JAN 3

Jezwi le Nikhodɛmɛn ɔ́nmɔn

1Lephan bɛn bháne, mɛ́n hɛ́n li Nikhodɛmɛn. Ńni Jwifunɛ́n-óthe, saji ńni Fariziɛnnɛ́n gbe. 2Cíbɛn, ńman gɛ Jezwi mréci, ló ántɔ sa:

– Yíliéwo, lo yɛn salé ɛli lephan bɛn Yankan chɛ bha élie lo yí. Lephan kasé Yankan le bha mɛ́n phɔ, ánnɛn gɛ tɛ́ hɛ hɛ́nmɛntányí yábhɛ ɛtɛ́.

3Jezwi krɛnmɛn sa:

– Mímí mɛɛ́n kranmán hɛ: álepɛ lephan ábha gɛ wú Yankan Bhringbi khúbhɛ́, kasé khɛ́n lephan lókɔn wo le ho-e pɔ́-npɔ́.

4Ló Nikhodɛmɛn ébhi Jezwi sa:

– Yán kalósi ógɛ cu khɔ́ hó lephan atɛ gbógbo e? Anman nɛ́n gɛ cu nká mɛ́n man hrómɛn npɔ, lókhɛ́n wo bhá cu ho-e ndɔn mɔn a?

5Ló Jezwi krɛnmɛn lée:

– Mímí mɛɛ́n kranmán hɛ: álepɛ lephan ábha gɛ ló Yankan Bhringbi khúbhɛ́, kasé lephan lókɔn, wo le ho-e pɔ́pɔ́ ńdu le Nánnánmi Créncré ɔ́nmɔn hrómɛn. 6Lephan khɛ́n wo ho nánmí mɛn, lephan lókɔn ńni nánmí, lephan khɛ́n wo ho Nánnánmi Créncré hrómɛn, lephan lókɔn ńni nánnánmi. 7Ló ole tán hɛ hɛ́nmɛn, kasé mɛɛ́n kranmán hɛ lée: “Áyɔn sa wo cu hó hɔ́n khúnbrɛn pɔ́-npɔ́.” 8Áphɛ́phrɛ, mɛ́n si ńpɔ nɔn anné no. Ɛyé áphɛ́phrɛ édɛn, lókhɛ́n mɛ́n si ńchan, le mɛ́n si ánno, ɛ́le gɛ yɛ́n. Lóyábhɛ brɛ nɔn ali lephan wo hó Nánnánmi Créncré hrómɛn.

9Ló Nikhodɛmɛn ébhi Jezwi sa:

– Yán kalósi lóyí bha khɔ́ tɛ́ e?

10Ló Jezwi krɛnmɛn lée:

– Ɛli yíliéwo khóo Izraɛ khúbhɛ́, ló ɛle yɛn ábhwe lókɔn? 11Mímí mɛɛ́n kranmán hɛ: lo, ábhwe lo ye lóthé, lónɔn lo tɔ, saji áyí lo wu, lónɔn lo lí lóphɔ ndalefɛ, lótɛ khɛ́n hɔ́n hrómɛn álepɛ lephan brɛ adɛn eyé lo bhwe. 12Kasé ɔ́n ne bhú mɛn mímí lóka mɛɛ́n tɔ áthéji bhwe sé hɔn yé, ló kalósi ɔ́n ma khɔ́ bhú mɛn mímí lóka mɛn mán tɔ átho bhwe sé hɔ́n yé e? 13Álepɛ lephan apha lo tho, kasé áleli Lephan Mi khɛ́n achantho dithé. 14Lósi yábhɛ brɛ Moyízi khɔ hɔn ádonɛn nannan du gɛ ha yá mɛ́n khɛ́n áhɔn dilé tre ánánkhuthé, lósi yábhɛ brɛ wo bhá khɔ́ hɔ́n Lephan Mi lɔ yroman tré tho áyá phɔ é, 15ochɛ́sé lephan kasé ɛbhui mímí, ɛgɛ mɛpɔ́bhá álephú. 16Átɛsalé Yankan pɔ áthéjinɛ́n banban, lóhɛ́nthé ńhɔn mɛ́n Bhi logro brɛ se wo, ochɛ́sé lephan kasé ɛbhui mímí ɛle khú, lókhɛ́n ɛgɛ mɛpɔ́bhá álephú. 17Yankan le chɛ mɛ́n Bhi bha áthéji salé anmɔ́ áthéjinɛ́n kwa, lókhɛ́n ńma salé ando áthéjinɛ́n nká. 18Lephan kasé ɛbhu Yankan Mi mímí, wo bha le bhɔ́ hɛ kwa, lókhɛ́n kasé ɛle bhui mímí, hɛ lephan lókɔn wo bhɔ hɛ kwa phu, átɛsalé ɛle bhu Yankan Mi logro brɛ mímí. 19Ló thénthé nɛn lósi wo bhá khɔ́ bhɔ́ kwa: áyéfí bha áthéji, lókhɛ́n néphanmiɔn pɔ dubhlékhu brɛn áyéfí, átɛsalé wo bha áyíléletɛ́ hrómɛn. 20Lephan átɛ́ yíléle, ánnɛn pɔ áyéfí, ló anman nɛ́n dɛn man nká lóhrómɛn, átɛsalé ńnɛn pɔ sa mɛ́n yíléletɛ́ oká tho. 21Lókhɛ́n lephan atɛ́ yí khɔ́ ábhwe mímí hrómɛn, lephan lókɔn, ánnɛn áyéfí phɔ má, ochɛ́sé néphan oyɛ́n salé mɛ́n yítɛ́ sakhɔ Yankan jí hrómɛn.

