Yirile 30

Nùndaanni yáriga sáriga-wòlo-yafanʔa

1 # Yir 37:25-28 «Ki n yɛlɛ mi sáriga-wòlo-yafanʔa sámaga bàā nùndaanni yárira sórogi gi na. Ki sámaga ní akasya tíire ní. 2Ki tɔnɔganmi n yɛlɛ bi pye mɛ́tiri tíla, ki kpɔ́ʔɔganmi si wɔ́ɔ pye mɛ́tiri tíla. Ki tɔnɔganmi ní gi kpɔ́ʔɔganmi a pye sèjira. Ki ǹjogi tɔnɔganma si pye mɛ́tiri nibin. Ki nyɛ́ngèle si yirige pínɛ ní gi ní. 3Mí tɛɛteleo tɛ́ʔɛ mi gi tɛ́ɛyi myɛ tɔ́n, gee bee n jo ki ǹjogi, ní gi lɛ̀ʔɛgèle myɛ, n fàra ki nyɛ́ngèle na, bi gi màʔa. Mí tɛɛwaa sámaga wi pye ki nyɔɔwari bi gi màʔa. 4Mí tɛɛ̀ vèʔeye siin-ziin sámaga ki nyɔɔwari láara ni, ki lɛ̀ʔɛgèle siin na. Yàa a pye kàbangee na, yàa í pye kàbangee na jàngó bàā ki láali tíingéle forogi yaà beè. 5Mɔ a tíingéle sámaga akasya tíire woʔolo, mí tɛɛ̀ tɛ́ʔɛ mi ge tɛ́ɛyi myɛ tɔ́n. 6Mí sáriga-wòlo-yafaangi tɛ́ʔɛ fànipariw yɛ́ʔɛ ma, wi lè séeraw kásu yɛ́ʔɛ ma, kapeegèle kùsulugo tɛ́ʔɛ yɛ́ʔɛ ma ki lè séeraw kásu ǹjoʔo ni, beè mii a ra mɔ fàrá lè. 7Aarɔn a be pye paa nùndaanni yáriga sórogi. Canʔa o canʔa nyɛ̀ʔɛ nyɔ́ɔ na, wi a be pye be kàa sórigo lǎli ni wi ga ni jà fètingèle sámaga yaʔa lè. 8Aarɔn ga ni fètingèle nii cângwɔɔgi nyɔ́ɔ na lǎli ni lè, wi a wɔ́ɔ kàa sórigo. Gee bee a pye nùndaanna yáriga, gee ki a ra sóori lè làla o làla mii Yawe yɛ́ʔɛ ma, yele yìrigèle myɛ syɛ̀ɛnnɛ lala ni. 9Yele a kɔ́ nùndaanna yárigaa nikwɔɔ wòlo sáriga gi na í. Yele a wɔ́ɔ kɔ́ sáriga-sórigoo, wàlá míimɛ sáriga wòlo gi na í. Yele a wɔ́ɔ kɔ́ sáriga-yólogoo faala wo gi na í. 10Aarɔn a ra kapeegèle kùsulugo fáli kpéʔele sáriga-wòlo-yafaangi nyɛ́ngéle na tɔlɔgɔ nibin yɛɛlɛ o yɛɛlɛ. Kapeegèle kùsulugo fáli yaweele sisyaan wi a ra téeri bàā kapeegèle kùsulugo fáli kpéʔele. Kapeegèle kùsulugo fáli a ra kpéʔele gi na yɛɛlɛ o yɛɛlɛ tɔlɔgɔ nibin yele yìrigèle myɛ syɛ̀ɛnnɛ lala ni. Gee bee a pye yacandelege mii Yawe yɛ́ʔɛ ma.»

