye lè Elazari fànʔafɔw. Fànʔafɔɔlɔ sicɛrɛ ní fànʔafɔɔlɔ kagunɔ pe da wáa peyɛɛ na. 10Kùro wéeye si maa pye Sidiimi jǐnlɔgi myɛ ni. A Sodɔmi ní Gomɔri fànʔafɔbèle fàn n sáà too yi ni. Bele be kòro woweebèlē ní lè, a poro fàn n lúgu nyanbelegi na. 11Bele be fànʔa taa lè, a poro fala n pan n baa jée n Sodɔmi ní Gomɔri lɔ́ri myɛ koli, n fàra be yaliiri myɛ na n kári ní di ní. 12A be wɔ́ɔ̀ Abirami senyɛnw jáa cò wi lè Lɔti, n fàra wi kɔlɔ̀ yáriri na n kári. Lɔti maa pye wodɛ́ɛɔn ní Sodɔmi ni.
13A nànwaa fàn n syɔɔ n kári n sáà kéeli bee joo Abirami ma wi lè Heburuw. Abirami si maa pye wodɛ́ɛɔn ní Mamire syɛni tíiri nínge ni. Mamire wi da pye lè Amɔri ye wów, ní i nyɛ Ɛsyikɔli ní Anɛɛri senyɛnnɛ. Pe myɛ taanriw maa bɛ̀ɛ nibin na ní Abirami ní. 14Lǎli ni Abirami gi lóʔo lè pe n woro senyɛnw jáa cò n kári, nǎnbèle sirakele ní dabata ní kpɔrigɔ ní kɔrɔtaanri be pye wi wóbèle lè, bele pe da see yaà wi kpáagi ni lè, á wi be tama kapɛɛnni na, a wi be kɔ́ri n taʔa fànʔafɔbèle bee na n sáà be nɛnɛ n cò fwɔɔ Dan ma. 15A wi wi kapɛɛnkpumɔnbèle kabiga tíla, a be too fànʔafɔbèle bee na yébiligi ni woro ní wi falipyebèle ní. A wi be jáa, níì be kɔ́ri n láa fwɔɔ n sáà nan Hoba na. Tɛ́ɛgi bee i nyɛ Damasi solomɔkulo kàbangi na. 16A wi lúru n pan ní yáriri myɛ ní pe da koli lè, ní wɔ́ɔ̀ lúru n pan ní wi senyɛnw jáa ní wi lè Lɔti, ní Lɔti kɔ́lɔ yáriri ní, n fàra cébèle, ní syɛɛnsanbèle bele na pe da cò n kári lè.
17Lǎli ni Abirami yìri Kedɔrilawomɛɛri, ní fànʔafɔbèle bele pe da pye ní Kedɔrilawomɛɛri ní lè, poro tɛɛ̀jáagi ni ni maa lè, a Sodɔmi fànʔafɔw yiri n kári n sáà wi fàra Syave jǐnlɔgi ni, pe yiri lè Fànʔafɔw Jǐnlɔgɔ.
18 #
Heb 7:1-10
Mɛlikizedɛki wi lè Salɛmi fànʔafɔw, ní i nyɛ sáriga-wòloo Kolocɔlɔɔ ma wi nyɛ lè Pe Myɛ Nyúngo na, a woro pan ní yaliire ní n fàra dùvɛɛn na. 19Ní baa dùba kpéʔele Abirami ma níì jo:
«Kolocɔlɔɔ wi nyɛ lè Pe Myɛ Nyúngo na,
ní i nyɛ nyɛ̀ʔɛni ní tári Kàfɔlɔ,
ki n yɛlɛ woro í dùbaw taʔa Abirami na.
20Kolocɔlɔɔ n yɛlɛ waa wi kpɔ̀ʔɔrɔ́,
woro wee wi nyɛ lè Pe Myɛ Nyúngo na,
woro wee wi mɔ nígoobèle le mɔ kɔ́yi ni lè.»
A Abirami yáriri myɛ yáʔa wòlo n kaan wi ma.
21A Sodɔmi fànʔafɔw gi joo Abirami ma níì jo: «Syɛ́ɛnbèle kaan mii ma mí kòro ní lɔ́ri ní.»
22A Abirami si Sodɔmi fànʔafɔw yari: «Mii n mii kɔ́gi yìrige bi kàli Yawe na, woro wee wi nyɛ lè Kolocɔlɔɔ, wee wi nyɛ lè Pe Myɛ Nyúngo na, woro wee wi nyɛ̀ʔɛni ní tári faan lè, 23yáriri myɛ di nyɛ mɔ wóro lè mii a tée ki kàa syɔɔ mɔ ma í, àlí jèseepile, wàlá taʔala-mɛ́ɛnnɛ, koro ga pye mɔ a kɔ́ gi joo si jo: ‹Mii n Abirami kpéʔele lɔrɔ fɔ́lɔ› í. 24Mii a yafyɛn syɔɔ mɔ ma í, fwɔɔ gee nìgɔcaribèle lìi lè, n náà fàra Anɛɛri, ní Ɛsyikɔli, ní Mamire ye na be pínɛ n pye ní mii ní lè, poro n yɛlɛ bi be lɛɛgèle syɔɔ.»
Currently Selected:
Sélimɛ 14: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
