Santia 1

Kunda xi kitsingiya Santia

1Án xi ꞌmína Santia, xi tetsiꞌinꞌan xki̱ Namiña Diuu̱ kju̱ Ndia̱ña Kjesukristo, kꞌui tetsingiyána kunda ngieje xu̱ta̱ nga̱sunde xi tekuácha sꞌejínre nga̱tꞌaꞌe.

Kju̱a̱nisꞌejin nga̱tꞌaꞌe Namiña Diuu̱

2Jun kua tsꞌeña ndichjaña, tsjua ngasꞌendure anima̱jnu nga ngieje tku̱ya najmi xi niꞌin tjin bitjajnu. 3Kjia nga chutꞌakakúnjnu tsa kjain nga sꞌejínjnu nga̱tꞌaꞌe Namiña Diuu̱, kjia nga kumájnu ku sakúre ngaꞌñu anima̱jnu nga nichukjuájnu ngu najmi xi niꞌin tjin. 4Kui nga tichukjuajnu kju̱a̱chutꞌakakún janda nga fetꞌa, tuxi xu̱ta̱ ndá xu̱ta̱ ngatꞌuyájnu, ku ngatumájnu nikitjusun najmi xi tjiꞌmíjnu.

5Tsa tjin xi najmíjnu kju̱a̱kitakun, chjinengitꞌa̱jnu Namiña Diuu̱. Kui xi mare̱ tse tsjuáre ngieje xu̱ta̱, ku mitsa tjún én xi chꞌo tsú tjitsikjaꞌakja. 6Ta̱nga tsubáre̱ nga tjingujnu, nga kjáin nga tsjuajnu, nga chjinengitꞌajnu kju̱a̱chji̱neꞌen Namiña Diuu̱. Nga̱tꞌa xi jó xi ján sindúre xukútsa tjionꞌen ndachakun, xi fuejo̱ kꞌui ku fuejo̱ ján tjo̱. 7-8Xu̱ta̱ xi majin nisꞌejin nga̱tꞌaꞌe ku najmíre ngaꞌñu anima̱ꞌen nga tsiꞌin ngu najmi xi ndátjin, ngují kju̱a̱ndá sakúre nga̱tꞌaꞌe Ndia̱ña.

Xu̱ta̱ xi tjínre tón ku xi ni̱ma̱ tjima

9Tsa tjenjin ngu xi ni̱ma̱ tsuꞌba xu̱ta̱ xi jña tjimajnu, kꞌajin ngatjabixi, nga̱tꞌa kui xi ꞌñu chjiꞌe ngakjáin Namiña Diuu̱. 10Kutsa tjenjin ngu xi tjínre tón tsjua nga̱tꞌaꞌe anima̱ꞌen ni̱tjin nga tsikjaꞌa kju̱a̱sabá Namiña Diuu̱, nga̱tꞌa ngutjútse fe xi ꞌmí tón; xukútse naxu xi baja ngijña. 11Nga ꞌñu sué ma xí xka̱; ku kjia xiꞌñu naxuꞌe ku kju̱a̱chajá xi tsjuakúnre̱. Tekuácha mataꞌin xi tjínre tón: matsejíre kui ku te̱ matsejíre najmi xi chji tjínre.

Kju̱a̱chutꞌakakún xi bitjajínña

12Xu̱ta̱ xi chukjuare najmi xi niꞌin tjin, tsichakunné Namiña Diuu̱ ku, nga kuma xi kitsiꞌínre kju̱a̱niꞌin ꞌñu tsé kju̱a̱ndá xi tsjuáre: nga fabixi nguxikaꞌa ndatsa je kꞌen kꞌui nga̱sunde, nga̱tꞌa kuacha tsu én xi kitsjuáre xu̱ta̱ xi ngieje anima̱ꞌen nga tsitjo.

