Mateo̱ 27
27
Nga jichuju̱ꞌñu Jesuu̱ xu̱ta̱ xi táonre ndabaxá tsjuatjinꞌen Pilato̱
(Mr 15.1; Lk 23.1-2; Jua 18.28-32)
1Nga kuꞌasen, ngieje ja chanaꞌmi tetjun kju̱ ja xi inchatetjúnre̱ na̱xi̱nanda ndsijin ku̱ma nga ꞌyenda kúcha tsikꞌen Jesuu̱. 2ꞌYetaꞌñu xu̱ta̱ ku itsjé niꞌya tsjuatjinꞌen Kaifaa̱ ku ngaya tsja Ponsio̱ Pilato̱ kitsikasꞌen, xitetjun xi chja̱ Roma̱ kui ngande.
Kitsikꞌen suba yajo̱ꞌe Juda̱
3Nga kisꞌejínre Juda̱ nga nikꞌen Jesuu̱, tuxi ngi kumáre̱ nga̱tꞌa kui skabe ngatun nga kitsikasꞌén. Kui nga kijí jma sindu ja chanaꞌmi xi ngitku̱ kju̱ xi inchatetjúnre̱ na̱xi̱nanda, kitsuaníre̱ xi kate tao̱n tiaba, 4ku ku̱i̱cha kitsúre̱:
—Jee tsangina yajoꞌna ngakjain Namiña Diuu̱ nga̱tꞌa kitsikasꞌénjnu Jesuu̱, ku najmíre̱ jee.
Ku̱i̱cha skengi kui ja:
—¡Ku ji̱n mí xi ndusínjnu! ¡Kju̱a̱si subari kiku̱a̱!
5Kui nga Juda̱ kitsikjaꞌa kicha̱ ton ngaya ni̱ngu̱xi̱, ku kijí ku kitsixindu yajo̱ꞌe. 6Ja chanaꞌmi tetjuu̱n jaya ton ku ku̱i̱cha kitsú: «Kui ton xi kisꞌengiña nga nikꞌen ngu xu̱ta̱; tsjuají kju̱a̱ kju̱a̱kixi nga kaxaꞌe̱ chje̱ ꞌbenduyaña.»
7Kui nga kitsindsiji̱n yajo̱ꞌe ku nangi xi ꞌmí «Ngandeꞌe̱ xta̱ xi tsindá ti̱jí» tuxi kꞌi̱a̱ ꞌbenduñajín xu̱ta̱ xi kjaꞌi na̱xi̱nanda chja̱. 8Kui kju̱a̱ kui nga̱nde «Ngandeꞌe̱ jín» ꞌmí janda kjatꞌei. 9Kuacha itjusún najmi xi kitsú xi tsuya Enꞌen Namiña Diuu̱ Jeremia:
«Xu̱ta̱ xi chja̱ Israe yeꞌére̱ chji
nga ꞌyechji nga kinikꞌen kui xta̱:
¡Kate ton tiaba!
10Ku kui skabe tao̱n,
Ku tsꞌatsje Ngandeꞌe xta̱ xi tsꞌatsje ti̱jí,
xukúcha kitsiꞌínna kjuakixi Namiña Diuu̱.»
Jesuu̱ ku Pilato̱
(Mr 15.2-5; Lk 23.3-5; Jua 18.33-38)
11Nga tsangiju̱ Jesuu̱ ngakjain Pilato̱, ku xikꞌui tsinengiyáre̱:
—A kjain nga ji xi Xta̱ tetjun xu̱ta̱ judio̱ ji.
Skengi Jesuu̱: b
—Ji xi kua tjibixi.
12Ja chanaꞌmi xi ngitku̱ kju̱ ja inchatetjúnre̱ na̱xi̱nanda inchabatejené Jesuu̱ ngakjain Pilato̱, ta̱nga ichijí kjengi Jesuu̱. 13Pilato̱ tsinengiyáre̱ Jesuu̱:
—A nuꞌyeiji ngieje én xi inchatsú xu̱ta̱ nga kontra̱ inchafuéri.
14Ku nga ichijí skengi Jesuu̱ tuxi se̱n kumáre̱ Pilato̱.
¡Tjatꞌájnu kru kitsú xu̱ta̱!
