Jua 19

1Manda kitsiꞌín Pilato nga fáre̱ Kjesuu. 2Jaskan, ngu korona naꞌya kitsindá jón romano ku tku̱ Kjesuu ꞌyeꞌa. Tekuácha ngu najñu ndiu xi aní chjindi kitsikajá 3ku, ja jun kijikun tiña Kjesuu, ku ku̱i̱cha kitsúre̱: «¡Kꞌui kitjián xitetjunꞌen xu̱ta̱ judio̱!» Ku incha ꞌmujin Kjesuu.

4Te itjuni Pilato, ku ku̱i̱cha kitsúre̱ xu̱ta̱: «¡Nuꞌyájnu! Kitsiꞌinꞌan manda nga te ndibajóni Kjesuu. Sꞌejinjínna tsa jee xi xaba tjínre.»

5Nga kiꞌnatsje Kjesuu, korona naꞌyá tjitjai tku̱ ku ngu najñu ndiu aní chjindi yaja. Ku̱i̱cha kitsú Pilato:

—¡Kꞌui kisián kui xta̱!

6Nga kube Kjesuu jaxá tetjunꞌen chanaꞌmi kju̱ ja jun xi kunda ni̱ngu̱xi̱, skindaya ngieje:

—¡Kalabo̱ tjatꞌajojnu Kru! ¡Kalabo tjatꞌajojnu Kru!

Pilato ku̱i̱cha kitsúre̱ xu̱ta̱:

—Sꞌejinjínna tsa kju̱a̱xikjain nga tjínre jee. Tangijújnu ku jún tjatꞌájnu kru.

7Ku̱i̱cha kitsú xu̱ta̱:

—Xukúcha tichja xu̱ju̱n kju̱a̱kixiña, kju̱a̱ꞌñutjínre nga ꞌmé kui xta̱ nga̱tꞌa tjitsu nga kjindiꞌe Namiña Diuu̱.

8Nga tsitꞌe Pilato kui én, tusáma ꞌñu kitsakjun. 9Te̱ tsasꞌenni niꞌya ndabaxaꞌe, tsichjare Kjesuu ku tsinengiyáre̱:

—Jmá nganderi.

Ta̱nga ngují én tsichja Kjesuu. 10Jaskan Pilato ku̱i̱cha kitsúre̱:

—A mejínri nukju̱a̱jína. A yijí nga án tjínna ngaꞌñu nga tsixánra, kutsa kru̱ fatꞌari nga nikꞌenri.

11Ku̱i̱cha skengi Kjesuu:

—Nguji ngaꞌñu tjínri tsa an kúcha ꞌniji̱nna, tsa Namiña Diuu̱ jí xi kitsjuari kui ngaꞌñu. ꞌÑu tjínre jee xta̱ xi kitsikasꞌenna tukꞌuajíre nga jí.

12Ku janda kui chu̱ba̱, Pilato tsangitsjaire kúcha tsixan Kjesuu, ta̱nga tusa ndá skindayá xu̱ta̱:

—¡Tsa nixain kui xta̱, ndáji kichꞌei xtaxá tetjun xi chja̱ Roma̱! ¡Xu̱ta̱ xi mejénre nga xta̱xá tejún ꞌbatsjé yajo̱ꞌe, mejínre̱ xta̱xá tetjún xi chja̱ Roma̱!

13Nga tsitꞌe kui én, Pilato kitsiꞌin manda nga ꞌnatsje Kjesuu ngaya ndabaxaꞌe. Ku kisꞌejñaya yáxile jma ꞌbendajin kju̱a̱, ngu ngande xi ꞌmí Ngabatá, xi nga én ebreo̱ mejénre tsu Ngande xi kjiya Ndia̱jo. 14Ngi ngútse ni̱tjin chajare nga bitju sꞌui Paskua̱, ku je kjuane tejó nga nchisen. Jaskan Pilato ku̱i̱cha kitsúre̱ xu̱ta̱ judio̱:

—¡Kꞌui kitjián xta̱xá tetjúnjnu!

15Ta̱nga skindaya ngieje xu̱ta̱:

—¡Kalabo tjatꞌajójnu Kru! ¡Kalabo tjatꞌajójnu Kru!

Pilato tsinengiyáre̱ xu̱ta̱:

—A kju̱a̱xikjain nga mejénjnu nga tsikꞌenꞌan xta̱xá tetjúnjnu.

