Genesis 44

Ja b'is toj sakal tak'in sb'a Jose

1-2Tsa'an ja Jose ti yal yab' ja ya'tijum b'a snaji a b'i sb'ut' lek yi sok sat trigo ja janek' oj b'ob' ochuk ja b'a ye'tal yi'oje ja smoj alijel jumasa, ja b'a jujune ye'tal jaw yi'oje'i tix cho wa' och yi'e ti' ja sts'akol b'a stupuwe soki. Jaxa ye'tal sb'a ijts'inali, mi kechan ja oj wa och ja tak'ini, a cho ochuk ja sb'is toj sakal tak'ini.

Ja a'tijum jawi, jach'ni sk'u'lana, 3yajni el ja k'ak'u, ti yi'aj ja sburro'e ja sb'ankil jumasa ja Jose ti'xa wajye'a. 4Mito najatuk wajele ja yajni yal yab' ja ya'tijum ja Jose:

—Ka'ax, kax lajawe ja winike it wajye wa'nto, yajnix lajawe'i, ti'xa wala yabye'a: —¿Jasyuj ja mi jun sb'ej waxa wa'wex stup ja kajwal b'a? 5—Ja b'is iti, ja sb'a kajwali, ja b'a wax makuni yuj b'a wax yu'aj ya'ali, sok b'a wa sk'inta jasunk'a ti jakumi. Ja smeranili mi jun sb'ej ja jas a k'u'lanex yi'i, xchi ja ya'tijum ja Jose.

6Yajni lajwani ja a'tijum jawi, ti och yal spetsanil ja jas alji yab' oj yali. 7Jaxa ye'nle'i, ti yalawe'a:

—¿Jasyuj jach' waxa wala kab'tikon b'a? —Ja ke'ntikoni, mi oj jk'u'ltikon ja jastal jawi—. 8Ja we'n waxa na'a lek, ja tak'in jta'atikon b'a ye'tal ki'ojtikoni, jak ka'tikon kumxuk kana wi. ¿Me'y sb'ej lom oj kelk'atikon yi ja k'anal tak'in sok ja sakal tak'in sb'a wa wajwali? 9Ja b'is jawi, ta ay k'a lek ke'n ki'ojtikon junuk, a ch'ay sna'jel ja ma yi'oji, jaxa ke'ntikoni a'awotikon b'a yib k'ab'al.

10Ja a'tijum jawi, ti yala'a:

—Lek ay. A k'u'laxuk ja jastal waxa k'anawexi. Kechan ja' wax k'ana oj ka b'a yib k'ab' ja ma' yi'oj ja b'isi; jaxa tuki lomxani oj lokxuk ab'ala.

11Jaxa ye'nle'i, juts'in ya'we ko'uk ja yijkatse'i, stukuwe. 12Ja'yuj ja a'tijum jawi, chol sk'ela ja syetali, ti stuluyi sk'eljel b'a syetal yi'oj ja b'ankilali, ti ch'ak sk'eljel b'a syetal ja ijts'inali, —Jasa, ja b'is jawi, ti' tax b'a syetal yi'oj ja Benjamini— 13Yajni yilawe ja smoj alijel jumasa ja Jose, jel xiwye, sok jel cham sk'ujole; tsa'an ya'we skuch ja yijkats ja sburro'ei, cho kumxiye b'a Egipto.

14Yajni k'otye'i, ti'toni ay b'a snaj ja Jose. Ja Juda sok ja smoj alijel jumasa, ch'ak ko'uke mek'an b'a sti sat ja Jose, 15jaxa Jose ti yala:

—¿Jasyuj jach' a k'u'lanex ki b'a? ¿Mi' maxa na'awex yuj k'intanumon b'a?

16Ja Juda, ti sjak'a'a:

—¿Kajwal jasunk'a oj b'ob' kaltikon a wab' b'a? Mi oj b'ob' je' jb'ajtikon yuj mey jmultikon a mok. Ja Dyosi, sta'atani jmultikona, ja ya'n jpetsaniltikon wax ka a b'ajtikon b'a yib a k'ab' sok ja ma yi'oj ja b'isi.