(Mr 15.6-15; Lk 23.13-25; Jua 18.38-40; 19.4-16)
15Ngajiꞌen nga kjima sꞌuiꞌe Paskua̱, xitetjún tu̱xá ku̱a̱cha ngare̱ nga ngu xi xu̱ta̱ xi incha nduya tsixan; xi mejénre na̱xi̱nanda nga xixan. 16Kuima ni̱tjin kjisian nduya ngu cheje xi ꞌmí Jesuu̱ Barraba. 17Tsinengiyáre̱ Pilato̱ xu̱ta̱ xi kꞌi̱a̱ sindutkiu: «ꞌYá xi mejénjnu jun nga nixan: a Jesuu̱ Barraba, a xu̱ Jesuu̱, xi jajin Namiña Diuu̱ nga Ꞌbatsjengiña bixujnu.»
18Tsinengiya Pilato̱ kui najmi nga̱tꞌa bé nga kju̱a̱ꞌontakún, ja chanaꞌmi xi ngitku̱ kju̱ xi inchatetjúnré na̱xi̱nanda, Jesuu̱ xin inchabatejene.
19Ku kꞌi̱a̱máre̱ nga tjitsitsje kju̱a̱ Pilato̱, ku̱i̱cha tsú én xi kitsingiyáre̱ chju̱nꞌen: «Tu̱chu̱ba̱ ngují najmi ꞌniji̱n kui xta̱, nga̱tꞌa tsje. Nga̱tꞌasꞌe kui xta̱, tuxi chꞌo kitsúna chini kujñu.»
20Ku kꞌi̱a̱máre̱, ja chanaꞌmi xi tetjun kju̱ ja xi inchatetjúnre̱ na̱xi̱nanda, kitsiꞌínre kju̱a̱ꞌñu xu̱ta̱ xi kꞌi̱a̱ tjima nga nganixan Barraba ku nganikꞌien Jesuu̱.
21Kui nga te̱ tsinengiyaníre̱ na̱xi̱nanda xitetjún:
—Jmá xi mejénjnu nga tsanꞌan nga ngiajó.
Ku ngieje nga ku̱i̱cha skengi:
—¡Barraba mejénjni̱ nga nixan!
22Ku ku̱i̱cha kitsú Jesuu̱:
—Ku mí xi mejénjnu nga tsijunꞌan Jesuu̱, xi jajin Namiña Diuu̱ nga ꞌbatsjengiña bixujnu.
—¡Kru ngatꞌéntꞌa! —tu̱ jña ku̱a̱kitsú ngieje.
23Tsinengiyare̱ xitetjún:
—Tixuyájnu, Mí najmi xi ndáji tjin kitsiꞌin kui xta̱.
Ta̱nga xu̱ta̱ kjín tusátse ꞌñu kitskindia:
—¡Kru ngatꞌéntꞌa!
24Nga je kube Pilato̱ nga ngite najmí xi tsiꞌinre xki̱, ku ma tsa kjankjín xu̱ta̱ ku ndáji kjuetꞌa. Tsinengi nga mangichꞌáre̱ ndijua, ienjún tsja ngixku̱ xu̱ta̱ ku kitsú:
—Anjín kúnna nga nikꞌiénjnu kui xta̱. Jun xi kúnjnu.
25Ku ku̱i̱cha skengi xu̱ta̱:
—¡Ji̱n kju̱ kjindijni xi kichꞌájni̱ jee nga kiniꞌkién kui xta̱!
26Kui nga kitsixa̱n Pilato̱ cheje xi ꞌmí Barraba, ku kjia kitsiꞌin manda nga ngu naꞌñu nichjen nga fare̱ Jesuu̱, ku nga je kumá kjia ngatinchanére̱ kalabo tꞌa kru.
Ngieje xu̱ta̱ nga tsijnuke Jesuu̱
(Mr 15.16-20; Jua 19.1-3)
27jajún xi tjínre Pilato̱ kiju̱ kjindetsinꞌen niꞌyaꞌe̱ jajún ku tsichjare ngieje jajún xi ngisa. 28Kꞌi̱a̱ kichjubaꞌáre̱ ñajñuꞌen Jesuu̱ ku ngu tianga aní kitsikaja, 29ngu tjiuꞌbi̱ naꞌya xuku korona̱ ꞌyetjaire̱ ngasun tku̱, ku ngu ya yaya tsja ngandá. Kjia isentꞌare tkiuꞌe, y ku̱i̱cha inchatsúre̱ nga inchamijnuké: «¡Tsé ngatumáre̱ reiꞌe̱ xu̱ta̱ judio̱!»
30Inchabatetére̱, ku tekuini ya xi kitsjuáre inchaꞌmutjaire̱ ngatsja tku. 31Nga jenda nga inchamijnuké, skebaꞌáre̱ tianga, tuku kui najñu xi tsajáni te̱ kitsikajani ku kiju̱ jma nga kikatꞌa kru.
