Luka̱ 16

Musu xi tkutkun

1Ku tekuícha tsichjáju Jesuu̱ ja xi kjibakuyáre̱:

«Kisꞌe ngu ndiya ngu xta̱ xi tuxi tjínre taon, xi tjínre ngu musu xi tjitsiꞌin xki̱ ngieje najmi xi tjínre; ta̱nga tsitꞌe nga kui musu tuchuba tjitsichjén tao̱nꞌe̱n. 2Kui nga tsichjáre̱ ku ku̱i̱cha kitsúre̱ “Mí najmi xi tjíniꞌín xi kitsuyana xu̱ta̱. Tikasꞌéinna xki̱ ngieje taon ku ngieje najmi xi tjínna, nga̱tꞌa ngite anjín nixajína ngisa.”

3»Kitsikjao musu: “Kjatꞌei nga je kuangatjengína xi tjitsjuána xá, mí xi tsiꞌinꞌan. Najmína ngaꞌñu tsanga mingiꞌan ku sabána tsa chje̱ minengiꞌa̱n. 4¡Je béꞌa̱n mí xi tsiꞌinꞌan, tuxi tjin xi tsikasꞌénna niꞌyaꞌe̱ nga je biyutjengína!”

5»Kitsiꞌin musu, tjeꞌñu tsichjáre̱ nga ngu ngu xu̱ta̱ xi yajáre tse̱ꞌe xta̱ xi tjitsixajó, xi tjún jichú tsinengiyare̱. “Kó kjitje̱nri tseꞌe xta̱ xi tetsixajoꞌa̱n.” 6Ku̱i̱cha skengi kui xta̱: “Uchan barri xine oliba̱ kjitje̱nna tse̱ꞌe.” Kitsú musu: “Nga̱i̱ kjitjián xki̱ri. Kijna, tijni, ku ngandeꞌe̱ xi uchan barri, ichatetse tjatꞌái.” 7Te̱ tsinengiyánire̱ kjaꞌi: “Ku jí, kú kjitje̱nri tseꞌe xta̱ xi tetsixajó.” “Ku jí, kú kjitje̱nri tse̱ꞌe xta̱ xi tetsixajo: Skengi kui xta̱” “Te mi kilo̱ trigo̱.” Ku̱i̱cha skengire musu.” Ku̱i̱cha kitsú musu: “Chjabí xki̱ri ku jín mi kilo̱ tjatꞌai.”

8»Nga kisꞌejínre xta̱ xi tse̱ꞌe̱ xá tuxi ndá kitsitsjuaju̱ kui musu xi tkukun nga̱tꞌa tsangitsjaire kúcha kitsiꞌin. Nga̱tꞌa, xu̱ta̱ xi chja̱ kui nga̱sunde tuxi mangitsjáire kúcha tsiꞌin xki̱ xáꞌe tukꞌuajíre̱ xi kjindiꞌe Namiña Diuu̱.

9»Kui kju̱a̱ nga jún, xu̱ta̱ xi tebakuyájnu, tsjuájnu kui kju̱a̱kitakun nga taon xi kju̱a̱ tkukun sakujnu, tichjénjnu ku ngasakújnu xi ndá baꞌajnu. Tuxi nga féjnu kui taon, kjabéjnu Namiña Diuu̱ ndiu̱jmí.

10»Xi mare̱ chúnre najmi xi kꞌají chji xi tjínre, tekuácha ma nikuendáre̱ najmi xi chji. Ku xu̱ta̱ xi tsichejétse najmi xi chubáchji, tekuácha tsiꞌin nga najmi xi chji nikuendáre̱. 11Tsanga jún majínjnu chúnre ngu najmi xi chu̱ba̱ chji xuku ngu taon xi kju̱a̱nimajnujín kisꞌengíjnu, ꞌyá xi tsingatsjajnu ngu najmi xi chji. 12Kútsa majínjnu chúnre ngu najmi xi tseꞌe xu̱ta̱, ꞌyá xi tsjuájnu ngu kju̱a̱ndá xi tsajún ku̱ma. 13»Najmí ngu musu xi jó ndi̱a̱ ma tsixaju, nga̱tꞌa ngu xi ꞌñu kumejénre nga xingu. Kútsa ngu xi tꞌeꞌenre, tꞌeꞌenjínnire̱ xingu. Majín nga jña ñaꞌán xki̱ Namiña Diuu̱ ku taon.»

Kjaꞌi kju̱a̱kitakun xi ikuya Jesuu̱ ngisa

(Mt 19.1-12; Mr 10.1-12)

14Ja fariseo̱ tuxi ꞌñu kutsjuare̱ taon. Kui kju̱a̱, nga tsitꞌe ngieje najmi xi kjibakuya Jesuu̱, ku tsijnuke. 15Kui nga ku̱i̱cha kiskengíre Jesuu̱:

«Jún, tuxi ndá xu̱ta̱ tjinikꞌuyájnu yajo̱jnu ngixku̱n xu̱ta̱, ta̱nga tekuixi kjibaséjnu Namiña Diuu̱. Najmi xi tsú xu̱ta̱ nga̱sunde nga ꞌñu chjiꞌe, tsamí xi chjiꞌére̱ Namiña Diuu̱.

