Amós 7
7
Bich'soa ka'
1Xanllon broere nada': kan chinze zuraw llachj dan guz aken, dan llas ake' bawlle, ket ba bde wrap ke be'nnen llnebia le aken, na brera Xanllon llaz'sure bich'soa.
2Na brera ke rentekaze yix ka' ballaw bich'soa ka', na bnia:
Xana, bxhixhen keto, ¿akre gun Jacoben sueren, le naken to yell daoze?
3Na Xanllon bayatre kan ba benee xbaben, na bnee:
Bi gak guna ka'.
Bredawre yi'
4Dani broere Xanllon nada': Brera bsele'e to yi' da zajze llzeyen lo nisdaw zitjen, na llzeyrenten yu lix ka'. 5Na bnia:
Dios kia, ben gukre brexhkero, ¿Akre gun Jacoben sueren le naken to yell daoze?
6Na Xanllon bayatre kan ba benee xbaben, na bnee:
Lekse ka' bi gak guna ka'.
Bredawre plum dan llunren be'nn wakoa ka' llin
7Lekse ka' Xanllon broere nada' dani: Le'e ze'e kwit wdup, na noxe'e to plum ke dan llunren be'nn wakoa ka' llin. 8Na bnabre nada':
¿Bixha dan llrero Amós?
Na ballia xtillen: llrera to plum ke dan llox be'nn wakoa ka'.
Natell Xanllon gulle'e nada':
Konen plum ke be'nn wakoa ka', wiachka yell kia Israelen cha ne' naw aklle llun ake' dalixhej, le bill wazixhena ke ake' cha llun ake' daxhinj. 9Wlleyia rmit ka' sjanbanle Isaaken, na wachinja yodao ka' sjalla Israelen. Na wxia wdil, nench'na gakdilrena be'nn bich'loellj be'nn wnebian nzi Jeroboam.
Amós na gukdilrene Amasías
10Amasíazen nake'e bxus gan nzi Betel, bdixjwere Jeroboamen, be'nnen llnebia Israelen: Amózen, bikse llne'e wen ko'o rwe' be'nn llnebia raw be'nn Israel ka'. Na latj yell-liw ni, bill zoeren ke di'll ka' yixjweren. 11Ke di'll kin de'e yixjwere'e be'nn yell ka': Gut ake' Jeroboamen konen spad, na yoyte be'nn yell Israel ka' wachach ake' le ake' yellen.
12Na Amasíazen gulle'e Amózen:
Balloj gani', be'nn llayixjwe, cha llenlo wau dan llayixjweron rwe', biaj gan nzi Judá, 13Axha bill taw chixhjoero Betel ni, le yell ni zu yodao braon, na ganin lled be'nn wnebian lladyierawe'e.
14Na Amózen ballie'e xtillen lle'e le'e:
Nada' bi naka be'nn llayixjwe, na billenksera ta chixhjoera, le kere len'na llwao nadan, gup xhir nada', na llrapa higos, 15axha Xanllon bakoase nada' gan da llapa xhir ka', na gulle'e nada': biaj na bne'e rawraza raw yell kia Israelen. 16Na kelen'na, bzenay xtill Xanllon. Na rwe' llew nada': Bitbi di'll krere neo ke Israelen, na bitbi di'll krere neo ke xhi'nn xhasoa Isaaken. 17Na kin ba bnee Xanllon: Nor ko'on gake nor ree raw yell xhen ni, na xhi'nno bi biew ka', na xhi'nno bi nor ka' gut akebe konen spad, na yell-liw ko'o ka' wla aken, na gut ake' rwe' to yell ga lloeraw ake' loe lsak ka', na be'nn Israel ka' wchach ake' le ake' raw yellen, na wache ake' le ake' zit kwis gan de yell-liw yubre.
Currently Selected:
Amós 7: ZPUPAT
Highlight
Share
Copy
Want to have your highlights saved across all your devices? Sign up or sign in