17Ti jak'ji yi'e yuj ja Jose:

—Ja ke'n, mi oj b'ob' jk'u'luk ja jastal jawi. Kechan ye'n oj ki'kan b'a oj a'tijuk jmok ja ma yi'oj ja jb'isi. Jaxa tuk jumasa, oj b'ob' kumxuke lek ja b'a snaj ja state'i.

18Jaxa Juda ti och mojan sok ja Jose, ti yal yab'a:

—Kajwal, ja ke'n wax na'a yuj k'a we'n oj k'umuka, lajan sok ye'n wa'non sk'umajel ja mandaranumi. Ts'akataluka'a mok tajkan jmok, maklayon, kechan ay jas wax k'ana oj kala wab'i. 19We'n a job'oki'tikon ta sak'anto ja jtatikoni, ma' yuj cho ayto pilan kijts'intikon. 20Jaxa ke'ntikoni kalatikon a wab'i, ja jtatikoni ayxa lek sk'ujol ja ajyi ja chab' yuntikil sok ja sche'um Raqueli. June ja ye'nle'i, chami, kechan ja kan ja ma' untikto leki, ayxa lek sk'ujol ja jtatikon ja manxi ja chab' yal keremtik jawi. Ja'yuj ja jtatikoni, jel wa syajta. 21Cho we'n a k'ana oj ki'tikon jan a wi b'a oj ja na' sb'aj. 22Ja ke'ntikoni kaltikon a wab' yuj ja jtatikoni oj b'ob' cham yuj cham k'ujol ta waj k'aj a'jukan stuch'il yuj ja yal keremi. 23Jaxa we'n a wala kab'tikon, oj b'ob' jakotikon tuk majke ja ili, ta tik'a jmojtikon ja kijts'intikoni.

24—Yajni k'otikon b'a snaj ja jtatikoni, ch'ak kaltikon yab' spetsanil ja jas a wala kab'tikoni, 25Ja'yuj, ja yajni sjekawotikon ja jtatikon ja il b'a oj jak jmantikon trigo, 26ja ke'ntikoni kalatikon yab'i: —Oj wajkotikon kechani ta oj ja jek jmoktikon ja kijts'intikoni. Yuj k'a mi oj wajmoktikoni, ja mandaranum b'a Egipto, mi' oj yi'otikon lek—.

27—Ja jtatikoni, ti yala kab'tikona: —Ja we'nlexi, waxa na'awex lek kechan chab' yal kerem ajyi sok ja jche'um Raqueli. 28Ja juni waji, mi t'un wax kila man ya'ni. Lom wax ek' jk'ujol, b'ob'ta k'uxji yuj jun tan chan. 29Yuj k'a oj cho a jap'ex ki ja jun kunin iti, ay k'a jas mi lek waj ek' yuji, toj cham k'ujolxa oj ekuj ja janek'to ay jsak'anili.

30-31—Jastal ma oj ja wil ja we'n, ta mik'a oj kumxuk jmok ja kijts'in ja b'a snaj ja jtati, b'ob'ta ojni chamuka. Yujni jel wa syajta ja yal skerem ita. Ja'yuj, ta waj k'a cham yuj cham k'ujol ja jtatikoni, ke'nani oj a'ji jmuluktikona. 32Ke'n kal yab' ja jtat mix cham sk'ujol ke'n oj jtalna yi' ja yal skeremi. Cho kal yab'i: —Kala tat, ta yuj k'a mi ka kumxuk jana wi wa yal keremi, a'nima tix waj kuchkan ke'n spetsanil k'ak'u ja mulal iti—.

33—Ts'akataluka'a, i'ajon kan ke'n b'a oj a'tijukon a mok, jaxa yal kerem iti, a kumxuk sok ja jmoj alijel jumasa. Ke'n oj kan kon b'a slok'ol. 34¿Jastal oj b'ob' k'otkon ja b'a snaj ja jtat ta mik'a oj kumxuk jmok ja kijts'ini? —Miyuk, mix k'ana oj kil jastal oj yi' wokol ja jtati—.

Currently Selected:

Genesis 44: YABD

Highlight

Copy