Mateo̱ 25
25
Kúcha kuma nga̱tꞌaꞌe xi te̱ yachjin xungu
1»Jma kjibatexuma Namiña Diuu̱ kuacha ku̱ma xukúcha kumá ngu kju̱a̱xke. Nga je tsejen ni̱tje̱n te yachjin skabe ndiꞌixu xi ndifatí ꞌbetí ku kijí jma fichú xta̱ xi bixantsja. 2Ón kui yachjin xi kusunjínre̱ najmi xi tsiꞌin ku ón xi xiꞌinkju̱a̱. 3Ngiaꞌón yachjin xi kusunjínre̱ najmi xi tsiꞌin, áiji ndifatí tsaꞌá, 4ta̱nga ngiaꞌón xi xiꞌinkju̱a̱ ái ndifatí tsaꞌá tuxi ma nga mincháre̱ kjaꞌi kandiꞌe̱ tsanga fé xi inchamáre̱.
5»Ta̱nga xatijí jichú xke, ku yachjin xi te kunajñare ku kisꞌendufé. 6Tu mejen basen ni̱tje̱n, kinuꞌyáre nga si inchatsiꞌín xu̱ta̱: “¡Je ndiba xke, titjújnu, tjaichjaꞌá ndiyájnu!”
7»Isitjen yachjin ku tsaꞌangire̱ nga ꞌyendá ndiꞌixuꞌe̱. 8Kui nga ngiaꞌón yachjin xi ndsen ku̱i̱cha kitsúre̱ yachjin xi xiꞌinkju̱a̱: “Titjuájnu ndifatí xi tjimajúnjnu, nga̱tꞌa ndiꞌixujni je inchatsꞌo”.
9»Ku̱i̱cha skengi yachjin xi xiꞌinkju̱a̱: “Áiji ma ndifatí xi tjimajúnjni ku majín baꞌíjnu. Ngisa ndá tsa faikindájnu.”
10»Ku nga kikꞌatse ndifatí yachjin xi ndsen, kjiama jiꞌi xkee̱. Ku ngiaꞌón yachjin xi xiꞌinkju̱a̱ jña tsasꞌenju̱n xkee̱ jma kjima sꞌuiꞌe kju̱a̱xke, ku kisꞌechja kjinde̱tju̱a̱. 11Nga tsꞌutjini ngiaꞌón yachjin xi ndsen, ngieje nga tjichja ku skindia: “¡Ndi̱a̱ꞌna̱, ndi̱a̱ꞌna̱, jnuxꞌáijni kjinde̱tju̱a̱!”
12»Ta̱nga ku̱i̱cha skengire xkee̱: “Bejíꞌa̱n ꞌyájnu jun. Bejinjínjnu.”
13»Kui kju̱a̱ nga jun, xi tebakuyájnu, tutsjái nga tsubáre̱ nga mijñandájnu, nga̱tꞌa yajíjnu mí ni̱tjin ku mí ura nga faꞌiñaꞌan.
Musu xi ján ma
(Lk 19.11-27)
14»Jma kjibatexuma Namiña Diuu̱, tekuácha ku̱ma xukúcha kumá ngu ndiyá nga kijí tsabe ngu xta̱. Tsichjare musuꞌe ku kui kitsikasꞌenxki̱re̱ tao̱nꞌe̱n. 15Bé kui xta̱ xá xi máre tsiꞌin nga ngu ngu musu. Ngu xi ón mi kichaton kitsingatsja, kjaꞌi xi jó mi kitsingatsja ku kjaꞌi xi ngumi. Nga kumá ku kijí jma nga kjue.
16»Musu xi ón mi ton kiskabe kitsixaju ton, ku ngi ón mi kitsiꞌin xi xku̱n. 17Xi jó mi kitsiꞌíre ngi jó mi kitsikensún. 18Ta̱nga xi ngu mi ton kitsiꞌíre inchañajíntse nginde nangi.
