Mateo̱ 6

Kúcha ñaꞌan nga baꞌi ngu najmi

1»Nga mejénjnu nga ngu najmi xi ndá ñaꞌánjnu, nga tu̱ kuijí najmi nukju̱a̱jnu jma ꞌbemájnu; tsa nukjuajnu Namiña Diuu̱jni ngují kju̱a̱ndá tsjuájnu.

2»Tsa tjin xi tjimajínjnu kꞌui xi minchaju xu̱ta̱ xi ni̱ma̱ tjima, tukui en ñaꞌanjínjnu nga ꞌbemájnu ni̱ngu̱xi̱ꞌe judio̱ kútsa jan tjinukju̱ájnu ngande jma kjín xu̱ta̱ faꞌa; xu̱ta̱ jóngakjain xi ku̱a̱chá tsiꞌin, xi mejénre nga ndá ku̱i̱chja xu̱ta̱ nga̱tꞌaꞌe. Kju̱a̱xikjainni ku xiyájnu nga tukuitse najmi xi sakujnu.

3»Tsa tjin xi tjimajínjnu kꞌui xi minchaju xu̱ta̱ xi ni̱ma̱ tjima, nga tu̱ ngují xi ngatsuyare̱. 4Ku̱a̱cha kumá nga sꞌe̱ꞌma kui kju̱a̱ndá ku Namiña Diuu̱, xi ngují najmi tjiꞌmáre̱, tekuácha tsjuájnu kju̱a̱ndá.

Nga ikú Jesuu̱ kúcha chjinengire̱ kju̱a̱ndá Namiña Diuu̱

(Lk 11.2-4)

5»Nga jún chjinengíjnu kju̱a̱ndá Namiña Diuu̱, ngatu̱ xukují xu̱ta̱ jóngakjain ñaꞌánjnu. Nga̱tꞌa kui xu̱ta̱ tuxi tsjuáre nga ngieje nga bé nga Namiña Diuu̱ inchaminengire̱ kju̱a̱ndá. Kui kju̱a̱ minchakixi ngaya ni̱ngu̱xi̱ꞌe judio̱ kju̱ jmanga kjín xu̱ta̱ faꞌa. Ku xi kju̱a̱xikjain, kui xu̱ta̱ ngují kju̱a̱ndá sakúre.

6»Nga tjin xi jña tjimajnu minengire kju̱a̱ndá Namiña Diuu̱, ngatsiꞌin suba. Ngatjai kuarto̱ꞌe̱, ngatꞌechja kjinde̱tju̱a̱ ku kꞌi̱a̱ ngatinengire̱ kju̱a̱ndá Namiña Diuu̱, xi Namijnu, nga̱tꞌa kuí, tsjuá kju̱a̱ndá nga chjinengire ndatsa jma ꞌma.

7»Nga jún xi chjinengíjnu kju̱a̱ndá Namiña Diuu̱, ngatu̱ tsejí en nichjénjnu, xukúcha tsiꞌin xi chanjín bé Namiña Diuu̱. Kuáracha tsikjao kui xu̱ta̱, nga tse én chja̱, ku chan tsiꞌinre xki̱ Namiña Diuu̱. 8Nga tu̱ kuijí chjangijnu, nga̱tꞌa xi Namiña Diuu̱, xi Namíña, bé najmi xi ndusínjnu, janda nga kje chjinengitꞌajíjnu.

9»Ku̱i̱cha tsubáre̱ nukju̱atꞌájnu Namiña Diuu̱:

“Jí Namiña

xi tijniji̱ ndi̱u̱jmi:

ngieje xu̱ta̱ ngatsibé yajo̱ꞌe

nga ji xi Diuu̱ xi kju̱a̱xikjáinji.

10Jabí ku tu̱ jítse tatexumaijni̱.

Ngieje xu̱ta̱ xi tjima ngasun kui nangi

ngatꞌéri en,

xukúcha tꞌe énri

xi sindu ndiu̱jmi.

11Titjuéjni xi chine nga nchajún nga nchajún.

12Tichatꞌáijni kju̱a̱xaba xi ñaꞌánjni,

xukúcha nichatꞌájni xu̱ta̱

xi tsꞌijúnni̱ kju̱a̱xaba.

13Ku nga ndiunitsjéiji kui nga̱sunde,

ngatu̱ yujíri nga kju̱a̱xaba tsikjínjni ji,

ngatu̱ baꞌijí kju̱a̱ nga tsiꞌinjni ngaꞌñuꞌen xindajin.”

14»Tsa jún xi nichatꞌájnu kju̱a̱xaba xi tsꞌijúnjnu xu̱ta̱, tekuácha tsichatꞌájnu Namiña Diuu̱jni xi kjitjián ndi̱u̱jmi. 15Ta̱nga tsa jún najmíjnu kju̱anichatꞌa nga̱tꞌaꞌe xu̱ta̱, tekuácha Namiña Diuu̱jni kꞌuejíre̱ kju̱a̱nichatꞌa nga̱tꞌájnu.

