MATHIE 23

Jezwi étɔlé ohá bidíyɛ́nmán le Fariziɛnnɛ́n ɔ́nmɔn phɔ mwanhɛ́n

(Ɔ́n wú Mák 12.38-39; Ɔ́n wú Lwik 11.43,46; 20.45-46)

1Lótɛ Jezwi étɔ bhwe sé ápasá le mɛ́n yíchwɛmán ɔ́nmɔn sa:

2– Bidíyɛ́nmán le Fariziɛnnɛ́n ɔ́nmɔn ɔn, wo júmán nɔn ali lée wo lɛ Moyízi bidí bhwethé sé néphan oyé. 3Lóhɛ́nthé, áyɔn salé ɔ́n ji wo, ló wo bhwe khúnbrɛn tɛɛ wo étɔ ɔn, ɔ́n tɛ́ lóyí, khɛ́n ɔ́n ne tɛ́ wo yí yábhɛ brɛ wo etɛ́, átɛsalé áyí wo élie ɔn, wo nbrɛn-ɛ wo le tɛ́ lóyí. 4Wó ha nɔnkwá lwálwa sé néphan the, lókhɛ́n wo lé gɛ bhó wo nkhwɛ brɛ wɛ́-nwɛ́ hɔ́n the nkɔn. 5Wo yítɛ́ khúnbrɛn hrómɛn, wo pɔ salé néphan owan wo. Lóhɛ́nthé, ábhwetɔ́ créncré lókɔn khɛ́n abha wo hɛ́nmɛn thethé le wo mɔ́n tho, wó la bidí phɛ́nphɛ́n thóntho phɔ, ló wo pɛ ntráliɛ́ mɛ́n nwɔ́wɔyá. 6Kasé wo bha nɛn mɛ́n, ási mímí abha hɛ́nmɛn khɛ́n wo nkɛé wo chré, saji hɛ́nbhúrɛ si lɔ, ńyákhru akhwa hɛ́nmɛn, lótho khɛ́n wo nkɛé wo chré; 7ló ábhácathé lɔ, wo énɛn salé néphan obhɔ́ wo yí ájí mɛn, ló nkɔn che wo “Yíliemán”. 8Lókhɛ́n hɔ́n ɔn, ɔ́n ne chɛ́ néphan oche hɔ́n “Yíliemán”, átɛsalé hɔ́n khúnbrɛn ɔ́n ni hɔnsɛ́nhɔn, ló ɔ́n pɛ lephan míbrɛ ali hɔ́n “Yíliéwo”. 9Áthéji krɛn, ɔ́n ne che lephan brɛ hɔ́n “The”, átɛsalé ɔ́n pɛ lephan míbrɛ ali hɔ́n “The”, mɛ́n nɔn ńma átho. 10Ɔ́n ne chɛ́ néphan oche hɔ́n “Athe”, átɛsalé ɔ́n pɛ lephan míbrɛ ali “Athe”, mɛ́n nɔn ńni Mesi. 11Hɔ́n hrómɛn, lephan khɛ́n énɛn alí lephan khóo, áyɔn salé ankhwɛn hɔ́n hɛ́nmɛn nɛn. 12Lephan khɛ́n ehɔ́n mɛ́n nbrɛn jetho, wo bhá hɔ́n-ɛn bháthé, khɛ́n mɛ́n anhɔ́n mɛ́n nbrɛn máthé, wo bhá hɔ́n-ɛn jetho.

Bidíyɛ́nmán le Fariziɛnnɛ́n mɛ́n mɔ́nmɔn ápɛ, Jezwi ebhɔ́ nkɔn lóphɔ pɔn

(Ɔ́n wú Mák 12.40; Ɔ́n wú Lwik 11.39-42,44,52; 20.47)

13– Bidíyɛ́nmán le Fariziɛnnɛ́n mɛ́n mɔ́nmɔnmán, muswe gɛ hɔ́n! Ɔ́n hɔ́n Átho Bhringbi khúbhɛ́ khúmɛ́n si phú néphan hɛ́nmɛn; hɔ́n nbrɛn ɔ́n ne gɛ káne, saji néphan khɛ́n énɛn akáne lɔ, ɔ́n ne sé wo lóphɔ mɔ́nsi.

[ 14Bidíyɛ́nmán le Fariziɛnnɛ́n mɛ́n mɔ́nmɔnmán, muswe gɛ hɔ́n! Ɔ́n phiɔ grwanyá mɔ́n mɛn khwɛ́n wo yí khúnbrɛn yɛn, lóka lókɔn nɔn hɔ́n yankanla khɔ́n, ochɛ́sé néphan owú salé ɔ́n ni néphan apriman. Lóhɛ́nthé, wo bhá bhɔ́ hɔ́n kwa mɛ́n khrákhrá!]

