Jua 6
6
Tsꞌatiu ón mi xu̱ta̱ kitsikjien Kjesuu
(Mt 14.13-21; Mr 6.30-44; Lk 9.10-17)
1Nga je kuma kui najmi, ngunda chincha Ngalilea̱ tsꞌatiu Kjesuu, ngande xi tekuácha chincha Tiberia̱ ꞌmí. 2ꞌÑu kjín xu̱ta̱ ꞌbematjengire Kjesuu, nga̱tꞌa je kube ngieje najmi tkun xi tsiꞌin nga tsindaya xu̱ta̱ xi chiꞌinre.
3-4Je kjimatiñare sꞌuiꞌe Paskua̱ xi ꞌbatsjé xu̱ta̱ judio̱, ku na̱xi̱ kijí Kjesuu kju̱ ja xi kjibakuyáre̱, ku kꞌi̱a̱ kisꞌenduju. 5Nga tsase ngatun Kjesuu kube nga kjín xu̱ta̱ tjimatjéngire, ku Lipe̱ ku̱a̱cha kitsúre̱ Kjesuu:
—Tjeꞌñu kjínma xu̱ta̱ jmá mindaña ni̱pan.
6Je tjijínre Kjesuu najmi xi mejénre tsiꞌin, ta̱nga tsinengiya kui najmi tseꞌe xi bé kúcha kuitsu xta̱ xi kjibakuyare. 7Ku ku̱a̱cha kitsú Lipe̱:
—Nditsa jó uchan ni̱tjin nixa, tekui xi mejenjínre tón tsa nguxtin ni̱pan mindare ngieje kui xu̱ta̱.
8Jandre̱, xi tsꞌema Ximo Pe, ku tekuácha kui kjibakuyáre̱, ku̱i̱cha kitsúre̱ Kjesuu:
9—Kui kitjián ngu tichi̱ xi yaꞌa ón ni̱pan sebada̱#6.9 Kui ni̱pan xi kjien xu̱ta̱ ni̱ma̱, nga̱tꞌa chubachji ngisa tu̱kuajíre̱ ni̱pan trigo̱. ku jó tjio̱. Ta̱nga kuichumajínre̱ tsa nikabire ngieje kui xu̱ta̱.
10Ku̱a̱cha kitsúre̱ ja xi kjibakuyáre̱ Kjesuu nga ngatꞌendute xu̱ta̱. Máre̱ ngu xi ón mi xu̱ta̱, ku ngajin ndexichu kisꞌendute ngieje. 11Jaskan Kjesuu, skabe ngiajó ni̱pan ku kitsjuare kꞌuechji Namiña Diuu̱. Ku jaskan kitsikabire ngieje xu̱ta̱, ku teku̱a̱cha kitsiꞌin nga kitsikabi tjio̱. Tsakjien xu̱ta̱ xukúcha nga mejénre.
12Nga je tsakjien ku kitsére xu̱ta̱, Kjesuu ku̱a̱cha kitsúre̱ ja xi kjibakuyáre̱: «Chjayajnu najmi xi tsꞌángi, tuxi ngují najmi fitsun.»
13Ku kitsikitjusún kui ja najmi xi kiꞌmire, ku tejó nisinyá kumá najmi xi tsꞌangi. 14Nga kube ngieje xu̱ta̱ najmi tkun xi kitsiꞌin Kjesuu, ku̱a̱cha kitsú: «Kju̱a̱xikjain nga kui xi tsuya Enꞌen Namiña Diuu̱ xi tjiꞌmire nga faꞌi kui nga̱sunde.»
15Ta̱nga kukjínre̱ Kjesuu nga xu̱ta̱ mejénre faju kju̱a̱ꞌñu ku xta̱xá tetjunꞌen mejénre tsikꞌuya. Kui kju̱a̱ nga na̱xi̱ tsijin, nga̱tꞌa mejénre ꞌbejña subá.
Kjesuu fabixi nitjsai sun ndijua ndachakun
(Mt 14.22-27; Mr 6.45-52)
16-17Nga je kjamaꞌña Kjesuu kju̱ ja xi kjibakuyáre̱ tsijin tsutsu je, ku jaꞌatiu ngunda ndachakun nga kijí ngande xi ꞌmí Kafarnau̱m. Tuxi je ꞌñu kujñú, ku tuku kjia ꞌbutjijí Kjesuu. 18Tsase itjukja ngu tjoꞌñu, ku tusama ndá kuꞌñu tjiao̱nꞌen ndachakun. 19Jére ngu xi ón kútsa jon mi metro̱ yajasun ndachakun ja xi kjibakuyare Kjesuu, ku nga kube Kjesuu nga tsuꞌbajinsún ndijua ndachakun. Ku tusa tiña kjibichutꞌare tsutsu Kjesuu, tuxi ndá kitsakjun kui ja. 20Ta̱nga ku̱i̱cha kitsúre Kjesuu: «¡Ánni kua, ngatu tkunjínjnu!»
