LWIKHI 7
7
Jezwi tɛ Rɔ́mɛn khúbhɛ́nɛ́n ngbuwo bhrɔ́khó nɛnkhwɛ́nwo bɛn phɔ jan
(Ɔ́n wú Mat 8.5-13)
1Lóka Jezwi tɔ bhwe se ápasá phu, ló ńno Kapɛnaúmɛn khúbhɛ́. 2Lóne, Rɔ́mɛn khúbhɛ́nɛ́n ngbumán-óthe bhrɔ́khó bɛn bháne, ńpɛ mɛ́n nɛnkhwɛ́nwo bɛn ńpɔ kpɛ́ɛ́n, khɛ́n nɛnkhwɛ́nwo lókɔn ɔn, álɔ́ hɔ́n nkɛ-áan áya mɛ́n khú mɛn phu. 3Lóka wo tɔ Jezwi bhwe se ngbumán-óthe bhrɔ́khó lókɔn ye, lótɛ ńchɛ Jwifunɛ́n hrómɛn mrɔ́khómán mɔ́nbɛn lée nkɔn lo do Jezwi bha tɛ́ mɛ́n nɛnkhwɛ́nwo phɔ jan kpɛ se. 4Wo lo Jezwi ntakhú, wo éla nkɛ khekhremɛn, ló wo étɔ sa:
– Sɛ lókɔn yí énɛn ɔn, álri, ló áyɔn salé ɛdɔnmán nkɛ mɔ́n. 5Ńpɔ lo khúbhɛ́nɛ́n, mɛ́n nɔn ńchɛ wo than lo hɛ́nbhúrɛ si.
6Ló Jezwi gɛ wo ɔ́nmɔn lo. Wo bha ɔɔ ákhakpɛɛ́ wo ebhá di ngbumán-óthe bhrɔ́khó hwan, lótɛ ńchɛ mɛ́n jɔn olo kranmán Jezwi lée:
– Hwánthe, ɛlé lri hɛ nbrɛn gbre, mɛn nɛn ni lephan khɛ́n ɛ́gɛ lɛ́ mɛn hwan, 7lóhɛ́nthé áleyɔn salé mɛɛ́n nbrɛn mɛn má hɛ hɛ́nmɛn. Khɛ́n tɛmɛ ɛtɔ bhwe brɛ pán, mɛn nɛnkhwɛ́nwo phɔ bha jan. 8Mɛɛ́n nbrɛn lɔ, ápɛ néphan apɛ mɛn, ló mɛn lɔ, ngbumán dɔnbɛn bha mɛn mɔ́n mɛn. Kasé mɛn kranman bɛn lée: “Lo!” lópán ánno, kasé mɛn che lójɔ lée: “Bha!” lópán anmá; kasé mɛn kranman mɛn nɛnkhwɛ́nwo lée: “Tɛ yí lókɔn!” lópán antɛ́.
9Lóka Jezwi ye ábhwe lókɔn, lótɛ ngbumán-óthe bhrɔ́khó bhwe khwɛ hɛ́nmɛnlé. Ńsáya, ló ńkránman ápasá agɛ thá salé:
– Mɛɛ́n kranmán hɔ́n gbée: mɛn nɛn ka wu mímíbhú yábhɛ lókɔn, Izraɛ khúbhɛ́ hrómɛn bhwá nbrɛn lɔ, álepɛ mímíbhú yábhɛ lókɔn bhrɔ́ɔ́.
10Néphan ochɛ yí ka asaji bha ngbumán-óthe bhrɔ́khó hwan, wo gɛ nɛnkhwɛ́nwo álɔ́ ehɔ́n, khɛ́n mɛ́n phɔ jan.