15Bidíyɛ́nmán le Fariziɛnnɛ́n mɛ́n mɔ́nmɔnmán, muswe gɛ hɔ́n! Ɔ́n khali áyíta ngrɛmɛ́n ngrɛmɛ́n le gwe mɛ́n mɛ́n si khúnbrɛn, lótɛ khɛ́n áyítɛ́jrɛ́nwo pɔ́pɔ́ brɛ tɛɛ nɔn ɔ́n gɛ, ló lóka ɔ́n gɛ lólephan brɛ lókɔn, ɔ́n chɛ́ mɛ́n kwabhɔ́ khɔnman brɛn hɔ́n ékɛ lí ndɔn mɔn.

16Yalimán mɛphumán muswe gɛ hɔ́n! “Hɔ́n nkɛé lephan, kasé ɛbhɔli Yankan-nkhú hɛ́n hrómɛn tɔ bhwe, ló ékɛ ále tɛ́ yíɛkɛ. Lókhɛ́n kasé ɛbhɔli ńcí abha Yankan-khúthé hɛ́n hrómɛn tɔ bhwe ɔn, ábhwe lókɔn, áli ábhwe bɛn ahɔn pɛ.” 17Mɛphumán, gbwɛmán! Lóbɛn nɔn akhɔnman ɛ: ńcí lée nka Yankan-nkhú ali áyí achɛ ńcí lókɔn tɛ créncré? 18Saji ɔ́n cu tɔ sa: “Lephan kasé ɛbhɔli ńphaha túprán hɛ́n tɔ bhwe, ábhwe lókɔn ále tɛ́ yíɛkɛ; lókhɛ́n kasé ɛbhɔli áyí obho ha npha ńphaha túprán tho hɛ́n tɔ bhwe ɔn, ábhwe lókɔn, áli ábhwe bɛn ahɔn pɛ.” 19Mɛphumán! Lóbɛn nɔn akhɔnman ɛ: áyí obho ha npha lée nka ńphaha túprán ali áyí achɛ́ ńphaha yí lókɔn tɛ́ créncré? 20Lephan khɛ́n ébhɔlí ńphaha túprán hɛ́n tɔ bhwe ɔn, ńmɔ́li ńphaha túprán le lóyí khúnbrɛn abha lótho ɔ́nmɔn hɛ́n tɔ bhwe; 21lephan khɛ́n ébhɔlí Yankan-nkhú hɛ́n hrómɛn tɔ bhwe, ńmɔ́li Yankan-nkhú le Yankan khɛ́n achre lóhrómɛn ɔ́nmɔn hɛ́n tɔ bhwe; 22lephan khɛ́n ébhɔlí átho hɛ́n hrómɛn tɔ bhwe, ńmɔ́li Yankan Bhringbi yákhru le Yankan nbrɛn khɛ́n achre lótho ɔ́nmɔn hɛ́n hrómɛn tɔ bhwe.

23Bidíyɛ́nmán le Fariziɛnnɛ́n mɛ́n mɔ́nmɔnmán, muswe gɛ hɔ́n! Átɛsalé ɔ́n muri hɔ́n bithe nyámí ali ńfɛ, njisɛ́ le ngbokhwɛn ɔ́nmɔn ndɔn wɔ́, ló ɔ́n mó lóphɛ́nta brɛ sé Yankan. Lókhɛ́n áyílie akhɔnman ali áyí mímí abha ábidí hrómɛn ɔn, ló-ɛ ɔ́n yɔ kalé, lónɔn ali áyítɛ́ príman, ńfɛkhuwú le ágɛ ógɛlé ya: áyí ayɔn se salé ɔ́n tɛ́ nɔn ali lókɔn, lókhɛ́n ɔ́n há áyí nánkhɛ lɔ phɔ bhwa. 24Yalimán mɛphumán! Ɔ́n me ńpwɛ́n yɛn hɔ́n ndɛ hromɛn, lókhɛ́n ɔ́n mɛn frímú khókho-ngbɔwo ɛ!

25Bidíyɛ́nmán le Fariziɛnnɛ́n mɛ́n mɔ́nmɔnmán, muswe gɛ hɔ́n! Átɛsalé ɔ́n chó hɔ́n yábhɔ́ le hɔ́n gbán ɔ́nmɔn mánji, lókhɛ́n hɔ́n sídosí le hɔ́n nánmí yí phromɛn phromɛn énɛn ɔn, ló-ɛ si lóhrómɛn. 26Fariziɛn mɛphuwo! Tɛmɛ ɛlili chó hɛ yábhɔ́ hrómɛn, lópán lóphɔ lɔ bha chán.

