Santia 5

Najmi xi kumataꞌin xu̱ta̱ xi tjínre tón

1Nuꞌyájnu kjatꞌei jun xi tjínjnu tón: chikjindájnu ku chikjindiájnu nga̱tꞌa je xati ndiba nga on kjueyájnu. 2Kjuindú ngieje najmi chji xi tjinjnu, ku xabi kjuere najñújnu. 3Jaꞌon tsikjie tón xi tjichja̱tkújnu ngieje kui ni̱tjin, ku kui jaꞌon xi kuitsuyataꞌínjnu nga tsitsje kjuetꞌa Namiña Diuu̱ kui nga̱sunde, ku kui xi tsichajajnu xukúcha tsikje najmi ndiꞌi.

4Jun, kje ꞌbechjijíjnu musujnu, ku Ndia̱ña xi tjíngatsja ngaꞌñu je tsitꞌe nga inchachja̱tjai yajo̱ꞌe xu̱ta̱. Kui tón xi tjiꞌbechjijíjnu, tekuácha kuatejetaꞌínjnu ngixku̱n Namiña Diuu̱.

5Jun xi tjínjnu tón je tuxi ndá kinitsjuájnu najmi xi chji, ku tuxi ndá tjiꞌnatsjengíjnu anima̱jnu ngasun kui nangi. Je ndá itjuyájnu xuku chi̱nga̱ xi je ndákun nga nikjesún. 6Jee ni̱tje̱n kikatejnu ku kinikjesúnjnu xu̱ta̱ xi tsjé, xi najmíre kúcha tsiꞌin tsꞌatsjengí yajo̱ꞌe.

Nga baꞌíre̱ ngaꞌñu ku kju̱a̱chꞌan anima̱ña

7-8Ta̱nga jun, tsꞌeña kju̱ ndichja̱ña, titsjejnu anima̱jnu ku ngatu niskajíjnu yajo̱jnu, nga̱tꞌa je xati ndiba Kristo̱ xi Ndia̱ña. Ku̱a̱cha tiaꞌánjnu xuku xu̱ta̱ xi tsixá nga̱jnu, xi tsitse anima̱ꞌen nga kuyáre tsi, ku tekuácha kuyáre nga ndá namitje xi tsjuáre nangi. 9Ngatu̱ chꞌoji nukju̱a̱yájnu xingijún, tuxi tsijejíjnu Namiña Diuu̱, nga̱tꞌa kui xi nai, ku jee xati faꞌi.

10-11Ku̱a̱cha tiaꞌánjnu xukúcha kitsiꞌin xu̱ta̱ xi itetsajo tetjun Enꞌen Namiña Diuu̱. ꞌÑu masénña kui xu̱ta̱ nga̱tꞌa ꞌñu yeꞌé kakun ku kitsichukju̱a̱ kju̱a̱ꞌon kju̱a̱nde xi jeyáre̱. Fuetsjénrajnu Joo̱b, kúcha kitsiꞌñu kakun ku jichukju̱a̱re kju̱a̱ꞌon kju̱a̱nde xi jaꞌa, ku nga jetꞌa tuxi ndá kitsitjo Namiña Diuu̱. Nga̱tꞌa ndá anima̱ꞌen Namiña Diuu̱ ku tsitjó xu̱ta̱ xi tsé kju̱a̱ni̱ma̱ inchafaꞌa.

Kjaꞌi tku̱ya kju̱a̱texuma

12Ta̱nga ngieje kui najmi, tsꞌeña kju̱ ndichja̱ña, ngatu kju̱a̱ndesují bixujnu najmi xi tjin ngakꞌa ndiu̱jmi kju̱ najmi xi tjin kui nangi, ngují najmi xi ma ꞌbesunjnu ngisa. Ndá tikitjusúnjnu énjnu. Nga «jun» bixujnu ja «jun» ku nga «junjín» ja «junjín». Nga̱tꞌa tsajmí tsijéjnu Namiña Diuu̱ tsa bitjusunjínjnu énjnu.

13Tsa tjin xi jun ngi sindure, ngatichja̱tꞌare Namiña Diuu̱. Tsa tsjua sindúre, ngasere ku ngatsitsjuajo Namiña Diuu̱. 14Tsa tjin xi ndáji sindure, ngatichja̱tꞌáre ja xi inchatetjúnre̱ ni̱ngu̱xi̱, ku kui ngatichja̱tjái; kui xi kꞌu̱e̱jun xine ku kuinengire Namiña Diuu̱ nga ngatsindaya. 15Tsa tjíngújnu nga nukju̱a̱tꞌajnu Namiña Diuu̱, tsiꞌinjnu xki̱ ku tsindaya xi ndáji sindure, kútsa tjin jee xi kitsiꞌin tekuácha tsichatꞌáre.

16Kui kju̱a̱, te̱ ndsijin xingijúnni tꞌinyájnu jee xi tjínjnu ku nukju̱a̱tjáijnu xingijún, tuxi ma tsindayájnu Namiña Diuu̱. Tjínre ngaꞌñu nga chja̱tꞌáre Namiña Diuu̱ ngu xu̱ta̱ xi ndá anima̱ꞌen, ku tꞌeꞌénre Namiña Diuu̱. 17Xuku xu̱ta̱ xi kitsuya én xi kitsjuáre Namiña Diuu̱ xi ꞌmí Elía̱, xi tekuácha xu̱ta̱ xuku ñá, ta̱nga ngieje kakún nga tsinengíre̱ Namiña Diuu̱ nga ngataꞌají tsi, ku jan nú basen ngují tsi tsaꞌá ngasun nangi. 18Jaskan te̱ tsichja̱tꞌánire Namiña Diuu̱, ku te̱ tsaꞌáni tsi ku ndá kumá najmitje̱ ngasún nangi.

19Tsꞌeña ku ndichja̱ña xi ndsijin sꞌejínña Kristo̱, tsa tjin xi ngite̱ sꞌejinjínre xi kju̱a̱xikjain xi je kisꞌejinmáre̱, ku kjaꞌi xi tsiꞌin nga te̱ sꞌejínnire̱, 20mejénna nga yájnu: xi ma xi tsiꞌin nga ngu xu̱ta̱ kite̱ mangijíre̱ jee yajo̱ꞌe, je kite̱ ꞌméjín ku sakure kju̱a̱ndá nga tsichatꞌáre Namiña Diuu̱ ngieje jee xi tjínre.

Currently Selected:

Santia 5: MZI

Highlight

Copy