Jezwi chɛ grwanya bɛn mi cu bha mɛpɔ́
11Lómánji, Jezwi lo ákhúbhɛ́ bɛn óche Nayínɛn; mɛ́n yíchwɛmán le ápasá bhróbhrobhé gɛ ɔ́nmɔn lo. 12Lóka ńgbali ákhúbhɛ́ kɔ mɛ́n phu, ńywɛnli néphan élo mrwɛn lephan bɛn: lephan lókɔn akhu, grwanya bɛn mi sɛ logro brɛ, ló ákhúbhɛ́nɛ́n búdúbúdú bha nkɛ phɔ. 13Hwánthe ka awu grwanya lókɔn, nkɛ bhwe ékɛ phɔ, ló ńkránman nkɛ sa:
– Ɛle thɔ́n hɛ́ndu!
14Ńtino agbo phɔ, ńpa pɛ, lótɛ néphan ahɔn agbo, wo dɔnya. Ló Jezwi tɔ sa:
– Sɛbhri, mɛɛ́n kranmán hɛ lée, ɛchánfe!
15Kɔnthewo chanfe étɔ bhwe, ló Jezwi hɔn nkɛ se nkɛ man. 16Néphan khúnbrɛn esókhú, wo élri Yankan hwa, ló wo étɔ sa:
– Bhwetɔ́tréwo khóo bɛn bha ka lo thethé!
ló saji:
– Yankan bha édɔnmán mɛ́n féchwe mɔ́n!
17Néphan abha Jude gotho le lókhúbhɛ́hɔn abha lójɛ́ njɛ khúnbrɛn hrómɛn ye Jezwi yí atɛ phɔ bhwe.
Néphan khɛ́n Jan-Nduhɛ́nháwo chɛ yí
(Ɔ́n wú Mat 11.2-19)
18Áyí khúnbrɛn lókɔn ka atɛ khɛ́n mɛ́n yíchwɛmán lɛ lómɛ́n se ńye ɔn, Jan-Nduhɛ́nháwo che nkɔn hromɛn néphan mɔn bha, 19ló ńchɛ nkɔn lo nkɔn ébhi Jezwi salé: “Lephan wo nkɛé ebhá bhá, khɛ́n lo chre lo ébo ɔn, wú hɛ nɔn ɛli lólephan, lée nka áyɔn se salé lo bo lephan nankhɛ?” 20Wo ka wo di Jezwi ntakhú, ló wo kranman nkɛ sa:
– Jan-Nduhɛ́nháwo chɛ lo bha bhi hɛ lée: “Lephan wo nkɛé ebhá bhá, khɛ́n lo chre lo ébo ɔn, wú hɛ nɔn ɛli lólephan, lée nka áyɔn se salé lo bo lephan nankhɛ?”
21Lóka yábhɛ brɛ hromɛn nɔn Jezwi tɛ lɔ́phɔmán búdúbúdú phɔ jan, lɛnɛ-phɔmán le néphan khɛ́n nánnánmi phromɛn phromɛn bha wo phɔ, ló ńphwan mɛphumán búdúbúdú mɛbhí. 22Lómánji, ńkránman néphan khɛ́n Jan chɛ bha salé:
– Áyí ɔ́n wu le ábhwe ɔ́n ye, ɔ́n no lɛ lómɛ́n sé Jan oyé, ló ɔ́n krɛnmɛn lée: mɛphumán ewú yí, ntabhumán énɛnsi, khokhóbhé-phɔmán phɔ jan, njɛtɔmán eyé bhwe, mɔngumán chan khúnɔn mɛn fe, ló otɔ Ábhwe Bhwábhwá se gbremán. 23Néphan khɛ́n ebhú mɛn mímí ntɔ́nyán, áphɔ khwa wo lé!
