Yirile 24

Kolocɔlɔɔ n joogaanna kpéʔele ní Isirayɛli ye ní

1A Kolocɔlɔɔ gi joo Mowizi ma níì wi pye: «Lúgu naa mɔ tiimaa, mii Yawe ma nyanbelegi na, mɔ ní Aarɔn, ní Nadabi, ní Abihu, n fàra Isirayɛli wólɛɛbèle togoye taanri ní kpɔrigɔ na. Yele a ba kòro léelige si too bi yɛ́ɛyi cíbele. 2Mowizi nibin wi a nùuni mii Yawe na. Wozanbèle ga yɛlɛ bi nùuni naa í. Syɛ́ɛnmi ga wɔ́ɔ̀ yɛlɛ bi lúgu ní wi ní í.»

3A Mowizi sáà Yawe syɛ́ɛnri bee myɛ joo Isirayɛli syɛ́ɛnbèle ma n fàra wi tundunri myɛ na. A syɛ́ɛnbèle myɛ pínɛ n bɛ̀ɛ nibin na níì gi joo Mowizi ma níì jo: «Syɛ́ɛnree Yawe joo lè, wolo a ti myɛ foro.»

4A Mowizi Yawe syɛ́ɛnri myɛ sɛ́bɛ. Koro kàdoʔo ma a wi sɔ̀li n yìri n sáriga-wòlo-yafanʔa faan nyanbelegi tìgimɛ ni, n fàra gàángéle kɛɛ ní siin na n yɛlɛ ní Isirayɛli syɛɛnfeleyi kɛɛ ní siin nyɔ́ɔ ní. 5A wi Isirayɛli nìgɔcaribèle pèle tun a be sáà sáriga-sórigoo wòlo, ní wɔ́ɔ̀ náapegèle kèle kɔnɔgi n pye pínɛnyɛnnɛgɛ sáriga Yawe ma. 6A Mowizi sìsyaanw tílawaa le yaleyaa ni, níì tílawee nyari nyari sáriga-wòlo-yafaangi na. 7A wi joogaanni sɛ́bɛ láa n wi syɛ́ɛnri wéle n joo syɛ́ɛnbèle ma. A be jo: «Gee myɛ Yawe joo lè, wolo a gi kpéʔele foro sáā lúro wi ma.»

8 # Mat 26:28; Mar 14:24; Luk 22:20; 1Kor 11:25; Heb 9:19-20; 10:29 A Mowizi sìsyaanw láa n nyari nyari syɛ́ɛnbèle na níì jo: «Joogaanlee Yawe kpéʔele ní yele ní lè syɛ́ɛnri naa myɛ kéele na, loro sìsyaanw wi nyɛ wee naa.»

9A Mowizi lúgu nyanbelegi na, woro ní Aarɔn, ní Nadabi, ní Abihu, n fàra Isirayɛli wólɛɛbèle pèle togoye taanri ní kpɔrigɔ na. 10A be Isirayɛli ye Kolocɔlɔw nyaa. Wi tɔ́lɔyi láara maa pye àmɛɛ yarigaa nyɛ gee be sámaga ní safiiri ní lè, ki i nyɛ́ʔɛnɛ ní i nyɛ búula cére na àmɛɛ nyɛ̀ʔɛni gáà cèlege lè. 11Wi ga kɔlɔ̀ sánʔa n taʔa Isirayɛli wonyɛnɛ-wòlobèle na í. Pe maa Kolocɔlɔɔ nyaa, níì lìi níì gbaa.

Mowizi n Kolocɔlɔɔ fàra nyanbelegi na

12A Yawe gi joo Mowizi ma níì wi pye: «Ki n yɛlɛ mi lúgu naa mii ma nyanbelegi na mi ba pye naa. Mii a ba kàdɛnɛyɛ kàlagorigēle kaan mɔ ma, gele na mii làlwaw ní tundunri sɛ́bɛ lè be tamani kéele na.»

13A Mowizi yìri, a wi falipyew Zyozuwe pínɛ ní wi ní n lúgu Kolocɔlɔɔ nyanbelegi na. 14A wi gi joo wolɛɛbèle ma níì be pye: «Ye wolo sige nɛɛ naa bi taa wolo í lúru pan yele ma. Aarɔn ní Huri be nyɛ bele ní yele ní, keele ga pye yele wàa ma bi cɔɔnri, ki n yɛlɛ wi kári be ma.» 15A Mowizi lúgu nyanbelegi na, á fàfaangi nyanbelegi tɔ́n. 16A Yawe nìjangbɔɔri baa tɛ́ɛn Sinayii nyanbelegi na, a fàfaangi gi tɔ́n canya kɔrɔni fúngo ni. Canya kɔrɔsiin wógi na, a Yawe kòro yaà fàfaangi fúngo ni níì Mowizi yeri. 17Yawe nìjangbɔɔri kánma maa pye Isirayɛli ye nyɛ́nɛ na àmɛɛ naà nyɛ, gee gi sórigolo kpéʔele lè nyanbelege ǹjoʔo ni. 18#Làlw 9:9 A Mowizi jée fàfaangi fúngo ni n lúgu n kári nyanbelegi na, ní sáà kwɔ́ɔ yaà nyanbelegi na canya togoye siin ní yébiliye togoye siin.

Currently Selected:

Yirile 24: CB10

Highlight

Copy