16»Janda ni̱tjin nga kisꞌebixí Jua xi Batenda, xu̱ta̱ kju̱a̱ꞌñu tjínre nga kitsiꞌin xki̱ kju̱a̱kitakun xi ikú chjine enꞌen Namiña Diuu̱. Janda kjiaku̱a̱, kjifaꞌakjá én tjatse xi ndá xi chja̱ jma kjibatexuma Namiña Diuu̱, ku ngieje xu̱ta̱ inchatsiꞌin kju̱a̱ni̱ma̱ nga mejénre basen.

17»Ta̱nga, ngisa niꞌinjín chajá ndiu̱jmi ku nangi, ta̱nga Kju̱a̱kixiꞌe̱ Namiña Diuu̱ majín chaja ndatsa nguxtíntse.

18»Tsa ngu xu̱ta̱ tsjuén chju̱nꞌen ku kjaꞌi chjun bixantsjaju, jee najmi xi tjitsiꞌin, nga̱tꞌa kjiꞌbanachátse ngaya kju̱a̱bixantsja. Tsa ngu xta̱ bixantsjaju ngu chjun xi je kitjuen, tekuácha jee kui najmi.»

Lasaro̱ ku xta̱ xi tse taon tjínre

Tekuácha kitsú Jesuu̱ nga tsichja:

19«Kisꞌe ngu ndiya ngu xta̱ xi tse taon kisꞌere, xi najñu xi tuxi chji tsajá. Ngieje ni̱ntjin nga tsiꞌin sꞌui ku najmi xi chine xi chji tsjuáre xu̱ta̱. 20Ta̱nga kjinde̱tju̱a̱ niꞌyaꞌe kjitjián ngu xu̱ta̱ xi ni̱ma̱ xi Lasa ꞌmí, xi je jindujún tjiuxinꞌen. Tjín xu̱ta̱ xi kꞌi̱a̱ fuétsikeꞌe, 21ku naña inchatumayáre̱ jma nga onre̱. Kui xta̱ xi xꞌa̱n tumejénre̱ kjine najmi xi inchabixungi yamexaꞌe̱ xta̱ xi tjínre taon.

22»Ngu ni̱tjin jichú nga kꞌen xta̱ xi najmíre̱ taon ku kinditsjeꞌe Namiña Diuu̱ yeꞌe ngu ngande xi ꞌñu kꞌa, kꞌi̱a̱ jma kjitjián xu̱ta̱ changaꞌe̱ xi ꞌmí Abran. Jaskan kꞌen xta̱ xi tjínre taon ku kikjañajín. 23Nga je kjitjián ngakꞌien, jma nga tuxi on kjifeyare̱, xi kisꞌere taon kube ngakjáin Abran ku kꞌi̱a̱ tjiantꞌáre Lasa.

24»Ku kjia tsichjáre̱ Abran ku ku̱i̱cha kitsúre̱: “¡Abran, xu̱ta̱ changaꞌna, on chutꞌaina ngu kju̱a̱ndá! Tiꞌínri manda Lasa nga ngatsikꞌanchi̱ xku̱n kjinditsja ngajín ndijua ku ngatsikenchꞌán ꞌnaꞌa̱n. Tuxi tse kju̱a̱ꞌon tjitsikjeyána kui ndiꞌi.” 25Ta̱nga ku̱i̱cha kiskengíre Abran: “Tekuácha kjindiꞌna jí, ta̱nga tikjaitsjéin, nga jún kisꞌemájnu, jí tuxi ndá jeyári ku Lasa tuxi on kisꞌebixí. Kjatꞌei, Lasa tsjuatjínre kꞌui, ku jí tse kju̱a̱ni̱ma̱ tjibitjái. 26Ku tjin ngisa kjaꞌi najmi, jún ku ji̱n, achichí nga kjín tijñáña xingiña, ku najmí xi ma faꞌa jma nga tijñáña nga ngunguña.” 27Ku̱i̱cha kitsú xta̱ xi tjínre taon: “Abran, minengira kju̱a̱ndá tsani, nga niꞌínri manda Lasa nga ngatjai niꞌyaꞌe̱ xu̱ta̱ꞌna. 28Ngatsuyáre̱ ngia ón ja tsꞌeꞌan, tsanga mentꞌiuajíre̱ yajo̱ꞌe nga najmi xi ndáji inchatsiꞌin, kui ngande xi ku̱i̱cha chꞌao chun faꞌí.” 29Ta̱nga kuítsecha skengire Abran: “Tjínre ja tsꞌeji Xu̱ju̱n Enꞌen Namiña Diuu̱. Mí xá ꞌbexkiyají. Mí xá tsiꞌinjínre̱ xki̱.” 30Ku̱i̱cha skengi xta̱ xi tjínre taon: “Abran, xu̱ta̱ changaꞌna xi mejénna jí, ¡tukuijítse xi machjen! Ta̱nga tsa ngu xi je kꞌien fuékasére̱ ku chja̱ju, kixi tjin nga sꞌejínre ngatꞌaꞌe Namiña Diuu̱.” 31Ku̱i̱cha te̱ kitsúnire̱ Abran: “Tsanga tsiꞌinjínre̱ xki̱ én xi kjitꞌa Xu̱ju̱n Enꞌen Namiña Diuu̱, tekuácha tsiꞌinjínre̱ xki̱ ngu mikꞌen xi fueyánire̱.”»

Currently Selected:

Luka̱ 16: MZI

Highlight

Copy