Mateo̱ 8

Kúcha tsindaya Jesuu̱ ngu xu̱ta̱ xiꞌin

(Mr 1.40-45; Lk 5.12-16)

1Jaskan nga je jajen Jesuu̱ na̱xi̱, tuxi kjín xu̱ta̱ xi kijitjengíre̱. 2Trátse itjukja ngu xta̱ xi chiꞌin xi findujun yajo̱ña tjínre, kitsitiñáre yajo̱ꞌe, isentꞌáre tkuꞌe, ku ku̱i̱cha kitsúre̱:

—Ndi̱a̱ꞌna̱, beñaꞌan nga mári nindayéini. Tindayéina ngu kju̱a̱ndá.

3Yane tsja Jesuu̱ yajo̱ꞌe ku ku̱i̱cha kitsúre̱:

—¡Tsindayára! ¡Je kundayéiji̱!

Ku tra̱tse kundayá kui xta̱. 4Nga je kuma, ku̱i̱cha , ku̱i̱cha kitsúre̱ Jesuu̱:

—¡Ndá nuꞌyéi én xi xínra! Ngatu ngují xi ꞌmiyéiri najmi xi kuma kꞌui. Tꞌáin jma nga kjitjián chanaꞌmi, ku chꞌei ngu chje̱, xi tsubáre nga nikasꞌén xukúcha kitsiꞌin kjuakixi Moise. Tuxi ngatubé ja chanaꞌmi nga ngite najmíri chiꞌin.

Ngu xta̱ xi ngitku ja jun romano̱

(Lk 7.1-10; Jua 4.43-54)

5Ngu ndiya, ngande jma nga ꞌmí Kafarnau̱m kijí Jesuu̱. Kꞌi̱a̱ jichutꞌare ngu xta̱ xi ngitku ja jún romano̱ 6ku ku̱i̱cha kitsúre̱:

—Ndi̱a̱ꞌna̱ Jesuu̱, ndáji tjínre musuꞌna̱ jan nganiꞌya. Tuxi ꞌñu tjikjínére̱ ku majín tsikjaniya.

7Tsichja Jesuu̱ ku ku̱i̱cha kitsú:

—Faitsindayaꞌa̱n.

8Ta̱nga ku̱i̱cha skengi xta̱ xi ngitku ja jun:

—Ndi̱a̱ꞌna̱ Jesuu̱, jandara tsubajíre̱ nga bitjasꞌen nga̱ya niꞌyaꞌna. Tukuátse tixí nga kundaya musuꞌna̱ ku kundayá. 9Nga̱tꞌaꞌán mána ñaꞌán kjuakixi ku te̱ mána nuꞌyaꞌén. Tsangaꞌán xi tsiꞌiꞌna kjuakixi ngu jónꞌna nga fai ngu ngande, kui jun kju̱a̱ꞌñu tjínre nga fai. Tsa kjaꞌi xi xínna nga ngandiba, kju̱a̱ꞌñu tjínre nga ndiba; kútsa minengina musuꞌna nga tsiꞌin ngu najmi, ja tsikitjusún.

10Tuxi se̱n kumáre̱ Jesuu̱ nga tsitꞌe kúcha skengi kui xta̱ xi ngitku jun romano̱. Ku inga ku̱i̱cha kitsúre̱ xu̱ta̱ xi tjimatjéngire:

—¡Nga xikju̱a̱xikjáin, ngieje nangi Israe kjema béꞌan ngu xu̱ta̱ xi ku̱a̱cha ꞌñu sꞌejínre nga̱tꞌaꞌna xuku kui xu̱ta̱ xi kjaꞌi na̱xi̱nanda teya chja̱! 11Ndá nuꞌyájnu kui én: Ngieje nga̱sunde kjuindibá xu̱ta̱ xi sꞌejínre nga̱tꞌaꞌe Namiña Diuu̱, xukúcha sꞌejínre kui xta̱. Kui xu̱ta̱ xi kjine ni̱ñu̱ xi chine nga kjamajñú xi tsjuá Namiña Diuu̱ ngande jma tjitsiꞌin kjuakixi. Kꞌi̱a̱ jña kꞌuejñatꞌaju yamexa xu̱ta̱ changaꞌe̱ Abran, Isaa̱ ku Jako. 12Ta̱nga xi tjún kinikitꞌe nga kju̱ kui basꞌen ngaya ngande jma nga tjitsiꞌin kjuakixi Namiña Diuu̱, kuí xi biyutjengíre̱ ku nikjai ngandeꞌe̱ jñu. Kꞌi̱a̱ kjínda kꞌiaku̱a̱ kjinda kju̱a̱ꞌón ku janda xi sꞌasꞌai kju̱a̱tsére̱ tkun naꞌñu̱.

13Jaskan ku̱i̱cha kitsúre̱ Jesuu̱ xta̱ xi ngitku já jun:

—Tꞌuꞌbéini nganiꞌyari, ku ku̱a̱cha ngatuma xukúcha kinisꞌejínji.

Tekuíni chu̱ba̱, kundayáni musuꞌe.

Nga kjín xu̱ta̱ kitsindaya Jesuu̱

(Mr 1.29-34; Lk 4.38-41)

14Nga niꞌyaꞌe Pe kijí Jesuu̱ ku kꞌi̱a̱ kube nga ndáji tjínre nachꞌaꞌe ku tꞌaiꞌñu inchare̱ nga kjiꞌi. 15Tutsjatse skingajúnre̱ Jesuu̱ ku kitjubaꞌáre̱ tꞌai. Kui nga isitjen ku kitsjuánire̱ xi chine Jesuu̱.