Kúcha tjin tse̱ꞌe̱ nga kjindiá nikjaꞌa yajo̱ña

16»Nga jún xi kjindiá nikjaꞌájnu yajo̱jnu, ngatu̱ ngijí ꞌbendújnu ngakjainjún, xukúcha tsiꞌin xu̱ta̱ jóngakjain. Kui xu̱ta̱ tsjuáre nga tjin xi bé nga kjindiá inchatsikjaꞌa yajo̱ꞌe. Ta̱nga nga kju̱a̱xikjáin tukuitse najmi xi sakúre. 17Nga jún xi nikjaꞌájnu kjindiá yajo̱jnu ndá tasenjíjnu tsjatkujún ku tekuácha ndá titsjéjnu ngakjainjún, 18tuxi najmí xu̱ta̱ bejí nga kjindiá tjinikꞌatiújnu yajo̱jnu. Tujmá Namiña Diuu̱, xi Namijnu, xi bé ngieje najmi xi ꞌma tsuba, sku̱e̱ nga kjindiá tjinikꞌatiújnu yajo̱jnu ku kui xi tsjuájnu kju̱a̱ndá.

Nga xi kju̱a̱xikjain nga ꞌbeña ton

(Lk 12.33-36)

19»Tuyají nga ton, nga najmi xi chjí ꞌbetkujnu. Fitsun kui najmi kútsa xabí basꞌenre̱ ku tsichajá. Ta̱nga te̱ ma tsanga chejé basꞌen ku fueju̱. 20Ngisa ndá nga ndiu̱jmi ꞌbetkujnu ton, najmi xi chjí. Kꞌi̱a̱kua tsamí xi fitsun ku najmí xabi xi tsichajá. Ku te̱ majín basꞌen chejé ku fueju̱. 21Tikjaitsjénjnu nga najmi xi chjí xi kju̱a̱xikjain kjiá nga ngieje anima̱jnu nuꞌyaꞌenjnuꞌan.

22-23»Xkúnña xi inchatsuya ꞌyá tkuya xu̱ta̱ña. Kui nga tsa ndá kútsa ndajíña xu̱ta̱, nga chasena tjitsuya.

Kúcha tjin kju̱a̱ꞌe̱ ton

(Lk 16.13)

24»Ngují musu xi tujña jó ndi̱a̱ ma tsixajo, nga̱tꞌa tutsjai nga ngúxi ndá tsiꞌin xki̱ kútsa ꞌñu tsitjo. Ku tekuácha jún, majín tsa najmi xi chjí ku Namiña Diuu̱ tujña ñaꞌánjnu xki̱.

Kúcha tjin nga̱tꞌaꞌe kju̱a̱ndusin

(Lk 12.22-31)

25»Kuajícha nikjojnu mí xi chineña kjatꞌei, mí xi ꞌyúña, mí xi chajáña. Nga ꞌbema mítsa tu tjibichitse, ku Namiña Diuu̱ nga kitsindá yajo̱ña mítsa ngatu̱ najñútse baja.

26»Chaséjnu ni̱se xixi xi tjimatje̱n. Ngují najmi inchabeꞌe ku te̱ ngují najmi inchafangá, te̱ ngují tutje inchafaya ngaya niꞌya nijín. Ta̱nga Namiña Diuu̱ña, xi tjián ndiu̱jmi, tjitsjuáre najmi xi machjénre. ¡Ku jun ngisa ꞌñu chjiꞌéjnu ngisa nga kui!

27»A sꞌejínjnu, tsa tuya nga nindusínjnu yajo̱jnu, ku ngi ngu ni̱tjin nga tse kumajnu ngisa. 28Chaséjnu naxu xi tjin ngijña ku takuyájnu. Xuku nga kui ngují xá inchatsiꞌin tsa najñu xi chajá inchatsindáre̱ yajo̱ꞌe. 29Ku kju̱a̱xikjain nga janda xu̱ta̱xá tetjuu̱n Salomo̱, kuajícha ndá najñu xi chajá xi tsaja, ndatsa tse ton kisꞌere̱.

30»Tsanga naxu kuácha tsjua tsikún Namiña Diuu̱, xi tu̱ ngutjútse tjima, a ngisají tse kju̱a̱ndá tsjuájnu jún. ¡Tebaseꞌan nga kjie majínjnu nisꞌejín Namiña Diuu̱!

31»Nga tu̱ nindusinjínjnu yajo̱jnu mí xi chinejnu, mí xi ꞌyújnu, mí najñu xi chajá xi chajájnu. 32Xu̱ta̱ xi bejí Namiña Diuu̱ kui xi ngatsindusínre̱ yajo̱ꞌe nga̱tꞌaꞌe kui najmi. Xuku nga jún je tjiájnu Namiña Diuu̱ ndi̱u̱jmi, ku kui xi bé mí najmi xi kjimachjénjnu.

33»Najmi xi ꞌñu chjiꞌe, tibéjnu yajo̱jnu nga Namiña Diuu̱ xi tukuitse xta̱xá tetjun, ku tikitjusúnjnu najmi xi minengijnu. Namiña Diuu̱ xi bé mí chuba̱ nga tsjuájnu najmi xi inchamachjénjnu. 34Kui kju̱a̱, tu̱ nindusinjínjnu yajo̱jnu najmi xi ku̱ma nchajún. Jaskan kju̱i̱chu ngu ni̱tjin nga ñaꞌánjnu kui najmi. Tikjaitsjénjnu nga je tse kju̱a̱ndusin tjinña nga̱tꞌaꞌe kju̱a̱si xi tjin nga nchajun nga nchajun.

Currently Selected:

Mateo̱ 6: MZI

Highlight

Copy