19»Tsé jaꞌa kjiátse jiꞌíni xta̱ xi kiji tsabe, ku mejénre̱ ꞌyendaju xki̱ ja xi musure̱. 20Jichú xi ón mi kitsiꞌíre, kitsjuáre̱ xi ón mi kju̱ xi ngi ón tsejenre̱, ku ku̱i̱cha kitsúre̱: “Ndi̱a̱ꞌna̱, ón ꞌmí tao̱n kitsiꞌíni, ku kꞌui tjián ngi ón ꞌmí xi an kitsiꞌinꞌan.”
21»Ku̱i̱cha kitsú xta̱ xi tse̱ꞌe tao̱n: “¡Tuxi ndátjin! Ndáiniji nga musu, ku ma nisꞌejín ngatꞌa̱ri. Nga̱tꞌa ndá kichínri xi chu̱ba̱ kitsjuára, kjatꞌei najmi xi ꞌñu chjiꞌe ngisa tsingatsja̱ra. Sitsjuáña.”
22»Kjia jichúni musu xi kitsiꞌíre xi jó mi tao̱n, ku kitsú: “Ndi̱a̱ꞌna̱, jó ꞌmí ton kitsiꞌíni, ku kꞌui kjitjiánna ngi jó ꞌmí xi kitsiꞌínꞌa̱n.”
23»Ku̱i̱cha skengire xi tse̱ꞌe tao̱n: “¡Tuxí ndátjin! Ndáiji nga musu, ku ma nisꞌejin ngatꞌa̱ri. Nga ndá kichínri najmi xi chu̱ba̱ kitsjuára, kjatꞌei tsingatjsára najmi xi ꞌñu chjiꞌe ngisa. Tjaisi̱sꞌuiña.”
24»Jichu kjuetꞌa musu xi ngumi tao̱n kiningatsja, ku kitsú: “Ndi̱a̱ꞌna̱, tu̱xá béꞌa̱n nga tuxi ꞌñu kjiꞌiri, nga chjinengi janda najmi xi majín xi ñaꞌánña. 25Kui kju̱a̱ nga kitsakjunꞌan, ku ngajin nangitse ꞌyeñajinꞌa̱n. Kꞌu̱i̱ tsikꞌuꞌbénira xi ngu mi tao̱n xukúcha tjin xi kitsiꞌína.” 26»Ku̱i̱cha skengire xi tse̱ꞌe tao̱n: “Ndajíji̱ nga musuji̱ ku tseꞌeiji. Tsa yiji̱ nga ꞌñu kjiꞌina, 27mí xá banko̱jí kꞌajínji tao̱n. Tsa ku̱a̱cha kiniꞌinji̱, nga kjuaꞌiꞌa̱n sakúnina tao̱n xi kitsjuára, kju̱ xku̱n xi kisꞌesún.”
28»Sꞌe̱i̱ ku̱i̱cha kitsúre̱ ja xi kjibaseju̱n kui xta̱: “Chjubaꞌajnu xikꞌui tao̱n de ngumi, ku xi te ꞌmí tjiánre̱ titjuajnu. 29Nga̱tꞌa xi tse tjínre tusá ꞌñu tse baꞌíre̱, ku janda ꞌbanginire̱; ta̱nga xi ngují najmi tjínre, chjubaꞌáre̱ janda najmi xi chubaa̱. 30Ku kui musu xi chjiꞌeji , tikjaꞌájnu kjinde̱tsín jma nga jñú; kꞌi̱a̱ sku̱e̱ xi ꞌmíre̱ tkun ku kjinda ku kjineyaꞌñu naꞌñu̱ nga̱tꞌa̱ꞌe kju̱a̱tkiun.”