Ku ku̱i̱cha kitsú jaxá xi inchatetjúnre̱ ni̱ngu̱xi̱:

—¡Xuku nga jín najmíni kjaꞌi xta̱xá tetjún, tujma xta̱xá tetjún xi chja̱ Roma̱!

16Jaskan Pilato kitsikasꞌenre̱ Kjesuu tuxi kru ngatsikꞌentꞌa, ku kui xu̱ta̱ kiju̱ ꞌñu Kjesuu.

Kjesuu kalabo kikjatꞌaju kru

(Mt 27.32-44; Mr 15.21-32; Lk 23.26-43)

17Ku tekuini Kjesuu tsakꞌa kruꞌe̱ nga itju, ku ngande xi ꞌmí Ngolngota kijí, xi mejénre tsu nga én ebreo̱ «Ngande Ninda tku̱ mikꞌen». 18Kꞌi̱a̱ kalabo kikjatꞌajo kru Kjesuu. Tekuácha kru̱ kikꞌendutꞌa ngi jó ja, ngu ngatje̱n ngaskun ku ngu ngatje̱n ngandáꞌe̱ Kjesuu.

19-20Pilato kitsiꞌín manda nga nindá letra jma tjitsuya mí xá kinikꞌen Kjesuu. Jan tkuya én kunda kui letra ngasun yate: ebreo̱, latin ku ngriego̱; ku ku̱i̱cha tsu: «Kjesuu Nasare, Xta̱xá tetjunꞌe̱n xu̱ta̱ judio̱». Kru̱ kikjatꞌa kui yate, ngatje̱n ngatsja tku̱ Kjesuu kisꞌetꞌa.

Nga̱tꞌa tiñare na̱xi̱nanda ngande jma kisꞌetꞌa kru̱ Kjesuu, kjín xu̱ta̱ judio̱ kitsiꞌinya én xi kjitꞌa kru̱. 21Kui kju̱a̱ jaxá tetjunꞌen chanaꞌmi ku̱i̱cha kitsúre̱ Pilato:

—Tu̱: “Xta̱xá tetjunꞌe̱n judio̱” fatꞌai. “Ku̱i̱cha kitsú kui xta̱ nga kui xi Xta̱xá tetjunꞌe̱n xu̱ta̱ judio̱”, tjatꞌai.

22Ku ku̱i̱cha kitsúre̱ Pilato:

—Én xi je kiskiꞌan je ku̱a̱cha sꞌe.

23Nga je kikjatꞌa kru̱ Kjesuu nga kitsiꞌin ja jun xi chja̱ Roma̱, skabe najñuꞌen Kjesuu ku ñujún itsjé nga tsatenga, ku ngu ngu skabe jajun. Tekuácha skabe tiangaꞌe Kjesuu, ta̱nga ngútse nga kuchjine̱ najñu mítsa tjitkoya nga kunda, 24ku ndsijin kumá nga skendiyají ku kitsiton ndsiji̱n ꞌyára xi mejénre. Ku̱a̱cha itjusun én xi tjitsuya Xu̱ju̱n Enꞌen Namiña Diuu̱:

«Ku kitsiton ndsiji̱n,

tuxi bé ꞌyá xi tsiꞌin tiangaꞌna̱.»

25Ku kꞌi̱a̱ tꞌa kru̱ kitjian Maria naꞌen Kjesuu, Maria chjuꞌen Kleofa̱ kju̱ nchukjuanꞌe̱n Kjesuu, kju̱ Maria Lena. 26Nga kube naꞌen Kjesuu nga siantꞌare xta̱ xi ikuyáre xi tjo kumáre, ku ku̱i̱cha kitsúre̱: «Na, kꞌi̱a̱ sianjonri kjindiri.» 27Jaskan ku̱a̱cha kitsúre̱ xta̱ xi ikuyáre: «Kꞌi̱a̱ kitjian nári.» Ku kuima chu̱ba, xta̱ xi ikuyáre Kjesuu kiju Maria niꞌyaꞌe̱.

Nga kꞌen Kjesuu

(Mt 27.45-56; Mr 15.33-41; Lk 23.44-49)

28Je tjijínre Kjesuu nga je itjusunre ngieje najmi xi kitsúre̱ Namiña Diuu̱. Kui kju̱a̱, tuxi bitjusún xi tichja Xu̱ju̱n Enꞌen Namiña Diuu̱, ku̱i̱cha kitsú: «Xindana».

