JAN 21
21
Yíchwɛmán ákhwache wu Jezwi
1Lómánji, Jezwi cu lɛ mɛ́n yíchwɛmán mɛ Thiberia duphé mɛ́n. Ló nɛn lósi yábhɛ ńkhɔ nɛ wo mɛ o: 2Simɔn Piɛ, Toma (óche ńjrwan), Natanaɛ (achan Kana khúbhɛ́ abha Galile gotho), Zebede miɔn le Jezwi yíchwɛmán mɔn nánkhɛ, wo khúnbrɛn lókɔn wo bha sibrɛ. 3Ló Simɔn Piɛ kranman wo lée:
– Mɛn nó duphé tho.
Wo kranman Simɔn Piɛ lée:
– Lo lɔ lo bhá gɛ hɛ ɔ́nmɔn lo.
Wo khúnbrɛn wo lo, ló wo hɛn hran mɛn. Lókhɛ́n lómréci lókɔn, wo le hɔn cɔn míbrɛ ka hran mɛn. 4Lóka ácɛ́nmɛ di ebhá, Jezwi bha ya dumɛ́n, lókhɛ́n wo le yɛn salé mɛ́n nɔn ńya. 5Ló Jezwi ébhi wo sa:
– Ńmiɔ́-nsɛ wú ɔ́n hɔn ncɔn?
Ló wo kranman Jezwi lée:
– Hóo, lo le gɛ yíɛkɛ.
6Ló ńkránman nkɔn lée:
– Tɛmɛ ɔ́n ka fɛ́n áliémɔn njɛ, ló ɔ́n ma hɔ́n ncɔn.
Lóka wo ka fɛ́n, wo hɔn ncɔn si wo fɛ́n, ló wo lé gɛ do há hran mɛn. 7Ló yíchwɛ́wo khɛ́n Jezwi pɔ ékranmán Piɛ lée:
– Lo Hwánthe nɔn ali lókɔn.
Lóka Simɔn Piɛ ye salé: “Lo Hwánthe nɔn ali lókɔn”, ńmo yí mɔn thé (átɛsalé lóka lókɔn ńgbɔn yí yɛn mɛ́n phɔ) ló ńyo ka du. 8Ló yíchwɛmán krɛnnɛ́n abha hran mɛn, wo lɔ wo bha dilé dumɛ́n, ló wo etí fɛ́n bhá thé, ácɔn si wo fɛ́n hrómɛn: wo le lo sikhɔn, wo si wo ya ábha lí mɛ́trɛn ya brɛ. 9Lóka wo dilé dumɛ́n, wo wu ńtɛ́nmra khɛ́n wo khwɛn phutɛn tre, wo bho ácɔn tre lótho, ló kpánhɔn tre ló njɛ. 10Ló Jezwi kranman wo lée:
– Ɔ́n khwɛn ncɔn kpɛ́bɛn bha.
11Simɔn Piɛ pha ka hran mɛn, ńti fɛ́n khwa tho, ló ácɔn khónkhó si lóhrómɛn: lókhúnbrɛn áli ácɔn ya brɛ, ágrebhɛ le áwɔ́-bhwaliá. Ácɔn thubhɔ ńfɛ́n hrómɛn, lótɛ khɛ́n ńfɛ́n le thwɛ bhrɔ́ɔ́. 12Ló Jezwi kranman wo lée:
– Ɔ́n ma lí yí.
Wo hromɛn álepɛ lephan brɛ khɛ́n abhi lée: “Abɛn lephan le hɛ?” átɛsalé wo yɛn sa áli wo Hwánthe. 13Jezwi tigbali wo, ńmo kpánhɔn, ló ńnwa se wo. Ńmo ácɔn, ló ńtɛ lóyábhɛ brɛ.
14Áchan lócí Jezwi chan khúnɔn mɛn fe, ncɛ́n etɛ́ ńdɔn bhwaliá nɔn Jezwi lɛ mɛ́n yíchwɛmán mɛ.
Jezwi le Piɛ ɔ́nmɔn
15Lóka wo li yí phu, Jezwi ébhi Simɔn Piɛ lée:
– Simɔn, Jonasi mi, wú ɛpɔ mɛn brɛn krɛnnɛ́nhɔn pɔ́ apɔ mɛn?
– Ló Piɛ étɔlé, ee Hwánthe, ɛyɛn salé mɛn pɔ hɛ.