21Kui ja xi kjibakuyare Kjesuu mejénre nga tsikijín ngaya tsutsu, ta̱nga xati tsentꞌa tsutsu ngande jma nga incha fue.
Nipan xi tsjuáña kju̱a̱mijñachun
22Ni̱tjin xima nchajúnni, xu̱ta̱ xi tsuba̱ ngunda chincha kisꞌejínre nga kuitsa ja xi kjibakuyátsere̱ Kjesuu inchatsijín tsutsu xi kjitꞌa tꞌande, nga̱tꞌa tjiu̱junjín Kjesuu kiju̱. 23Kjaꞌi tsutsu xi xin na̱xi̱nanda tsꞌentꞌa na̱xi̱nanda Tiberia̱, ku kꞌi̱a̱ tiña jichu jmá kitsjuáre nikꞌuechji Namiña Diuu̱ jma kitsikjién xu̱ta̱. 24Nga kube xu̱ta̱ nga ndibají Kjesuu kju̱ ja xi kjibakuyáre̱ ngaya kui tsutsu, ku ku̱a̱cha kitsú nga mangitsjaiyá. Tsijín tsutsu je ku jaꞌa tiukjá ngunda chincha nga kijí nga̱tjen Kafarnau̱m.
25Ku ngunda ndachakun sakúnire̱ Kjesuu xu̱ta̱, ku tsinengiyáre̱:
—Ji kua Chji̱ne, ꞌmí ni̱tjin jiꞌí kꞌui.
26Ku̱a̱cha kitsúre̱ xu̱ta̱ Kjesuu:
—Kjáinni, jún tjiminchitsjaijnuꞌán nga̱tꞌa ichijnu jánda nga kitsejnu, ku mítsa nga̱tꞌaꞌe nga kukjínjnu najmi tkun xi kuyajnu nga kitsiꞌinꞌan. 27Ngatu kuijí ni̱ñu̱ xi mare̱ fe nindusínjnu yajo̱jnu, tusáni najmi xi chine ku matsére kui xi tsjuaña kju̱a̱mijñachun nguxikaꞌa. Kui najmi chine xi mana tsjuajnuꞌan, Kjindiꞌe xu̱ta̱ nga̱su̱ndeꞌan, ku Namiña Diuu̱ xi Namiꞌna, je ikújnu nga tjínna ngaꞌñu.
28Ku xu̱ta̱ tsinengiyáre̱ Kjesuu:
—Mí najmi xi mejénre Namiña Diuu̱ nga ñaꞌánjni.
29Ku̱a̱cha kitsú Kjesuu:
— Najmi xi mejénre Namiña Diuu̱ nga tisꞌejínjnu nga̱tꞌaꞌna, nga̱tꞌa an xi kitsingiyana.
30Jaskan te̱ tsinengiyáni xu̱ta̱:
—Mí najmi tkun xi niꞌin tuxi manga sꞌejínjni nga̱tꞌari. ¡Titjuéjni ngu chuba̱! 31Xu̱ta̱ changani tsakjien mana̱ nangi kixi. Xukúcha tjitsú xu̱ju̱n Enꞌen Namiña Diuu̱, mana̱ ꞌmí kui ni̱pan xi ndiba ndiu̱jmi.
32Ku̱a̱cha kitsú Kjesuu:
—Kju̱a̱xikjainni, nga Moise̱jí xi kitsjuájnu ni̱pan xi ndiba ndiu̱jmi, nga̱tꞌa Namiña Diuu̱ xi Namiꞌna ku̱a̱cha kitsiꞌin. 33Kui ni̱pan xi tsjuáña kju̱a̱mijñachun, kui xi kitsingiya Namiña Diuu̱ janda ndiu̱jmi.
34Jaskan xu̱ta̱ ku̱i̱cha kitsúre̱ Kjesuu:
—Ndia̱jni, taꞌíjni kui ni̱pan ngieje ni̱tjin.
35Ku̱i̱cha kitsu Kjesuu:
—Ánni kui ni̱pan xi tsjua kju̱a̱mijñachun. Xi sꞌejínre nga̱tꞌaꞌna, ngite ngingují ni̱tjin te kubajóre; ku xi sꞌejínre nga̱tꞌaꞌna, ngingují ni̱tjin te̱ kuxindáre̱. 36Xukúcha texínjnu, jún tuku kjia sꞌejinjínjnu nga̱tꞌaꞌna, nditsa je kuyajnuꞌan. 37Ngieje xu̱ta̱ xi jajín Namiꞌna nga án ꞌbematjengina, tuxa nga kjuangitsjaina; ku nga kju̱a̱ꞌetꞌana, kꞌui ndá basenñajúnna.