29Kꞌi̱a̱ kitjián ngu tiji xi tikjitse xan. Jaskan kitsikꞌanchi tsa̱nga̱ ngajin xan, ku ya yetꞌaꞌñu tꞌa, ku tsꞌua Kjesuu kitsingitꞌare. 30Ku Kjesuu skutꞌa xan ku ku̱i̱cha kitsú: «Je itjusun ngieje». Jaskan, yejen tku̱ ku kꞌen.

Nga kikasénre kicha ndanisinꞌen Kjesuu

31Ni̱tjin biejne ma, ku xima nga nchajún sꞌuiꞌe Paskua̱ bitju. Ku xu̱ta̱ xá tetjunꞌen ja judio̱ mejínre nga xubato sꞌendutꞌa kru ja xi ján xiꞌin, nga̱tꞌa ni̱tjin xubato ꞌñu kja ngisa. Kui kju̱a̱ ku̱a̱cha kichjinengire Pilato nga chjotꞌore ndsaku ngiajan kui ja. Tuxi kitsa fesun ngisa ku xati chjubaꞌa yajo̱ꞌe.

32Ku kijí ja jun, ku sketꞌore ndsaku ngiajó ja xi tijña jña kisꞌendutꞌa kru̱ Kjesuu. 33Nga jichutꞌare Kjesuu, kube nga je kꞌen. Kui kju̱a̱ kichjotꞌojíre ndsaku.

34Ta̱nga ngingu najmi, ngu xu̱ta̱ jun isénre kicha yajoxkun tꞌa ndanisinꞌen Kjesuu, ku tekuini ura itjure jín ku ndijua.

35-37Itjusun ngieje kui najmi xi tjichja Xu̱ju̱n Enꞌen Namiña Diuu̱: «Nga ngují nindaꞌe chjotꞌo». Ku kjaꞌi tjitꞌaꞌe Xu̱ju̱n Enꞌen Namiña Diuu̱ xi tjitsú: «Kꞌi̱a̱ chaséjnu kui xi kicha yajoxkun kinikꞌatiukja yajo̱ꞌe».

Kui xi ku̱a̱cha tjitsú, tekuácha kube najmi xi kumá, ku bé nga kju̱a̱xikjain ngieje kui najmi. Kui xi tjichja, tekuácha kube najmi xi kuma, ku be ngieje nga kju̱a̱xikjain.

Nga fañajín Kjesuu ngasuntsju

38Jaskan nga je kuma kui najmi Kuse, xi ndiba na̱xi̱nanda Arimatea̱, tsinengire kju̱a̱ Pilato nga fuejo yajo̱ꞌe Kjesuu. Kuse xu̱ta̱ xi tsuꞌbá tjengire Kjesuu, ta̱nga ngují xu̱ta̱ xi kitsuyáre nga̱tꞌa tsakjunre xta̱xá tetjunꞌe̱n judio̱. Ku Pilato kitsjuare kju̱a̱, ku Kuse kiju yajo kꞌenꞌe̱n Kjesuu.

39Tekuácha Nikodemo̱, kui xi ngu ndiya kikase jñure Kjesuu nga tsichjajo, jichuju ngu xi kate kilo̱ ndijua sijén jmá kitjián Kuse. 40Ngiajó kui ja tsakꞌa yajo̱ꞌe Kjesuu, ku kitsikjatjijun najñu xi ꞌñu chjí. Jaskan ndijua sijen kitsikꞌanchi najñu xi yaꞌa Nikodemo̱. Ku̱a̱cha ngare xu̱ta̱ judio̱ nga bañajín mikꞌenꞌe̱n.

41Ngande jma kꞌen Kjesuu kitjián ngu ngandeꞌe naxu jma kjitjiandá ngu tixa ndia̱jo tja̱tse̱. Kje ngují xi tsichjen kui tixa ndia̱jo. 42Nga̱tꞌa je makaꞌangire̱ ni̱tjin xubato, ni̱tjinꞌen nga tsikjaya kju̱a̱ꞌñu xu̱ta̱ judio̱, kꞌi̱a̱ kui tixa ndia̱jo kikjaya yajokꞌenꞌe̱n Kjesuu, nga̱tꞌa kui xi tiña.

Currently Selected:

Jua 19: MZI

Highlight

Copy