JAN 1

Ábhwetɔ́ jrɛn lephanmi

1Ásithwá, lóka wo ka tɛ áthéji, ábhwetɔ́ phrɛ bháne, ábhwetɔ́ bha Yankan phɔ, ló ábhwetɔ́ lókɔn mɛ́n nɔn ńni Yankan. 2Ábhwetɔ́ chan godo-áan bha Yankan phɔ. 3Mɛ́n phɔ nɔn Yankan khɔ tɛ áyí khúnbrɛn, álepɛ áyíbɛn khɛ́n wo le khɔ mɛ́n phɔ tɛ. 4Ábhwetɔ́ nɔn ali ńmɛpɔ́bhá lóhɛ́n, ló ńmɛpɔ́bhá lókɔn, ábho áyéfí bha se néphan khúnbrɛn. 5Áyéfí thándi dubhlékhu hromɛn, lókhɛ́n dubhlékhu le dɛn do-e.

6Yankan chɛ mɛ́n mranchɛ́wo bɛn bha, mɛ́n hɛ́n li Jan. 7Ńma ántɔ áyéfí phɔ bhwe sé néphan, ochɛ́sé néphan khúnbrɛn oyé ábhwe lókɔn, ló wo bhú mímí. 8Mɛ́n nbrɛn ńnɛn ni áyéfí, ńni ndalefɛlíwo bɛn abha étɔ áyéfí phɔ bhwe. 9Áyéfí lókɔn, lónɔn ali áyéfí mímí, ali áyéfí abha áthéji ló efí sé néphan khúnbrɛn.

10Ábhwetɔ́ bha áthéji, ló mɛ́n phɔ nɔn Yankan khɔ tɛ áthéji, lótɛ khɛ́n áthéji le yɛn. 11Áyéfí lókɔn ńma mɛ́n nbrɛn gotho, lókhɛ́n wo khúbhɛ́nɛ́n le dɛn do-e. 12Lótɛ khɛ́n néphan fe dɛn do-e, ló wo bhui mímí. Ló wo lókɔn, ńse wo mɔ́nsi sa wo lí Yankan miɔn. 13Wo le li Yankan miɔn sa lósi okhɔ́ hó lephan, lóthé nɔn ali sa: áleli lephanmi nɔn aho wo, lókhɛ́n Yankan brɛ nɔn ali wo The.

14Ábhwetɔ́ jrɛn lephanmi, ló ńma lo hromɛn, áphɔlíman le ábhwe mímí ɔ́nmɔn bha mɛ́n phɔ. Lo wu mɛ́n nguhá, ńguhá lókɔn lónɔn ali ńguhá bɛn lo The Yankan bho se mɛ́n Bhi logro brɛ. 15Jan phrɛ lukhwɛ́ tɔ mɛ́n phɔ bhwe salé:

– Nɛn lephan mɛn tɔ mɛ́n phɔ bhwe lóka mɛɛ́n kranman hɔ́n lée: “Lephan lókɔn, ńphúji ma, lókhɛ́n ńbanbrɛn mɛn, átɛsalé ńphrɛ di khɛ́n wo ho mɛn.”

16Áphɔlíman khóo bha mɛ́n phɔ, ló ńmo mɔ lo khúnbrɛn ndu. Ncɛ́n ansé lo ńdubhɔ́ lókɔn, npi ansé lo ńdubhɔ́ lókɔn. 17Moyízi phɔ nɔn Yankan khɔ bho ábidí se néphan. Lókhɛ́n áphɔlíman le ábhwe mímí, Jezwi phɔ nɔn akhɔ thandi. 18Álepɛ lephan awu Yankan, lókhɛ́n Yankan Mi logro brɛ ali Yankan, abha lo The phɔ, mɛ́n nɔn ńchɛ lo yɛn Yankan.

Jan-Nduhɛ́nháwo bhwetɔ́

(Ɔ́n wú Mat 3.1-12; Ɔ́n wú Mák 1.1-8; Ɔ́n wú Lwik 3.1-18)

19Jwifunɛ́n-óthemánhɔn abha Jeruzalɛ́mɛn, wo chɛ nphahamán le levinɛ́n dɔnbɛn lo Jan yé, ló wo bhi nkɛ sa:

– Hɛ, ébí lephan le hɛ?