38»Kuijíxa jajenꞌan ndiu̱jmi tsa tuxi mejénna tsiꞌinꞌan, tusáni Namiña Diuu̱ xi Namiꞌna tsiꞌinna xki̱, nga̱tꞌa kuí xi kitsingiyana. 39-40Ku xi mejénre Namiꞌna nga ngují xu̱ta̱ ngachaja xi kui jajín ku án ꞌbematjengina. Ku nga je fetꞌa nga̱sunde, ku xu̱ta̱ xi án kisꞌematjengina te fueyanire nditsa je jesun. Nga̱tꞌa xi mejénre Namiꞌna nga ngieje xi bejínna ku sꞌejínre nga̱tꞌaꞌna, nga Kjindiꞌereꞌan, nga sakúre kju̱a̱mijñachun nguxikaꞌa.
41Yakaꞌa xu̱ta̱ judio̱ chꞌo tsichja nga̱tꞌaꞌe Kjesuu, nga̱tꞌa kitsú nga kui xi ni̱pan xi jíndiba ndiu̱jmi. 42Ku̱i̱cha kitsú xu̱ta̱ judio̱: «Amítsa kui xi ꞌmí Kjesuu, tiꞌe̱ Kuse. ¡Ñá xi yajínña ꞌya xi na kju̱ xi nami mare̱! Kúcha mare̱ nga kuatsu nga ndiu̱jmi jajen.»
43Ku̱a̱cha skengi Kjesuu:
«Nga̱tꞌéjnu nga xu̱ta̱ chineyájnu. 44Namiña Diuu̱ xi Namiꞌna kitsingiyana. Kútsa Namiꞌna xi mejínre, ngují xu̱ta̱ ma ꞌbematjengina. Ku nga je fetꞌa nga̱sunde, án xi kua tsiꞌin ñaꞌan nga tsikjaiyánina xu̱ta̱ xi kisꞌematjengina, tuxi nguxikaꞌa nga Namiña Diuu̱ ꞌbenduju. 45Ku̱a̱cha tsú xu̱ju̱n xi kitsindá xu̱ta̱ tsuya Enꞌen Namiña Diuu̱: “Namiña Diuu̱ kuakuyare̱ ngieje xu̱ta̱.” Kui kju̱a̱, ngieje xu̱ta̱ xi tꞌere Namiꞌna, ku tsikitjusun kju̱a̱kitakun xi baku, kui xu̱ta̱ xi án ꞌbematjengina.
46»Xukúcha je kixínjnu, Namiña Diuu̱ xi Namiꞌna kitsingiyana, ku najmí kjaꞌi ngisa xi bé kúcha tjin Namiña Diuu̱, tuma ántsa. 47Kju̱a̱xikjain xi texínjnu, xi sꞌejínre nga̱tꞌaꞌna sakúre kju̱a̱mijñachun nguxikaꞌa.
48»Án xi tsjuaꞌan kju̱a̱mijñachun, nga̱tꞌa án kui ni̱pan xi tsjuáña kju̱a̱mijñachun. 49Xu̱ta̱ changajnu tsakjien mana̱ nangi kixí, ta̱nga ngieje nga jesún. 50-51Xi sꞌejínre nga̱tꞌaꞌna xuku xi ni̱pan xi ndiba ndiu̱jmi tsakjien, ku ngují ni̱tjin bisubaꞌatꞌáre Namiña Diuu̱. Án xi jajenꞌan ndiu̱jmi, ku mana baꞌíre̱ xu̱ta̱ kju̱a̱mijñachun nguxikaꞌa. Án xi ꞌméntjaiꞌan xu̱ta̱ xi sꞌejínre nga̱tꞌaꞌna ku tsjuána kui kju̱a̱mijñachun. Kui kju̱a̱ kuaxínjnu nga yajo̱ꞌna kui ni̱pan xi tsjuá kju̱a̱mijñachun; ku xi kjíne sakúre kju̱a̱mijñachun nguxikaꞌa.»