32Kiju̱ Jesuu̱ jajún. Nga je tjima ndiya kꞌi̱a̱ sakúree̱ ngu xta̱ xi ꞌmí Ximo, xi chja̱ nga̱nde Siréne̱, ku kitsikaꞌa kju̱a̱ꞌñu kru xi yaꞌa Jesuu̱. 33Nga jichú nga̱nde xi ꞌmí Ngogo̱lta̱, xi mejénre tsú «Ninda Tiya», 34bino xi jatjijín ngu xka̱ xi tsja kitsjuáre, xi ndá nga tsindaya jma nga onña. Skutꞌa Jesuu̱, ta̱nga mejínre̱ kitsꞌi.
35-38Ja jun kalabo inchané yajo̱ꞌe Jesuu̱ nga yatꞌa kru, ku kjia kitsitáon ꞌyá xi mejénre najñu xi chajá xi yaja. Ku tekuácha yatꞌa letra ngakꞌaꞌe̱ tku̱ Jesuu̱ xi tjitsú, jma nga inchatsuya mí xá nga kru yatꞌa. Ku̱i̱cha tjichja̱ kui letra: «Jesuu̱ xikꞌui, Reiꞌe̱ xu̱ta̱ judio̱.»
Ngatje̱n nga ngu ngu tsja Jesuu̱ isenné kalabo̱ nga yatꞌa kru jó ja cheje, ngu xi ngatje̱n ngandá ku ngu xi ngatje̱n ngaskun. Ku kjia xu kisꞌendu jajún nga kiskunda.
39Xu̱ta̱ xi kꞌi̱a̱ inchafaꞌa chꞌao inchatsúre̱ Jesuu̱ ku inchamijnuké, ku inchaꞌbetꞌiuáre tsꞌua 40ku inchatsúre̱: «Jí xi kibixiji nga nikixundúji ni̱ngu̱xi̱ ku jantse ni̱tjin te̱ nindá tjatséini. ¡Tsa tjeꞌñu tse ngaꞌñu xi tjinri, ꞌnatsjeingi subái yajo̱ri! ¡Tsa kjain nga kjindiꞌe Diuu̱ji, titjajéin kru!»
41Tekuácha inchamijnuké ja chanaꞌmi tetjun, chjine Kju̱a̱kixiꞌe̱ Namiña Diuu̱ kju̱ xi inchatetjúnre̱ na̱xi̱nanda. Ku̱i̱cha inchatsúre̱: 42«Xikꞌui, kumáre̱ kiꞌnatsengi xi kjaꞌi, tanga majínre̱ ꞌnatsjengi suba yajo̱ꞌe. Tjitsú nga kui xi xta̱xá tetjunꞌe̱n Israe. ¡Ngatjajén kꞌi̱a̱ jma kjitꞌa kru ku kjia nga nisꞌejínña nga̱tꞌaꞌe! 43Kitsú nga sꞌejínre Namiña Diuu̱, ku nga kjindiꞌe Namiña Diuu̱. ¡Ku tsanga kjain nga tuxi tjaore Namiña Diuu̱, ja ngatꞌatsjengi kjatꞌei!»
44Ku kui ja cheje xi kikjatꞌa kru kꞌi̱a̱ nga̱tꞌaꞌe tekuácha chꞌao inchatsúre̱.
Kꞌien Jesuu̱
(Mr 15.33-41; Lk 23.44-49; Jua 19.28-30)
45Janda nga nchisen ku janda nga kjuane jan ngixún, kuchjindi̱ ndiu̱jmi. 46Kui ura, ngije ngaꞌñuꞌen skindia Jesuu̱: «¡Elí, Elí!, lemá sabactani»
Xi mejénre tsú: «¡Namiña Diuu̱ꞌna, Namiña Diuu̱ꞌna! Mí xá kinikjaꞌabaséinna»
47Yajin xu̱ta̱ xi kꞌi̱a̱ tjima, tsitꞌe ku ku̱i̱cha kitsú: «¡Chjineꞌenꞌen Namiña Diuu̱ xi ꞌmí Elia̱ tjichjare̱!»
48Ngu kui xu̱ta̱ tsangitsjai ngu tsanga̱, ku bino sán kitsikꞌanchi̱ju, ꞌyetku ngu ya ndujú ku kitsjuáre, tuxi ma ꞌbi. 49Xi ngisa xi inchabase ku̱i̱cha kitsúre̱: «Xu chínri, a ndiukꞌatsjengíra̱ Elia̱.»