20Ló Jan lɔ le dɛn temélé, lókhɛ́n néphan khúnbrɛn hɛ́nmɛn, ńkránman nkɔn gbée salé:

– Mɛn nɛn ni Mesi.

21Wo bhi nkɛ sa:

– Ló ńthé hɛ nbrɛn ɔn, bí lephan le hɛ? Wú hɛ ɛli Eli?

– Jan kranman wo lée:

– Mɛn nɛn ni Eli.

Wo cu bhi nkɛ lée:

– Wú Bhwetɔ́tréwo le hɛ?

– Ńkránman wo lée: Hóo, mɛn nɛn ni Bhwetɔ́tréwo.

22Wo cu bhi nkɛ sa:

– Ńthé hɛ lephan yábhɛ ɛli, tɔ se lo yé. Énɛn salé lo gɛ ábhwetɔ́ bɛn lo bhó lo sé néphan achɛ lo bha. Ló hɛ nbrɛn ébí lephan le hɛ?

23Ló Jan kranman wo lée:

– Lephan khɛ́n abha ánánkhuthé elúkhwɛ́

“Mɛn nɔn mɛn ni mɛ́n tɔ́

lókɔn édɛn salé:

Ɔ́n jan ásitó bɛn ayali sé lo Hwánthe!”

(Ezayi bhwetɔ́tréwo nɔn atɔ bhwe lókɔn.)

24Mranchɛ́mán khɛ́n Fariziɛnnɛ́n chɛ bha, 25wo cu wo ébhi Jan lée:

– Kasé ɛle li Mesi, kasé ɛle li Eli, saji kasé ɛle li Bhwetɔ́tréwo, ló bítɛ khɛ́n ɛhá néphan nduhɛ́n ɛ?

26Jan kranman nkɔn lée:

– Mɛn, ńdu nɔn mɛn mo mɛn há hɔ́n hɛ́n, lókhɛ́n hɔ́n hrómɛn ápɛ lephan bɛn ɔ́n ne yɛn. 27Lephan lókɔn, ńma mɛn mánji anmá, ló mɛn nɛn ni lephan apriman khɛ́n ágɛ hrwɛn mɛ́n ngbawa bhɛ́.

28Lóyí khúnbrɛn lókɔn, átɛ Betani khúbhɛ́ abha ńdu mánji, ádubhɛ óche Judɛn njɛ, lóne si Jan bha ehá néphan nduhɛ́n.

Jewi nɔn ali Yankan Gbankhran Mi

29Lóka áyé lɛ, Jan wu Jezwi ebhá mɛ́n yé, ló ántɔlé:

– Nɛn Yankan Gbankhran Mi khɛ́n ahɔ́n áthéjinɛ́n ne yɛn. 30Nɛn lephan mɛn tɔ mɛ́n phɔ bhwe lóka mɛɛ́n kranman hɔ́n lée: “Lephan bɛn bha mɛn mánji ebhá, lókhɛ́n lephan lókɔn ńbanbrɛn mɛn, átɛsalé ńphrɛ di khɛ́n áse mɛn.” 31Mɛn nɛn yɛn mɛ́n lephan ánman ní, lókhɛ́n mɛn ma mɛn mó ndu há néphan hɛ́n, ochɛ́sé Izraɛ khúbhɛ́nɛ́n oyɛ́n mɛ́n lephan yábhɛ ńni.

32Ló Jan phwan gbée kranman wo sa:

– Mɛn wu Nánnánmi Créncré tɛsa bhwebhwe chantho bha ya Jezwi hɛ́n tho. 33Lóka lókɔn, mɛn ka yɛn mɛ́n lephan yábhɛ ńni, lókhɛ́n Yankan achɛ mɛn há néphan nduhɛ́n, kranman mɛn lée: “Ɛ́bha wú Nánnánmi bha chántho bha ya lephan bɛn hɛ́n tho. Lephan lókɔn, mɛ́n nɔn ánman mó Nánnánmi Créncré há néphan nduhɛ́n.” 34Ló Jan étɔlé: mɛn wu lóyí lókɔn, ló mɛɛ́n kranmán hɔ́n gbée salé: lephan lókɔn, ńni Yankan Mi.

Jezwi yíchwɛmán athwasi

35Lóka áyé lɛ, Jan cu bha ya lóne sibrɛ, mɛ́n le mɛ́n yíchwɛmán hrómɛn lephan mɔn. 36Lóka ńwu Jezwi bhuri ehɛ́n, ló ántɔlé:

– Nɛn Yankan Gbankhran Mi.