Nyùnzyɔɔ-wáliw kaanna tɛɛcǎngi kéele na

11A Yawe gi joo Mowizi ma níì jo: 12«Lǎli ni mɔ ga ni jà Isirayɛli ye córo bi be nyɔ́ɔgi cán lè, pe myɛ nibin nibin n yɛlɛ bi be tiimaa nyùnzyɔɔri sàra kaan mii Yawe ma, koro ga pye pe ga be córo lǎli ni lè, káfalagi yáama a kɔ́ too be na í. 13#Yir 38:25-26; Mat 17:24 Bele myɛ pe a córo lè, gee pe a kaan lè, koro gi nyɛ gee naa: Pe myɛ nibin nibin a kaan wálifiio gerabéle kagunɔ kagunɔ, bi yɛlɛ ní tɛɛcǎngi wáli nyɔ́ɔ tíla ní#30:13 tɛɛcǎngi wáli nyɔ́ɔ tíla ní: Pe i tɛɛcǎngi wáli mɛ́ʔɛ yiri sikili. Sikili nibin si i nyɛ gerabéle toko. Geraw si nyɛ girami be tílaga.. Wáliw bee a wòlo bi kaan Yawe ma. 14Syɛ́ɛnbèle bele myɛ pe a córo lè bi séli yɛ̀ʔɛlɛ toko wóbèle na, ní poro yɛ́ʔɛ ma wóbèle, poro pe a yakaangi bee wòlo bi kaan Yawe ma. 15Lɔrɔfɔlɔ ga yɛlɛ wi kàa fàra nyɔ́ɔgi bee na í, fɔ̀ngɔfɔlɔ ga wɔ́ɔ̀ yɛlɛ wi kàa fɔ̀n wálifiiw gíramibéle kagunɔ ni í woro wee pe a láʔala bi kaan mii Yawe ma jàngó bi peyɛɛ nyúnyi syɔɔ lè. 16Mɔ a nyùnzyɔɔ-wáliw syɔɔ Isirayɛli ye ma, si wi le Syɛ́ɛnmi Tɛɛfaraga fànikpaʔa fáli ni. Gee bee a pye Isirayɛli ye ma sɔ̀ngudaara mii Yawe yɛ́ʔɛ ma pe tiimaw nyùnzyɔɔrɔ kéele na.»

Jéemununi pɛɛkpɔʔɔ kéele

17A Yawe gi joo Mowizi ma níì jo: 18#Yir 38:8 «Ki n yɛlɛ mi kanyɛɛnrɛ pɛɛkpɔʔɔ sámaga. Ki nɔ́gi si pye kanyɛɛnrɛ wóʔo. Ki a pye jéemununi kéele na. Mí gi tɛ́ʔɛ Syɛ́ɛnmi Tɛɛfaraga fànikpaʔa, ní sáriga-wòlo-yafaangi nínge ni, mí lɔ̀ʔɔ le gi ni. 19Aarɔn ní wi jáabèle a ra kɔ́yi ní tɔ́lɔyi jé gi ni. 20Pe ga ni jà jée Syɛ́ɛnmi Tɛɛfaraga fànikpaʔa ni lǎli ni lè, pe peyɛɛ jée lǒgi bee ni, koro ga pye pe a kɔ́ kùu í. Pe ga wɔ́ɔ naà nùuni sáriga-wòlo-yafaangi na fáliw kéele na bi sárigaw sórigo, wee be sórogi naà ni lè, 21pe a be kɔ́yi ní be tɔ́lɔyi jée kánmi bee na jàngó pe a kɔ́ kùu í. Gee bee a pye bàngwɔɔ làlwasɛbɛɔ wi ní wi yòdaʔayi ma yirigèle myɛ wòolo lala ni.»

