Genesis 7
7
1Ja'yuj ja Dyosi, ti yal yab' ja Noeji:
—B'a spetsanil ja kristyano ja k'ak'u jumasa iti, kechan we'n toj aya wax kila, ja'yuj, ochanik ja b'a barco sok spetsanil ja swinkil wa naji, —xchi ja Dyosi. 2-3B'a spetsanil ja chante jumasa sok ja yal chan jumasa wax jujpi b'a lek wax ki'aj b'a jmajtani, a ochuke a mok juke snan sok juke swaw b'a jach' oj ajyuk sak'anile ja ye'nle b'a lu'umi. Jaxa chante b'a mi oj makunuk kuj b'a jmajtani, a och jun snan sok jun swaw. 4B'a yojol juke k'ak'u, oj ka jak jun tsatsal ja', chab' tajb'e k'ak'u sok chab' tajb'e a'kwal (40) oj alb'uk oj ya' ja ja'i. B'a jach' oj ch'ay sna'jel spetsanil ja jas jk'u'lunej b'a lu'um iti, xchi ja Dyosi.
5Jaxa Noeji, jach'ni sk'u'lan spetsanil ja jastal alji yab' yuj ja Dyosi.
K'e ya' ja ja'i
6-13Yajni ek' ja juke k'ak'u, ti och jakuk ja ja'i, och el ja' b'a lu'um sok b'a satk'inali. Ja janek' alb'i ya'a ja ja'i, chab' tajb'e k'ak'u sok chab' tajb'e a'kwal. Ja k'ak'u ek' ja iti, ayxa chab' ixaw ts'ikwel yuj ja wake syen jab'il (600) ja Noeji. Ja k'ak'u och b'ut' ya'lel ja lu'umi, b'a oj sta' skoltajel ja Noe sok ja sche'umi, ochye b'a barco jach'ni ja oxe yuntikil sok ja yalib' jumasa. Mi kechanuka, cho och spetsanil tik'e chante swaw sok snan jach'ni ja yal chan jumasa wax jujpi b'a lek wax yi'aj b'a smajtan ja Dyosi, cho ochni ja chante jumasa b'a mi lek wax yi'aj ja Dyos b'a smajtani, och yal chan b'a wax jujpi, b'its'il chan. Spetsanil ja jas alji yab' yuj ja Dyos ja Noeji, ch'akni sk'u'uk spetsanila.
14-16B'a barco jawi, cha'tike ch'ak och k'otuk ja chante jumasa b'a spetsanil tik'e, alak'il chante, chante b'a k'ul, spetsanil tik'e yal chan b'a wax jujpi, cho jach'ni ja b'its'il chan jumasa, jun swaw sok jun snan. Spetsanil ch'ak ochuke b'a barco jach'ni jastal alji yab' yuj ja Dyos ja Noeji. Yajni ch'akta och spetsanile'i, ti'xa slutu ja Dyos ja slutalab'ili.
17-20Chab' tajb'e (40) k'ak'u och k'e'uk ja scha'anil ja ja'i. Ek' lek ja scha'anil ja ja' yuj ja cha'anil wits jumasa juke metro kan mukan ja wits jumasa. Ja barco mi k'ot tek'an wa'n k'e'el ja ja'i, cho jach'ni ja barco wa'n k'e'el. 21-24Ja janek' alb'i och ts'ujuk ja ja'i, jun syen chab' tajb'e sok lajune (150) k'ak'u yi'aj, jach' cham spetsanil ja kristyano jumasa, cho ch'akni cham spetsanil ja alak'il chante jumasa, ja chante b'a k'uli, yal chan b'a wax jujpi, b'its'il chan jumasa, sok spetsanil ja us jumasa. Spetsanil ja jas ay sak'anili, ch'akni chamuka. Kechan ye'n kan sak'an ja Noe sok spetsanil ja ma' tey sok b'a yoj barco.
Currently Selected:
Genesis 7: YABD
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México 2021
