San Lucas 24

Jesús chibeyasabebanhe

1Dza nerho ki xhman, guiajkake bayengolha, lo ye'arhoba, na noake nisa rlaa zixi tan be'anke. 2Nan bchhinke, ble'ekene guiaj nabaga rhoa ye'arhoba labirhe xhoa ka' gxoake; 3na guio'oke, te bible'ekene kuerpo ki Jesús. 4Labi nezekene bigonke pensarhe ki ten, kati kazoazi ble'ekene chopa bene dzake kuitake, nakoke xhake rhe'api yesa. 5Bdzebikagaze, te bze'acho kuinke loyote'a; te ka bene na gochhike le'ake:

—¿Nobixhkia' rheguilhajlhe lén ladaj bene goti bene nabanhe? 6Labi yoe' ni, chibeyasabebanhe. Ledzajne tan gochhie lén kati ne zue' lo yechhi Galilea: 7Xhi'in bene bguio' rheyala yodeke le' lona'a ka bene dolaxhkia', te gotike le' lo yaga krozo te nan gaka tzona dza yeyasayebanhe.

8Na'arhe ka nigolha ni yajnekenhe didza ki Jesús, 9te nan bechhinke tan guiajke lo ye'arhoba, gdixaje'eke yogote'a ten bene chineaj glachhile'anke Jesús, kan bene yebalake. 10Ka nigolha yajoake rson kika bene glachhile'anke Jesús, rheloke María Magdalena, Juana, María xhna Santiago, le'an yebalaka nigolha. 11Bene glachhile'anke Jesús gokiekene rzi'ika ye'a nigolha ni, na labi guiajkenhe ye'a.

12Za'akalha kan, Pedro guiaje rze'aze lo ye'arhoba; kati byoe' loelhe, toga sabno blachhike Jesús ble'ene. Na'arhe beyiaje lo yo'o kie', rhe'akiene banachhi tan goka.

Neza zeaj lo yechhi Emaús

(Mc 16.12-13)

13Lagazi dza na, chopa bene glachhile'anke Jesús, zeajke lo to yechhi rhelawe Emaús, naka kado' chineaj milhe niaa kinda xhchhinrha Jerusalén. 14Zeajke rtzalajke ki yogote'a tan goka. 15Tzalaka rtzalajke kan rhebeajniake, Jesús yajxhenhe le'ake te gzolhoe zeaje le'an le'ake. 16Te za'akalha rle'ekene le', zoa ta labi bde'e lataj yeyonbe'ake le'. 17Jesús gnabene le'ake:

—¿Nobi kie' zeajlhe rtzalajle lén toneza?

Gzoke na rhonye'achike, 18na to bene rhelawe Cleofás, bochhie':

—¿Tozilho loe' chibega'anlo lo yechhi Jerusalén te binezelho, tan choka lo dza na?

19Le' gnabene le'ake:

—¿Nobi chigoka?

Gochhike le':

—Ka' goka ki Jesús bene yechhi Nazaret, goke to bene xhen btzalaje laza Diozo ka' rhonhe le'an ka' rne' lo Diozo le'an sdo xhen lo yechhi; 20te xanka bxozi le'an kostisia kne'ato bode'eke le' kinda gzoake le' rhoa yelagoti lo yaga krozo. 21Ne'ato gopato yelarbezalachhi le' gsle'e yechhi ki Israel. Chizeaj tzona dza goka yogote'a ten. 22Za'akalha balaka nigolha rhonke tozi ne'ato chibtzebike ne'ato, guiajke bayento' lo ye'arhoba, 23na tan labi beyalekene kuerpo kie', belha'ake lo yo'o. Te rguixaje'eke balaka angle yajtzagake le'ake na' chigochhike le'ake Jesús nabanhe. 24Balaka bene xhkompato guiajke lo ye'arhoba na beyalekene konka' gochhika nigolha le'ake, te labi ble'ekene Jesús.

25Na'arhe Jesús gochhie le'ake:

—¡Bixhkia' birheajnieguelhe lén, kan kani rheajelhe ye'a yogote'a tan gne'aka bene btzalajke laza Diozo! 26¿Alaga' birheyala sakaya'a Xhi'in Diozo zia'alha kati zigakalhe' xhen?