24Néphan khɛ́n Jan chɛ yí ka asaji lo ɔn, lótɛ Jezwi étɔ nkɛ phɔ bhwe sé ápasá oyé, ló ántɔ sa:
– Ébí ɔ́n no wu ánánkhuthé ɛ? wú ńgochro bɛn áphɛ́phrɛ ehɔ́n jika? Chɛchɛ! 25Ló ébí nbrɛn nɔn ɔ́n no wu ɛ? wú lephan bɛn akhwa ádɛgɔn mímí? Néphan ákhwa ádɛgɔn mímí khónkhó, khɛ́n apɛ yí mímí, khɔ́ mríngbilímán bháthó wo bhá? 26Ló ébí nbrɛn nɔn ɔ́n no wu ɛ? wú bhwetɔ́tréwo bɛn? Ee, khɛ́n mɛɛ́n kranmán hɔ́n salé, ńbanbrɛn bhwetɔ́tréwo bhwá nbrɛn lɔ. 27Átɛsalé Jan phɔ bhwe nɔn Yankan hrɔ́ tɔ sa:
“Yankan tɔlé wu a, mɛn chɛ
mɛn mranchɛ́wo ebhá hɛ yé,
sa antɛ́ sitó ká hɛ lé.”
28Ló Jezwi cu tɔ salé, mɛɛ́n kranmán hɔ́n, Jan banbrɛn lephanmi khúnbrɛn tɛɛ oho. Lótɛ khɛ́n lephan atɛ mri Yankan Bhringbi khúbhɛ́, mɛ́n-ɛ ńbanbrɛn Jan.
29Aféchwe khúnbrɛn le la-nphodómán ɔ́nmɔn di njɛlé eyé Jezwi bhwe. Wo wu salé Yankan li lephan apriman, ló wo chɛ Jan ha wo nduhɛ́n. 30Khɛ́n Fariziɛnnɛ́n le bidíyɛ́nmán ɔ́nmɔn le dɛn do Yankan yí adɛn etɛ́ sé wo, lóhɛ́nthé wo le dɛn Jan ha wo nduhɛ́n.
31Ló Jezwi cu tɔ sa:
– Abɛn lephan nɔn mán gɛ mó thwelí thénthé khúbhɛ́ miɔ́ ɛ? Abɛn nɔn wo khɔ ɛ? 32Wo khɔ ńmiɔ́ akhwa ábhácathé élu nkhwɛ́ ka wo bɛn nbrɛn, khɛ́n étɔlé: “Lo mɔn akete se hɔ́n lée ɔ́n gbe bhi, lókhɛ́n ɔ́n ne gbe bhi! Lo kho hɛ́nduthɔ́n nánmɛ, lókhɛ́n hɔ́n ne thɔn hɛ́ndu!” 33Átɛsalé Jan-Nduhɛ́nháwo bha, ánnɛn ní nɛn, ánnɛn nán divɛn, ló hɔ́n nkɛé: “Nánnánmi phromɛn bha mɛ́n phɔ!” 34Lephan Mi bha, mɛ́n anní, annán, ló hɔ́n étɔlé: “Ńnɛnlí le divɛn onán ɔ́nmɔn pán nɔn ali mɛ́n hɛ́nphe anmú, saji ángɛ la-nphodómán le néphan phromɛn phromɛn ɔ́nmɔn thóbhɛ́!” 35Khɛ́n néphan khúnbrɛn tɛɛ adɛn do-e ɔn, wo tɛ yí lie salé Yankan bhweyɛ́n priman.