Nga kutsje kjuetꞌa kjua
31»Nga án xi Kjindiꞌe xu̱ta̱ nga̱sunde, faꞌiñaꞌan, xuku xta̱xá tetjun faꞌiꞌan, ku fatjiandái̱na ngieje xi tsixajoꞌna, nga batejña̱ya yaxile chakunꞌna. 32Xu̱ta̱ xi chja̱ ngieje na̱xi̱nanda ndiukincha ngakjáinꞌan, ku xín minchaꞌan xi ndá ku xín minchaꞌan xi ndáji, xukucha tsiꞌin xi basére chu̱tsa̱nga̱ nga fajin ngajin tendsu. 33Xi ndá ku ngandaꞌna̱ mincha ku xi ndáji ngatje̱n ngaskunꞌna. 34Ku kjia, an xi Xta̱xá tetjun, xínna xi ndá: “¡Namiꞌna je kitsichakunnéjnu! ¡Ndibajnu, chjabejnu ngande jma kjibatexuma Namiꞌna, , xi ꞌyendá janda nga tjen ni̱tjin nga kundá nga̱sunde! 35Nga̱tꞌa nga kubajóna ku jun kitsiꞌíjnu xi chjine; nga kuxindána ku jun kitsiꞌíjnu xi ꞌyú; ku nga xín na̱xi̱nanda kisꞌebixiꞌan, jun kitsiꞌíjnu ngande nganiꞌyajnu; 36nga kisꞌejína najñu xi chajá ku jun kitsiꞌíjnu; nga ndáji kisꞌena ku kichaséjnu; nga kisꞌejñaꞌa̱n nduya ku jun kichaséjnu.”
37»Ku xi ndá xu̱ta̱ kuinengiyana: “Ndi̱a̱jni̱, kjiá kuya̱ri nga kubajóri ku kitsiꞌíri xi chine. Kjiá xinda kumári ku jin kitsiꞌíri xi ꞌyú. 38A tjin ni̱tjin nga itjuiji̱ na̱xi̱nandari ku kitsiꞌíri ngande nganiꞌyajni̱, a xu̱ tjin ni̱tjin nga kisꞌejíri najñu xi chajá ku ji̱n kitsiꞌíri xi chajá. 39Faitsjenjínjni̱ tsa kjia ndáji kisꞌeri, kutsa nduya kikijni kutsa ji̱n kichaséri.”
40»Án xi Xta̱xá tetjúnꞌa̱n: ku̱i̱cha xinjnu: “Najmi xi kiñaꞌánjnu nga kikinchaju̱jnu ngu xu̱ta̱ xi tsamí xi chjiꞌe nga ngieje nga̱sunde, xi xuku tsꞌeꞌan mána, xukútse tsa an xi ku̱a̱cha kiꞌñaju̱jnu.”
41»Ku kjia ku̱i̱cha xínna xu̱ta̱ xi xaba: “¡Tinchabaꞌájnu jma tase̱n! Tujma nga tsijejnu kuitse xi ma chuyajnu nga̱tꞌaꞌe Namiña Diuu̱. Tangijnu ngajin ndiꞌi xi ngují ni̱tjin tsꞌao, ndiꞌi xi ꞌyendare̱ xindajin Namiña Diuu̱ kju̱ xi mejun. 42Nga̱tꞌa nga kubajóna, jun kitsiꞌijíjnu xi chine; nga kuxindána, kitsiꞌijíjnu xi ꞌyú; 43Nga xín na̱xi̱nanda kisꞌebixiꞌan, jun kitsiꞌijíjnu ngande nganiꞌyajnu; nga kisꞌejína najñu xi chajá, jun tekuácha kitsiꞌijíjnu xi bajaꞌa̱n; nga ndáji kisꞌena ku nga kisasénꞌan nduya, kichasejíjnu.”
44»Kuícha skengína kuí: “Ndi̱a̱jni̱, ngují ni̱tjin kuya̱ri tsa kubajóri kutsa kuxindári. Ngují ni̱tjin kuya̱jni tsa itjuiji̱ na̱xi̱nandari kutsa kisꞌejíri najñu xi chajá. Tekuácha kuyajíjni tsa ndáji kisꞌeri, kutsa nduya kisasenji. Kui kju̱a̱ nga minchajujíri.”
45»Kjia ku̱i̱cha kjengina: “Nga̱tꞌa jun, kixinchajujíjni, tsatu̱ ngurani xu̱ta̱ xi najmíre̱ ngu chjii kui nga̱sunde, kui nga tekuácha kixinchajujíjnu ndatsa an.”
46»Kui xu̱ta̱ xi xaba kju̱e̱tꞌajíre̱ nga kuje̱re, ta̱nga xi tꞌeꞌenre Namiña Diuu̱ sakúre kju̱a̱mijñachun gunxikaꞌa.»
Currently Selected:
Mateo̱ 25: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
