Махьтвеест 25
25
Кохт логь видат алгтэс.
1Танна эльм царвут ленч эвт налла логин нійдин, кок вальтиш иджес тувсникь, и выйтиш воста вунтме.
2Сист лейиш вит милманэш и вит милтэмес.
3Милтэмес вальтиш иджес тувсникь, а ет валт?-?манч мелдес вуй.
4Милманас‐же эвтест иджес туввасники вуйм вальтиш вуй иджес асьтіи сиз.
5И кось вунтам кухкь ій потманч; танна пук нокашкуттиш и оддешкуттиш.
6А кэск иннэсьт шэндэй чорвмуш: кич, вунтам пот, выйтед воста сунне.
7Танна коцьиш пук тэк нійд, и вуйкіиш иджес тувсники.
8А милтэмес цилькиш милманнэсэть: эньтед мійит тійи вуй; тэн‐дет што мій тувсникь чацкэдэдет.
9А милманэш цилькиш воста: штобы ій леччи путмуш и мист и тист, мэннэд поряп мигэид гара, и восьтед ичсант.
10Кось‐же сій вулькиш восьтед; пудій вунтам, и валмуш мэнниш суйн найм‐вярра, и увз каттэиш.
11Маӈӈа поадет и ярес нійд, и сарнет: Господи! Господи! аввед мійит.
12А сон цилькій сійит воста: вуйкист сарнам тійит, им тед тійит.
13И нуть валвэдекке; тэн‐дет што еппед тед ни пейв, ни цас, кон пот олму эльк.
14Сон туйяй, махт олмэшь, ку вулкал верес манту, кочій иджес пакалдэзит, и аскэдій сійи китте иджес елмуш.
15И эвте сон эньдій вит талантет, нумпа кохт, мотме эвт, юкиканче су виг мельт; и товда вульгій.
16Ку вальдій вит талантет, вульгій, эній сійит туйи эл, и валлэшій нумбит вит талантет.
17Нуть же и тэт, ку вальдій кохт талантет, валлэшій нумбит кохт талантет.
18А ку вальдій эвт талант, вульгій, и койвэй су манту, и катій иджес хозьин силп.
19Кухкь айкин пот тэйт пакалдэзит хозьин, и кач сист лог.
20И пудій тэт, ку вальдій вит талантет, пувтій нумбит вит талантит, и сарн: хозьин! вит талантет тон эньтик мунне; кич, нумбит вит талантет мун валлэшэмь сійи эл.
21Су хоэьин цилькій сунне: порь ли, шиг и вуйк пакалдэс! ваннест тон леик вуйк; еннэгь эл ту піям; мэн ту хозьин рамсе.
22Пудій нуть‐же ку вальдій кохт талантет, и цилькій: хозьин! кохт талант тон эньтик мунне; кич, вял кохт талант мун валлэшэмь сійи эл.
23Су хозьин цилькій сунне: порь ли, шиг и вуйк пакалдэс! ваннест тон леик вуйк; еннэгь эльн ту піям; мэн ту хозьин рамсе.
24Пудій и ку вальдій эвт талант, и цилькій: хозьин! мон титтим ту, тон ляк кэр олмэшь, чуппак, косьт ик пуштам сим, и чоӈгак, косьт ик кометаманч;
25И пэльтим, вульким, каттим ту талант манту; таль тунне ту.
26А су хозьин цилькій сунне воста: венне юрьдій пакалдэс и лашкес! тон титтик, мун чупам, косьт им пуштманч, и чоаӈгам, косьт им кометам.
27Тэн‐дет тунне гэлькед ляй эньтед му силп кавпьязит; и мон, кось путтим, лейм вальтед иччан лэссин.
28Нуть вальтед суст талант, и эньтед кобест ли лохкь талантет.
29Тэн‐дет што іоксенче, кобест ли, эньтлат и лассан; а кобест елляк, сусьт вальтлат и тэт, ми ли.
30А кяхн пакалдэс сухпеекке олгас севнес?-?вутте; томб ленч лойкмуш и пань хырш. (Кось цилькій таллан, чурьвій: кест ліе піель куллэдь, ань сон кол!
31Кось‐же олму эльк пот иджес элнэмест, и пук пэзь аньгель суйн: танна ешт иджес эл‐нэм пре?-?стол эл;
32И чоӈкдэдет пут су пук олму; и іогест эв?-?тет нумбин, махт варредій іогач лампсит коззин;
33И чунчлат лампсит воллес‐пельт иджес чоар а козьлит чинч китте.
34Танна цялк цар тэйт, кок леб воллес‐бельт су: потте, Му Едж лаословманч, мэннед царства, ку ли тійит валлэшаманч манд и эльм туйем раест.
35Тэн‐дет што нялгэтем мун, и тій эньдин мунне порред; югстовим, и тій югэтен му; лейим як‐олмэнь, и тій вальдин му;
36Лейим піеота, и тій тіеввэтен му; лейим кэбест, и тій киччин му; турьмест лейим, и тій пудин мунне.
37Танна вуйк олму целькет сунне воста: Господи! кось мій уйним ту нялгэстам, и портем? или югэстовэм, и югэтем?
38Кось мій уйним ту як‐олмэнь, и вальдим? или піеотемес, и теввэтем?
39Кось мій ту уйним кэбест, или турьмест, и пудим тунне?
40И цар цялк сійид воста: вуйкест сарнам тійит: моммет тій туйешин тан эвте таллин му оцкэнь вильлин, тэн туйин мунне.
41Танна цялк и тэйд, кок лев чиндж‐бельт: ваньцед мусьт, проклет тій, егэсенч толле, ку ли валлэшам биссе и су ангелит.
42Тэн‐дет што порстоввем мун, и тій еппед антманч мунне порред; югстоввем, и тій еппе юг?-?там му;
43Лейим як‐олмэнь, и еппе валтам му; лейим піеота, и еппе тіевтам му; кэбест и турьмест, и еппе кичманч му.
44Танна и сій целькет сунне воста: Господи! кось мій уйним ту порстовманч, или югстовманч, или як‐олмэнь, или піеота, или кэбест, или турьмест, и еп лужманч тунне?
45Танна цялк сійит воста: вуйкист тійит сарнам: момет тій еппед туйям тан эвте тайн оцмузэнь; тэн еппед туйяманч и мунне.
46И вульгет так егсанч пехсмуже; а вуйк‐олмэ егсанч яллэге.
Currently Selected:
Махьтвеест 25: Akkala
Highlight
Share
Copy
Want to have your highlights saved across all your devices? Sign up or sign in
Евангеліе отъ Матеен, изданное Обществомъ Распространеиія Библін въ Велико‐Британін и въ другихъ странахъ (British and Foreign Bible Society) 1878.
