Santia 4
4
Jmá ndiba kju̱a̱ti kju̱ kju̱a̱bixkan
1A yájnu jmá ndiba kju̱a̱ti ku kju̱a̱bixkan xi tjinjnu. Nga̱tꞌa majínjnu nitꞌe kju̱a̱kitakunjnu kju̱ kju̱a̱xaba xi tjínre anima̱jnu. 2Tjeꞌñu kju̱a̱ꞌontakún xi tjinjnu, tu̱ júntse mejénjnu nga sakujnu ngieje tku̱ya najmi xi tjin nga̱sunde, ku nga sakujíjnu najmi xi mejénjnu, bixkánjnu, nikjiesúnjnu xingijún, ku kju̱a̱bixkan ꞌnatséjnu. Ta̱nga tekuini sakujíjnu najmi xi mejénjnu.
Jun najmíjnu, nga̱tꞌa chjinengitꞌajíjnu Namiña Diuu̱. 3Ku nga chjinengíjnu, majínjnu chjinengi, nga̱tꞌa tu najmi xi mejéntsejnu nga bitjusún kju̱a̱xaba xi tjinikjojnu. 4Jun, mejínjnu Namiña Diuu̱, ku nuꞌyaꞌenjínjnu. A yajíjnu, xu̱ta̱ xi kju̱a̱tsjuaꞌe nga̱sunde kjabe mejínre Namiña Diuu̱. Ku̱a̱cha tjin najmi, tsa jún tsjuájnu kju̱a̱xabaꞌe nga̱sunde Namiña Diuu̱ tjichꞌanachajújnu. 5A sꞌejinjínjnu, xukúcha tjichja Xu̱ju̱n Enꞌen Namiña Diuu̱, «ꞌÑu tsé nga mejénre ñá Namiña Diuu̱» 6Xi kju̱a̱xikjain, ꞌñu titsitjoña Namiña Diuu̱, xukúcha tjichja Xu̱ju̱n Enꞌen:
«Chꞌore Namiña Diuu̱ xu̱ta̱ xi kꞌakakun,
ta̱nga baseju̱n xi senjín mare̱ yajo̱ꞌe.»
7Kui kju̱a̱, nuꞌyaꞌénjnu Namiña Diuu̱. Tichꞌojnu xindajin ku kjiebaꞌa subá yajo̱ꞌe. 8Ndá chꞌa̱jnu Namiña Diuu̱, ku tekuácha ndá ku̱a̱ꞌajnu.
Jun kua xu̱ta̱ jee, ngite ñaꞌanjínjnu najmi xi ndáji tjin. Xi mejénre nga ndiyáꞌe Namiña Diuu̱ kjabe, ta̱nga tuku mejénre nga jee mangire yajo̱ꞌe, tsubáre nga ngútse tsiꞌin kju̱a̱kitakunꞌen: A Namiña Diuu̱, a xu najmi jee xi tjin nga̱sunde kjabe. 9ꞌÑu ngi ngatumájnu ku chikjíndaꞌonjnu. Tjentꞌuájnu nga tjimijnújnu ku tusá chikjindájnu, tuxi ngatubé Namiña Diuu̱ nga je kukjínjnu ku je kikasenkajo anima̱jnu. 10Tu xu̱ta̱ kꞌakakunjín ꞌnatsjéjnu yajo̱jnu ngakjain Namiña Diuu̱, ku tsé kju̱a̱ndá tsju̱a̱jnu.
Majin xu̱ta̱ nukju̱a̱taꞌin
11Tsꞌeña ku ndichjaña, ngatu chꞌojí bixujnu xu̱ta̱. Nga̱tꞌa xi chꞌo chja̱ ku xikjin chjaya, xuku xi kju̱a̱kixiꞌetse Namiña Diuu̱ kjimangiyare. Najmi xi tsubáre ñaꞌánjnu nga nikitjusúnjnu kju̱a̱kixiꞌe Namiña Diuu̱, mítsa chꞌo nukju̱a̱yájnu. 12Tu Namiña Diuu̱tse xi nai. Kuixi kitsjuáña kju̱a̱kixi, ku kuixi kuitsu tsa tjinña jee kútsa tsjéña. Kui kju̱a̱, najmíña kju̱a̱kixi nga nukju̱a̱taꞌínña xu̱ta̱.
Xu̱ta̱ kꞌakakunjín ꞌnatsjéjnu yajo̱jnu.
13Tasenñajúnjnu jún, xi kuacha nukju̱a̱jnu: «Kjatꞌe̱i̱ ku̱tsa nchajun mangiña na̱xi̱nanda ꞌñu; kꞌi̱a̱ mijñájña ngu nu, ndá xá xi faiñaꞌánña ku ndá fanikejénña tón.» 14Kúcha nga kuacha nukju̱a̱jnu, janda yajíjnu najmi xi kumataꞌínjnu nchajun. Xukútse xuñu nitjinjnu: ngutjútse bitju ku chajayáni. 15Ngisa ndátjin, tsa ku̱i̱cha nukju̱a̱jnu: «Tsa Namiña Diuu̱ xi mejénre, tjimaña ku ñaꞌánña najmi atsa xikꞌui kútsa xikjuan.» 16Ta̱nga jun tuxi tsjuájnu nga kꞌa nukju̱a̱jnu, xuku xi tsajun ni̱tjin xi sꞌei ndiba, ku tuxi ndáji tjin kui én. 17Tsa májnu ñaꞌan najmi xi ndá ku ñaꞌajínjnu, jee tjiminchijnu yajo̱jnu.
Currently Selected:
Santia 4: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
