Genesis 40

Swayich chab' winik

1-2Tsa'an, ja ma' niwan ya'tel yuj ja ak'a ek' sb'is jumasa sok ja ma' niwan ya'tel yuj ja ma'tik wax ya ek' ja wa'eli, ya'we tajkuk ja mandaranum b'a Egipto, jaxa mandaranumi, jel a'ji tajkuk yuj ja chab' koltanum iti. 3Ja'yuj ya' och ma' oj sk'el lek ja b'a lutane sok ja Jose. 4Jaxa ma' wa stalnanum jawi, ya'kan yi b'a sk'ab' ja Jose b'a ye'n oj stalna.

Ek' ja k'ak'u, 5Jun a'kwal ja chawane winik jawi, ajyi jujune swayiche, tuktukil ja jas wa sk'ana yali'. 6Ja pilan k'ak'u yajni k'ot iljuke yuj ja Jose jel cham k'ujol aye, 7Ti job'ji yi'e'a:

—¿Jasyuj ja jel cham k'ujol ayex b'a?

8Ti yalawe'a:

—B'aya, yuj ajyi jujune jwayichtikon mi ma' wax b'ob' yal kab'tikon ja sb'ej.

Ti alji yabye yuj ja Jose:

—Oj kiltik a wile, alawik kab' wa wayichexi, ye'n ja Dyos oj yal ja sb'ej.

9Ja ma' b'ajtan yala ja swayich ja ma wax ya ek' ja sbisi. Ti yala'a:

—B'a jwayichi, wax kila jun ib'e ts'usub', 10Ay oxe sk'ab'. Juts'in xolini ja sk'ab' jumasa jawi, cho juts'in nichini, ja sati juts'in ch'ak ta'juk. 11Jaxa ke'n ti ki'oj b'a jk'ab' ja b'is wax makuni yuj ja mandaranumi, ti wax ki'aj ja sat ts'usub'i wax pits'a ja ya'lel b'a yojol ja b'isi, ti'xta'a wax waj ka'yi ja mandaranumi.

12Ti alji yab' yuj ja Jose:

—Ja oxe sk'ab' ts'usub' a wila, wa sk'ana yale, oxe k'ak'u. 13B'a yoxil k'ak'u oj yala yab' ja mandaranumi, yuj sch'ayata a wi wa muli, oj cho ya'wi ja wa wa'tel jastalni wa'na sk'u'lajel ajyi, cho we'nani jel niwan wa wa'tel yuj ja ma'tik wax ya' ek' ja b'is jumasa. 14Oj kala wab'i, moka ch'ay'on a k'ujol ja yajni ti'xa aya b'a wa wa'teli, ala yab' ja mandaranum a ya elkon b'a lutanon ja ke'n. 15Ja ke'n hebreo'on, t'enub'al yi'ajone jana ili, a'nima mi jas jk'u'lunej mey sb'ej ja wa slutuwone'i.

16Jaxa ma' niwak ya'tel yuj ja ak'a ek' wa'eli, yajni yila jel lek alji yab' ja sb'ej ja swayich yuj ja Jose'i ja ak'a ek' ya'lel ts'usub' wax yu'aj ja mandaranumi, ti yala ja ye'n:

—Cho Jach ni ja ke'n jwaychin. Wax na'a ti b'i kajan oxe mo'och pan b'a j'olomi. 17Ja jun mo'och b'a satilajel ayi, ti naka ay ja jas lek wax yab' ja mandaranumi; jasa, jak ja yal chan jumasa ch'ak slo'e ele'.

18Ti yala ja Jose:

—Ja oxe mo'ochi, wa sk'ana yale oxe k'ak'u. 19Ja mandaranumi, b'a yoxil k'ak'u oj yal oj a'ji k'e'an lokan te'. Ti oj sch'ak e' tiw wa b'ak'tel ja usej jumasa.

20Merani'a b'a yoxil k'ak'u, ts'ikwi sjab'il ja mandaranumi, sk'u'lan jun niwan k'in, sloko spetsanil ja ya'tijum jumasa, b'a sti sat spetsanil ja sloki, sjeka ma oj waj ya eluk ja ma' niwan ya'tel yuj ja ak'a ek' b'is jumasa cho jach'ni ja ma' niwan ya'tel yuj ja ak'a ek' wa'eli. 21Ja ma' niwan ya'tel yuj ja ak'a ek' ya'lel ts'usub' wax yu'aj ja mandaranumi, a'ji kumxuk yi ja ya'tel yi'oj b'ajtani, 22Jaxa ma' niwan ya'tel yuj ja ak'a ek' swa'el ja mandaranumi. A'ji k'e lokan b'a jun te', jach' k'ot smeranil ja jas yala ja Jose.

23Jasa, ja winik ma' niwan ya'tel yuj ja ak'a ek' b'is jumasa, sch'aya sk'ujol ja pabor k'anji yi yuj ja Jose.

Currently Selected:

Genesis 40: YABD

Highlight

Copy