13Tsa tjin xi kutꞌakakúnjnu ku najmi xi ndáji tjin mejénre nga ñaꞌánjnu, ngatu Namiña Diuu̱ jí batéjnu, nga̱tꞌa kuí sa najmí xi ma kutꞌakakun ku te̱ xu̱ta̱jí tjikutꞌakakun, ku ngují xi tjitsúre̱: najmi xi xaba tiaꞌánjnu. 14Nga matsjuaña ngu najmi xi ndáji tjin, tekuini kju̱a̱kitakúnña xi kjienña ku tsiꞌinña. 15Jee mangiña kju̱a̱kitakun xi xaba; ku tsa tu kju̱a̱xabátse tjimáña, kjabeyá nguxikaꞌa̱ tjikuyáña.

16Jun kua tsꞌeña ndichjaña xi tjona jun, nga tu ndsenjín ꞌnatséjnu yajo̱jnu ku te̱ chꞌanachajujíjnu yajo̱jnu. 17Najmí ni̱tjin nga basenkajó yajo̱ꞌe Namiña Diuu̱. Namiña Diuu̱ xi kitsindá ngieje niñú xi tjin ndiu̱jmi, ku kui xi tsjuáña ngieje najmi xi ndá, xi cha̱n kundá. 18Ku kui xi ku̱a̱cha kumejénre̱ nga kjindiꞌe kitsiꞌínña. Kui kju̱a̱ nga én tjatse xi itetsajo, jiꞌijúña ngu én xi ꞌbatsjengiña, kitsjuáña ngu kju̱a̱mijñachun tjatse.

Nikitjusun en xi yaja Namiña Diuu̱

19Jun kua tsꞌeña ndichjaña, xi tjona jun, tiaꞌánjnu xki̱ én xi mejénna xinjnu: ngiejeña nga tsubáre̱ nga nuꞌyaña xingi̱ña, tanga tsubajíre̱ tsa nitiña ku̱tsa ꞌñu tsé nga nukjuaña. 20Nga̱tꞌa xu̱ta̱ xi niꞌyú majínre̱ nikitjusun najmi xi mejénre Namiña Diuu̱. 21Kui kju̱a̱, nga̱tꞌéjnu najmi xi ndáji tjin, nga̱tꞌa je ꞌñu tsé kju̱a̱xaba tjin kui nga̱sunde. Nga̱tꞌa nga kju̱a̱xaba ñaꞌan xukútse xi najñu ndi kichajaña nga tjimaña. Tusáni xu̱ta̱ nima̱kju̱a̱ ꞌnatséjnu yajo̱jnu ku cha̱n chjabejnu én xi je kitsjuájnu Namiña Diuu̱. Kui én xi tjínre ngaꞌñu nga ꞌbatsjengijnu.

22-24¡Tikitjusúnjnu ku tiaꞌánjnu xki̱ Enꞌen Namiña Diuu̱! Tsa nuꞌyájnu, ku nikitjusunjínjnu, jun subá tjichꞌanachajújnu yajo̱jnu ku ku̱a̱cha kumajnu xuku xi baseya chu̱tsin: nga bisubaꞌatꞌájnu, chayánijnu kúcha kúnjnu. 25Tanga tsa jun xi ñaꞌánjnu xki̱ Enꞌen Namiña Diuu̱, ku tutjsai nga nikitjusúnjnu, tsjua kꞌuere anima̱jnu nga ngieje tku̱ya najmi xi tjiñaꞌánjnu. Nga̱tꞌa cha̱n ꞌyenda Enꞌen Namiña Diuu̱ ku kui xi kjebaꞌájnu ngieje tku̱ya jee.

26Tsa tjin xi xu̱ta̱ tsjé be yajo̱ꞌe ku kunjínre én xi chja̱, kjiꞌbanachaju subá yajo̱ꞌe ku tsamí xi chjiꞌére tsa tsu nga ndiyaꞌe Namiña Diuu̱ tsuꞌba. 27Nga sꞌejínña Namiña Diuu̱ xi Nami, kju̱a̱tsjua tjibaꞌíña ku najmi xi ndá tsubáre ñaꞌánña, minchaju yachjin xi je jesún xiꞌinꞌen, kjindixꞌan xi on inchafeyare̱, ku tsubajíre̱ nga baꞌíña ngande nga tsiꞌinña kju̱a̱xaba xi tjin nga̱sunde.

Currently Selected:

Santia 1: MZI

Highlight

Copy