52Ku xu̱ta̱ judio̱ jutijú xikjin, ku minengiyáre̱ xikjin: «Kúcha mare̱ nga kuatsú kui xta̱ nga yajo̱ꞌe tsikjineña»
53Ku̱a̱cha kitsú Kjesuu:
«Án xi Kjindiꞌere xu̱ta̱ nga̱sunde, kju̱a̱xikjain najmi xi texínjnu, tsanga jún chinejínjnu yajo̱ꞌna ku ꞌyujíjnu jínꞌna, sakujíjnu kju̱a̱mijñachun nguxikaꞌa. 54Xi kjine yajo̱ꞌna ku ꞌbi jínꞌna, sakúre ngu xi kaꞌa kju̱a̱mijñachun. Ku nga je kjuetꞌa nga̱sunde, án te̱ tsikjaiyánina. 55Yajo̱ꞌna xi niñu̱ xi kju̱a̱xikjain, ku jínꞌna xi ndijua xi kju̱a̱xikjain. 56Xi kjine yajo̱ꞌna ku ꞌbi jínꞌna, ku kui xi jña tsuꞌbajona ku kui xi jña tsuꞌbajoꞌan.
57»Xi Namiꞌna, kui xi Diuu̱ xi mare̱ tsjua kju̱a̱mijñachun, kuí xi kitsingiyana ku kitsjuána kju̱a̱mijñachun, nga̱tꞌa tjínre ngaꞌñu nga tsjuá kju̱a̱mijñachun. Kui kju̱a̱, ngieje xi kjine yajo̱ꞌna sakúre kju̱a̱mijñachun nguxikaꞌa. 58Án xi kui ni̱pan xi jajen ndiu̱jmi, ku xi sꞌejínre nga̱tꞌaꞌna sakúre kju̱a̱mijñachun nguxikaꞌa. Ántsa, xukují kui ni̱pan xi skiné xu̱ta̱ changajnu, ku tekui xi jesun nditsa kui ni̱pan skiné.»
59Ngieje kui én ꞌyenijmi Kjesuu niꞌya ni̱ngu̱xi̱ Kafarnau̱m.
Én xi tsjuáña kju̱a̱mijñachun nguxikaꞌa
60Ngieje xu̱ta̱ kjin xi tjimatjengire Kjesuu, tsitꞌe kui én, ku ku̱a̱cha kitsú:
—Kju̱a̱kitakun xi tjibixi tjeꞌñu niꞌin nga nijaꞌo. ꞌYá xi ndsijín kumájnu nga̱tꞌaꞌe kui kju̱a̱kitakun.
61Ta̱nga ku̱a̱cha skengi Kjesuu:
—A chꞌo makjínjnu najmi xi texiꞌan. 62Tsa ku̱a̱cha tsáni, mí xi kuma tsa yajnu án, xi Kjindiꞌe xu̱ta̱ nga̱sunde, nga mijínꞌan nga̱kꞌa ndiu̱jmi, jmá tejñaꞌan ngasꞌei. 63Ngayaꞌa̱senꞌen Namiña Diuu̱ xi tsjua kju̱a̱mijñachun nguxikaꞌa; ngují xu̱ta̱ nga̱sunde mare̱ tsjua kui kju̱a̱mijñachun. Ngayaꞌasenꞌen Namiña Diuu̱ ndiba én xi texínjnu ku kui xi tsjuá kju̱a̱mijñachun. 64Ta̱nga tjin xu̱ta̱ xi tjimajnu xi sꞌejinjínjnu nga̱tꞌaꞌna.
Ku̱a̱cha kitsú Kjesuu nga̱tꞌa janda nga tjutsꞌin, tjijínre ꞌya xi sꞌejinjínre nga̱tꞌaꞌe kui, ku ꞌyá xi kjabe ngatun. 65Tekuácha kitsúre̱ nga ngují xi ꞌbematjengire tsa tsjuají kju̱a̱ Namiña Diuu̱ xi Namiꞌen.
66Janda kui ni̱tjin, xu̱ta̱ xi ku̱a̱cha kisꞌematjengire Kjesuu ꞌyendu basen. 67Ku jaskan Kjesuu tsinengiyare xi tejó ja xi fuekatetsajo Enꞌen Namiña Diuu̱:
—A tekuácha mejénjnu mangijnu jún.
68Ku ku̱a̱cha kiskengi Ximo Pe:
—Ku ꞌyáxi mangitjengijni, Ndia̱ꞌna. Kuitsa énri xi tsjuá kju̱a̱mijñachun nguxikaꞌa. 69Jín, je kisꞌejínjni nga̱tꞌari, ku yájni nga jí xi Kjindiꞌe Namiña Diuu̱ jí.
70Ku̱a̱cha kitsúre̱ Kjesuu kui ja:
—Nga̱tꞌa án jajínjnu xi tejó májnu; ta̱nga ngingu najmi, ngu xi kjitjenjínjnu xi xindajin.
71Juda̱ xi kua tjitsúre Kjesuu tiꞌe̱ Ximo, xi ꞌmí Iskariote̱. Nga̱tꞌa Juda̱, kuí xi ma tejó xu̱ta̱ xi jajín Kjesuu, ku tekuini kjabe ngatun.
Currently Selected:
Jua 6: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