Jezwi le Jan ɔ́nmɔn

22Lómánji, Jezwi le mɛ́n yíchwɛmán ɔ́nmɔn lo Jude gotho. Wo chre lóne ámɔn kpɛ́bɛn, ló Jezwi ehá néphan nduhɛ́n. 23Jan lɔ bha Enɔn ehá néphan nduhɛ́n, lóne gbali ákhúbhɛ́ bɛn óche Salimɛn, átɛsalé ńdu búdúbúdú bha lóne thethé. Néphan khúnbrɛn eló Jan yé, ló anhá nkɔn nduhɛ́n. 24(Átɛsalé lóka yábhɛ lókɔn, wo ka hɔn Jan ka khúthé.)

25Jwifunɛ́n bidí ali wo mɔ́n chó le wo nta chó ɔ́nmɔn hɛ́nthé, Jan yíchwɛmán dɔnbɛn gɛ Jwifu sɛ bɛn ɔ́nmɔn elɛ́mɛ́n, 26ló wo bha wo ékranmán Jan lée:

– Yíliéwo, lephan khɛ́n abha gɛ hɛ Judɛn mánji, khɛ́n ɛtɔ mɛ́n phɔ bhwe se lo ye ɔn, wú mɛ́n bhwe édi hɛ mwanhɛ́n? Lephan lókɔn thénthé anhá nduhɛ́n, ló néphan khúnbrɛn wa eló mɛ́n yé.

27Ló Jan ékranmán wo lée:

– Álepɛ lephan ábha gɛ pɛ yíbɛn bhá mɔ́n mɛn, kasé Yankan nbrɛn le se lóyí lókɔn. 28Hɔ́n bɛn nbrɛn ɔ́n gɛ lí mɛn ndalefɛ salé mɛn phrɛ kranman hɔ́n lée: “Mɛn nɛn ni Mesi, lókhɛ́n wo chɛ mɛn thwasi ma mɛ́n hɛ́nmɛn.” 29Bhie nca, mɛ́n nɔn bhie li mɛ́n bhia, lókhɛ́n lephan ali bhie nca mɛ́n jɔ, mɛ́n ńni lephan bɛn abha bhie nca phɔ, ló ándi njɛlé yé nkɛ bhwe. Lephan lókɔn, lóka anyé bhie nca tɔ́, ánimán mɛ́n thɛ́n hrómɛn. Áphɔhá yábhɛ lókɔn, áli áphɔhá bɛn agɛ mɛn, ló thénthé mɛn phɔhá khúnbrɛn simɛ́n. 30Tɛmɛ mɛ́n-ɛ, anní lephan khóo, ló mɛn-ɛ, mɛn ní lephan bhri.

Lephan khɛ́n achantho bha

31– Lephan achantho bha, ńbanbrɛn lephan khúnbrɛn. Lephan khɛ́n achan áthéji, ńni áthéji lephan, ló mɛ́n, áyí abha théji bhwe nɔn ántɔ, lókhɛ́n lephan achantho bha, mɛ́n, ńka lephan khúnbrɛn tho. 32Ló mɛ́n, áyí mɛ́n mɛbhí wu le ábhwe mɛ́n njɛ ye, lóbhwe nɔn ántɔ, lókhɛ́n álepɛ lephan adɛn édo mɛ́n bhwetɔ́. 33Lókhɛ́n lephan kasé ɛdɛn do mɛ́n bhwe, átɛsa ɛlí ndalefɛ lée Yankan li bhwe mɛ́nbrɛwo. 34Lephan khɛ́n Yankan chɛ bha, ántɔ Yankan bhwe, átɛsalé Yankan bho mɛ́n Nánnánmi khúnbrɛn se. 35Lo The Yankan pɔ mɛ́n Bhi, ló ńmo áyí khúnbrɛn ha nkɛ mɔ́n mɛn. 36Lephan kasé ɛbhu Yankan Mi mímí, átɛsa ɛgɛ ńmɛpɔ́bhá álephú. Lephan kasé ɛle ji Yankan Mi, ɛbha lé gɛ lómɛpɔ́bhá lókɔn, lókhɛ́n ɛbha Yankan thɛ́nyan hromɛn.

Currently Selected:

JAN 3: ENT96

Highlight

Copy