27Bidíyɛ́nmán le Fariziɛnnɛ́n mɛ́n mɔ́nmɔnmán, muswe gɛ hɔ́n! Ɔ́n tɛsa álínɔn oha phé, lóphɔ efí, khɛ́n lóhrómɛn ɔn, mɔngumán nchwe le áyí phúnɔn yábhɛ yábhɛ khúnbrɛn si lóhrómɛn. 28Hɔ́n lɔ lóyábhɛ brɛ, néphan hɛ́nmɛn ɔ́n tɛ́sa néphan apriman, lókhɛ́n abhurɛ yábhɛ yábhɛ le ńmɛ́n mɔ́nmɔn yítɛ́-ɛ si hɔ́n hrómɛn.

Áyí wo bhá tɛ́ dri néphan phɔ, Jezwi étɔ lóphɔ bhwe

(Ɔ́n wú Lwik 11.47-51)

29– Bidíyɛ́nmán le Fariziɛnnɛ́n mɛ́n mɔ́nmɔnmán, muswe gɛ hɔ́n! Ɔ́n thán álínɔn mwámwá sé bhwetɔ́trémán akhu, ló áyíyálitɛ́mán línɔn, hɔ́n écɔ lóphɔ tɛ́, 30ló hɔ́n étɔ sa: “Lo jisɛmánhɔn cí abha mɛpɔ́, kasé áli lo lɔ lo bhá mɛpɔ́ lóka lókɔn, ka lóka wo ewɛ́n bhwetɔ́trémán lo bha lé ká wo hrómɛn.” 31Lóhɛ́nthé, hɔ́n nbrɛn lɔ thénthé ɔ́n yɛn salé néphan awɛn bhwetɔ́trémán, ɔ́n ni wo jimiɔn. 32Áyɔn! Hɔ́n jisɛmánhɔn yí abhɔhɛ́n, tɛmɛ ɔ́n tɛ́ osímɛ́n! 33Ńdumán, mɛmán gbemán! Kalósi ɔ́n khɔ hɔ́n ebhú salé wo bha lé tɛ́ yí dri hɔ́n phɔ nɔ́nkrwan khúbhɛ́ e? 34Lóhɛ́nthé, tɛmɛ ɔ́n yé ábhwe mɛn mán tɔ: mɛn mán khwɛ́n bhwetɔ́trémán, bhweyɛ́nmán le hrɔ́yɛ́nmán ɔ́nmɔn man sé hɔ́n. Ɔ́n ma wɛ́n dɔnbɛn, ló ɔ́n ma khwɛ́n fe-ɛ chɛ́ há áyábhletre phɔ, ɔ́n ma bhra dɔnbɛn ngbre hɔ́n hɛ́nbhúrɛ si, ló ɔ́n ma thú wo thá khɔ́ khúbhɛ́ khúbhɛ́. 35Lóhɛ́nthé, néphan khúnbrɛn ale tɛ yíɛkɛ khɛ́n wo wɛn, achan Abɛ ali lephan apriman mɛ́n cí tho, kábrɛ kábrɛ ádi Zakari ali Barachi mi yé, Zakari lókɔn khɛ́n ɔ́n wɛn ńphaha túprán le ási atɛ créncré ɔ́nmɔn thethé, áyí khɛ́n wo bhá tɛ́ dri néphan lókɔn phɔ, hɔ́n tho nɔn ábha bhú. 36Mímí mɛɛ́n kranmán hɔ́n: áyí khɛ́n wo bhá tɛ́ dri néphan phɔ néphan wo wɛn hɛ́nthé, thénthé khúbhɛ́nɛ́n tho nɔn lókhúnbrɛn lókɔn bha sa hɛ́n.

Jezwi le Jeruzalɛ́mɛn khúbhɛ́ phɔ bhwe

(Ɔ́n wú Lwik 13.34-35)

37– Jeruzalɛ́mɛn, Jeruzalɛ́mɛn, hɛ ɛwɛ́n bhwetɔ́trémán le néphan Yankan ekhwɛ́n thu hɛ, khɛ́n ɛkúmú dia wo wɛ́n! Lósi tɛ khɛ́n mɛn khɔ́ gba hɛ khúbhɛ́nɛ́n bhurɛhɛ́n mɛn phɔ, sa lósi kɔsɔ bhie khɔ́ gba mɛ́n miɔn bhurɛhɛ́n mɛ́n nphrɛ́mɔn thé ɔn, mɛɛ́n nɛn lósi khɛ́n ɔ́n ne dɛn bhrɔ́ɔ́! 38Ɔ́n wu a! Thénthé wo bhá sa mánji khrui hɔ́n bháthó. 39Mímí mɛɛ́n kranmán hɔ́n salé: achan ncɛ́n élo, ɔ́n ma le cu wú mɛn npɔhɔ́n, kábrɛ kábrɛ, ábha di lócí khɛ́n ɔ́n ma tɔlé: “Lephan khɛ́n ebhá Hwánthe hɛ́n hrómɛn ɔn, tɛmɛ Yankan obhɔ́ nkɛ ndu!”

Currently Selected:

MATHIE 23: ENT96

Highlight

Copy