Jua 2

Bino#2.1 Ndijua xi bitjure, tu̱ tseje. kitsikꞌuya ndijua Kjesuu

1Xi ma ján ni̱tjin Maria, Naꞌen Kjesuu, kijí ngu kju̱a̱xke ngande xi ꞌmí Kana̱, nangi xi chja̱ Ngalilea̱. 2Tekuácha kiꞌmíyare̱ Kjesuu kju̱ ja xi kjibakuyáre̱.

3Ta̱nga jé bino jmá kjima kju̱a̱xke. Ku Maria ku̱i̱cha kitsúre̱ Kjesuu:

—Je ngite̱ najmíre bino xi ꞌyú xu̱ta̱.

4Ku ku̱i̱cha skengi Kjesuu:

—Ji kua Na̱, ñajín kuendáña kui najmi. Nga̱tꞌa kjia fichují ni̱tjin nga xiyaꞌan ꞌyáni án.

5Jaskan Maria ku̱a̱cha kitsúre̱ xu̱ta̱ xi inchatsiꞌin xá: «Tikitjusúnjnu ngieje najmi xi kuitsujnu Kjesuu.» 6Kꞌi̱a̱ tsuba̱ jun tiji yíꞌi xi ma mincha ndijua, kui xi tsichjen xu̱ta̱ judio̱ nga tsiꞌin sꞌui. Uchan litro̱ ndijua kjiya nga ngu ngu tiji. 7Kjesuu ku̱a̱cha kitsúre̱ xu̱ta̱ xi inchatsiꞌin xá: «Tikitséjnu ndijua ngieje kui tiji.»

Ku kitsikitse sunsun ndijua tiji ja xi inchatsiꞌin xá. 8Ku jaskan Kjesuu ku̱a̱cha kitsúre̱ kui ja: «Kjatꞌei, ꞌnatsjéjnu nguxtin ku tangichꞌájnu xi sián te̱tjúnre̱ sꞌui, ku ngakutꞌa.»

Ku ku̱a̱cha kitsiꞌin. 9Ku xta̱ xi sián te̱tjunre̱ sꞌuiꞌe kju̱a̱xke skutꞌa ndijua xi bino kitsikꞌuya Kjesuu, ku tu kua kumáre̱ nga̱tꞌa bejí jmá itju kui bino xi skutꞌa. Ta̱nga bé ja xi inchamincha bino.

Te kui ura̱, xta̱ xi sián te̱tjunre̱ sꞌui tsichjare xke 10ku ku̱a̱cha kitsúre̱: «Tutsjái nga bino xi ndá tjún ꞌbeyáre̱ xu̱ta̱, ku nga je ꞌñu kitsꞌi ku kjia ꞌbeyáre̱ bino xi ndáji. Ta̱nga jí, tusa nga kjuetꞌa tjibaꞌí bino xi ndá.»

11Ku̱i̱cha kumá nga tjún ikú yajo̱ꞌe Kjesuu ngande jmá ꞌmí Kana̱ kꞌi̱a̱ nangi Ngalilea̱. Ku̱a̱cha tsaꞌangire nga ikú ngieje ngaꞌñu xi tjínre, ku ja xi kjibakuyare kisꞌejínre nga̱tꞌaꞌe.

12Nga je kumá kui najmi, Kjesuu jña kijí kju̱ naꞌen, ja tsꞌe̱, kju̱ ja xi kjibakuyáre̱ na̱xi̱nanda Kafarnau̱m, ku kꞌi̱a̱ kisꞌendu chu̱ba̱ ni̱tjin.

Kúcha kumá nga kijí niꞌya ni̱ngu̱xi̱ Kjesuu

(Mt 21.12-13; Mr 11.15-18; Lk 19.45-46)

13Nga̱tꞌa je Kjimatiñare sꞌuiꞌe xu̱ta̱ judio̱ xi ꞌmí Paskua̱, ku kijí Kjesuu na̱xi̱nanda Jerusalen. 14Ku kꞌi̱a̱ ni̱ngu̱xi̱, sakúre yakaꞌa xu̱ta̱ xi inchabate̱ña yunda̱, chu̱tsanga̱ ku tuju; ku kjaꞌi xi tsuba̱tꞌá yamexaꞌe̱, xi inchabasénkjajo tón nangi ngunda ku tón judio̱ inchatsjuá. 15Ku nga kube kui najmi, kjín naꞌñu skabe Kjesuu, ku ngu naꞌñu xi je kitsindá, ku tsangatje̱ngire̱ ngieje xu̱ta̱ xi tsuba̱ niꞌya ni̱ngu̱xi̱, tjiujún chu̱tsa̱nga̱ kju̱ yunda̱. Ku tekuácha ite̱tsajo tꞌanangi kicha tónꞌen xu̱ta̱ xi inchabasenkajó tón, ku kitsikitjiaꞌmé yámexa. 16Ku xi inchabate̱ña tuju kitsúre̱: «ꞌNatsjéjnu ngieje kui najmi. Niꞌyaꞌe Namiña Diuu̱, xi Namiꞌna, nga̱tꞌa ngande ndetsinjin kumá!»

17Ku nga kube kui najmi, ja xi kjibakuyáre̱ Kjesuu jitsjénre kúcha tjichja Xu̱ju̱n Enꞌen Namiña Diuu̱: «Kui kju̱a̱nitjo xi tjínna nga̱tꞌaꞌe niꞌya ni̱ngu̱xi̱ri janda xi chini maꞌan nga mejénna kunna.»

18Ku jaskan, xta̱xá tetjunꞌen xu̱ta̱ judio̱ tsinengiyáre̱ Kjesuu:

—Mí ngaꞌñu xi tjínri nga kui najmi tjiniꞌin.

19Ku̱a̱cha kitsú nga skengi Kjesuu:

—Tikixundújnu kui niꞌya ni̱ngu̱xi̱, ku jántsa ni̱tjin beꞌéna nga tsindaꞌan kjaꞌi.

20Ku ku̱a̱cha skengi jáxá judio̱:

—Yachanjon nu kutsére nga kundá kui ni̱ngu̱xi̱, ku jí a jántsa ni̱tjin mandari.

21Ta̱nga yajo̱ꞌe xi tjitsúre Kjesuu nga ku̱a̱cha tichja̱. 22Kui kju̱a̱, nga jiyanire Kjesuu, jitsjénre ja xi ikuyáre̱ nga ku̱a̱cha kitsú. Ku kisꞌejínre najmi xi tjichja̱ Xu̱ju̱n Enꞌen Namiña Diuu̱ kju̱ én xi kitsuya Kjesuu.

Kjesuu kube kúchakun xu̱ta̱ nga sꞌejinjínre

23Ku nga tsuꞌbama Kjesuu na̱xi̱nanda Jerusalen, ni̱tjinꞌen sꞌui Paskua̱, kjín xu̱ta̱ kisꞌejínre nga̱tꞌaꞌe Kjesuu nga̱tꞌa kube ngieje najmi xi majín kúcha ñaꞌan bixuyá. 24-25Ta̱nga ꞌbengujíre̱ yajo̱ꞌe Kjesuu nga̱tꞌaꞌe kui ja, ku machjenjínre̱ tsa ꞌmiyare nga̱tꞌaꞌe ngu xu̱ta̱, nga̱tꞌa bé ngieje najmi xi inchatsikjo.

Currently Selected:

Jua 2: MZI

Highlight

Copy