50Ngi ngu xi tuxi ꞌñu skindia Jesuu̱ ku kꞌen 51Kui chu̱ba̱ najñu xi tje̱ntiú ni̱ngu̱xi̱ jaoya kumá, janda ngakꞌa ku janda nginde, janiya nangii̱ ku tsakjan ndi̱a̱jo̱ tsiña; 52jixꞌa tsjuꞌe mikꞌen, ku kjín xi sꞌejínre nga̱tꞌaꞌe Namiña Diuu̱ ku je jesún, te̱ jiyánire̱. 53Ku nga je jixꞌajingajóre̱ Jesuu̱, tsasꞌen na̱xi̱nanda Jerusalen kui xu̱ta̱ ku kjín xu̱ta̱ xi kube.
54Xi sián ngitku̱ jajún xi chja̱ Roma̱ kju̱ nga ngieje jajún xi inchakunda Jesuu̱ kube chaon ꞌñu xi kumá ku kju̱ ngieje najmi xi kjima. Ndaxi inchafatse tkun ku ku̱i̱cha kitsú: «¡Kjainni, nga kjindiꞌe Namiña Diuu̱ kui xta̱!»
55Kjín yachjin tjima kꞌiakua xi inchabasekjin. Kui xi tjimatjengíre Jesuu̱ janda nga itju Ngalilea̱. 56Kꞌi̱a̱ kjitsuꞌba Maria̱ Lena; Maria̱, naꞌe̱n Santia ku Kusee̱; kju̱ chju̱nꞌen Sebedeo̱.
Nga kikjañajín Jesuu̱
(Mr 15.42-47; Lk 23.50-56; Jua 19.38-42)
57Nga je kujñú, kitsitiña yajo̱ꞌe ngu xta̱ xi tjínre tao̱n xi ꞌmí Kusee̱ jma kinikꞌentꞌa kru Jesuu̱. Nga̱nde xi ꞌmí Arimatea̱ chja̱ ku je Jesuu̱ kjitsuꞌbatjengíre̱. 58Kui Kuse tsinengíre̱ kju̱a̱ Pilato̱ nga ma fueju̱ yajo̱ꞌe Jesuu̱, tuxi ma nga bañajín. Kitsiꞌín kjuakixi Pilato̱ nga baꞌíre̱ mikꞌen.
59Kuse kiskabé yajo̱ꞌe Jesuu̱ ku nitjiabe xi tsjé kitsikjatjikja 60ku ngu ngaya tsju kikañajín. Tjatse kui tsju, xi kje tsejí tjínre nga kitsingiya tsindá nga inchiyare̱ ngu ndi̱a̱jo̱ tsé. Ngu ndi̱a̱jo̱ xi tuxi tsé ꞌyetiu Kusee̱ kjinde̱tju̱a̱ kui tsju, ku kijí nga je kumá.
61Ngakjain kui tsju kisꞌendu Maria̱ Lena kju̱ Maria̱ xi ngingu.
62Ni̱tjin xubato̱ni xi ma nganchajun, ni̱tjin nikjayaꞌe̱ xu̱ta̱ judio̱. Ja chanaꞌmi tetjun kju̱ ja fariseo̱ kikasére̱ Pilato̱ 63ku ku̱i̱cha kitsúre̱:
—Xta̱xá, jitsjénjni nga, kisꞌebixi kui xta̱ ndesu ku̱i̱cha kitsú: “Xi ma jan ni̱tjin nga nikꞌiénjnu faiyánina.” 64Máre̱ tsa ja xi ikuyáre̱ kjabecheje yajo̱ꞌe ku kuitsúre xu̱ta̱ nga jixꞌajingajóre̱. Kui kju̱a̱ndesu ꞌñu ndáji kuma ngisa tukꞌuajíre̱ nga kitsú nga kui xi Kjuaꞌikꞌatsjengíña. Tuxi kuajícha kumá, tiꞌin kjuakixi nga tingiyéi xi ꞌbendunda tsjuꞌe janda nga faꞌa xi jan ni̱tjin.
65Ku̱i̱cha skengire Pilato̱:
—Jun tjinjnu jajún xi tsa̱jún; tangijnu ku ndá chundájnu tsjuꞌe kui xta̱.
66Ku kijí jma kjiꞌi tsjuꞌe Jesuu̱, ku ꞌyetaꞌñu ndi̱a̱jo̱ xi tjitjiu kjinde̱tju̱a̱ꞌe̱ tuxi majin faniya. Ku kꞌi̱a̱ incha jajún xi kisꞌendunda.
Currently Selected:
Mateo̱ 27: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