Ló Jezwi kranman Piɛ lée:
– Tɛmɛ ɛbo mɛn gbankhran.
16Ńdɔn mɔn mɛn Jezwi cu bhi Piɛ lée:
– Simɔn, Jonasi mi, wú ɛpɔ mɛn?
– Ló Piɛ étɔlé: ee Hwánthe, ɛyɛn salé mɛn pɔ hɛ.
Ló Jezwi krɛnmɛn lée:
– Tɛmɛ ɛbo mɛn gbankhran.
17Ńdɔn bhwaliá hrómɛn Jezwi cu bhi Piɛ lée:
– Simɔn, Jonasi mi, wú ɛpɔ mɛn?
Jezwi bhwe lókɔn abhi Piɛ ńdɔn bhwaliá lée: “Wú ɛpɔ mɛn?” áchɛ́se Piɛ phɔ gbɔn ló ántɔlé:
– Hwánthe, ɛyɛn bhwe khúnbrɛn phu, ɛyɛn salé mɛn pɔ hɛ!
Ló Jezwi krɛnmɛn lée:
– Tɛmɛ ɛbo mɛn gbankhran. 18Mímí mɛɛ́n kranmán hɛ: lóka ɛtɛ yípɔsɛ, hɛ nbrɛn ɛbhó yí mɔ́n thé ló ɛ́khali ló ási ɛpɔ, lókhɛ́n lóka ɛ́bha thí, ɛ́bha tia mɔ́n tré, ló lephan nankhɛ nɔn ábha bhó yí mɔ́n hɛ thé, ló ánman do hɛ nó ási ɛlɛ pɔ salé ɛ́lo.
19(Ábhwe lókɔn hromɛn, Jezwi élie lo lósi Piɛ bha khɔ́ mɛ́n khú hrómɛn bhó nguhá sé Yankan.) Lómánji Jezwi kranman Piɛ lée:
– Tɛmɛ ɛgɛ mɛn thá!
Jezwi le yíchwɛ́wo khɛ́n ńpɔ ɔ́nmɔn
20Lóka Piɛ saya, ńwu yíchwɛ́wo lójɔ khɛ́n Jezwi pɔ bho mɛ́n mánji pɛ ebhá, (lephan khɛ́n agbali Jezwi kpɛ́ɛ́n chre ńnɛn mɛ́n, lókhɛ́n ébhi Jezwi lée: “Hwánthe, abɛn ebhá phɛ́ hɛ lí?”) 21Lóka Piɛ wu lephan lókɔn ebhá, ló ánmi Jezwi lée:
– Hwánthe, yán mɛ́n lókɔn-ɛ, ébí bhwe bha mɛ́n phɔ ɛ?
22Ló Jezwi ékranmán Piɛ sa:
– Kasé mɛn pɔ salé anchré odi lóka mɛn saji má, hɛ bhwe le bha lóhrómɛn. Hɛ, tɛmɛ ɛgɛ mɛn thá pán!
23Ábhwe lókɔn, álehɛ́n pi Jezwi yíchwɛmán hrómɛn, ló wo étɔlé, yíchwɛ́wo lókɔn, mɛ́n anman nɛ́n khú! Lókhɛ́n Jezwi le kranman Piɛ lée: “Lephan lókɔn anman nɛ́n khú”, Jezwi bhwe atɔ lónɔn ali salé: “Kasé mɛn pɔ salé anchré odi lóka mɛn saji má, hɛ bhwe le bha lóhrómɛn!”
24Lephan lókɔn, mɛ́n nɔn ńni yíchwɛ́wo khɛ́n atɔ bhwe khúnbrɛn lókɔn, mɛ́n nɔn ńni lephan alrɛ ábhwetɔ́ khúnbrɛn lókɔn ha áhrɔ́ lókɔn hromɛn, ló lo yɛn salé mɛ́n bhwe ńtɔ, áli ábhwe mímí.
Ábhwe wo tɔ aphuji
25Jezwi cu tɛ áyí búdúbúdú, kasé wo lrɛ lóbrɛ brɛ khúnbrɛn ha áhrɔ́ mɛn, mɛn mú salé áthéji pasá brɛn bha lé gɛ do lóhrɔ́ khúnbrɛn khɛ́n wo bhá lrɛ.
Currently Selected:
JAN 21: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
