Genesis 32

Ja Jacob sok ja Esau

1Jaxa Jacobi, cho snochoyi ja sb'eji, ja b'a b'ej wajumi jak ta'juk yuj chab' oxe yanjel ja Dyosi. 2Yajni yila ja Jacobi, ti yala'a: —Cho jach'ni ja ili, ti wax cho jijli ja Dyosi— Ja'yuj ya sb'i'iluk ja tiwi, —Chab' jijlub'—.

3-4Tsa'an yuj ja jawi, ja Jacobi, sjeka chab' oxe sjekab'anum ma' oj waj sk'umuk ja smoj alijel Esau it ti kulan b'a slujmal Edomi. Ja jekab'anum jumasa, alub'al yabye jasunk'a oj yalwe yab' ja Esau:

—Ja wa moj alijel Jacobi, wax ya'a sb'aj b'a we'n oj ja wal jasunk'a oj sk'u'luki, sok wax cho ya'a na' spetsanil ja k'ak'u jumasa iti, ti' ay sok ja statjun Labani. 5Ja ya'n ay yi'oj jitsan wakax, burro, chej, chivo, sok mi kechanuk ja jawi, ay jitsan ya'tijum jumasa, ya'tijum ixuk. Wax cho sk'ana a wi jun pabor b'a oj ja wi' lek ja we'n.

6Yajni kumxiye ja jekab'anum jumasa, ti yalawe yab' ja Jacobi, —Wajtikon, jk'uman jb'ajtikon sok ja wa moj alijel Esau, ye'n oj jak sta'a sok chane syen winik (400) oj jak mojtajuk yuj.

7Jaxa Jacobi, jel och sxiwel, ja'yuj spila chab' k'ole ja swiniki, sok ja swakax jumasa, 8—yuj jach' yala jastal iti, yuj k'a ti waj snol k'ab'uk jun k'ole ja Esauji, oj b'ob' spak ajnel ja pilan k'ole'i—. 9Sok sk'umani ja Dyos ja Jacobi:

—Dyos kuj, we'n Dyosa yuj ja jtat awel Abraham sok ja tat Isaaki. We'n a wala kab' oj kumxukon sok ja jmoj alijel jumasa b'a jlujmali, a wala k'ab' oj ja koltayon. 10Spetsanil k'ak'u ayni lek syajal ak'ujol jmoka, a'nima mi jach' sb'ej oj ja k'u'lki, yuj ja ke'n sb'ej oj ka'teltaya. Ja k'ak'u ek' jk'uts ja niwan ja' Jordani, kechan xe'n te' ki'oj b'a oj kolta jb'aj sok jaxa ya'n ay ki'oj winik, wakax, b'a oj pil chab' k'ole. 11-12We'n a wal kab' jel lek oj ekuj, jaxa kintil jumasa, a wala jach' oj pojxuk jastal ja jijkab' b'a sti' ja niwan ja'i, mi ma' oj b'ob' yajtab'en. —Ja ya'n wax k'anawi jun pabor, —koltayon ja b'a sk'ab ja jmoj alijel Esauji—. Jel wa'non xiwel lek jakumuk b'a oj ch'ak smil'otikon jpetsaniltikon.

13Ja a'kwal jaw ja Jacobi ti kan way b'a lu'um tiwi. Jaxa chante jumasa yi'oji, spila ja janek' oj sk'eb' yi ja smoj alijeli, 14chab' syen (200) nan chiva, sok jun tajb'e (20) swaw, chab' syen (200) nan chej, sok jun tajb'e (20) swaw, 15jun tajb'e sok lajune (30) nan cameyo sok yuntikil, chab' tajb'e (40) snan wakax, sok lajune (10) swaw, jun tajb'e (20) snan burra, sok lajune (10) swaw. 16Jach' pilan ya'yi b'a sk'ab' ja ya'tijum jumasa, ti yala yabye a'xa ek'uke t'un b'ajtana, kechan, najtik a yil sb'aje. 17Ti yala yab' ja ma' yi'aj ja b'ajtan nole'i:

—Yajnixa ta'a b'aj sok ja Esau jmoj alijeli, oj sjob' a wi mach'aya ja we'n, b'a wajuma'a, ma' sb'aj spetsanil ja chante jumasa iti, 18ala yab'i, jb'aj ke'na, yuj ye'n wax k'ana oj k'eb' yi. Cho ala yab' ti jakumon tsa'an b'a wa patik.

19Cho jach'ni yala yab' ja b'a schab'il nole'i, b'a yoxili, cho jach'ni ja ma' ti nochane jan b'a spatik ja chante jumasa. Spetsanile st'ena, 20b'a jach' oj yal e' yuj ja ti jakum nochan jmoktikon ja ye'n. Ja Jacobi jach' wa'n yaljel jastal iti: —Sok spetsanil ja majtanal jumasa iti, oj ka lamxuk yi ja yaltsil ja Esauji, ja'yuj, ja yajnix yilawoni, ojni yi'on leka.

21Yajni ch'akta sjek ja majtanal jumasa it ja Jacobi, jaxa ye'n ti'to kan jun a'kwal ja b'a wax jijli.

Tiro'ani ja Jacobi

22-23Ja a'kwal jaw ja Jacobi, schapa spetsanil ja jas b'aji, ja sche'um jumasa sok ja yuntikili, lajan ek' sk'uts e ja niwan ja' sb'i'il Jaboki. 24Tsa'an stuch'ilxa kumxi, ti sta'a sb'aj sok jun winik mi sna'a sb'aj, och syam sb'aje man el ja k'ak'u. 25Yajni yila ja winik it mix na'xi sb'a mi jas wax b'ob' yuj sok ja Jacobi, man sopoyi ja sku'i. 26Ja'yuj ti alji yab' yuj ja winik jawi:

—Sijpanonxa. Ojxa sakb'uk—

Jaxa Jacobi, ti yala'a:

—Yuj k'a mixa tojb'eson, mi oj sijpaya.

27Jaxa winik jawi, ti sjob'o yi'a:

—¿Jas a b'i'il b'a?

Yajni yala ja sb'i'il ja Jacobi, 28jaxa winik jawi, ti yala'a:

—Ja ya'n mixa Jacobuk oj ja b'i'iluk. Man ya'n Israel oj ja b'i'iluk, yuj ja tiro'aniyata sok ja Dyosi, cho jach'ni sok ja winik jumasa, we'nani elya slekila.

29Ja'yuj ja Jacobi, ti cho sjob'o ja ye'n:

—Jaxa ya'n ala kab' jas a b'i'il ja we'n.

Ja winik jawi, ti yala'a:

—Sb'ej yuj a na'a ta jb'aj—.

Ti'xa ya tojb'uk yi ja skub' ja Jacobi, 30ja'yuj ja Jacobi, ya sb'i'iluk Penuel ja tiwi, ti yala'a: —Satilajel ab'al kila jb'aj sok ja Dyosi, cho sak'anonto ni'a—.

31Yajni el ja k'ak'u, ti el ja Jacob b'a penueli, renkoni waja. 32Ja'yuj man ya'n ja israelenio mi sk'uxuwe ja skub' ja chante jumasa yuj ja ja' yajb'esjiyi ja Jacob ja tiwi.

Currently Selected:

Genesis 32: YABD

Highlight

Copy