Sìnjǎnmi kéele

22 # Yir 37:29 A Yawe gi joo Mowizi ma níì jo: 23«Nùndaanni yárira di nyɔɔ lè, ki n yɛlɛ mi toro tàa láa. Toro di nyɛ: Míiri, koro lǒgi cúlobéle kagunɔ, ní kanɛli cúlobéle siin ní tíla, ní nùndaanna yáriga cúlobéle siin ní tíla, 24ní kasi cúlobéle kagunɔ bi yɛlɛ ní tɛɛcǎngi córomɔ nyɔ́ɔ ní, ní olivye sìnmɛ lítiribéle kɔrɔni. 25Mi dee bee kpéʔele syɔɔn kalifaali sìnmɛ, bi yɛlɛ ní nùndaanni yárira sámagafɔɔlɔ fálipyeganma ní, pi a pye syɔɔn kalifaali sìnmɛ. 26Mi bi pàa wo Syɛ́ɛnmi Tɛɛfaraga fànikpaʔa, ní séeraw kásu na, 27ní tàbaliw, ní wi yayigeleri myɛ, ní fètindaʔali, ní li yayigeleri, ní nùndaanni yasorigoro sáriga-wòlo-yafanʔa, 28ní sáriga-sórigow sáriga-wòlo-yafanʔa, ní gi yayigeleri myɛ na, n fàra pɛɛkpɔɔgi ní gi nɔ́gi na. 29Mɔ a yáriri bee sámaga yaʔa Kolocɔlɔɔ ma, ti a pye yacandelere. Yariga o yariga ki ga tánga di na lè, ki a yaʔa kɔlɔ̀ na Kolocɔlɔɔ ma. 30Mɔ a sǐnmi wo Aarɔn ní wi jáabèle na bi be yaʔa kɔlɔ̀ na mii Kolocɔlɔɔ ma jàngó paa sáriga-wòlori fáli kpéʔele mii ma. 31Ki joo Isirayɛli ye ma mí be pye: ‹Sǐnmi bee a pye mii ma syɔɔn kalifaali sìnmɛ yele làrigèle myɛ syɛ̀ɛnnɛ nínge ni. 32Ki ga yɛlɛ pe bi pàa wo syɔɔnwaa cére na í. Yele a kɔ́ pàa sámaga bi bee naa wíri ní yanijanri ní í. Pi i nyɛ yacanga, koro na ki n yɛlɛ bi córo ànbée. 33Syɔ́ɔnwee wi ga bi felege sámaga lè, wàlá n bi pàa taʔa syɔɔnwaa nikwɔɔ na lè, syɔ́ɔnw bee a kwɔ́ɔ yirige wi syɛ́ɛnbèle nínge ni.› »

Nùndaanni yariga sámaga-yaʔala kéele Kolocɔlɔɔ ma

34A Yawe gi joo Mowizi ma níì jo: «Ki n yɛlɛ mi nùndaanna yáriraa láa, ti lè sitakite, ní onikisi, ní galibanɔmi, ní nùndaanni yáriraa n fàra nùndaanna yasorigogo wodelege na. Ti nyáʔami tiyɛɛ ni, ti tímanaganmi í pye sèjira. 35Mɔ a dee bee tɛ́ʔɛ nùndaanna yasorigogo sámaga, ti nyáʔami tiyɛɛ ni bi yɛlɛ ní nùndaanna yasamagaɔ fáli pyeganma ní, solomɔ si pye gi ni. Ki a pye fɔɔnrɔ fun, si yaʔa kɔlɔ̀ na Kolocɔlɔɔ ma. 36Mí gi kàa súu míige mi tɛ́ʔɛ Séeraw kásu yɛ́ʔɛ ma, Syɛ́ɛnmi Tɛɛfaraga fànikpaʔa ni, beè mii a ra mɔ fàrá lè. Ki a pye yele ma yacandelege. 37Nùndaanni yáriga mɔ a sámaga lè, yele a tíi si kɔ́ gi felege sámaga ní yanijanri ní bi yaʔa yeyɛɛ ma í. Ki a pye mɔ ma yarigaa, gee ki a yaʔa lè kɔlɔ̀ na Yawe ma. 38Syɔ́ɔnwee faala wi ga gi felege sámaga jàngó bàā gi nǔngi taagi lè, wee bee a kwɔ́ɔ yirige wi syɛ́ɛnbèle nínge ni.»

Currently Selected:

Yirile 30: CB10

Highlight

Copy