Miqueas 7
7
Daxhinjen llun Israelen
1Niachraz llakrize kia nada', kanake naka ke to be'nn llayirj xlaw
ket ba bde wrapen,
na billbi uvas, ni higos bi ballelra,
ka daxhixh ka' zeralla gawan.
2Nullno llra' raw yell-li'on
be'nn wen dalixhej, na be'nn nxenlall Dios,
yeolol akze llbexh ake' batkre
gun we loellj ake',
na le llkoan mar loellj ake'.
3Na banesyian akre ke gun ake' da maren,
na be'nn braw ka' llchie akre le ake' nench'na we ake' bi da de ke ake',
na be'nn ka' llun yel korchisen lloe ake' latj nench'na llxoayay ake' le ake',
na be'nn wnia ka' llun ake' kon danezen ke ake',
na llkoyel akre be'nn ka' sjalla raw yell xhen'na llun ake' da bi nak wen.
4Na be'nnen nak be'nn wen ke aken nake ke to yay yiech,
na be'nn de baran ke aken, nake ke to yiech dinn.
Axha baza lla nench'na Diozen wsakzie'e le ake',
na gak doxhente kan ba bdixjwe be'nn ka' be xtill Diozen.
Ke lla'na gunchixe loellj ake'.
5Bi chajle'o bi da ye be'nn loellj nachon rwe',
na bi wxenlallo be'nnen zureno wen'na,
na bdap bi di'll da wereno nor ko'on.
6Xhi'nn ake' bi biew ka' llwie akebe xa akben,
na xhi'nn ake' bi nor ka' llayechj akbe xna akbe ka',
na xhorill ake' ka' llayechj ake' tawxhi'nn ake' ka',
na be'nn ka' llwiere le aken, lo yo' rill ake' nazen sjalla akze.
7Axha nada' kwexha Xanllon,
na wzoa yel nxenlall kian raw Diozen wasra nadan,
le le'en wzenaye kia.
Xanllon nse'e beni na yel wasra
8Rwetko llwiero nada', bi yewero kanake llak dakenxhie kian,
lakse cha ba byiala, deksde wayasa,
na lakse nechj daxhchulen nada',
Xanllo nan nake beni kia.
9Yel llaklla ke Xanllon gunan banez,
le ba bxinja konen le'e,
llakte lli'n lla, le'e koe'e xneze kan llak kian,
na gune yel korchis kia.
Le'e wchie'e nada' gan de be'nin,
wruere nada' da nbarazen nak yel wazra ke'en.
10Leskakse re're be'nnen llwiere nadan,
na le'en wagane'e raw yelsdon.
Le le'en lle nada': ¿Ganxha Xano Diozen?
Na na' yewera rera le'e
ka benj da de tnez da ba brajchekw ake'.
Yeyakchaw Jerusalén'na
11Jerusalén, ba za lla
nench'na wayakchao ze ko'o ka',
na yell-liw ko'on llirjen.
12Baza lla ka'
yed'ran ake' rwe', be'nn sjalla yell yubre:
be'nn zak Asiriate xte bllinte Egipto,
bxhizen yeon nzi Nilo bllinten Éufrates,
na be'nn sjalla llwa nistaw, na be'nn sjalla ya' xhen ake'.
13Yellri'on wayaken to latj dach yu bill,
xtole be'nn ka' sjalla rawen,
nike daxhinj ka' llun aken.
Llnabe'e nench'na gak wen ke raw yellen
14Xanto, bdap yell ko'on,
bdap xhir ko'o ka' nbanlon,
ba ka' da llakllajlall ya' yeo ka',
gan sjade yu chao ka'.
Bdap neto' kan beno batna,
gan nbane Basán na rente Galaad'na.
15Broere neto' ke da wabaneto',
ke da ka' broero gan nzi Egipto.
16Na na' be'nn ka' sjalla latj yell-liw ka' yela, to waban akre katken nak da nbaraz ko'o ka',
to wayere llwarao aken
lakse nap akte yelwak.
To wagan ake' ka be'nn kwell, na ke be'nn bi llak llne'.
17Bzaxkexj le be'nn yell ka' yela kan llun bel ka' sjada raw yu,
bchach be'nn ka' sjalla nkoachen,
nench'na to lleb ake' yedgon ake'
gan zeon, na gunyiach ake' ke nake re akre rwe',
Xanto Dios.
Diozen llazixhene ke yell ke'en
18Nullno zu yeto Dios ke rwe',
le rwen llazixheno ke da mar ka',
na llalallo daxhinj ka' llunton,
kato neto' llaganto' nakto yell ko'o.
Rwen llroero neto' yel nllie ko'on,
na bi llakllao ke chnare.
19Bayachrall neto' dayubre
na bkoach da mar keto ka',
na bzal lo nisdaw zitjen
daxhinj keto ka'.
20Xanto tuze ke bzellaren yel wen da lixhejen, na yel nllie ko'on
ke dan bchebo raw Abraham, na Jacoben
be'nn ka' guk xustawto ka'.
Currently Selected:
Miqueas 7: ZPUPAT
Highlight
Share
Copy
Want to have your highlights saved across all your devices? Sign up or sign in