Jezwi bha Fariziɛn sɛ Simɔn hwan
36 Fariziɛn sɛ bɛn do Jezwi lée nkɛ bhá mɛ́n hwan bha gɛ ɔ́nmɔn lí nɛn. Jezwi lo nkɛ hwan, ló mɛ́n le nkɛ ɔ́nmɔn wo khwa tábrɛ mɛ́n. 37Bhie gbakhreya bɛn abha lóne khúbhɛ́, mɛ́n ka ńye salé Jezwi bha Fariziɛn sɛ hwan elí nɛn, ńno lóne, ló ńsránman abáthi kran bɛn ńnɔ́ndu bha lóhrómɛn. 38Ńya Jezwi mánji nkɛ nta njɛ anthɔ́n hɛ́ndu. Mɛ́n hɛ́ndu édia Jezwi nta tho, ló ńhɔn mɛ́n hɛ́nyro pɛ ánphu. Ńhɔn nkɛ nta sɛn hɛ́nmɛn, ló ńhɔn nɔ́ndu saha lóphɔ. 39Fariziɛn sɛ khɛ́n ado Jezwi lo mɛ́n hwan elí nɛn wu lóyí, ló ántɔ mɛ́n hrómɛn mɛn sa: “Kasé lephan lókɔn lí bhwetɔ́tréwo mímí nbrɛn, ka ánman yɛ́n bhie lókɔn khɛ́n epɛ́ pɛ, nkɛ lephan yábhɛ nkɛ li, ló ánman yɛ́n salé nkɛ li bhie gbakhreya.” 40Jezwi bho bhwetɔ́, ló ńkránman Fariziɛn sɛ lée:
– Simɔn, mɛɛ́n nɛn mɛn tɔ bhwe bɛn sé hɛ yé.
Ló Simɔn tɔ sa:
– Yíliéwo, tɔ lóbhwe obhá a.
41Ló Jezwi tɔ sa:
– Sɛ bɛn se néphan mɔn jɛtɛn pɛn. Ńse bɛn phɔ́nɔn phɛn, ló ńse lójɔ phɔ́nɔn mɔn. 42Wo le pɛ yí wo sɔ́n pɛn, lóhɛ́nthé ńyɔ wo mɔ́nmɔn pɛn phɔ wo. Wo mɔ́nmɔn hrómɛn ɔn, lóbɛn nɔn ábha pɔ́ nkɛ banbrɛn mɛ́n jɔ ɛ?
43Ló Simɔn tɔ sa:
– Mɛn mú salé lephan khɛ́n ńyɔ pɛn khóo phɔ.
Ló Jezwi tɔ sa:
– Lótɛ nɔn ɛtɔ o.
44Jezwi sa hɛ́nmɛn tre nɛn bhie ɔɔ, ló ńkránman Simɔn sa:
– Mɛn nɛ hɛ hwan, ɛle se mɛn ndu ochó nta, khɛ́n ɛwu bhie lókɔn yí atɛ? Ńmo mɛ́n hɛ́ndu pɛ cho mɛn nta, ló ńhɔn mɛ́n hɛ́nyro pɛ ánphu. 45Hɛ dó ɛdo mɛn ɔn, ɛle sa mɛn mánji. Khɛ́n mɛ́n-ɛ, mɛn ka tɛɛ mɛn nɛ hɛ hwan ɔn, lóka nɔn ńchan anhɔ́n mɛn nta sɛn hɛ́nmɛn. 46Ɛle ha mɛn nɔ́n hɛ́n, khɛ́n mɛ́n-ɛ, ńhɔn nɔ́ndu ha mɛn nta tho. 47Lóhɛ́nthé mɛɛ́n kranman hɛ gbée salé: mɛ́n pɔ́ yí khóo lókɔn ńtɛ, élie salé oyɔ mɛ́n ne bhróbhrobhé khúnbrɛn lókɔn phɔ-ɛ. Khɛ́n lephan oyɔ ne kpɛɛ́ phɔ ɔn, ápɔ́ yí kpɛɛ́ nɔn antɛ́.
48Ló Jezwi kranman bhie lée:
– Oyɔ hɛ ne phɔ́ hɛ.
49Néphan khɛ́n mɛ́n le nkɔn ɔ́nmɔn wo khwa tábrɛ mɛ́n, étɔ wo hromɛn mɛn sa: “Lólephan bɛn li lókɔn khɛ́n apɛ mɔ́nsi ayɔ́ ne phɔ́ lephan ɛ?” 50Khɛ́n Jezwi kranman bhie sa:
– Hɛ mímíbhú do hɛ ka: tɛmɛ ɛlo thɛ́nkhwálé hrómɛn.
Currently Selected:
LWIKHI 7: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