16Nga je tsejen jñu, kjín xu̱ta̱ jichuju̱re̱ xi xindajin sindujín yajo̱ꞌe. Ngútse en kitsiꞌin Jesuu̱ nga itsjé kui xindajin, ku tekuácha kitsindaya ngieje xu̱ta̱ xi ndáji sindure xi kꞌi̱a̱ tjima.

17Ku̱a̱cha kumá nga itjusún én xi kitsuyasún xta̱ xi ꞌmí Isaia̱ xi kitsuya Enꞌen Namiña Diuu̱: «Kui kitsindayajni̱ chiꞌin xi tjinjni.»

Xu̱ta̱ xi mejénre faitjengíre̱ Jesuu̱

(Lk 9.57-62)

18Kubé Jesuu̱ nga tuxi kjima xu̱ta̱ xi jatjiandáire̱. Kui nga kitsúre̱ ja xi kjibakuyáre̱, nga ngatjaiju̱ ngunda xinguá Chincha Ngalilea̱. 19Nga jichú kiakua, ngu chjine Kju̱a̱kixiꞌe̱ Namiña Diuu̱ kitsitiñáre yajo̱ꞌe ku ku̱i̱cha kitsúre̱::

—Jíkua Maestro̱, jña faijúra tujma nga ꞌmáiji.

20Ku kui kiskengire Jesuu̱:

—Ti̱xa̱ tjínre sorra̱ ku nda̱ba̱ tjínre ni̱se, ta̱nga án, Kjindiꞌe xu̱ta̱ nga̱sunde, najmína ngu ngande jma tsikjayaꞌan.

21Ngu kui ja xi kjibakuyáre̱, ku̱i̱cha kitsúre̱:

—Ndi̱a̱ꞌna̱, titjuéna kju̱a̱ nga tjún faikañajínmaꞌan nde namiꞌna; ku kjia faitjengira.

22Ku̱i̱cha skengire Jesuu̱:

—¡Titjuéri kju̱a̱ mikꞌen nga ngatañajín mikꞌenꞌe̱n! ¡Jísa, ndibitjengini!

Tsitjao̱ ꞌñu

(Mr 4.35-41; Lk 8.22-25)

23Tsasén Jesuu̱ ngaya tsutsu je ku jña kijiju̱ ja xi kjibakuyáre̱. 24Tuku tjima ngasún ndijua nga jaꞌa tjao̱ ku tsi xi tuxi ꞌñu ku tuxi tjitsikasꞌen ndijua ngaya tsutsu. Ta̱nga Jesuu̱ kjifétse. 25Kui nga Kitsikjaꞌare ja xi kjibakuyáre̱:

—¡Ndi̱a̱jni̱ Jesuu̱, ꞌnatsjengíjni̱, nga̱tꞌa je mangijni nginda!

26Ku̱i̱cha kitsú Jesuu̱:

—Mí xá nga tjitkúnjnu. ¡Mi xá tuxi sꞌejinjínjnu nga̱tꞌaꞌe Namiña Diuu̱!

Kui nga isitjén Jesuu̱ ku kitsiꞌínre kjuakixi tjao̱ kju̱ tjiáon nga ngatenda, ku ngieje nga xu kisꞌe. 27Já xi kjibakuyáre̱ Jesuu̱ tuxi se̱n inchamáre̱ nga inchaminengiya kúcha ku̱a̱cha kumá:

—ꞌYáni kui xta̱, nga janda tjao̱ ku tsi tꞌeꞌénre.

Jó ja xiꞌin xi kjín xindajin tjínre

(Mr 5.1-20; Lk 8.26-39)

28Nga jichú Jesuu̱ nangi xi chja̱ Ngadara, xi kjitjián ngunda xingua chincha, jó xu̱ta̱ xiꞌin itju ngaya tixa̱ jma sinduñajín mikꞌien. Tuxi ndáji xu̱ta̱ nga najmí xi mejénre te̱ faꞌa kui ndiya. Nga kitsitiñare Jesuu̱ yajo̱ꞌe ngiajó kui ja, 29kiskindia xindajin:

—¡Jesuu̱, Kjindiꞌe Namiña Diuu̱! Mí xi mejénri ꞌnijínjni. A nijéijni nga tuku kje fichují ni̱tjin nga matsje kjuetꞌa nga̱sunde.

30Tekꞌiáni jma nga tiña tuxi kjín chi̱nga̱ incha, ku 31ꞌyetsꞌuáre̱ Jesuu̱ kui xindajin:

—Tsa ꞌnatsjéijni ngajín yajo̱ꞌe kui ja, titjuéjni kju̱a̱ nga bitjasꞌenjínjni ngajín yajo̱ꞌe kui chi̱nga̱.

32Ku̱i̱cha kitsú Jesuu̱:

—Titjasꞌenjínjnu ngajin yajo̱ꞌe.

Kitsiꞌin xindajin ku itjujín ngajin yajo̱ꞌe ngiajó kui ja ku ngajín yajoꞌe chi̱nga̱ tsasꞌenjín. Kui nga tsanga ngieje chi̱nga̱, janda nga ixuya ngaya chincha, jma nga jesún nginda.

33Ja xi inchakunda chi̱nga̱ tsanga nga kijí na̱xi̱nanda. Kꞌi̱a̱ kikasennijmi najmi xi kumataꞌín chi̱nga̱ kju̱ najmi xi kumataꞌín ngiajó ja xi kisꞌendujín xindajin yajo̱ꞌe. 34Xu̱ta̱ na̱xi̱nanda kikasére̱ Jesuu̱, ku tsinengire̱ nga ngatitjú kui nangi.

Currently Selected:

Mateo̱ 8: MZI

Highlight

Copy