27Dena'a gzolhoe rzeajniene le'ake yogote'a ka' rtzalaj kie' lo xhtidza Diozo, ta gzolhote'a lo guichi ki Moisés na zeajte'a kan yogote'a guichi ki bene btzalajke laza Diozo.

28Nan bchhinke lo yechhi ga' zeajke, Jesús be'anhe kata tzeaje gnerho. 29Te le'ake gotayoke le' kinda yega'anhe, na gne'ake:

—Bega'an le'an ne'ato, le'a chirhon chigola, chizeaj rchola.

Jesús guioe', kinda yega'anhe le'an le'ake. 30Kati chirhe'eke gagoke yeta, le' gde'ale yetaxhtilha, na bde'e xhlhe'an Diozo, bxhoxhaje na bde'e kie'ake. 31Tina'azi beyalhaj yajloke te beyonbe'ake Jesús; te le' tobenitize. 32Na gochhike leza'ake:

—¿Alaga' tabalha laxhdorha gla' lo lechorha kati zeze'e rtzalaje toneza na rse'adiene rho'o xhtidza Diozo?

33Labirhe glezake mazirhe, beyasake na beyiajke Jerusalén, ga' beyalekene nadobika bene chineaj glachhike le'an Jesús le'an ka bene xhkompake, 34Gochhike le'ake:

—Tabalhaksi chibeyasabeban Jesús, na chiyajtzague Simón.

35Na'arhe rhopake gdixaje'eke ka' goka kie'ake lo lhaneza, na nonaka beyonbe'ake Jesús kati bxhoxhaje yetaxhtilha.

Jesús yajtzague bene glachhile'anke le'

(Mt 28.16-20; Mc 16.14-18; Jn 20.19-23)

36Nedzake rtzalajke ka' goka, kati Jesús yajsoe' galawe ga' dzake, te bledze le'ake na gne':

—Tachhia'a ta tzawe ki Diozo zoa le'an lén.

37Le'ake bdzebikagaze, rhonke kuenda rle'ekene to be'egrasia. 38Te Jesús gochhie le'ake:

—¿Nobixhkia' rdzebigalhe? ¿Nobixhkia' rbixhaje laxhdolhe? 39Leguiokalhe na'a kan nia'a. Ne'adiksa. Lekan ne'adia na leguio: To be'egrasia labi napa be'alha kan chhita, ka' rle'elhe lén napa ne'adia.

40Nan gochhie le'ake kan, bsloene le'ake ne'e kan nie'e. 41Le'ake labi rheyochhi tzeajkene ye'a, tandozi rhebekene le'an rhe'akiekene banachhi, Jesús gnabene le'ake:

—¿A napalhe ni bi ta gagorha?

42Bdeke troa'a bela ye'axo, 43na le' gxhie'e na gdawe ga' dzake. 44Dena'a gochhie le'ake:

—Tan goka kia' naka tan gdixaje'eda lén kati nezoale'anha lén: rheyala gaka kumplirhe yogote'a tan zoa kia' lo xhba'a ki Moisés, lo guichi ki bene btzalajke laza Diozo kan lo salmos.

45Na'arhe be'anhe nonga tzeajniekene xhtidza Diozo, 46na gochhie le'ake:

—Kan zoa, Xhi'in Diozo rheyala gatie', te yeyasayebanhe nan gaka tzona dza, 47te nan gla'ake lawe, kixaje'eke yogote'a lo yechhi xhen, kinda yeyakake ki Diozo, kinda le' yezixhenhe dolaxhkia' kie'ake. Ta solhote'a lo yechhi Jerusalén, 48lén rheyala kixaje'elhe ki tan chible'elhe. 49Na ne'adia sela kie'alhe tan bkie'abi Xoza. Te lén leyega'an nizi, lo yechhi Jerusalén, kati si'irhelhe balorhe tan za'a yeba'.

Jesús rhebe'anhe yeba'

(Mc 16.19-20)

50Dena'a Jesús gche le'ake tzala'alha lo yechhi Jerusalén, Betania te'a, na gchise ne'e te be'an la'aye le'ake. 51Na tzalaka rhon la'aye le'ake, gbigue ga' dzake na bebe'anhe yeba'. 52Le'ake, de be'anke le' xhen, beyiajke Jerusalén rhebekeguezene. 53Te tolizi ze'ake lo yo'o sdo'o, rhonke xhen Diozo.

Currently Selected:

San Lucas 24: ZAALuk

Highlight

Copy