37Lóka yíchwɛmán mɔn lókɔn ye Jan bhwe atɔ, ló wo wa lo gɛ Jezwi. 38Jezwi gbɛnɛn mánji, ló ńwu salé wo bho mɛ́n mánji pɛ wo ebhá, ló ńmi nkɔn salé:

– Ébí hɔ́n énɛn?

Ló wo bhi nkɛ lée:

– Rabi, bánne ɛbha? (Rabi: lóthé nɔn ali “Yíliéwo”.)

39Ló ńkránman wo lée:

– Ɔ́n ma wú a, lóka lókɔn, ácí li njuka wáchɛn bhwelí. Wo gɛ Jezwi ɔ́nmɔn lo, ló wo wu mɛ́n si ńma, ló lócí brɛ lókɔn, wo gɛ ɔ́nmɔn chre ácí gu.

40Néphan mɔn lókɔn aye Jan bhwe atɔ, khɛ́n agɛ Jezwi thá, lóbɛn nɔn óche Andre ali Simɔn Piɛ hɔnsɛ́n. 41Andre phrɛ gɛ mɛ́n hɔnsɛ́n Simɔn ló ńkránman nkɛ lée:

– Lo gɛ lephan ali Mesi. (Lóthé nɔn ali “Krisi”.)

42Ló ńdo Simɔn no Jezwi yé. Lóka Jezwi gbɛnɛn wu Simɔn, ló ántɔlé:

– Hɛ hɛ́n li Simɔn, Jan mi, lókhɛ́n wo bhá che hɛ Sefasi. (Lóthé nɔn ali “Ábhú”.)

Jezwi éche Filíphu le Natanaɛ

43Lóka áyé lɛ, Jezwi nkɛé, mɛn nó Galile gotho. Ńgɛ Filíphu, ló ńkránman nkɛ sa:

– Bha gɛ mɛn thá!

44(Filíphu chan Bɛsayida, Andre le Piɛ ɔ́nmɔn khúbhɛ́.) 45Lómánji Filíphu gɛ Natanaɛ ló ńkránman nkɛ sa:

– Lo gɛ lephan khɛ́n Moyízi tɔ mɛ́n phɔ bhwe ábidí hrɔ́ hrómɛn, lókhɛ́n bhwetɔ́trémán lɔ tɔ mɛ́n bhwe. Lephan lókɔn, mɛ́n nɔn ńni Jezwi, Jozɛfu mi, achan Nazarɛ́thi khúbhɛ́.

46Ló Natanaɛ ébhi Filíphu lée:

– Wú ápɛ yí mímí bɛn ágɛ chán Nazarɛ́thi khúbhɛ́ thándi?

Ló Filíphu krɛnmɛn sa:

– Bha wú a.

47Lóka Jezwi wu Natanaɛ ebhá mɛ́n phɔ, ló ántɔlé:

– Nɛn Izraɛ lephan mímí bɛn, mɛ́n hrómɛn álepɛ lephan khrɛ.

48Natanaɛ bhi Jezwi lée:

– Bánne ɛyɛn mɛn?

Ló Jezwi krɛnmɛn sa:

– Mɛn phrɛ wu hɛ lóka ɛya fígeyá thé, lómánji khɛ́n Filíphu lo che hɛ.

49Ló Natanaɛ kranman Jezwi lée:

– Yíliéwo, ɛli Yankan Mi, hɛ nɔn ɛli Izraɛ khúbhɛ́nɛ́n bhringbi.

50Ló Jezwi krɛnmɛn lée:

– Mɛn bhwe lókɔn tɛɛ mɛn kranman hɛ lée, mɛn wu hɛ lóka ɛya fígeyá thé, lónɔn ɛ́bhú mímí? Mɛɛ́n kranmán hɛ, ɛbha wú yí ábha bánbrɛn lókɔn yí ɛwu.

51Ló ánkranmán néphan lée:

– Mímí mɛɛ́n kranmán hɔ́n: cíbɛn ɔ́n ma wú átho bha phwan haphá, ló Yankan-mranchɛ́mán bha ya Lephan Mi hɛ́n tho, wo bhá phá ló tho, ló wo bhá chántho dithé!

Currently Selected:

JAN 1: ENT96

Highlight

Copy